Matalikilo 43
43
Bapati ba Josefa mbubakabweeda ku Ijipiti a Benjamini
1Lino nzala mucisi ca Kenani yakacili kulunzya kasuko. 2Nkabela mukwasyi wa Jakobo nuwakamana kulya cilyo coonse cakaletedwe kuzwa ku Ijipiti, Jakobo wakaambila bana bakwe kuti, “Amubweede alimwi mukatuulile cimbi cilyo nociceya.”
3Mpoonya Juda wakati kuli wisi, “Muntu uulya wakatucenjezya kapati kuti takonzyi kututambula ccita tuunke amusyoonto wesu. 4Naa ulazumina kuti musyoonto wesu tuunke aawe, inga twainka. 5Pele otamuzuminzya aswebo tatukonzyi kuunka pe, nkaambo muntu ooyo wakaambisya kapati kuti, ‘Nsiyandi kuzoomubona ccita mukaboole amusyoonto wanu.’”
6Amvwe boobo Isilayeli wakati, “Ino nkaambo nzi ncimwandikatazya boobu, ncimwakaambila muntu ooyo kuti mulijisi aumwi musyoonto wanu?”
7Balo bakaingula kuti, “Muntu ooyo wakatubuzisya amakani aamukwasyi wesu. Wakatubuzya kuti, ‘Sena uso ucipona? Sena mulijisi musyoonto wanu.’ Kayi twakeelede kwiingula mibuzyo eeyo. Kunyina wakazi kuti ulatwaambila kuti tukamweetelezye awalo musyoonto wesu.”
8Juda wakaamba kuli wisi Isilayeli wakati, “Ndipa mulombe ooyo mebo kuti tuunke awalo. Ndendilyo toonse, yebo aswebo antoomwe abana besu notutakwe kufwa nzala. 9Mebo ndilaba mubusena bwamulombe ooyu. Kuti naa kukabe cicitika kulinguwe uzoopa ndime mulandu. Naa intakamuboozyi kulinduwe kali kabotu, mulandu walufu lwakwe uzooba alindime mubuumi bwangu boonse. 10Kuti nitwatakalindila nitwalipilukide kale ziindi zili zyobilo kuzwa nkuko.”
11Lino Isilayeli wisi wakabaambila kuti, “Kuti naa kacili boobo, amucite boobu. Amutolelezye amicelo mibotu yanyika iino mumasaka aanu, zikabe zipego kumuntu ooyo. Mutole atufuta twamabbona, atuci tuniini, amafuta aanunkilila, atunyungu twamisyobo-misyobo, amisamu ya alumondi. 12Alimwi mutole amali aavula ziindi zyobilo kwiinda ngumwakatolede kusaanguna, mweelede kwaabweedezya mali aalya aakaboozyegwa mumasaka aanu. Ambweni kwakali kulubizya buyo. 13Amutolelezye musyoonto wanu, mulibambile kweenda kuya kumuntu ooyo. 14Lino Leza Singuzuzyoonse acite kuti muntu ooyo akamufwide luzyalo kutegwa akaboozye munyoko ooyo uusyeede antoomwe a Benjamini kuno. Ino inga ndacita buti, naa ndasweekelwa bana bangu, ati ndasweekelwa kapati.”
15Aboobo baalumi aabo bakalibambila batola zipego, alimwi bakabweza amali aavula ziindi zyobilo, alimwi bakatolelezya a Benjamini, bainka ku Ijipiti, baakusika kuli Josefa. 16Nkabela Josefa naakabona kuti a Benjamini uli aambabo, wakaambila mubelesi uubamba ŋanda yakwe kuti, “Tola bantu aaba kuŋanda, ukabajaile munyama akubajikila kabotu, nkaambo baalumi aaba beelede kulida kwangu cisusulo.” 17Mubelesi ooyo wakacita mbuli Josefa mbwaakamulailila, wakatola baalumi aabo kuŋanda ya Josefa.
18Lino baalumi aabo bakayoowa nibakatolwa kuŋanda, bakayeeya kuti, “Ncitwaletelwa kuno nkaambo kamali aalya aakabweedezegwa mumasaka mulweendo lwakusaanguna. Uyanda kutupa mulandu akutwaanga eelyo tulaba bazike, balatola ambongolo zyesu.” 19Aboobo bakaboola kumubelesi uubamba ŋanda ya Josefa naakali amulyango bati kuli nguwe, 20“O mwami, twakalizide kale kuno lutaanzi kuzooula cilyo. 21Pele nitwakaakusika mpotwakaakulala, twakajalula masaka, nkabela umwi aumwi wesu wakaajana mali aakwe musaka lyakwe, oonse mali eesu mbwaabede kaazulide mumweelwe wawo. Lino twaleta mali aayo, ngaaya mpaali. 22Alimwi twaleta aambi mali kuzooula zilyo. Tatuzi naa nguni wakaabikka mali mumasaka eesu.” 23Mubelesi ooyo wakati, “Mutapengi pe, alimwi mutayoowi. Ngu Leza wauso wakamubikkila mali mumasaka. Mebo ndakaatambula mali eenu ngumwakabbadela kusaanguna.” Mpoonya wakaleta Simiyoni kuli mbabo.
24Lino mubelesi ooyo wakabanjizya baalumi aabo muŋanda ya Josefa, wakabapa maanzi kuti basambe kumaulu, alimwi wakasanina mbongolo zyabo. 25Abalo bakabamba zipego zyabo kuti bazoope Josefa asika ciindi casikati, nkaambo bakabona kuti balalida nkuko. 26Josefa naakaboola kuŋanda yakwe, bakaleta zipego zyabo kuli nguwe, bafugama akukotama kumbele lyakwe. 27Mpawo wakababuzya mbobapona, alimwi wakabuzya kuti, “Sena uso uli kabotu, munene ooyo ngumwakandaambila? Sena ucipona?” 28Bakaamba kuti, “Iiyi, muzike wako taata uli kabotu, ucipona.” Eelyo bakamukotamina alimwi.
29Lino Josefa naakabona Benjamini ooyo ngubakazyalwa limwi, wakaamba kuti, “Tee ooyu ngomusyoonto wanu, ooyo ngomwakandaambila? Leza akuleleke mwanaangu.” 30Eelyo Josefa wakanyamuka cakufwambaana, nkaambo moyo wakwe wakeetela akaambo kamusyoonto wakwe. Wakatilile, nkaako wakaya muŋanda yakwe yamukati waakulila. 31Naakamana kulila, wakasamba kumeso, waliyumya-yumya akujata moyo wakazwa muŋanda eeyo, eelyo wakalailila kuti zilyo ziletwe. 32Josefa wakapegwa cilyo cakwe alikke, banabokwabo bakali kulida atebule limbi. Baijipiti bakali kulya aawe bakabikkilwa alubazu balikke, nkaambo bayeeya kuti nkulisofwaazya kulya a Bahibulu. 33Banabokwabo bakakkede atebule kumbele lya Josefa, kwiindila mubupati bwabo, kuzwa kumupati kusikila kumusyoonto. Lino nibakabona boobo, bakalangana mukugambwa. 34Mpoonya zilyo zyakapegwa kuzwida kutebule lya Josefa, pele walo Benjamini wakapegwa cilyo civula ziindi zyosanwe kwiinda bamwi. Aboobo bakalya akunywa cakusekelela a Josefa.
Currently Selected:
Matalikilo 43: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
