Matalikilo 44

Mbubakajana nkomeki iisweekede

1Lino Josefa wakalailila mubelesi uubamba ŋanda yakwe kuti, “Zuzya masaka aabaalumi aaba acilyo cinji mbuli mbobakonzya kuyumuna, alimwi ubikke mali aaumwi aumwi wabo musaka lyakwe. 2Nkabela ubikkilizye ankomeki yangu yansiliva musaka lyamusyoonto wabo, ubikkilizye amali aakwe ngaatuuzye cilyo.” Eelyo mubelesi ooyo wakacita mbuli mbwaakaambilwa. 3Lino nibwakaca cifumo-fumo aabo baalumi bakabweza beenda ambongolo zyabo. 4Pele nibakeenda kasinzo kaniini buyo kuzwa mumunzi, Josefa wakaambila mubelesi uubamba ŋanda yakwe kuti, “Libambile ubaccilile baalumi baya. Nkabela waakubeenzya ukabaambile kuti, ‘Nkaambo nzi nywebo nimwaboozya bubi kububotu? 5Nkaambo nzi ncimwabba nkomeki yansiliva? Ede njenkomeki mwanywida simalelo wangu, alimwi njiyonya njasondya. Mwabisya kapati mukucita boobo.’”

6Lino mubelesi ooyo naakaakubeenzya, wakaakubaambila ngoonya majwi aakaamba simalelo wakwe. 7Balo bakamwiingula kuti, “Ani ncomwaamba ninzi mwami? Swebo inga tatukonzyi akuyeeya kucita cintu cili boobo naaceya pe. 8Tee kayi wakabona kuti twakaaletelezya mali kuzwa ku Kenani aayo ngotwakajana mumasaka eesu. Ino inga twabba buti nsiliva niiba ngolida kuzwa kuli simalelo wako? 9O mwami kuti umwi wesu ajanwe ankomeki eeyo, ajaigwe buyo, alimwi swe toonse tulaba bazike bako.”

10Lino mubelesi ooyo wakaamba kuti, “Mbubo, ooyo buyo uutijanwe ankomeki nguutibe muzike wangu, nobamwi nyoonse mulainka.” 11Lino boonse bakaselusya masaka aabo cakufwambaana akwaabikka ansi, nkabela umwi aumwi wakajalula saka lyakwe. 12Eelyo mubelesi wa Josefa wakalangaula muzintu zyabo zyoonse kabotu-kabotu, wakatalikila kumupati akuyoomanizya amusyoonto. Nkomeki yakajanwa musaka lya Benjamini. 13Mpoonya bakazapaula zisani zyabo mukuusa, bakabikka mikuli yabo ambongolo zyabo, babweeda mumunzi.

14Lino Juda abanabokwabo nibakaakusika kuŋanda ya Josefa bakajana Josefa mpacili. Bakamufugamina. 15Josefa wakababuzya kuti, “Ninzi ncimwacita? Sena tamuzi kuti muntu uuli mbuli ndime ulakonzya kusonda akuziba zintu zicili kumbele?” 16Mpoonya Juda wakaingula kuti, “Ino inga twaamba nzi kulinduwe, o mwami, inga twakazya buti, alimwi ino inga twalisalazya buti lwesu? Leza wayubununa mulandu wesu, o mwami. Iswe toonse twaba bazike bako, kutaamba buyo yooyu wajaninwa nkomeki alikke pe.” 17Pele Josefa wakati, “Peepe, takuli boobo! Nsikonzyi kucita cintu cili boobo pe. Walo ooyo alikke wajaninwa nkomeki nguutibe muzike wangu. Nywebo nyoonse nobamwi kamuya kuli uso.”

Juda mbwaakakombelezezya Benjamini

18Mpoonya Juda wakaya kuli Josefa akuti, “Akaka mwami wangu, undizumizye kuti ndaambaule ayebo cakwaangunuka. Utandinyemeni pe, o mwami, nkaambo yebo uli mbuli Falo lwakwe mwini. 19O mwami, yebo wakatubuzya kuti, ‘Sena mulijisi uso naba mwanookwanu umwi?’ 20Eelyo swebo twakaingula kuti, ‘Tulijisi taata, pele mmudaala, alimwi tulijisi amusyoonto wesu, wakazyalilwa taata kali mudaala kale. Alimwi twakati mupati wakwe mulombe ooyo, ngubazyalwa da lyomwe, wakafwa, lino walo alikke nguuliko mwida lyabanyina, alimwi wisi ulamuyandisya.’ 21Eelyo, o mwami, yebo wakatwaambila kuti, ‘Amukamweete kuno, nzoomubone.’ 22Nkaako swebo o mwami, twakaingula kuti, ‘Mulombe ooyo takonzyi kumusiya wisi, nkaambo kuti naa wamusiya, inga wisi ulaba nafwa.’ 23Mpoonya yebo o mwami, wakati ‘Nsikooyoomutambula ccita musyoonto wanu ooyo akaboole anywebo.’”

24Lino nitwakabweeda kuli taata, muzike wako, twakaakumwaambila makani ngookatwaambila. 25Mpoonya walo wakati, “Amubweede, mukatuulile cilyo nociceya. 26Pele swebo twakaingula kuti, ‘Tatukonzyi kuunka pe, nkaambo mwaalumi ooyo takatutambuli ccita tuunke amusyoonto wesu. Tatukonzyi kuunka kuti naa musyoonto wesu katali andiswe.’ 27Taata wakaamba kuti, ‘Mulizi kuti mukaintu wangu wakazyala buyo bana bobilo balombe. 28Nkabela umwi wabo wakandisiya kale. Ndisyoma kuti wakazapaulwa abanyama bamusokwe, nkaambo kuzwida ciindi eeco nsinakumubona pe. 29Lino kuti mwandinyanga awalo ooyu mwamutola, kwamana waakujaigwa, mulacita kuti nkafwe mubuusu ndemudaala.’

30“Nkaako lino, o mwami, kuti naa ndabweeda buyo kuli taata mulombe katawo, mbwatikabone buyo kuti mulombe tali ambebo, uyoofwa mpoonya. Nkaambo mpaali moyo wakwe alinguwe. 31Nkabela swebo o mwami, tulaba ndiswe twaletela taata mause mapati ayoocita kuti afwe mpoonya. 32Acimwi cintu alimwi o mwami, ncakuti mebo ndakakonkezya buumi bwangu kuli taata akaambo kamulombe ooyu, ndakamwaambila kuti naa nditakamuboozyi kulinduwe, mebo ndime eentikapegwe mulandu ooyo mubuumi bwangu boonse. 33Nkaako lino, o mwami, mebo ndilakkala kuno, ndibe ndime muzike wako mubusena bwamulombe, pele walo umuleke abweede abanabokwabo. 34Ani inga ndabweeda buti kuli taata kuti mulombe katali ambebo? Peepe, ndayoowa kubona malweza aanga alacitika kuli Taata!”

Currently Selected:

Matalikilo 44: Tonga96

Highlight

Copy