Bapaizi 21
21
Busalali bwabapaizi
1Lino Mwami Leza wakaambila Mozesi kuti aambile bana ba Aloni bapaizi kuti, “Taakwe mupaizi weelede kulisofwaazya akaambo kaziyanza zyamumadilwe zicitwa wafwa waluzubo, 2ccita buyo waciinga cakwe mbuli banyina, wisi, mwana, mwanookwabo, 3naa mucizi wakwe uutakwetwe ngwalela. 4Pele teelede kulisofwaazya ciindi kumakwaakwe kwafwa muntu.
5“Taakwe mupaizi weelede kulinyoola naa kugela cilezu, nikuba kulinengaula amubili, kutondezya kuti ngusidilwe. 6Uleelede kusalala atasampauli zina lyangu pe. Nkaambo nguupa zipaizyo zyazyakulya kulindime, nkaako uleelede kusalala. 7Mupaizi teelede kukwata mukaintu wakali muvuule naa wakalekwa, nkaambo mupaizi uleelede kusalala ku Mwami Leza. 8Bantu baleelede kuziba kuti mupaizi muntu uusalala, nkaambo nguundipa zipaizyo zyazyakulya. Ndime Leza, ndasalala, alimwi ndasalazya abantu bangu. 9Kuti naa mwana wamupaizi waba muvuule, mwana ooyo wasampaula wisi, uleelede kutentwa kuti afwe.
10“Mupaizi mupati wakananikwa akusalazigwa kuti asame zisani zyabupaizi teelede kutalikamuna, nikuba kuzapaula zisani zyakwe kuti atondezye kuti ngusidilwe. 11-12Nkaambo wakasalazigwa akunanikilwa kuti kandimanina milimo, teelede kulisofwaazya nikuba kusofwaazya ŋanda yangu akaambo kakuti waisiya akuyoonjila muli uufwide, naba wisi naa banyina, teelede kunjila pe. Ndime Mwami Leza. 13Uyookwata musimbi ncobeni uutanaziba musankwa. 14Atakwati mukamufu, naa mukaintu wakalekwa naa muvuule. Uleelede kukwata buyo musimbi utanaziba musankwa wamusyobo wakwe, 15nkaambo naa wacita cikwate-kwate inga bana bakwe banjila nzila iitasalali. Ndime Mwami Leza ndakamusala kuti abe mupaizi uusalala.”
16Lino Mwami Leza wakaambila Mozesi 17kuti aambile Aloni kuti, “Taakwe waciinga cako mulema weelede kupa cipaizyo cacakulya kulindime alili pe. 18Taakwe muntu mulema weelede kupaizya, twaambe mbuli moofu, uulemene myeendo naa cizo cimwi, 19ambweni uupuutide kuboko nikuba kuulu 20naba uugogomene, naba mufwiifwi kapati, naa sicimbolyo, naa uuciswa cinsenda, naa uutazyali. 21Taakwe waciinga ca Aloni mulema weelede kundipa cipaizyo cacakulya pe. 22Pele muntu ooyo ulakonzya kulya capaizigwa kulindime, cisalala acisalalisya. 23Pele teelede kusika kucisitilizyo cisalala nikuba kuswena kucipaililo, nkaambo mmulema. Teelede kusofwaazya zipaizyo, nkaambo mebo ndime Mwami Leza uuzisalazya.”
24Aaya ngamakani ngaakaambila Mozesi kuti aambile Aloni abana bakwe antoomwe a Baisilayeli boonse.
Currently Selected:
Bapaizi 21: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.