Bapaizi 8
8
Kunanikwa kwa Aloni abana bakwe
(Kulonga 29.1-37)
1Lino Mwami Leza wakaambila Mozesi kuti, 2“Tola Aloni abana bakwe kumulyango watente lyakuswaanganina, alimwi uletelezye azisani zyabupaizi, amafuta aakunana, akapoho kacipaizyo cakugwisya zinyonyoono, abagutu bobilo acisuwo cazinkwa zitakwe mimena. 3Wamana ukabunganye bantu boonse kubusena oobo.”
4Lino Mozesi wakacita mbubonya mbuli mbwaakalaililwa a Mwami Leza, nkabela bantu nibakabungana, 5eelyo wakabaambila kuti, “Ndiyanda kucita eeco ncindalaililwa a Mwami Leza.” 6Eelyo Mozesi wakaleta Aloni abana bakwe kumbele, akubasanzya amaanzi. 7Lino wakamusamika cisani akumwaanga lutambo mucibuno. Amane wamusamika jansi akabaki kabupaizi akumwaanga alutambo lwako loosedwe kabotu. 8Alimwi wakamubikka kabaki kaacamba, mukati kako wakabikka Ulimu a Tumimu. 9Mpoonya wakamusamika cingundu kumutwe, alincico wakabikka mpande yangolida yakasalazigwa mbubonya mbuli Mwami Leza mbwaakamulailila.
10Lino Mozesi wakabweza mafuta akunanika tente azyoonse zyakali mukati. Munzila eeyi wakazisalazya. 11Wakabweza mafuta amwi akwaasansaila ziindi zili ciloba acipaililo azibelesyo zyaco amutiba atako lyawo kutegwa zisalale ku Mwami Leza. 12Kumane wakananika Aloni kumutwe mukumusalazya. 13Naakamana kucita oobo, Mozesi wakaleta bana ba Aloni kumbele. Wakabasamika zisani antambo muzibuno atungundu kumitwe, mbubonya mbwaakalaililwa a Mwami Leza.
14Mpoonya Mozesi wakaleta kapoho kacipaizyo cakugwisya zinyonyoono, eelyo Aloni abana bakwe bakabikka maanza aabo amutwe wakapoho. 15Kumane Mozesi wakakajaya, wakagwisya bulowa, nkabela amunwe wakwe wakabuzila kumeja aacipaililo kutegwa cisalale. Lino wakatila bulowa bwakasyaala kutako lyacipaililo akucisalazya. 16Nkabela Mozesi wakagwisya mafuta aazyamukati, amafuta aalaamuni, ansa amafuta aazyo, akwaatenta oonse acipaililo. 17Mpawo zyakasyaala kubikkilizya acikutu abufumba wakazitenta kunze lyazivuka mbubonya mbuli Mwami Leza mbwaakalailila.
18Lino amane Mozesi wakaleta mugutu wacipaizyo cakutenta, eelyo Aloni abana bakwe bakabikka maanza amutwe wawo. 19Mpawo Mozesi wakamujaya akusansaila bulowa kumabazu one oonse aacipaililo. 20Ooyo mugutu wakamutendaula, amane wakatenta mutwe, mafuta azizo nzyaakatendaula. 21Amane wakasanzya amaanzi zyamukati amaulu amusule, nkokutenta zyoonse zyakasyaala, mbubuli Mwami Leza mbwaakalailila. Eeci ncipaizyo cakutenta cabweema bubotelezya ku Mwami Leza.
22Lino Mozesi wakaleta mugutu wabili wakali wakunanikwa kwa bapaizi, eelyo Aloni abana bakwe bakabikka maanza aabo amutwe wawo. 23Mpoonya Mozesi wakamujaya, akugwisya bulowa bumwi, walamba mpela yakutwi kwa Aloni kululyo, kucala calulyo, akucala cacituta calulyo. 24Naakamana kucita oobo wakaleta bana ba Aloni kumbele akubalamba bulowa mbubonya mbuli mbwaakacita wisi. Eelyo Mozesi wakasansaila bulowa kumabazu one oonse aacipaililo. 25Wakabweza mafuta, amafuta aakumucila, amafuta aazyamukati, amafuta oonse aalaamuni, ansa amafuta aazyo, acibelo calulyo. 26Mpawo wakabweza cinkwa comwe kuzwa mucisuwo cacinkwa citakwe mimena cakapegwa ku Mwami Leza, acimwi cinkwa cakapangwa amafuta, akankwa kapapali komwe, wakazibikka amafuta acibelo calulyo. 27Nkabela zyoonse eezi wakazipa kuli Aloni abana bakwe, balo bakazizumbaanya kuli Leza kuti zibe zipego zyeelede. 28Mpoonya Mozesi wakazitola kuzwa kulimbabo, wazitenta acipaililo atala lyazipaizyo zitentwa, kutondezya kunanikwa kwabo. Eeci ncipaizyo cabweema bubotelezya ku Mwami Leza. 29Amane Mozesi wakabweza kaango, wakakazumbaanya ku Mwami Leza kuti cibe cipaizyo cilibedelede, cakali cipaanzi ca Mozesi camugutu wakunanikwa. Mbombuboobo Mozesi mbwaakacita zyoonse nzyaakalaililwa a Mwami Leza.
30Lino Mozesi wakabweza mafuta aakunana, abulowa bumwi bwakali acipaililo, wakabusansaila ali Aloni abana bakwe aazisani zyabo. Munzila eeyi, wakabapa antoomwe azisani zyabo ku Mwami Leza.
31Mozesi wakaambila Aloni abana bakwe, wakati, “Amutole nyama kumulyango watente lyakuswaanganina amukaijike, akwiilya ooko acinkwa cili mucisuwo cacipego cakunanikwa, mbuli Leza mbwaakandilailila kuti mucite. 32Amutente nyama yoonse acinkwa citisyaale. 33Mutakazwi kumulyango kwamazuba aali ciloba, mane ciyanza cakunanikwa kwanu cikainde. 34Mwami Leza watulailila ncitwacita boobu kuti zinyonyoono zyanu zigwisigwe. 35Nkaako muleelede kukkala kumulyango watente lyakuswaanganina sikati amasiku kwamazuba aali ciloba, kamucita eeco Mwami Leza ncaakamulailila. Kuti naa tamuciti boobo, mulafwa. Mbombuboobo mbwaandilailila.” 36Lino Aloni abana bakwe bakacita nzibakalaililwa a Mwami Leza kwiindila muli Mozesi.
Currently Selected:
Bapaizi 8: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.