Bapaizi 9
9
Aloni mbwaakapa zipaizyo
1Lino lyakamana ciyanza cakunanikwa, buzuba bwakatobela Mozesi wakaita Aloni abana bakwe abasololi ba Baisilayeli. 2Amane wakaambila Aloni kuti, “Kogwisya kapoho amugutu zitajisi kampenda, nkabela mukazipaizye ku Mwami Leza. Kapoho kabe kacipaizyo cakugwisya zinyonyoono, pele mugutu ngwacipaizyo citentwa. 3Alimwi waambile Baisilayeli kuti batole sijembwe wacipaizyo cakugwisya zinyonyoono, koombe kamwaka omwe, akabelele kamwaka omwe, tutajisi kampenda, tube cipaizyo cakutenta. 4Nkabela batole mupoho amugutu, zibe zyacipaizyo calumvwano. Baleelede kuzipaizya ku Mwami Leza amaila aavweledwe mafuta. Baleelede kucita eeci nkaambo Mwami Leza ulalibonya sunu ndilyonya kulimbabo.”
5Ciindi eeco bakaleta kumbele lyatente lyakuswaanganina zyoonse nzibakalaililwa a Mozesi, eelyo bantu boonse bakabungana ooko kuti bakombe Mwami Leza. 6Mozesi wakabaambila kuti, “Mwami Leza wamulailila kuti mucite eezi zyoonse, kuti mubone bulemu bwakwe bwasika.” 7Alimwi wakaambila Aloni kuti, “Koya kucipaililo upe cipaizyo cakugwisya zinyonyoono zyabantu, mbubonya mbuli Mwami Leza mbwaakalailila.”
8Mpoonya Aloni wakainka kucipaililo, nkabela wakajaya kapoho kacipaizyo cakugwisya zinyonyoono zyakwe. 9Bana bakwe bakaleta bulowa kulinguwe, Aloni wakanjizya munwe wakwe mubulowa, amane walamba bulowa kumeja one oonse aacipaililo. Lino bulowa bwakasyaala wakabutila kutako lyacipaililo. 10Aalo acipaililo wakatenta mafuta, ansa, amafuta alaamuni mbubonya mbuli Mwami Leza mbwaakalailila Mozesi. 11Pele nyama acikutu wakazitentela anze lyazivuka.
12Alimwi wakajaya munyama wacipaizyo cakutenta, bana bakwe bakaleta bulowa kulinguwe. Wakabusansaila kumabazu one oonse aacipaililo. 13Mpawo bakamupa mutwe azituli zyamunyama, lwakwe mwini wakazitenta acipaililo. 14Kumane wakasanzya zyamukati amaulu aamunsi, amane wakazitenta acipaililo atala lyazipaizyo zimwi.
15Naakamana kucita oobo, wakaleta zipaizyo zyabantu. Wakabweza mpongo yacipaizyo cakugwisya zinyonyoono zyabantu akwiijaya, alimwi akwiipaizya, mbuli mbwaakacita naakali kulisalazya lwakwe mwini. 16Amane wakabweza munyama wacipaizyo cakutenta mbubonya mbuli bwaamba mulawo. 17Wakaleta cipaizyo camaila, wakabuula janza lizwide akwaatenta acipaililo. Cipaizyo eeco cakali cakuyungizya atala lyacipaizyo cakutenta cifumo-fumo. 18Wakajaila bantu mupoho amugutu kuti zibe cipaizyo calumvwano. Bana bakaleta bulowa kuli Aloni, eelyo wakabusansaila kumabazu oonse one aacipaililo. 19Lino Aloni wakabikka zizo zyamafuta aapoho amugutu, mafuta aamucila, mafuta aazyamukati, ansa, amafuta alaamuni, 20atala lyatwaango twabanyama, amane zyoonse wakazitenta acipaililo. 21Nkabela wakazumbaanya twaango azibelo zyalulyo kuti zibe cipego cilibedelede ku Mwami Leza, mbubonya mbuli mbwaakalailila Mozesi.
22Lino naakamana kupa zipaizyo eezi, wakatambika maanza aakwe kubantu wakabaleleka, amane wakazwa. 23Mpoonya Mozesi a Aloni bakanjila mutente lyakuswaanganina, bazwe buyo, bakaleleka bantu. Mpoonya aawo bulemu bwa Mwami Leza bwakaboneka kubantu boonse. 24Mpoonya-mpoonya Mwami Leza wakatuma mulilo, walo wakatenta zipaizyo zyoonse amafuta aakali acipaililo. Nkabela bantu nibakabona eeco, bakoongolola akuvuntama ansi.
Currently Selected:
Bapaizi 9: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.