Luka 7
7
Jesu mbwaakaponya mubelesi wasilutwe mupati
(Mateyo 8.5-13)
1Jesu naakamana kwaamba zintu eezi zyoonse kubantu, wakanjila mu Kapenaumu. 2Lino silutwe wabasinkondo umwi wakajisi mubelesi ngwaakali kuyandisisya. Mubelesi ooyo wakali kuciswa calufu. 3Silutwe ooyo naakamvwa kuti Jesu nkwali, wakatuma bapati ba Bajuda bamwi kuyoomukumbila kuti aboole azooponye mubelesi wakwe. 4Eelyo bapati ba Bajuda nibakasika kuli Jesu, bakamukombelezya kapati, bati, “Bona muntu ooyu uleelede kuti umugwasye, 5nkaambo kakuti uluuyanda musyobo wesu, alimwi nguwakatuyakila cikombelo.”
6Eelyo Jesu wakainka ambabo. Naakasika afwiifwi aŋanda, silutwe wakatuma beenzinyina kuyooamba kuli Jesu kuti, “Mwami, utalikatazyi, nkaambo nseelede kuti unjile muŋanda yangu. 7Ncenciceeco ncindataboolela lwangu ndemwini kulinduwe. Pele amba buyo majwi, mubelesi wangu ulapona. 8Nkaambo ambebo ndimuntu weelede kutobela malailile aabalupati-pati, ambebo ndijisi basilumamba aabo mbelailila. Naa kuti ndaambila umwi kuti, ‘Koya!’ ulainka, aumwi kuti, ‘Koza!’ ulasika, akuti ndati kumubelesi wangu, ‘Cita eeci,’ ulacicita.”
9Jesu naakamvwa majwi aaya, wakagambwa kapati. Eelyo wakacengulukila kunkamu yabantu yakali kumutobela wakiizibya kuti, “Taakwe naba omwe mu Isilayeli uusyoma mbuli yooyu!”
10Eelyo bakatumidwe, nibakajoka kuŋanda, bakaakujana mubelesi wakwe wapona kale.
Jesu mbwaakaponya mwana wamukamufu
11Nibwakaca, Jesu wakaya ku Naini, antoomwe abasikwiiya bakwe. Alimwi ankamu mpati yabantu yakainka awe. 12Naakasika afwiifwi amulyango wamunzi, wakaswaana basidilwe kabatembede mufu. Lino ooyu mwaalumi, mufu wakali ngomwana alikke kulibanyina aabo bakali bamukamufu. Bantu banji bamumunzi ooyu bakali aamukaintu wakali aamause aataambiki. 13Eelyo Mwami wakamubedaa nkumbu, naakabona mukamufu ooyu, wakati kulinguwe, “Utalili pe.” 14Ndilyonya Jesu wakaswena afwiifwi, waampa bbokesi, eelyo bakatembede muntumba bakaima. Wakati, “Mwaalumi, ndati kulinduwe, buka!” 15Mpoonya-mpoonya wakabuka akukkala, watalika kwaambaula. Nkabela Jesu wakamupa kulibanyina.
16Lino bantu boonse bakakankamana kapati. Bakatalika kulumbaizya Leza bakati, “Ncobeni musinsimi mupati wasika akati kesu!” alimwi bakati, “Leza waboola kuzoofutula bantu bakwe!”
17Lino mpuwo eeyi yakamwaika mucisi coonse ca Judiya, amuzisi zyoonse zizingulukide.
Batumwa bakazwa kuli Joni Mubbapatizi
(Mateyo 11.2-19)
18Lino Joni bakamwaambila zintu zyoonse eezi basikwiiya bakwe. Nkaako wakaita basikwiiya bakwe bobilo, 19wabatuma ku Mwami Jesu kuyoobuzya kuti, “Sena nduwe ooyo ulaboola, naa tucilangila umbi?”
20Aabo bakatumwa nibakaakusika kuli Jesu bakati, “Joni watutuma kuti tuzoobuzye kuti, ‘Sena nduwe uuboola, na tucilangila uubi?’”
21Ciindi eeco nciconya Jesu wakaponya bantu banji-banji, bakali kuciswa abaabo bakali aamalwazi antoomwe abaabo bakanjidwe myuuya mibi, alimwi wakabonya boofu banji. 22Mpawo Jesu wakaambila batumwa ba Joni kuti, “Kamuya mukamwaambile Joni zyoonse nzimwabona anzimwamvwa, boofu balabona, balema baleenda, basizinsenda balaponyezegwa, basinkematwi balamvwa, bafu balabusigwa, bacete balakambaukilwa Makani Mabotu. 23Ulilelekedwe muntu ooyo uutadonaiki mulindime.”
24Nibakainka mbaakatumide Joni, Jesu wakatalika kubuzya bantu banji bakabungene makani aa Joni, “Ino ncinzi ncimwakainkide kuyoobona munkanda? Sena ndubu lwakali kuyuuntana? 25Ino mwakainkide kuyoobona nzi? Sena muntu wakasamide zisani ziteteete? Tee kayi aabo basama zisani ziteteete bakkala cakulibotezya mumaanda aabami. 26Amundaambile, Mwaali kuyoobona nzi? Musinsimi? Iiyi, ndamwaambila masimpe kuti mupati kwiinda musinsimi. 27Nkaambo Joni ngonguwe ooyo wakaambwa mumajwi aa Leza kuti, ‘Ndatuma mutumwa wangu, kumbele lyako uuti kakubambile nzila.’ 28Ndamwaambila kuti noliba lili taakwe nikwakali muntu naba omwe mupati kwiinda Joni, nikuba boobo muniini mubwami bwa Leza mupati kwiinda nguwe.”
29Bantu boonse antoomwe abasimitelo bakakuswiilila kukambauka kwa Joni, eelyo bakabbapatizigwa alubbapatizo lwakwe. 30Pele Bafalisi abamaiyi ba Mulawo bakali kukaka ncaakabayanzizye Leza. Ncencico eeco ncibatakabbapatizigwa a Joni.
31“Ino bantu basunu ndibakozyanisye aanzi? Ino bali mbuli nzi? 32Bali mbuli bana baniini bakkede mucisambalilo kabaitana kuti, ‘Twamuumina ngoma, pele nywebo tamuzyani! Twamwiimbila nyimbo zyabuumba, pele nywebo tamulili!’ 33Nkaambo Joni Mubbapatizi wakasika kaliimya kulya, alimwi katanywi waini, pele nywebo mwakamwaamba kuti, ‘Unjidwe muuya mubi!’ 34Mwanaa Muntu wakaboola kalya akunywa, pele nywebo mwakamwaamba kuti, ‘Amubone sindya, mukolwi, mulongwe wabasimitelo abatabambi milawo ya Mozesi.’ 35Nkabela busongo bwa Leza bulabonwa muli baabo babutambula!”
Jesu kuŋanda ya Saimoni Mufalisi
36Nkabela umwi Mufalisi wakatamba Jesu kuti akalye anguwe. Jesu wakainka kuŋanda yamuntu ooyo, waakukkala kulya antoomwe anguwe. 37Lino kwakali mukaintu umwi wamumunzi oomo, wakali simamambe, naakaziba kuti Jesu wakali muŋanda ya Mufalisi, wakaleta nsazi yakazwide mafuta aansende aanunkilila kabotu. 38Wakasika, waima munsi aa Jesu kalila, wakatesya matende aa Jesu amisozi. Eelyo wakatalika kumupukuta amasusu, alimwi wakali kumyonta matende aa Jesu akwaananika amafuta aalya.
39Lino ooyo Mufalisi wakatambide Jesu naakabona boobo, wakalyaambauzya kuti, “Kuti ooyu muntu naali musinsimi ncobeni, naaziba kuti ooyu mukaintu uumuguma uli buti, nkaambo ngusimamambe.”
40Pele Jesu wakati kulinguwe, “Saimoni, ndijisi cintu cakukwaambila.”
Saimoni wakavuwa kuti, “Ino ncintu nzi, O Mwiiyi?”
41Jesu wakati kulinguwe, “Kwakali bantu bobilo bakakolotede mali kumuntu umwi. Umwi wakakolotede mali ansiliva aali myaanda yosanwe, nkabela umwi wakakolotede mali aansiliva aali makumi osanwe. 42Nibakakacilwa kumuboozezya mali, ooyo muntu wakabalekelela boonse bobilo zikoloto zyabo. Ino nguuli wabantu aabo uyoomuyandisya muntu wakabalekelela?”
43Saimoni wakavuwa kuti, “Ndiyeeya kuti ngooyo ngwaakalekelela mali manji.”
Jesu wakati kulinguwe, “Wavuwa kabotu.” 44Lino wakalanga kumukaintu uulya, mpoonya wakati kuli Saimoni, “Wamubona mukaintu ooyu na? Ndanjila muŋanda yako, taakwe noondipa maanzi aakusamba ku matende. Pele mukaintu ooyu watesya matende aangu amisozi yakwe, alimwi waapukuta amasusu aakwe. 45Yebo taakwe noondimyonta ciindi noondijuzya. Mukaintu ooyu kuzwa ciindi naanjila muŋanda, taakwe naaleka kumyonta matende aangu. 46Yebo taakwe noondinanika mafuta kumutwe, pele walo wandinanika kumatende. 47Lino ndakwaambila kuti, nkaambo kaluyando lwakwe lunji, zinyonyoono zyakwe nozivula buti, mukuti wayandisisya, zyalekelelwa. Ooyo uulekelelwa kuce awalo utondezya luyando luce.”
48Mpawo Jesu wakati kumukaintu, “Zinyonyoono zyako zyalekelelwa.” 49Lino aabo bakali kulya antoomwe anguwe atebule bakatalika kwaamba akati kabo kuti, “Ino nguni muntu ooyu uulekelela zinyonyoono zyabantu?”
50Nkabela Jesu wakati kumukaintu, “Lusyomo lwako lwakufutula. Koya muluumuno.”
Currently Selected:
Luka 7: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
