Luka 8
8
Bakaintu bakasindikila Jesu
1Kuzwa aawo, Jesu wakatola lweendo, kuya muminzi mipati aminiini kaya bukambauka makani mabotu abwami bwa Leza. Abalo bali kkumi ababili bakainka anguwe, 2antoomwe abakaintu bamwi bakagwisigwa myuuya mibi akuponyezegwa kumalwazi. Mazina aabakaintu ngaaya: Maliya waku Magadala ooyu Jesu ngwaakagwisya myuuya mibi iili ciloba, 3Jowana, mukaintu wa Cuza wakali mupati wababelesi bamwami Helodi, Susana, alimwi abamwi banji bakabagwasya alubono lwabo.
Cikozyanyo casikuminza
(Mateyo 13.1-9; Maako 4.1-9)
4Lino bantu banji bakali kuyoboloka kulinguwe kuzwa mumunzi amunzi, nkabela nkamu mpati niyakabungana, Jesu wakabaambila cikozyanyo eeci.
5“Muntu umwi wakainka kuyoominza mbuto. Nkabela naakali kuminza zimwi zyakawida munzila zyakalyataulwa, alimwi bayuni bakazilya, 6zimwi zyakawida muvu lyamabwe. Mbuzyakamenena buyo, zyakatalika kupusama nkaambo zyakabula mudumu. 7Alimwi zimwi zyakawida mumamvwa, mamvwa akakomenena aamwi azisyango eezyo, mpoonya akaziyasa. 8Zimwi mbuto zyakawida muvu bbotu, zyakakomena akuzyala micelo, zyakavuzyanya akuba mwaanda.”
Nkabela Jesu wakamanizya akoompolola wati, “Nkaako ulaamwatwi amvwe!”
Bupanduluzi bwacikozyanyo
(Mateyo 13.10-17; Maako 4.10-12)
9Basikwiiya ba Jesu bakamubuzya ncocaamba cikozyanyo eeci. 10Walo wakati, “Nywebo mulipedwe luzibo lwamaseseke aabwami bwa Leza, pele bamwi balaambilwa zintu zyoonse muzikozyanyo zyalo, nkaambo nibabona tababonesesyi nibamvwa tabamvwisisisyi.
Jesu mbwaakapandulula cikozyanyo casikuminza
(Mateyo 13.18-23; Maako 4.13-20)
11“Lino mboobu mbucaamba cikozyanyo: Imbuto ndijwi lya Leza. 12Mbuto zyakawida munzila caamba bantu banga baamvwa majwi, pele bacimvwa buyo, Saatani wasika waagwisya mumyoyo yabo kuti batazumini akufutulwa. 13Eezyo zyakawida muvu lyamabwe caamba bantu banga baamvwa majwi aa Leza akwaatambula cakubotelwa. Pele majwi taanjilisyi mumyoyo yabo, balaazumina kwakaindi kaniini buyo, eelyo basunkwa balawa. 14Eezyo zyakawida mumamvwa caamba bantu banga bamvwa majwi, pele balayandisya zintu zyanyika abuvubi, akuyandisya kulibotezya cakuti, eezi zilabasyaanikizya, aboobo micelo yabo tiisimi. 15Pele zyakawida muvu bbotu caamba bantu banga baamvwa majwi, baayobola mumoyo mubotu uuswiilila, aboobo balaajatisya anguzu kusikila bazyale micelo.
Cikozyanyo calambi kunsi lyacisuwo
(Maako 4.21-25)
16“Taakwe muntu uunga adomeka lambe walivunika kunsi lyacisuwo, nikuba kulibikka mujungusi lyabulo, pele ulalibikka acikkazikilo kuti limunikile bantu boonse banjila muŋanda.
17“Nkaambo taakwe cintu cisisidwe citakooyoosisululwa, nikuba cintu camaseseke citakooyooyubununwa. 18Nkaambo kaako amucenjele ambomumvwa, ooyo uujisi uyooyungizizilwa, pele uujisi kasyoonto uyoonyangwa akaako nkayeeya kuti ulijisi.”
Bamukowa wa Jesu
(Mateyo 12.46-50; Maako 3.31-35)
19Lino banyina ababunyina Jesu bakaboola kulinguwe. Pele tiibakali kukonzya kusika munsi-munsi lyakwe nkaambo bantu bakali banji kapati. 20Umwi wakati kulinguwe, “Banyoko abana bokwanu mbabaya baliimvwi anze, bayanda kwaambaula anduwe.”
21Walo wakabaambila kuti, “Baama abana bokwesu mbaabo bamvwa majwi aa Leza akucita zyaamba majwi aayo.”
Jesu mbwaakaumuzya guwo
(Mateyo 8.23-27; Maako 4.35-41)
22Bumwi buzuba Jesu wakanjila mubwato abasikwiiya bwakwe. Wakabaambila kuti, “Atuzubukile mutala limwi lyalwizi.” Mpoonya bakainka. 23Nkabela bwato nibwakali kuya bweenda mumaanzi, Jesu wakoona. Eelyo guwo pati lyakatalika kubbubbula, cakuti mayuwe akatalika kunjila mubwato mane bwakatizule, bakaba muntenda mpati. 24Mpoonya basikwiiya bakamubusya Jesu bati, “O Mwami, O Mwami! Twafwa!”
Jesu naakasinsimuka wakakalalila guwo amayuwe. Nkabela kwakabatama bataa! 25Mpoonya Jesu wakati kuli basikwiiya, “Ino lusyomo lwanu luli kuli?”
Pele balo bakaliyoowede akugambwa kapati. Bakalyaambauzya bati, “Ino ooyu muntu nzi uunga guwo amayuwe zilamuswiilila?”
Jesu mbwaakaponya muntu wakanjidwe myuuya mibi
(Mateyo 8.20-34; Maako 5.1-20)
26Lino bakaakusika kucisi ca Gelasini, cilangene acisi ca Galilii. 27Nkabela Jesu mbwaakalandukila buyo, kwakamuswaana muntu, wakali kuzwa mumunzi. Muntu ooyu wakanjidwe myuuya mibi. Kanji-kanji taakwe naakali kusama, alimwi taakali kukkala mumunzi, pele wakali kukkala buyo kunamaumbwe ciindi coonse. 28Naakabona Jesu wakoompolola ajwi pati wakati, “Yebo Jesu, Mwanaa Leza, Sijulu lyamajulu! Uyanda kundicita nzi? Akaka ndakomba, utandipenzyi pe!” 29Nkaambo Jesu wakalailila myuuya mibi kuti izwe mumuntu ooyo. Lino ziindi zinji naakali kupenzegwa amyuuya mibi eeyo, wakali kulindilwa kaangidwe ankentani ansimbi kumaboko akumaulu, pele wakali kuzibbansaula, eelyo myuuya yakali kumutola munkanda.
30Lino Jesu wakamubuzya kuti, “Ino nduweni zina lyako?” Walo wakavwiila kuti, “Ndime ‘Makamu,’” nkaambo wakanjidwe myuuya minji. 31Nkabela myuuya mibi yakakumbila Jesu kuti, “Utatutandili mumulindi uutagoli.”
32Lino aawo kwakali butanga bwangulube bwakali kucela munsi aacilundu, aboobo myuuya mibi yakamukumbila Jesu kuti, “Tuzumizye tukanjile mungulube.” Nkabela wakaizumizya. 33Aboobo myuuya mibi yakazwa mumuntu ooyo, yaakunjila mungulube. Butanga boonse bwakakunkulikila mujeleele lyaziba pati, boonse bwakaloba mumaanzi.
34Beembezi nibakabona cakacitika bakatija, baakuluula makani mumunzi amutunzi. 35Bantu boonse bakainka kukubona eeco cakacitika. Nibakaakusika, bakajana Jesu antoomwe amuntu ngwaakagwisya myuuya mibi ulikkede munsi-munsi anguwe kasamide, alimwi kasitikide mumiyeeyo, nkaako bakayoowa. 36Aabo bakalibonena kacicitika, bakaambila beenzinyina mbuli wakanjidwe mbwaakagwisigwa myuuya mibi. 37Eelyo nkamu yabantu yoonse yamucisi ca Gelasini yakakumbila Jesu kuti azwe mucisi cabo, nkaambo yakayoowa kapati. Aboobo Jesu wakanjila mubwato wainka. 38Lino muntu ooyo wakagwisigwa myuuya mibi, wakakumbila Jesu wati, “Ndizumizye kuti nduunke anduwe.”
Pele walo wakamulailila kuti, 39“Pe, koya kumunzi ukaambile bantu zintu zyoonse Leza nzyaakucitila.”
Mpoonya ooyo muntu wakainka wakeendeenda muminzi yoonse kaya bwaambilizya zintu nzyaakamucitila Jesu.
Jesu mbwaakabusya mwana musimbi wa Jailosi amukaintu wakaguma cisani cakwe
(Mateyo 9.18-26; Maako 5.21-43)
40Lino Jesu naakapiluka, bantu bakamutambula cakubotelwa nkaambo boonse bakali kulindila nguwe. 41Nkabela kwakasika mwaalumi uutegwa Jailosi wakali mweendelezi wacikombelo. Wakafugamina Jesu akumukumbila kuti ainke kuŋanda yakwe, 42nkaambo wakajisi mwana musimbi omwe buyo, wakali amyaka iili kkumi aibili. Ooyo mwana wakali kuciswa calufu.
Lino Jesu naakali kuyabweenda, bantu banji bakali mubumbilide. 43Nkabela mukaintu umwi, wakali kuciswa kalobola kwamyaka iili kkumi aibili, wakabbadelede lubono loonse kubasilisi, pele kakutakwe muntu naba omwe wakakonzya kumuponya. 44Aboobo wakaboola kusule lya Jesu akati kankamu yabantu, waguma moombe wacisani cakwe. Mpoonya-mpoonya bulowa bwakaleka kuzwa. 45Lino Jesu wakabuzya kuti, “Ino nguni wandiguma?”
Bantu boonse nibakakazya, Pita wakaamba kuti, “Mufundisi, ino kobuzya buya oobwene bantu mbobakusyanikizizye!”
46Pele Jesu wakati, “Mpali wandiguma, nkaambo ndalimvwa kuti nguzu zyazwa mulindime.” 47Eelyo mukaintu ooyo naakabona kuti wakacilwa kulisisa, wakaboola cakuyoowa akutuntuma kuli Jesu, wakaliwaala kumaulu aakwe. Wakalipandulula kumbele lyabantu boonse kuti wakamugumina nzi, ambuli mbwaakaponyezegwa ciindi eeco nciconya.
48Jesu wakati kulinguwe, “Mwanaangu, lusyomo lwako lwakuponya. Koya muluumuno.”
49Naakacili kwaamba, kwakasika muntu umwi kuzwa kuŋanda ya Jailosi, waamba kuti, “Mwanaako wazimina kale, ino utacimukatazyi buyo Mwiiyi.”
50Pele Jesu naakamvwa makani aaya, wakamwiingula kuti, “Utayoowi, kosyoma buyo musimbi uyooba kabotu.”
51Jesu naakasika kuŋanda ya Jailosi, taakwe naakazumizya muntu kunjila awalo, ccita buyo Pita, Joni, Jemusi abazyali bamwana. 52Bantu bakaliko bakali kulila akweema akaambo kamusimbi wakafwide. Pele Jesu wakati, “Mutamulili, nkaambo tafwide, uloona!”
53Bantu bakatalika kuseka Jesu, nkaambo bakalizi kuti mwana wafwa. 54Mpoonya Jesu wakamujata kujanza, wamwiita wati, “O Mwana, kobuka!” 55Nkabela muuya wakwe wakaboola, mwana wakapona mpoonya, wakaimikila kufwambaana. Eelyo Jesu wakabalailila kuti bamupe cakulya alye. 56Bazyali bamwana bakagambwa kapati, pele Jesu wakabalailila kuti batakaambili muntu naba omwe cintu cacitika.
Currently Selected:
Luka 8: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
