Luka 9

Jesu mbwakatuma batumwa bakwe

(Mateyo 10.5-15; Maako 6.7-13)

1Lino Jesu wakaita batumwa bakwe bali kkumi ababili kuti babungane. Wakabapa nguzu zyakugwisya myuuya mibi azyakuponya malwazi. 2Mpoonya wakabatuma kuti bakakambauke zyabwami bwa Leza akuponya balwazi. 3Wakabaambila kuti, “Mutabwezi cintu niciba comwe mulweendo lwanu, mutabwezi musako niiba nkomo, niciba cakulya, naaba mali, alimwi mutabwezi zyakusama zyobilo pe. 4Kufumbwa muŋanda mubayoomutambula, amukakkale mumonya oomo mane kusikila mukazwe mumunzi ooyo. 5Alimwi kufumbwa ooko koonse nkobatakoyoomutambula, mwaakuzwa mumunzi, mukakunkumune lusuko kuzwa kumatende aanu kutegwa cikabe cicenjezyo kulimbabo.”

6Basikwiiya bakainka, bakainda muminzi yoonse. Bakali kukambauka Makani Mabotu kubantu, alimwi akuponya balwazi koonse-koonse.

Zyakukatazigwa kwa Mwami Helodi

(Mateyo 14.1-12; Maako 6.14-29)

7Lino Mwami Helodi wacisi ca Galilii naakamvwa makani oonse aaya aakacitika, wakakatazigwa kapati nkaambo bamwi bakali kwaamba kuti Joni Mubbapatizi wabuka kuzwa kubafu. 8Bamwi bakali kwaamba kuti Elija walibonya alimwi. Pele bamwi bakali kuti umwi wabasinsimi wabuka kuzwa kubafu.

9Helodi wakaamba kuti, “Kayi Joni ndakamukosozya mutwe, ino ooyu nguni uucita zintu eezi nzyemvwa?” Nkaako wakayandisisya kubona Jesu.

Jesu mbwaabakasanina bantu banji

(Mateyo 14.13-21; Maako 6.30-44; Joni 6.1-14)

10Nibakaboola batumwa, bakaambila Jesu zyoonse nzyobakacita. Nkabela wakabatola, wakainka aabo kumbali kumunzi wa Betesaida. 11Eelyo makamu aabantu naakamvwa akatobela. Lino wakabatambula akutalika kubaambila makani aabwami bwa Leza, alimwi wakaponya aabo boonse bakali kuyanda kuponyezegwa.

12Lino zuba nilyakasalazya, basikwiiya bali kkumi ababili bakaboola kulinguwe baamba kuti, “Baambile bantu kuti bainke muminzi amumasena aaengelede kuti bakaliyandawide zyakulya amwakoona, nkaambo kuno nkotubede nkuusokwe.”

13Pele Jesu wakaingula kuti, “Amubape cakulya nywebo.” Basikwiiya bakati, “Swebo tujisi buyo zinkwa zyosanwe atuswi tobilo. Sena tuunke kuyooula cakulya cinji cikonzya kuzulizya bantu aaba boonse?” 14Nkaambo aawo kwakali baalumi bakatisike kuzyuulu zyosanwe.

Lino wakati kuli basikwiiya bakwe, “Amubakkazike mutukamu-tukamu twamakumi osanwe.”

15Bakacita mbubonya oobo, bakabakkazika bantu boonse. 16Jesu wakabweza zinkwa eezyo zyosanwe atuswi tobilo, wakalungumana kujulu, wazileleka akuzikomona. Naakamana, wakazipa basikwiiya bakwe kuti baabanye bantu aabo bakabungene. 17Bantu boonse bakalya bakkuta. Mpawo basikwiiya bakabwezelela bufwefwelenga bwakasyaala, bazuzya zisuwo zili kkumi azibili.

Jesu ngo Munanike wa Leza

(Mateyo 16.13-19; Maako 8.27-29)

18Ciindi cimwi Jesu naakali kukomba alikke, basikwiiya bakwe bakaliwo abalo. Mpoonya wakababuzya kuti, “Ino bantu baamba kuti mebo ndime ni?”

19Balo bakamwiingula kuti, “Bamwi bakwaamba kuti nduwe Joni Mubbapatizi, bamwi baamba kuti nduwe musinsimi Elija, alimwi bamwi baamba kuti uli umwi wabasinsimi baciindi wakabuka kuzwa kubafu.”

20Jesu wakati kulimbabo, “Ino nywebo mundaamba kuti ndime ni?” Pita wakaingula kuti, “Nduwe Munanike wa Leza.”

21Lino Jesu wakabalailila canguzu basikwiiya bakwe kuti batakaambili muntu naba omwe makani aaya pe.

Jesu mbwaakaambilizya zyakupenga azyalufu lwakwe

(Mateyo 16.21-28; Maako 8.3—9.1)

22Alimwi wakati, “Mwanaa Muntu uleelede kupenga zintu zinji akukakwa abapati babantu, abapaizi basilutwe abamayi ba Mulawo. Bayoomujaya, pele mubuzuba bwatatu uyoobusigwa.”

23Mpoonya Jesu wakati kulimbabo boonse, “Kuti naa muntu kayanda kunditobela, aliimye, abweze ciingano cakwe eelyo anditobele. 24Nkaambo kufumbwa uuyandisya buumi bwakwe uyoobusweekelwa, nkabela ooyo uusweekelwa buumi bwakwe akaambo kandime, uyoobujana. 25Nkaambo nimpindu nzi njajana muntu kuti naa wavuba nyika yoonse, kwamana wasweekelwa buumi bwakwe naa walinyonyoona? 26Nkaambo kaako kufumbwa uuusa nsoni akaambo kandime amakani aangu, awalo Mwanaa Muntu uyoomukaka aakuboola mubulemu bwakwe amubulemu bwawisi abwabangelo basalala. 27Kasimpe ndamwaambila kuti, mpobali bwamwi aano batakooyoofwa kabatanabona bwami bwa Leza.”

Ciwa ca Jesu mbucakasanduka

(Mateyo 17.1-8; Maako 9.2-8)

28Nkabela naakainda mazuba aali lusele, kaambide makani aaya Jesu wakatola Pita ababunyina bobilo ba Joni a Jemusi wakainka acilundu cilamfu kuyookomba. 29Lino naakacili kukomba, ciwa cakwe cakasanduka, azyakusama zyakwe zyakatuba bu. 30Mpoonya-mpoonya kwakalibonya baalumi bobilo kabakanana anguwe. Baalumi aabo bakali Mozesi a Elija. 31Bakalibonya mubulemu bwakujulu kabakanana anguwe zyalufu lwakwe ndwayoofwida ku Jelusalemu. 32Lino Pita abaabo mbaakali aabo bakali koona, pele nibakasinsimuka bakabubona bulemu bwakwe alimwi abaalumi bobilo aabo mbaakaimvwi aabo. 33Aaba nibakatalika kuti bamusiye, Pita wakati kuli Jesu, “Mufundisi, ncibotu kuti tuli aano! Tulayaka zilawo zyotatwe, cimwi cibe cako, cimwi cibe ca Mozesi, cimwi cibe ca Elija.” Pele taakazi ncaakali kwaamba pe.

34Kacaambaula, kwakalibonya kkumbi nkabela lyakabavumbilila. Lino bakayoowa kapati nibakavumbwa akkumbi eelyo. 35Mpoonya kwakamvwigwa ijwi mukkumbi oomo lyakati, “Ooyu ngo Mwanaangu ngweyandisisya, ngwendakasala. Amumuswiilile!”

36Nibakamana kumvwa jwi, Jesu wakasyaala, uliimvwi alikke buyo. Basikwiiya bakaumuna buyo, taakwe muntu naba omwe ngobakaambila mazuba aayo eeco cakacitika ncibakabona.

Jesu mbwaakaponya sikasuntu

(Mateyo 17.14-18; Maako 9.14-27)

37Mubuzuba bwakatobela bakaseluka kuzwa acilundu nkabela nkamu yabantu mpati yakacingauzya Jesu. 38Mpoonya aawo umwi mwaalumi wakazwa mukati kankamu woompolola kati, “Mwiiyi, mufwide lubomba mwanaangu mulombe, ndakukumbila, nkaambo ngonguwe buyo alikke ngwejisi! 39Kuli muuya mubi uumunjila. Ulamukwiizya, ulamuyuminizya akumuzwisya kovu! Ulamupenzya kapati, alimwi tuumuleki pe! 40Ndakakumbila basikwiiya bako kuti baugwisye muuya mubi ooyu, pele bakakacilwa.”

41Mpoonya Jesu wakati, “Akaka nywebo nobantu basicinguni nomutasyomi, ino muyanda kuti ndikkale ciindi cilamfu cili buti andinywe? Ndibikkilile buti mumoyo? Ino mmupengele ciindi cilamfu cili buti? Mulete kuno mwanaako.”

42Mulombe ooyo naakali kuboola kuli Jesu, muuya mubi wakamuwaalila ansi, mpoonya wakatalika kusansa. Jesu wakakalalila muuya uusofwaazya, mpoonya wakamuponya mulombe, wamubweedezya kuli wisi. 43Bantu boonse bakagambwa kunguzu mpati zya Leza zyakuponya.

Jesu mbwaakaamba zyalufu lwakwe alimwi

(Mateyo 17.22-23; Maako 9.30-32)

Pele bantu nibakacili kugambwa kuzintu eezi nzyaakacita, Jesu wakaambila basikwiiya bakwe kuti, 44“Mutaalubi majwi aaya ngendamwaambila! Mwanaa Muntu uyooabwa kubantu.” 45Pele balo taakwe nibakaciziba ncaakali kwaamba. Nkaambo cakalisisidwe kuti batacimvwisisyi, aboobo bakayoowa kumubuzya.

Ino nguni mupati mubwami bwakujulu?

(Mateyo 18.1-5; Maako 9.33-37)

46Kwakabuka kukazyanya akati kabasikwiiya ba Jesu munkani yakuti ino nguni mupati akati kabo. 47Pele Jesu naakaziba makani aaya, wakabweza kana, wakaimika kumbali lyakwe. 48Mpoonya wakati kulimbabo, “Kufumbwa muntu uutambula kana aaka muzina lyangu, watambula ndime, alimwi awalo uunditambula, watambula ayooyo wakandituma. Ooyo ngomutayeeyeli kuti nguni akati kanu ngomupati.”

Kufumbwa uuli kulubazu lwanu nguwanu

(Maako 9.38-40)

49Lino Joni wakaamba kuti, “Mwami, twakabona muntu umwi kagwisya myuuya mibi muzina lyako, pele twakamukasya, nkaambo takutobeli mbuli mbotutobela swebo.”

50Pele Jesu wakati kulinguwe, “Mutamukasyi, nkaambo ooyo uutamulwani uli kulubazu lwanu.”

Munzi wa Basamaliya mbuwakakaka Jesu

51Lino nicakaswena afwiifwi ciindi cakuti Jesu atolwe kujulu, wakakanza kuya kumunzi wa Jelusalemu. 52Wakatuma bamwi batumwa kumbele lyakwe, balo bakaakunjila mumunzi wamucisi ca Samaliya kuti bakamululamikile zintu zyoonse. 53Pele bantu bamumunzi ooyu taakwe nibakatambula Jesu, nkaambo cakalizizilwe kuti uyabuya ku Jelusalemu. 54Lino basikwiiya bakwe, Jemusi a Joni, nibakabona boobo, bakati kuli Jesu, “Mwami, sena ulayanda kuti twiite mulilo kuzwa kujulu kuti uzoobanyonyoone bantu aaba?”

55Jesu wakacebuka wakabakalalila. 56Mpoonya bakazwa, bakaya kumunzi uumbi.

Zyakutobela Jesu

(Mateyo 8.19-22)

57Nibakali kuyabweenda munzila, umwi muntu wakati kuli Jesu, “Ndilakutobela kufumbwa nkoyooinka.”

58Pele Jesu wakati kulinguwe, “Bamwaaba balijisi mena abayuni balijisi ziteente, pele Mwanaa Muntu tajisi mpoona pe.” 59Alimwi Jesu wakati kuluumwi muntu, “Nditobela.”

Pele muntu ooyo wakati, “Mufundisi ndali kuyanda kusaanguna kuunka kumunzi nkazike taata.”

60Pele Jesu wakamwiingula kuti, “Peepe, kobaleka bafu bazikkane muli cabo, yebo koya ukakambauke makani aabwami bwa Leza.”

61Aumwi muntu wakati, “Ndilakutobela, Mwami, pele kondizumizya kuti ndikalaye bamukwasyi wangu.”

62Jesu wakati kulinguwe, “Taakwe muntu uunga atalika kulima ajamba ulanga musule, weelede bwami bwa Leza.”

Currently Selected:

Luka 9: Tonga96

Highlight

Copy