मत्ती 26

यीशु दी अत्या दा सलहा-मशवरा

1जेसलै यीशु ए सब गल्लां आखी चुकया तां पी अपने चेलें गी आखन लगया, 2“तोस जांनदे ओ के दो देन बाद फसह दा त्यार ऐ, ते मनुक्ख दा पुत्तर सूली उपर चढ़ाए जाने आसतै पड़काया जाग।”

3ओस बेलै प्रधान याजकें ते लोकें दे प्राचीन कैफा नां दे महायाजक दे आंगन च किट्ठे ओए, 4ते अप्पुं बिचें बिचार करना लगे के यीशु गी चलाकी कन्ने पकड़ीयै मारी दिचै। 5लेकन ओ आखदे हे, त्यार दे बेलै नेई, कुतै ऐसा नेई उवै के लोकें च कहामां मची जा।

यीशु दे उपर कीमती इत्र ढोलना

6जेसलै यीशु बैतनिय्याह च शमौन कोढ़ी दे कर हा, 7तां उत्थें एक जनांनी कच दे पांढे च बड़ा कीमती खुशबुदार तेल लेईयै ओदे कोल आई, ते जेसलै ओ रुट्टी खाणे गी बैठा हा तां ओदे सिर उपर डोली दिता। 8ए दिखियै ओदे चेलें क्रोधें च ओईए ते बोलन लग्गे, एस दा कि सत्यनाश कित्ता गीया? 9इसी तां चंगी किम्मत उपर बेचियै गरीबें गी बंडोई सकदा हा। 10ए सब केश जांनियै यीशु ने उनेंगी आखया, “जनांनी गी कि सतांदे ओ? ओसने मेरे कन्ने पलाई कित्ती ऐ। 11गरीब थुआड़े कन्ने मेशा रैंदे न, मगर आऊँ थुआड़े कन्ने मेशा नेई रौगा। 12ओसने मेरी जिंद उपर जेड़ा तेल डोलया ऐ ओ मेरे दब्बने आसतै कित्ता गीया ऐ। 13आऊँ थुआड़े कन्ने सच आखना ऐं, के सारी दुनियां च जिथें कुतै बी ए शोभ समाचार प्रचार कित्ता जाग उत्थें ओदे एस कम दा जिक्र बी ओसदी याद बेच कित्ता जाग।”

यहूदा इस्करियोती दा विश्वास तरुटनां

14ओस बेलै यहूदा इस्करियोती ने, जेड़ा बारां चेलें बिचा एक हा, प्रधान याजकें दे कोल जाईयै आखया, 15“जेकर आऊँ उसी थुआड़े अथ्थ पड़काई दियां तां मिगी के देगे?” उनै उसी त्री चांदी दे सिक्के तोलियै देई दिते। 16ते ओ उसै बेलै थमां उसी पड़काने दा बेला तुपन लगी पिया।

चेलें दे कन्ने ऐन्त पोजन

17अखमीरी रुट्टी दे त्यार दे पैले देन, चेलें यीशु दे कोल आईयै पूछना लगे, “तुं कुत्थें चानां के अस तेरे आसतै फसह दी रुट्टी खाणे दी तयारी करचै? 18ओसने आखया, शैर च फलाने मनुक्ख दे कोल जाईयै ओदे कन्ने आखो, गुरु आखदा ऐ के मेरा समां कोल ऐ। आऊँ अपने चेलें दे कन्ने तेरे इत्थैं फसह दा त्यार मनागा।” 19खीरी च चेलें यीशु दा उक्म मनया ते फसह तयार कित्ता।

20केसलै शाम ओई तां ओ बारें चेलें दे कन्ने रुट्टी खाणे गी बैठा। 21जेलै ओ खा करदे हे तां ओसने आखया, “आऊँ थुआड़े कन्ने सच आखना ऐं के थुआड़े चा एक मिगी पकड़ाग।” 22एस गल उपर ओ मते दूआस ओए, ते अर एक उसी पूछना लगया, “ए गुरु, के ओ आऊँ ऐं?” 23ओसने जबाब दिता, “जेस ने मेरे कन्ने थाली अथ्थ पाए दा ऐ, उवै मिगी पड़काग। 24मनुक्ख दा पुत्तर तां जियां ओदे बारै च लिखे दा ऐ, ओ ओई जानां गै; लेकन ओस मनुक्ख आसतै बसोस ऐ जिदे दवारा मनुक्ख दा पुत्तर पड़काया जन्दा ऐ; जेकर ओस मनुक्ख दा जन्म गै नेई होंदा हा, तां ओस लेई पला होंदा।” 25ओस बेलै यीशु दे पकड़ाने आले चेलें यहूदा इस्करियोती ने आखया, “ए गुरु, कित्ते ओ आऊँ तां नेई ऐं?” यीशु ने उसी जबाब दिता, “तो गै गलाई उड़या।”

प्रभु पोज

26जेसलै ओ खा करदे हे तां यीशु ने रुट्टी लेई, ते आशीष मंगीयै त्रोड़ी, ते चेलें गी देईयै आखया, “लियो, खाओ; ए मेरी जिंद ऐ।” 27पी ओसने कटोरा लेईयै शुकर कित्ता, ते उनेंगी देईयै आखया, तोस सारे एस बिचा पीओ, 28किके ए बायदा दा मेरा ओ खून ऐ, जेड़ा मतें सारें दे पापें दी माफी आसतै रुडाया जंदा ऐ। 29आऊँ थुआड़े कन्ने आखना ऐं के दाख दा ए रस ओस धयाडै तकर कदें नेई पीगा, जिंदु तकर थुआड़े कन्ने अपने पिता दे राज बेच नमां नेई पीयां। 30पी ओ पजन गाइयै जैतून पाड़ उपर गै।

पतरस दे एनकार दी पविखवाणी

31ओस बेलै यीशु ने उंदे कन्ने आखया, “तोस सारे अज्ज गै राती गी मेरे बारै च ठोकर खागे, किके लिखे दा ऐ; आऊँ गुआल गी मारगा, ते झुंड दी पिड्डां तितर बितर ओई जाघंन। 32लेकन आऊँ अपने जिन्दे ओनें दे बाद थुआड़े थमां पैलैं गलील जिले गी जागा।” 33एस गल्ल उपर पतरस ने उसी आखया, “जेकर सारे तेरे बारै च ठोकर खांन तां खांन, लेकन आऊँ कदें बी ठोकर नेई खागा।” 34यीशु ने ओस कन्ने आखया, “आऊँ तेरे कन्ने सच आखना ऐं के अज्ज गै रातीं कुकड बांग देने थमां पैलैं, तू त्रै बारी मेरे लेई मुकरी जागा।” 35चेलें पतरस ने ओस कन्ने आखया, “जेकर मिगी तेरे कन्ने मरना बी पौग, तां बी आऊँ तेरे थमां कदें नेई मुकरगा।”

गतसमनी दे बगीचे च प्रार्थना।

36ओस बेलै यीशु अपने चेलें दे कन्ने गतसमनी नां दे एक जगै च आया ते अपने चेलें गी आखन लगया, “इत्थैं बैठे दे रवो, जेलै तकर आऊँ उत्थें प्रार्थना करगा।” 37ओ पतरस ते जब्दी दे दौनीं पुत्रें गी कन्ने लेई गीया, ते दूआस ते दुखी ओना लगया। 38ओस बेलै ओसने उंदे कन्ने आखया, “मेरा जी बड़ा दूआस ऐ, इत्थैं तकर के, के मेरा प्राण निकला करदा ऐ। तोस इत्थैं रुको ते मेरे कन्ने बिजे दे रवो।” 39पी ओ थुड़ा ओर अग्गें बदियै मुंह दे पार प्या, ते ए प्रार्थना करन लगया, “ए मेरे प्पो, जेकर ओई सकै तां ऐ कटोरा मेरे थमां टली जा, तां बी जियां आऊँ चानां इयां नेई, लेकन जियां तुं चानां उय्यां गै उवै। 40पी ओस चेलें दे कोल आईयै उनेंगी सुतें दें दिखया ते पतरस गी आखया, के तोस मेरे कन्ने एक घड़ी बी नेई बिजे दे रेई सके? 41बिजे दे रवो, ते प्रार्थना करदे रवो के तोस परिख्या च नेई पवो; आत्मा तां तयार ऐ, लेकन जिंद कमजोर ऐ।” 42पी ओसने दुई बार जाईयै ए प्रार्थना कित्ती, “ए मेरे प्यो, जेकर मेरे पीते दे बगैर नेई अटी सकदा तां तेरी मर्जी पूरी उवै।” 43ओस बेलै ओसने आईयै उनेंगी पी सुतें दे दिखया, किके उंदीयां अखीयाँ नींदर कन्ने परोची दीहां। 44उनेंगी शुड़ीयै ओ पी चली गीया, ते उवै गल्ल पी आखीयै त्री बारी प्रार्थना कित्ती। 45ओस बेलै ओसने चेलें दे कोल आईयै उनेंगी आखया, “हूंन सुते दे रवो, ते अराम करो; दिखो, घड़ी आई पूजी दी ऐ, ते मनुक्ख दा पुत्तर पापियें दे अथ्थ पडकाया जंदा ऐ। 46उठो, चलचे। दिखो, मेरा पडकाने आला कोल आई पूजया ऐ।”

यीशु गी बन्दी बनाना

47ओ ए आखा गै करदा हा के यहूदा इस्करियोती, जेड़ा बारें चेलें बिचा एक हा आया, ते ओसदे कन्ने प्रधान याजकें गी ते लोकें दे प्राचीन दी पीड, तलवारां ते सोटे लेईयै आई। 48ओदे पड़काने आले ने उनेंगी ए पता दिते दा हा के “जिसी आऊँ चूमी लैगा ओ उवै ऐ; उसी पकड़ी लियो।” 49ते फोरन यीशु दे कोल आईयै आखया, “ए गुरु, नमश्कार!” ते ओस उसी मता चूमया। 50यीशु ने उसी आखया, “ए मित्र, जेस कम आसतै तुं आएदा ऐं, उसी करी लै।” ओस बेलै उनै कोल आईयै यीशु उपर अथ्थ रखे ते उसी पकड़ी लेता। 51ओस बेलै यीशु दे साथियें बिचा एक ने अथ्थ बदाईयै अपनी तलवार खिची लेई ते महायाजक दे दास उपर चलाईयै ओसदा कन कटी दिता। 52ओस बेलै यीशु ने उसी आखया, “अपनी तलवार म्यान च रखी लै किके जेड़े तलवार चालांदे न ओ तलवार कन्ने नाश कित्ते जाघंन। 53के तुं नेई समझदा के आऊँ अपने पिता अगें अर्ज करी सकना ऐ, ते ओ सोर्गदूतें दी बारां फौजीयें दी पलटन कोलां जादै मेरे कोल हूंन हाजर करी देग?” 54लेकन पवित्र शास्त्र दियां ए गल्लां के ऐसा गै ओना जरुरी ऐ, ए कियां पूरीयां ओगन? 55उसै बेलै यीशु ने पीड गी आखया, “के तोस तलवारां ते सोटे लेईयै मिगी डाकू आला लेखा पकड़ने आसतै निकले ओ? आऊँ अर देन मंदर च बेईयै शिखया दिंदा हा, ते तुसें मिगी नेई पकड़या। 56पर ए सब एसकरी ओया ऐ के पन पविखवक्तें दे वचन पूरे ओंन।” ओस बेलै सारे चेलें उसी शुड़ीयै नसी गै।

कैफा दे अगें यीशु

57ते यीशु दे पड़काने आले उसी कैफा नां दे महायाजक दे कोल लेई गै, जित्त्थें शास्त्री ते प्राचीन किट्ठे ओए दे हे। 58पतरस दूर दा यीशु दे पिछें-पिछें महायाजक दे आंगन तकर गीया, ते अन्दर जाईयै यीशु दी खीरी बेला दिखने आसतै सबकें दे कन्ने बेई गीया। 59प्रधान याजकें ते सारी महासभै यीशु गी मारी ओड़ने लेई ओदे वरोध बेच चुठी गुआई दी तलाश बेच हे, 60लेकन मते सारे चुठे गवाऐं दे औने उपर बी सेई गुआई नेई थोई। ऐन्त बेच दो जन आए, 61ते आखया, “एस ने आखे दा ऐ के आऊँ परमेसर दे मंदर गी टाई सकना ऐं ते उसी त्रै दिनें च बनाई सकना ऐं।”

62ओस बेलै महायाजक ने खडोईयै यीशु गी आखया, “के तुं कोई जबाब नेई दिंदा? ए लोक तेरे खलाफ के गवाई दिंदे न?” 63लेकन यीशु चुप रिया। ओस बेलै महायाजक ने उसी आखया, “आऊँ तुगी जिंदे परमेसर दी कसम दिनां ऐं के जेकर तुं परमेसर दा पुत्तर मसीह ऐं तां साड़े कन्ने आखी दे।” 64यीशु ने ओदे कन्ने आखया, “तो अप्पुं गै गलाई उड़या; पर आऊँ तुगी एबी गलानां ऐं, के उनै कोलां तोस मनुक्ख दे पुत्तर गी समर्थमान दे सजे पासे बैठे दे, ते अम्बर दे बदलें उपर औंदे दिखगे।” 65ओस बेलै महायाजक ने अपने कपड़े फाड़ियै आखया, “एस ने परमेसर दी निंदया कित्ती ऐ, हूंन असेंगी गुआईयें दी के लोड़ ऐ? दिखो, तुसें हूंन ए निंदया सुनी ऐ! 66तोस के समझदे ओ? उनै जबाब दिता, ए मौत दी सजा दे काबल ऐ।” 67ओस बेलै उनै ओदे मुंह उपर थुकया ते उसी मुक्के मारे, दुए चपेटां मारीयै आखया, 68“ए मसीह, साड़े कन्ने पविखवाणी करियै बोल के कोने तुगी मारया?”

पतरस थमां यीशु दा एनकार

69पतरस बार आंगन च बैठा दा हा के एक दासी ने ओदे कोल आईयै आखया, “तुं बी यीशु गलीली दे कन्ने हा।” 70ओसने सारें दे सामनें ए आखदे ओई एनकार कित्ता ते आखया, “आऊँ नेई जांनदा के तुं के आखनी ऐं।” 71जेसलै ओ बार डेवढ़ी च चली गीया, तां दुई दासी ने उसी दिखियै उन्दे कन्ने जेड़े उत्थें हे आखया, “एबी तां यीशु नासरी दे कन्ने हा। 72ओसने कसम खाईयै पी मना कित्ता; आऊँ ओस मनुक्ख गी नेई जांनदा।” 73थुड़े चेर बाद लोक जेड़े उत्थें खड़ोते दे हे, उनै पतरस दे कोल आईयै उसी आखया, “सचमुच तुं बी उंदे बिचा एक ऐं, किके तेरी बोली तेरा पेद खोली दिंदी ऐ।” 74ओस बेलै ओ फटकारनां ते कसम खाणा लगया; “आऊँ ओस मनुक्ख गी नेई जांनदा।” ते फोरन कुकडै बांग देई दिती। 75ओस बेलै पतरस गी यीशु दी आखी दी गल्ल याद आई गेई, “कुकड बांग देने थमां पैलैं तुं मेरा त्रै बारी मैं एनकार करगा।” ते ओ बार जाईयै डोसकी-डोसकी रोनां लगया।

Currently Selected:

मत्ती 26: DOG

Highlight

Copy