मत्ती 28
28
यीशु दा जिन्दा ओना
1बसां दे धयाडें दे बाद हफ्ते दे पैले देन बड़ा पैर ओदे गै मरियम मगदलीनी ते दुई मरियम कब्र गी दिखने गी आईयां। 2ओस बेलै एक, बड़ा भुंचल ओया, किके परमेसर दा एक दूत सोर्ग थमां उतरया ते कोल आईयै ओसने पत्थर गी रुलकाई दिता, ते ओदे उपर बैठी गीया। 3ओसदा रूप बिजली आला लेखा ते ओसदा कपड़ा पाले आला लेखा चिट्टा हा। 4ओदे डर कन्ने पैरेदार कम्बी उठे, ते मुड़दे आला लेखा ओई गै। 5सोर्गदूत ने जनांनीयें गी आखया, “मत डरो, आऊँ जांनना ऐं के तोस यीशु गी जेड़ा सूली उपर चढ़ाया गीया हा तुपा करदीयां ओ। 6ओ इत्थैं नेईयैं, पर अपने वचन दे मताबक जिन्दा ओई गेदा ऐ। आओ, ए जगह दिखो, जिथें प्रभु रखे दा हा, 7ते तौलै गै जाईयै ओदे चेलें गी आखो, के ओ मुड़दां बिचा जिंदा ओई गेदा ऐ, ते दिखो ओ थुआड़े थमां पैलैं गलील जिले गी जंदा ऐ, उत्थें तोस ओसदा दर्शन पागे! दिखो, मैं तुसेंगी आखी दिता।”
8ओ डर ते बड़ी खुशी कन्ने कब्र कोलां तौलै गै बापस आईयै ओदे चेलें गी खबर देने आसतै दौड़ी गेईयां।
जनांनीयें गी यीशु दा दर्शन
9ओस बेलै यीशु उनेंगी लबया। ते उनेंगी आखया, “खुशी कन्ने रवो” ते उनै कोल आईयै ते ओदे पैर पकड़ीयै उसी मत्था टेकया। 10ओस बेलै यीशु ने उनेंगी आखया, “मत डरो; मेरे सारें चलेयां गी जाईयै आखो के गलील जिले गी चली जांन, उत्थें ओ मिगी दिखघंन।”
पैरेंदारें दी तल्ला
11ओ जा गै करादीहीयां के पैरेदारें बिचा कीने गै शैर च आईयै पूरा हाल प्रधान याजकें कन्ने सनाई दिता। 12ओस बेलै उनै प्राचीन कन्ने किट्ठे ओईयै सलहा कित्ती ते सपाईयें गी बड़ा चांदी देईयै आखया, 13“उनै सपाईयें गी आखयो के, राती अस जेसलै सुते दे हे, तां ओदे चेलें उसी चुराई लेई गै। 14ते जेकर ए गल्ल पिलातुस दे कन्ने तकर पुजग के तोस सेई गेदे हे, तां अस उसी बोलिऐ समझाई लैगे ते तुसेंगी खतरा थमां बचाई लैगे।” 15खीरी च उनै पैसे लेईयै जियां उनेंगी सखाए दा हा, उय्यां गै कित्ता। ते ए गल्ल अज्ज तकर यहूदीयें च बड़ी मशूर ऐ।
चेलें गी दर्शन ते ऐन्त उक्म
16ते जारां चेलें गलील जिले च ओस पाड़ उपर गै, जेसदे बारै च यीशु ने उनेंगी आखे दा हा। 17ते उनै ओदे दर्शन पाईयै ओदे अगें मत्था टेकया, पर कुसे-कुसे गी शक ओया के ओ जिन्दा ओया ए। 18यीशु ने उंदे कोल आईयै आखया, “सोर्ग ते तरती दा सारा अख्त्यार मिकी दिते दा ऐ। 19एसकरी तोस जाईयै; सारें जाती दे लोकें गी मेरा चेला बनाओ; ते उनेंगी प्यो, ते पुत्तर, ते पवित्र आत्मा दे नां कन्ने पवित्रशनांन दियो, 20ते उनेंगी सब गल्लां जेड़ीयां मैं तुसेंगी उक्म दित्ता ऐ, मनना सखाओ ते दिखो, आऊँ दुनिया दे खीरी तकर मेशा थुआड़े कन्ने ऐं।”
Currently Selected:
मत्ती 28: DOG
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
