चेलै रै कम 11
11
पतरस रै द्धारा तसेरै कम्मा रा ब्योरा
1फिरी प्रेरितै अतै विस्वासी भाईये जैडा यहूदिया परदेस मन्ज हुणु कि गैर यहूदी भी प्रमात्मैं रा बचन मनी लैऊ हा। 2ता जैहणै पतरस यरूशलेम मन्ज आ, ता खतना करूरै मणु तैस सोगी बैंहसणा लगै, 3“तैंई खतना ना करूरै मणु वलै गिच्ची करी तियां सोगी खाऊ।”
4ता पतरसै शुरू थऊँ अक्क अक्क करीके तियां जो सब कणैई हुणाऊ 5“अऊँ याफा नगर मन्ज प्रार्थना करू करदा थू, अतै बेहोश भूच्ची करी अक्क दर्शन हेरू अक्क बड़ी चादर सांईयै चौं कनारै थऊँ लटकुरा, अम्बरा थऊँ ओसी करी मेरै सामणै आ। 6जैहणै मैंई तैत पुर ध्यान करू, ता धरती रै सब चौं पैरा बाळै, वणा रै पशु अतै रेगणैवाळै जन्तु अतै अम्बरा रै पक्षी हेरै; 7अतै ऐह बोल हुणु, ‘हे पतरस उठ, मार अतै खा’।”
8मैंई बल्लू, “ना प्रभु, ना; क्ओकि कोई भी अपवित्र अतै अशुद्ध चिज मेरै मुँहा मन्ज कदी भी ना गई।”
9ता अम्बरा थऊँ ऐह दुआ शब्द भुआ, “जैडा कुछ प्रमात्मैं शुद्ध ठहराऊरा, तैतिओ अशुद्ध मत बल।” 10त्राई बरी ऐसा ही भुआ; ता फिरी सब कुछ अम्बरा जो वापस चली गो। 11अतै हेरा, तैहणै ही त्राई मणु जैड़ै कैसरिया नगर थऊँ मिन्जो वलै भैजुरै थियै, तैस घरा मन्ज ईच्ची खड़ियै जैड़ी अऊँ थू। 12ता पवित्र आत्मै नि:संकोच तियां सोगी गाणै जो बल्लू, अतै ऐह छिआ भाई भी मिन्जो सोगी चली पै; अतै अहै तैस मणु रै घरा जो गै। 13तिनी असिओ दस्सु कि तिनी अक्क स्वर्गदूता जो अपणै घरै खडूरा हेरू, जिनी तैसिओ बल्लू, याफा नगर मणु भैजी करी शमौन जो जैसिओ पतरस भी बलदै हिन, हैदी लै। 14तैस तूसु सोगी ऐसी गल्ला करनी हिन, जिंआं सितै तुद अतै तेरै घरानै उद्धार पाणा।
15जैहणै अऊँ गल्ला करना लगु ता पवित्र आत्मा तियां पुर तैस तरीकै ऊतरू जिंआं शुरू मन्ज असु पुर ऊतरू थू। 16ता मिन्जो प्रभु रा ऐह बचन याद आ; जैडा तिनी बलुरा थू, “यूहन्नै ता पाणी सितै बपतिस्मा दितुरा; पर तूसु पवित्र आत्मा सितै बपतिस्मा पाणा।” 17ता जैहणै प्रमात्मैं तियां जो भी ऐह दान दिता, जैडा असिओ प्रभु यीशु मसीह पुर विस्वास करनै थऊँ मुळुरा; ता अऊँ कुण थू जैडा प्रमात्मैं जो रोकी सकदा?
18ऐह हुणी करी सो यहूदी विस्वासी चुप रैह, अतै प्रमात्मैं री बड़ाई करीके बलणा लगै कि “प्रमात्मैं गैर यहूदी जो भी अनन्त जिन्दगी तांयें मन फिराव रा दान दिता हा।”
अन्ताकिया री कलीसिया
19जैड़ै मणु तैस क्लेशा रै मारै जैडा स्तिफनुस री वजह थऊँ पेऊरा थू, तितर-बितर भूच्ची गच्छुरै थियै, सो फिरदै फिरदै फीनीके अतै साइप्रस अतै अन्ताकिया शहर मन्ज पुजै; पर यहूदी जो छड़ी होर कसी जो सुसमाचार ना हुणादै थियै। 20पर तियां मन्ज कुछ साइप्रसवासी अतै कुरैनी थियै, जैड़ै अन्ताकिया मन्ज ईच्ची करी गैर यहूदी जो भी प्रभु यीशु रै सुसमाचार री गल्ला हुणाणा लगै। 21प्रभु री शक्ति तियां सोगी थी, अतै मतै गैर यहूदी मणु विस्वास करीके प्रभु री कनारी फिरै।
22जैहणै तंयारी चर्चा यरूशलेम री कलीसिया रै हुणनै मन्ज आई ता तिन्यै बरनबास जो अन्ताकिया भैजु। 23सो तैड़ी पुजीकरी अतै प्रमात्मैं री कृपा जो हेरी करी खुश भुआ, अतै सबी जो उपदेश दिता कि तन मन लगाई करी प्रभु सितै लिपटी रेय्आ। 24सो अक्क भला मणु थू, सो पवित्र आत्मा अतै विस्वास सोगी भरूरा थू; अतै होर भी मणु प्रभु मन्ज ईच्ची मिलै।
25ता बरनबास शाऊल जो तोपणै तांयें तरसुस नगर जो चली गो। 26जैहणै सो तियां सोगी मुळु ता सो तियां जो अन्ताकिया लेई आ; अतै ऐसा भुआ कि सो अक्क साल तक कलीसिया सोगी मुलदै अतै मतै सारै मणु जो उपदेश दिन्दै रैह; अतै चेलै सबी थऊँ पैहलै अन्ताकिया मन्ज ही मसीह कहलाए।
27तियां दिन मन्ज कुछ विस्वासी जैड़ै भविष्यवक्ता थियै यरूशलेम थऊँ अन्ताकिया आये। 28तियां मन्ज अगबुस नां रै अक्की भविष्यवक्तै पवित्र आत्मा री प्रेरणा सोगी खडी करी ऐह दस्सु कि पूरै रोमी साम्राज्य मन्ज अक्क बड़ा अकाल पैणा-सो अकाल सम्राट क्लौदियुस रै टैमां मन्ज पैऊ। 29ता चेलै ऐह फैसला करू कि अपणी अपणी पूंजी रै अनुसार यहूदिया मन्ज रैहणैवाळै विस्वासी भाई री मदद तांयें कुछ पैसै भैजन। 30तिन्यै ऐसा ही करू; अतै बरनबास अतै शाऊल रै हत्थै स्याणै तांयें कुछ मदद भैजी दिती।
Currently Selected:
चेलै रै कम 11: GBKNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
