चेलै रै कम 17
17
थिस्सलुनीके नगरा मन्ज
1पौलुस अतै सीलास अम्फिपुलिस अतै अपुल्लोनिया शहर मितै भूच्ची करी थिस्सलुनीके शहर मन्ज आये, जैड़ी यहूदी रा अक्क सभागार थू। 2पौलुस अपणै रीति रै अनुसार तियां बलै गो, अतै त्राई विश्रामदिन पवित्रग्रन्था थऊँ तियां सोगी वाद-विवाद करू; 3अतै तंयारा अर्थ खोली-खोली करी तियां जो समझांदा थू मसीह जो दुख उठाणा; अतै मरूरै थऊँ जी भूणा, जरूरी थू; अतै “ऐह ही यीशु जसेरी अऊँ उदाहरण हुणाऊ करदा, मसीहा हा।” 4तियां मन्ज कैतनै यहूदी, भक्त यूनानी, अतै मती सारी कुलीन जनानी विस्वास करी लैऊ, अतै पौलुस अतै सीलास सोगी मिली गै।
5पर यहूदी मणुऐ डाह सितै भरी के बजारू मणु थऊँ कुछ बुरै मणु जो सोगी लैऊ, अतै भीड़ इकट्ठी करीके नगरा मन्ज दंगा करनै लगै, अतै यासोन रै घरा पुर हमला करीके पौलुस अतै सीलास जो मणु सामणै अणना चाऊ। 6सो तियां जो तैड़ी ना मुळै ता सो बकदै बकदै यासोन अतै कुछ विस्वासी भाई जो नगरा रै हाकमा रै सामणै खिन्जी लेई आये, अतै बलणा लगै “ऐह मणु जिन्यैं संसार मन्ज हंगामा करी दितुरा, सो ऐठीआ जो भी चली आये हिन। 7यासोन तियां जो अपणै घरै ठहराऊरा हा। ऐह सबी रै सब बलदै हिन कि यीशु ही राजा हा, अतै सम्राट कैसर रै हूक्मा रा विरोध करदै हिन।” 8तिन्यै मणु जो अतै नगरा रै हाकमा जो ऐह हुणाई करी डराई दिता। 9ठेरैतांये तिन्यै यासोन अतै बाकी मणु जो जमानत लेई करी छड़ी दिता।
बिरीया नगरा मन्ज
10विस्वासी भाईये झट राती ही पौलुस अतै सीलास जो बिरीया शहर जो भैजी दिता; अतै सो तैड़ी पुजीकरी यहूदी रै सभागार मन्ज गै। 11ऐह मणु ता थिस्सलुनीके शहर रै यहूदी थऊँ भलै थियै, अतै तिन्यै बड़ी लालसा सितै बचना जो ग्रहण करू, अतै रोज पवित्रग्रन्था मन्ज इन्या गल्ला जो तोपदै कि इन्या ही लिखुरी हिन कि ना। 12ठेरैतांये तियां मन्ज मतै अतै यूनानी कुलीन जनानी थऊँ अतै मतै मणु थऊँ विस्वास करू।
13पर जैहणै थिस्सलुनीके शहर रै यहूदी जाणी गै कि पौलुस बिरीया शहर मन्ज भी प्रमात्मैं रा बचन हुणान्दा, ता सो तैड़ी ईच्ची करी मणु जो उकसाणा अतै हलचल मचाणा लगै। 14ता विस्वासी भाईये झट पौलुस जो विदा करू कि समुंद्र रै कनारै चली गा; पर सीलास अतै तीमुथियुस तैठिये ही रैह। 15पौलुस जो पुजाणै बाळै तैसिओ एथेंस शहर तक लेई गै; अतै सीलास अतै तीमुथियुस तांयें ऐह आज्ञा पौलुस थऊँ लेई करी फिरी कि सो झट थऊँ झट तैस बलै ईन।
एथेंस नगरा मन्ज
16जैहणै पौलुस एथेंस शहर मन्ज तंयारी भाळ करू करदा थू, ता नगर जो मूर्ति सितै भरूरा हेरी करी तसेरा जी जळी गो। 17ठेरैतांये सो यहूदी रै सभागार मन्ज यहूदी अतै भक्ता सितै, अतै चौका मन्ज जैड़ै भी मणु तैस सोगी मुळदै थियै तियां जो यीशु रै बारै मन्ज दसदा थू। 18पौलुस कुछ ऐसै विद्धाना सोगी मुळु जियां जो इपिकूरी अतै स्तोईकी बलदै थियै, ता सो कुछ तैस सोगी तर्क करना लगै, अतै कुछ बलणा लगै, “ऐह बकवादी कै कणैणा चाहन्दा?” पर कुछ बलणा लगै, “ऐह होरी देवता रा प्रचारक लगू करदा” क्ओकि सो यीशु रै अतै दोबारा जी भूणै रा सुसमाचार हुणान्दा थू। 19ता सो तैसिओ अपणै सोगी अरियुपगुस नां री यहूदी सभागार मन्ज लेई गै अतै पूछु, “कै अहै जाणी सकदै हिन कि ऐह नोई शिक्षा जैड़ी तू हुणाऊ करदा कै चिज हा? 20क्ओकि तू अनोखी गल्ला असिओ हुणाऊ करदा, ठेरैतांये अहै जाणना चाहन्दै कि ठेरा मतलब कै हा।” 21(ठेरैतांये कि कई एथेंसवासी अतै परदेसी जैड़ै तैड़ी रैहन्दै थियै, नोई नोई गल्ला करना अतै हुणनै रै अलावा हौ कोई कम ना करदै थियै।)
अरियुपगुस री सभा मन्ज पौलुस रा भाषण
22ता पौलुसै अरियुपगुस सभागार मन्जै खड़ी करी बल्लू, “हे एथेंस रै मणुओ, अऊँ हेरदा कि तुहै हर गल्ला मन्ज देवता जो बड़ै मनणैवाळै हिन। 23क्ओकि अऊँ घुमंदै घुमंदै तून्दै पूजा री चिजा जो हेरू करदा थू, ता अक्क ऐसी वेदि हेरी, जैत पुर लिखुरा थू, ‘अनजाणै ईश्वर तांयें।’ ठेरैतांये जैसिओ तुहै बिना जाणै पुजदै हिन, अऊँ तुसिओ तसेरा समाचार हुणान्दा।”
24“जिनी प्रमात्मैं धरती अतै सब चिजा जो बणाऊरा, सो स्वर्ग अतै धरती रा स्वामी भूच्ची करी, हत्था रै बणाऊरै मन्दरा मन्ज ना रैहन्दा;#1 राजा 8:27; 2 इति. 6:18; भज. 146:6. 25ना कसी चिजा री जरूरता रै अनुसार मणु रै हत्था री सेवा लैन्दा, क्ओकि सो अप्पू ही सबी जो जिन्दगी अतै सांस अतै सब कुछ दिन्दा।#यशा. 42:5; भज. 50:12; भज. 50:12. 26तिनी शुरू मन्ज अक्क ही जोडै थऊँ मणु री सब जाति पूरी धरती पुर रैहणै तांयें बणाई; अतै कुण जाति अतै कुण भाषा कड़ी रैहणी तिनी ही फैसला करूरा,#व्य. 32:8. 27प्रमात्मैं ऐसा करू कि मणु प्रमात्मैं जो तोपन, अतै टटोलीकरी पान भी, तांभी प्रमात्मां असु कसी थऊँ भी दूर निय्आ।#यशा. 55:6; यिर्म. 23:23. 28क्ओकि अहै तैस मन्ज ही जिन्दै रैहन्दै हिन, चलदै-फिरदै अतै स्थिर रैहन्दै हिन; जिंआं तून्दै कैई कविये भी बलुरा, ‘अहै ता तसेरै ही वंशज हिन’।”
29“ठेरैतांये प्रमात्मैं रै औलाद भूच्ची करी असिओ ऐह समझणा ठीक निय्आ कि ईश्वरत्व सोनै, रूप या पत्थर सांईयै हा, जैड़ै मणु री कारीगरी अतै कल्पना सितै बणाऊरै हिन।#उत्प. 1:27; यशा. 40:18-20; यशा. 44:10-17. 30ठेरैतांये प्रमात्मैं मणु री अज्ञानता रै टैमां पुर ध्यान ना दितुरा, पर अबै हर जगह सब मणु जो मन फेराणै रा हूक्म दिन्दा हा। 31क्ओकि तिनी अक्क दिन ठहराऊरा हा, जैत मन्ज तैस मणु रै द्धारा धर्म रै संसार रा न्याय करना, जैसिओ तिनी बणाऊरा, अतै तैसिओ मरूरै थऊँ जियाई करी ऐह गल्ल सबी मणु पुर प्रमाणित करी दिती हा।”#भज. 9:8; भज. 72:2-4; भज. 96:13; भज. 98:9; यशा. 2:4.
32मरूरै थऊँ दोबारा जीणै री गल्ला हुणी करी कुछ मजाक करना लगै, अतै कुछ बलणा लगै, “ऐह गल्ल अहै तिजो थऊँ फिरी कदी हुणलै।” 33ता पौलुस तंयारै मन्जै थऊँ नकैई गो। 34पर कुछ मणु तैस सोगी मिली गै, अतै प्रभु पुर विस्वास करू; जिंआं मन्ज दियुनुसियुस जैडा अरियुपगुस रा सदस्य थू, अतै दमरिस नां री अक्क जनानी थी, अतै तियां सोगी होर भी मतै मणु थियै।
Currently Selected:
चेलै रै कम 17: GBKNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
