यूहन्ना 12
12
यीशु रै पैरा पुर इत्र मलणा
(मत्ती 26:6-13; मरकुस 14:3-9)
1यीशु फसह रै त्यौहार थऊँ छिया दिन पैहलै बैतनिय्याह ग्राँ मन्ज आ जैड़ी लाजर थू, जैसियो यीशुऐ मरुरै थऊँ जीयाऊ थू। 2तैड़ी तियैं यीशु तांयें धाम बणाई; अतै मार्था तसेरी सेवा लगुरी थी, अतै लाजर भी तियां सबी सोगी धाम खाणा बैहुरा थू। 3तैहणै मरियमें अध्धा सेर किमती इत्र लेई करी यीशु रै पैरा मन्ज ड़ोळी करी मळु अतै अपणै बाळा सितै पैर पुन्जै; अतै तैस इत्र री मुसकी सितै पुरा घर खुश्बुदार भूच्ची गो।
4पर तसेरै चेलै मन्ज यहूदा इस्करियोती नां रा अक्क चेला जैडा तैसिओ पकडाणै बाळा थू, बलणा लगा, 5“ऐह इत्र ता त्राई सो दीनार मन्ज बेचीकरी गरीबा जो कजो ना दिता?” 6तिनी ऐह गल ठेरैतांये ना बली की गरीबा री चिन्द थी, पर ठेरैतांये की सो चोर थू, अतै तैस बलै अक्क थैली भुन्दी थी अतै तैत मन्ज जैडा कुछ भी पान्दै थियै सो कड़ी लैन्दा थू।
7यीशुऐ बल्लू, “ऐसा जो रैहणा देय्आ। ऐसै जैड़ा ऐह करू हा ऐह मेरै दफनाणै रै दिना री तैयारी पैहलै थऊँ ही करी हा। 8क्ओकि गरीब ता तूसु सोगी सदा रैहन्दै हिन, पर मुँ तूसु सोगी सदा ना रैहणा।”#मर. 14:7.
लाजर जो मारनै रा षड्यन्त्र
9जैहणै यहूदी मणु री भीड़ जो पता लगू कि यीशु बैतनिय्याह ग्राँ मन्ज हा। ता सो ना सिर्फ यीशु री वजह थऊँ तैड़ी आये, पर लाजर जो भी हेरना आये, जैसियो तिनी मरूरै थऊँ जिआऊरा थू 10ता प्रधान याजकै लाजर जो भी मारनै री योजना बणाई। 11क्ओकि तसेरी वजह थऊँ मतै सारै यहूदी मणु चली गै अतै यीशु पुर विस्वास करू।
यरूशलेम मन्ज विजय प्रवेश
(मत्ती 21:1-11; मरकुस 11:1-11; लूका 19:28-40)
12दूये दिन मतै मणुऐ जैड़ै तैस त्यौहारा मन्ज छुरै थियै ऐह हुणु कि यीशु यरूशलेम मन्ज ईणा लगुरा। 13ठेरैतांये तियैं खजूर री डाळी लेई अतै तैस सोगी मुळन तांयें चली पै, अतै चिल्लाणा लगै,
“जय जयकार!
धन्य इस्त्राएल रा राजा,
जैडा प्रभु रै नां थऊँ इन्दा हा।”#भज. 118:25-26.
14जैहणै यीशु जो गदहै रा अक्क बच्चा मूलु; ता सो तैस पुर बैही गो, अतै यरूशलेम शहरा जो आ। अतै जिंआ पवित्रग्रन्थ मन्ज लिखुरी हा,
15“हे सिय्योन री बेटी,
मत डर;
हेर, तेरा राजा गदहै रै बच्चै पुर
चड़ी करी चली आ हा।”#जक. 9:9.
16यीशु रै चेलै पैहलै ऐह गल्ल ना समझै थियै, पर जैहणै यीशु रै चमत्कार हेरै ता तियां जो याद आई कि जैड़ी गल्ला तसेरै बारै मन्ज लिखुरी थी अतै मणुऐ भी तैस सोगी ईना ही वर्ताव करूरा।
17ता तैहै मणु री भिड़ै तसेरी गवाही दिती, जैड़ै तैस टैमैं तैस सोगी थियै जैहणै तिनी लाजर जो क्रब थऊँ हैदी करी मरूरै थऊँ जीयाऊ थू। 18ठेरी वजह थऊँ ही मणु तैस सोगी मुळना चली आये थियै क्ओकि तियैं ऐह हुणु थू कि तिनी ऐह चमत्कार करू हा। 19ता फरीसी अप्पू मन्ज कणैणा लगै, “सोचा असु थऊँ कुछ ना भूच्छु करदा। हेरा संसारा रै मतै मणु ऐस पिचो भूणा लगुरै।”
यूनानी यीशु जो तोपणा लगै
20जैड़ै मणु तैस त्यौहारा मन्ज भजन करना छूरै थियै तियां मन्ज कुछ यूनानी मणु भी थियै। 21तियैं गलील रै बैतसैदा रै रैहणै बाळै फिलिप्पुस बलै ईच्ची करी तैस सोगी बिनती करी, “श्रीमान, अहै यीशु सोगी मुलणा चाहन्दै हिन।” 22फिलिप्पुसे ईच्ची करी अन्द्रियास सोगी बल्लू, ता अन्द्रियास अतै फिलिप्पुसे गिच्ची करी यीशु सोगी बल्लू,।
23ता यीशुऐ तियां सोगी बल्लू, “सो टैमं चली आ की मणु रै पुत्रा री जय जयकार भोआ। 24अऊँ तूसु सोगी सच बलदा कि जैहणै तक कणका रा दाणा जमीना मन्ज पैई करी मरी ना गान्दा, सो अकेला रैहन्दा हा, पर जैहणै मरी गान्दा, ता मता फल लैईन्दा हा। 25जैडा अपणै प्राणा जो बडा प्यारा जाणदा, सो तैस खोई दिणै; अतै जैडा ऐस संसारा मन्ज अपणै प्राणा जो प्यारा ना जाणदा, तैस अनन्त जिन्दगी तांयें तठेरी रक्षा करनी हा। 26अगर कोई मेरी सेवा करा, ता मेरै पिचो चला, अतै जैड़ी अऊँ हा, तैड़ी मेरा दास भी भूणा। अगर कोई मेरी सेवा करा, ता पितै तसेरा आदर करना।
क्रूस री मौती री कनारी इशारा
27“अबै मेरा मन बड़ा परेशान हा। ठेरैतांये अबै अऊँ कै बल्लू? ‘हे पिता, मिन्जो ऐस टैमां थऊँ बचा?’ क्ओकि अऊँ ऐस संसारा मन्ज दुख सैहणै तांयें ही छूरा। 28हे पिता, अपणै नां री महिमा जो प्रकट कर।” तैहणै अम्बरा थऊँ ऐह आकाशवाणी भूई, “मैंई अपणी महिमा जो प्रकट करूआ, अतै होर भी करनी हा।” 29ता जैड़ै खडुरै मणु हुणु करदै थियै ता तियैं बल्लू कि बदळ गरूजू हा। होर बलणा लगै, “कोई स्वर्गदूत ऐस सोगी कणैऊ हा।”
30ता यीशुऐ बल्लू, “ऐह बोल मेरै फायदै तांयें ना पर तून्दै फायदै तांयें ही हा। 31अबै ऐस संसार रा न्याय भूणा, अतै शैतान जो कड्ड़ी दिणा जैडा ऐस संसारा रा हाक्म हा; 32अतै अगर अऊँ धरती थऊँ उच्चै पुर चढाया गाणा, ता सबी जो अप्पू बलै खिंजणा हा।” 33ऐह बली करी तिनी ऐह दस्सु कि तैस किन्नी मौती मरना हा।
34ऐह हुणी करी मणुऐ बल्लू, “अहै पवित्रग्रन्था री गल्ला हुणुरी हिन कि मसीह सदा रैहणा हा, फिरी तू कजो बलदा हा कि मणु रै पुत्रा जो ऊचै पुर चढ़ाया गाणा जरूरी हा? ऐह मणु रा पुत्र कुण हा?”#दानि. 7:14.
35यीशुऐ तियां सितै बल्लू, “ज्योती अबै थोड़ी देरा तक तूसु सोगी हा। जैहणा तिकर ज्योती तूसु सोगी हा तैहणा तक चली रेय्आ, ईयां ना भोआ कि नैहरा ईच्ची करी तुसिओ घेरी लेय्आ; जैडा नैहरै मन्ज चलदा सो ना जाणदा कि करा चलूरा। 36जैहणै तक ज्योती तूसु सोगी हा, ज्योती पुर विस्वास रखा ताकि तुहै ज्योती री औलाद बणन।”
ऐह गल्ला करीके यीशु चली गो अतै तियां थऊँ लूकी रैऊ।
यहूदी मणु विस्वास ना करू
37यीशुऐ मणु सामणै ऐतनै चमत्कार करै, तांभी तियैं तैस पुर विस्वास ना करू; 38ऐह ठेरैतांये भूआ ताकि यशायाह भविष्यवक्ता रा बचन पुरा भोआ जैडा तिनी बलुरा थू
“हे प्रभु, इन्दै सुसमाचार पुर कुणी विस्वास करू हा?
अतै प्रभु रा जोर कुणी हेरू हा?”#यशा. 53:1.
39ठेरी वजह थऊँ सो विस्वास ना करी सकै, क्ओकि यशायाह ऐह भी बलुरा हा
40“तिनी तंयारी हाख्री अंधी,
अतै मन कठोर करी दितुरा हा;
करखी ऐसा ना भोआ कि सो हाख्री सितै हेरन,
अतै मना सितै समझन,
अतै फिरन, अतै अऊँ तियां जो चंगा करूं।”#यशा. 6:10.
41यशायाह ऐह गल्ला ठेरैतांये बली कि तिनी तसेरी भविष्य मन्ज भूणैबाळी महिमा हेरी, अतै तसेरै बारै मन्ज गल्ला करी। 42तांभी हाकमा मन्ज भी मतै तैस पुर विस्वास करू, पर फरीसी री वजह थऊँ सामणै ना मन्दै थियै, क्ओकि सो सोचदै थियै कि ऐसा ना भोआ कि तियां जो यहूदी रै सभागार थऊँ कड्ड़ी दीन। 43क्ओकि मणु री तरफा थऊँ तारीफ तियां जो प्रमात्मैं री तारीफ थऊँ ज्यादा खरी लगदी थी।
यीशु रै बचन : न्याय रा आधार
44यीशुऐ जोरा सितै बल्लू, “जैडा मिन्जो पुर विस्वास करदा, सो मिन्जो पुर ना मगर मेरै भैजणै बाळै पुर विस्वास करदा हा। 45अतै जैडा मिन्जो हेरदा, सो मेरै भैजणै बाळै जो हेरदा। 46अऊँ संसारा री ज्योती बणी करी छूरा, ताकि जैडा कोई मिन्जो पुर विस्वास करा सो नैहरै मन्ज ना रेय्आ।”
47“अगर कोई मेरी गल्ला हुणी करी ना मना, ता अऊँ तैसिओ दोषी ना ठहरान्दा; क्ओकि अऊँ संसारा रै मणुओ दोषी ठहराणा ना छूरा, पर ईयां जो बचाणै तांयें छूरा हा। 48जैडा मिन्जो तूछ जाणदा अतै मेरी गल्ला ग्रहण ना करदा तैसिओ दोषी ठहराणै बाळा ता अक्क ही हा; मतलब जैडा बचन मैंई बल्लू हा, तैस ही न्याय रै दिना मन्ज तैसिओ दोषी ठहराणा। 49क्ओकि मैंई अपणी तरफा थऊँ गल्ला ना करी, पर पिता जिनी मिन्जो भैजुरा तिनी ही मिन्जो हूक्म दितुरा हा कि अऊँ कै बल्लू अतै कै कै कणैऊ? 50अतै अऊँ जाणदा कि तसेरा हूक्म मनणै थऊँ अनन्त जिन्दगी हा। ठेरैतांये अऊँ जैडा कुछ बलदा, सो जैडा पितै मिन्जो सोगी कणैऊ तियां ही बलदा हा।”
Currently Selected:
यूहन्ना 12: GBKNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
