लूका 10

यीशुऐ सत्तर चेलै होर भैजै

1ईयां गल्ला थऊँ बाद प्रभु यीशुऐ सत्तर#10:1 कुछ हस्तलेख मन्ज ऐह चेलै री गिणती सत्तर ना पर बहत्तर हा। होर चेलै चुणै अतै जैस-जैस नगरा अतै जगहा जो सो अप्पू गाणै बाळा थू तैस कनारी तिआंओ दोई-दोई करीके अप्पू अगो भैजै। 2तिनी तियां जो भैजणै थऊँ पैहलै वल्‍लु, “फसल ता बड़ी पक्की गछुरिआ पर कम कमाणै बाळै मजदूर थोड़ै हिन। ठेहरै तांयें खेता रै मालका सितै ऐह बिनती करा कि सो तैहा फसला री बड़ाई तांयें कम कमाणै बाळै मजूरा जो भैजा। 3अबै गच्छा, अऊँ तुसिओ भैड़ा साईयें भेड़िये रै मन्जै भैजु करदा। 4ठेरैतांये तुसै अप्पू सोगी ना पैसा, ना झोल्ळू अतै ना ता जुटै लैं अतै ना ता बता मन्ज कसिओ नमस्ते करै।”#मत्ती 10:9; 2 राजा 4:29.

5जैस कसी रै घरै तुहै प्रवेश करलै, ता सबी थऊँ पैहलै बलै कि, “ऐस घरा मन्ज आशीष भोआ।” 6जे तैठी कोई ईना मणु भुला जैड़ा शान्ती जो चाहणै बाळा भोला, ता तूसु थऊँ शान्ती तैसिओ मुळणिआ, ना ता तूसु वलै फिरी ईणिआ। 7तुसै तैस ही घरा मन्ज रैहन अतै जैडा कुछ तियां थऊँ मुळना तैस ही खायें-पियें, क्ओकि मजदूरा जो तसेरी मजदूरी मुळना चहिन्दीआ। तुसै घरै-घरै मत नचदै।

8जैस भी नगरा मन्ज तुहै गाहन अतै तैठी रै मणु तुसिओ अपणै घरै इजत मान दीन अतै सो जैडा कुछ भी तून्दै मुँहा अगो रखन तैतिओ ही खायें। 9तैठिया रै बीमारा जो ठीक करै अतै तिआंओ वल्‍लैं, “प्रमात्मैं रा राज्य तूसु नेड़ै ईच्ची रैऊआ।” 10पर जैस नगरा मन्ज तुहै गाहन अतै तैठिया रै मणु तून्दा इजत मान ना करन ता, बजारा मन्ज गिच्ची करी वल्‍लैं, 11“तुदैं नगरा री धूड भी जैड़ी इन्दै पैरा मन्ज लगुरीआ, अहै तुदैं सामणै ही झाड़ी दिन्दै फिरी भी ऐह जाणी लेय्आ कि प्रमात्मैं रा राज्य तून्दै नेड़ै ईच्ची रैऊआ। 12अऊँ तुसिओ बलदा कि तैस दिन ऐस नगरा री हालत सदोम री हालत थऊँ भी ज्यादा रूणै-पिटिणै बाळी भुणीआ।”#उत्प. 19:24-25.

अविस्वासी नगरा जो धिक्कारना

(मत्ती 11:20-24)

13“हाय खुराजीन! अतै हाय बैतसैदा! मन्ज रैहणै बाळै मणुओ जैड़ै सामर्थ रै कम तूसु मन्ज करूरै हिन, अगर सूर अतै सैदा मन्ज रैहणै बाळै तांई करदा ता, सो मणु टाट लपेटी करी, अतै धूड़ी मन्ज बैही करी, अपणै मना फेरी लैन्दै। 14पर हाँ न्याय बाळै दिन सूर अतै सैदा री दशा तूसु थऊँ खरी समझी गाणीआ।#योए. 3:4-8; जक. 9:2-4. 15अतै हे कफरनहूम रै मणुओ, कै तुसिओ स्वर्ग मुळना? तूसु ता अधोलोक तिकर पुजणा।”#यशा. 14:13-15.

16जैडा तुन्दी हुणदा हा, सो मेरी हुणदा अतै जैडा तुसिओ ठुकरांदा, सो मिन्जो ठुकरांदा अतै जैडा मिन्जो ठुकरांदा, सो मिन्जो ही ना पर मेरै भैजणै बाळै जो ठुकरांदा।

सत्तर चेलै रा फिरी ईणा

17जैहणै सो सत्तर चेलै फिरी आये ता बड़ी खुशी सितै बलणा लगै, “हे प्रभु, तेरै नां सितै दुष्‍टात्मा भी ईन्दा कणैऊरा मन्दी हिन।”

18यीशुऐ तिआंओ वल्‍लु, “ठीक हा, अऊँ शैतान जो बिजळी साईए स्वर्गा थऊँ पैंदा हेरू करदा थू।#प्रका. 12:7-9; यशा. 14:12. 19हेरा, मैंई तुसिओ कीड़ै-बिच्छु जो दरड़णै रा अतै शैतान री ताकता पुर राज्य करनै रा हक्क दितुरा अतै कसी भी चिजा सितै तुसिओ कोई नूकसान ना भूणा।#भज. 91:13. 20फिरी भी ऐसा गल्ला थऊँ खुश मत भोआ कि दुष्‍टात्मा तुदैं वशा मन्ज हिन पर ठेरैतांये खुश भोआ कि तून्दै नां स्वर्गा मन्ज लिखुरै हिन।”

यीशु रा खुश भूच्ची करी प्रमात्मैं रा गुणगान करना

(मत्ती 11:25-27; 13:16,17)

21तैस ही टैमैं यीशु पवित्र आत्मा सितै भरी करी खुश भुच्‍ची करी बलणा लगु, “हे पिता, स्वर्ग अतै धरती रै मालका अऊँ तून्दा सूकर करदा कि तुहै इआं गला जो ज्ञानी अतै समझदारा थऊँ लुकैरी रखूरा अतै बच्चै पुर प्रकट करू हा। हाँ, हे पिता, क्ओकि तुसिओ ऐह ही खरा लगदा। 22मेरै पितै मिन्जो सब कुछ दितुरा हा अतै पितै रै अलावा कोई ना जाणदा कि पुत्र कुणआ अतै पुत्रा रै अलावा कोई ना जाणदा कि पिता कुणआ अतै सो मणु जाणदा जैस पुर पुत्र प्रकट करना चाहा।”

23ता यीशुऐ चेलै री कनारी फिरी करी सिर्फ तियां सितै वल्‍लु, “धन्य हिन सो हाख्री जियें ऐह सब कुछ हेरूआ। 24क्ओकि अऊँ तुसिओ बलदा कि मतै भविष्‍यवक्ता अतै राजै ऐह चाँऊ कि जैड़ी गल्ला तुहै हेरी, तियां अहै भी हेरन पर हेरी ना सकै अतै जैड़ी गला तुहै हुणदै तैतिओ अहै भी हुणन पर सो ना हुणी सकै।”

दयालु सामरी रा उदाहरण

25अक्क दिन जैहणै यीशु शिक्षा दिणा लगुरा थू ता अक्क शास्त्री ऊठु अतै ऐह पुच्छी करी यीशुओ अजमाणा लगु, “हे गुरू अनन्त जिन्दगी पाणै तांयें अऊँ कै करू?” 26ता यीशुऐ तैस थऊँ पूच्छु, “मूसा री व्यवस्था मन्ज कै लिखुरा? तू तैतिओ पढ़ी करी कै समझदा?” 27ता तिनी जवाव दिता, “तू अपणै प्रभु अपणै प्रमात्मैं सितै अपणै पूरै मनां, आत्मा, शक्ति अतै अपणी बुद्धि सितै प्रेम कर अतै अपणै पड़ेही सोगी अप्पू सैईं प्रेम कर।”#मत्ती 22:37-40; व्य. 6:5; व्य. 10:12; यहो. 22:5.

28यीशुऐ तैसिओ वल्‍लु, “तैंई ठीक जवाव दिता, इआं ही करदा रैह कि तू अनन्त जिन्दगी पा।”#लैव्य. 18:5.

29पर तिनी अपणै आपाओ बड़ा धर्मी समझी करी यीशु थऊँ पूच्छु, “ता तुहै मिन्जो ऐ दस्सा मेरा पड़ेही कुण हा?”

30यीशुऐ जवाव दिता, “हुण! अक्क मणु यरूशलेम थऊँ यरीहो नां रै शहरा जो चलूरा थू कि लुटेरै सो लुटी लैऊ, तसेरै कपड़ै खुस्सी लै अतै मारी-मारी अधमरा करीके फड़ाई गै। 31ता थोड़ी देरा बाद तैहा बता मितै अक्क यहूदी याजक आ तिनी तैसिओ हेरी अतै मुँहा फेरी करी चली गो। 32ऐस तरीकै अक्क लेवी तैहा बता मितै आ तिनी भी सो मणु हेरी करी अणहेरा करी दिता अतै चली गो। 33पर कै भुआ कि अक्क सामरिया जगह रा सामरी मणु तैहा वतै-वत आ अतै तैस अधमरै मणु जो हेरी करी तैस पुर तरस खाऊ। 34तिनी तैस वलै ईच्ची करी तसेरै जख्मा जो धोई करी तेल मळु अतै दवा वूटि लगाई करी पट्टी वनी दिती अतै अपणै गदहै पुर लदी करी अक्की सरांई जो लेई गो अतै तसेरी देखभाल करी। 35दूये दिन तिनी सरांई रै मालका जो पैहै दिकरी वल्‍लु, सेरी हेर-हुण करदा रै अतै जे ज्यादा खर्चा भूच्ची गाला ता अऊँ फिरी करी दी दिला।”

36ता यीशुऐ तैस थऊँ पूच्छु, “अबै मिन्जो ऐह दस्स जैडा मणु लुटेरै लुटूरा थू, इआं त्रिहणी मणु मन्ज कुण जिन्‍ना तसेरा पड़ेही भोला?”

37तिनी जवाव दिता, “तसेरा पड़ेही ता सोई भुआ जिनी तैस पुर दया दस्सी।” ता यीशुऐ वल्‍लु, “गा, तू भी इआं ही कमाऊ कर।”

मार्था अतै मरियम रै घरै यीशु

38फिरी चलदै-चलदै यीशु अतै तसेरै चेलै अक्की ग्राँ मन्ज आ, तैस ग्राँ मन्ज मार्था नां री अक्क जनानी यीशु जो अपणै घरा जो लेई गई। 39मरियम नां री तहारी अक्क बैहण भी थी, अतै सो मरियम यीशु रै पैरा वलै बैही करी तसेरै बचना हुणना लगी। 40पर मार्था सेवा करदी-करदी परेशान भूच्ची गई अतै यीशु बलै ईच्ची करी बलणा लगी, “हे प्रभु कै तिजो मेरी कुछ भी चिन्‍द निआं कि मेरी बैहणी मिन्जो सेवा करनै तांयें अकेला छड़ी दितुरा? अबै ऐसाओ बल्ला कि मेरी मदद कर।”

41प्रभु यीशुऐ तैहाओ जवाव दिता, “मार्था, ओ मिऐ मार्था, तू बड़ी गला री चिन्‍द करदी हा अतै परेशान भुन्‍दीआ। 42पर अक्क गप्‍प जरुरआ कि, जैड़ी खरी गल्ला मरियमें चुणी लैऊरी तियां गल्ला ऐसा थऊँ कोई ना खुस्सी सकदा।”

Currently Selected:

लूका 10: GBKNT

Highlight

Copy