शधाणूं 15
15
येरुशलेम नगरीए सभा
1पल़सी और बरनबास आसा तै सिरीया लाक्कै अन्ताकिया नगरी और कई लोग आऐ यहूदा लाक्कै का तिधा लै। संघा लागै तिंयां विश्वासी भाई का इहअ सखाऊंदै, “ज़ै मुसा गूरे रिती रबाज़े साबै थारअ खतैर नांईं होए तै निं तम्हां उद्धार हई सकदअ।” (लेबी बधान 12:3)
2पल़सी और बरनबास निं तिन्नें एसा गल्ला लै राज़ी हुऐ और तिन्नैं की हठ कि अह गल्ल आसा गलत। खिरी हुऐ सोभ एसा गल्ला लै राज़ी कि पल़सी, बरनबासा संघै डेओआ हाम्हां मांझ़ै कई होर भाई एसा गल्ले बारै फैंसलै लै येरुशलेम नगरी लै शधाणूं और विश्वासी मंडल़ीए सैणैं सेटा लै।
3तेखअ छ़ाडै तिंयां विश्वासी मंडल़ी येरुशलेम नगरी लै और तिंयां दैनै बाता खास्सै दूर तैणीं पजैल़ी। तेखअ नाठै तिंयां फिनाका नगरी और सामरी लाक्कै बाती विश्वासी भाई सेटा। तिन्नैं खोज़अ तिन्नां का कि बडी भारी खुशीए गल्ल आसा कि होरी ज़ातीए लोग बी सका परमेशरा सेटा एछी।
4ज़ांऊं तिंयां येरुशलेम नगरी पुजै ता विश्वासीए मंडल़ी, शधाणूं और विश्वासी मंडल़ीए सैणैं मिलै तिन्नां संघै बडी भारी खुशी संघै। तिन्नैं बी खोज़अ कि परमेशरै तिन्नां संघै रही करै किहै-किहै काम किऐ। 5पर फरीसी लोगे पंथा का ज़ुंण विश्वासा दी आऐ तै, तिन्नां मांझ़ै बोलअ कई इहअ, “ज़ुंणी होरी ज़ाती मांझ़ै विश्वास किअ तिन्नां लै दैणअ खतैर करनै और मुसा गूरे बधान मनणैंओ हुकम ज़रूरी।”
6तेखअ हुऐ शधाणूं और विश्वासी मंडल़ीए सैणैं एसा गल्ले बारै बच़ारा करदै कठा। 7खास्सै हठल़णैं का बाद बोलअ पतरसै खल़ै उझ़ुई करै तिन्नां सोभी लै,
“भाईओ, तम्हां का आसा थोघ कि खास्सै धैल़ै गऐ तेसा गल्ला बिती कि परमेशरै छ़ांटअ तम्हां मांझ़ै हुंह कि मुखा होर ज़ाती बी खुशीओ समाद शूणीं करै विश्वास करे। 8मनें गल्ला परखणैं आल़ै परमेशरै दैनी तिन्नां लै बी हाम्हां ई ज़ेही पबित्र आत्मां दैई करै तिन्नें गवाही।
9“विश्वासा करै तिन्नें मन शुचै करी करै निं परमेशरै हाम्हां और तिन्नां दी किछ़ै फरक डाहअ। 10ता ऐबै किल्है आसा तम्हैं लागै दै परमेशरा परखदै? तम्हैं किल्है लाअ होरी ज़ाती का आऐ दै इना विश्वासी भाईए कैल़ै इहअ जूँ पाई ज़हा नां म्हारै पित्तर च़की सकै और नां हाम्हैं च़की सकदै?
11“पर हाँ, म्हारअ आसा इहअ विश्वास कि ज़ेऊ साबै तिन्नां प्रभूए जशा दी उद्धार भेटणअ, तेऊ ई साबै भेटणअ हाम्हां बी मसीहा ईशू दी विश्वास करी करै! म्हारअ उद्धार निं बधाना करै हणअ।”
12सभा दी बेठै दै सोभ लोग लागै शांत हई करै बरनबास और पल़सीए गल्ला शूणैं कि परमेशरै तिन्नां करै होरी ज़ाती दी किहै-किहै नछ़ैण और नुआहरै काम किऐ। 13पल़सी और बरनबास ज़ांऊं बोली मुक्कै ता याकूब लागअ इहअ बोलदअ,
“भाईओ, 14मेरी गल्ला शूणां, शमौन पतरसै आसा हेरअ द तम्हां का खोज़ी कि ज़धू सह पैहली बारी होरी ज़ाती सेटा नाठअ तधू परमेशरै तिन्नां लै केही बर्गत दैनी कि तिन्नां मांझ़ै बी छ़ांटै आप्पू लै लोग। 15एता संघै ज़ुल़ा परमेशरे गूरै बोली दी ईंयां गल्ला; ज़िहअ शास्त्रा दी आसा लिखअ द, (यिर्मयाह 12:15; याशायाह 45:21; आमोस 9:9-12)
16‘आजू दैणअ मुंह दाबेदे पोस्ती का एक राज़अ।
सह हणअ इहअ ज़िहअ कुंण तेऊ घरे मेटा भी च़िणें ज़ुंण बसेरअ ढोल़ी आसा पाअ द।
17मुंह करनअ इहअ एते तैणीं कि,
होरी ज़ातीए मणछ बी मुंह सेटा लै एछे ज़हा दी मेरै नांओंए छ़ाप आसा लागी दी।
18ऐहा गल्ला बोला सह ई प्रभू
ज़ुंण संसारे मूल़ का इना गल्लो समादा खोज़दअ आसा लागअ द।’
19“तै आसा मेरअ इहअ बच़ार कि होरी ज़ाती का बी ज़ुंण लोग परमेशरा बाखा लै फिरा, तिन्नां लै निं दुख दैआ। 20पर तिन्नां लै दैआ इहअ समाद लिखी कि तिंयां मुर्ति लै बल़ी किऐ दै मासा और लोहू का और गल़ा का मरोक्कै दै मासा का और कंज़रैई का रहै दूर। (मूल़ 9:4; लेबी बधान 3:17; 17:10-14)
21“किल्हैकि पराणैं ज़मानैं ओर्ही आऐ नगरी-नगरी मुसा गूरे बधाने बारै खोज़दी और हर बशैघे धैल़ै पहल़ा इना आराधना कोठी दी।”
होरी ज़ातीए विश्वासी लै च़िठी
22तेखअ हुऐ एसा गल्ला लै सारी विश्वासीए मंडल़ी, शधाणूं, विश्वासी मंडल़ीए सैणैं बी राज़ी और तिन्नैं छ़ांटै आप्पू मांझ़ा का कई मणछ, मतलब यहूदा ज़हा लै बरसबा बोला और सिलास, ज़ुंण होरी भाई मांझ़ै मुखियै तै, तिंयां छ़ाडै पल़सी और बरनबासा संघै अन्ताकिया लै। 23तिन्नें हाथै दैनअ इहअ लिखी कि अन्ताकिया, सिरीया और किलकिआ प्रदेस दी रहणैं आल़ै विश्वासी भाई ज़ुंण होरी ज़ाती का आसा, येरुशलेम नगरी का शधाणूं और विश्वासी मंडल़ीए सैणैं बाखा तम्हां सोभी लै राज़ी-खुशी!
24“हाम्हैं शूणीं एही गल्ला कि म्हारै कई मणछ आऐ तम्हां सेटा लै और तिन्नैं किऐ थारै मन गलत शिक्षा दैई उंबल़ै पर तिंयां निं हाम्हैं तम्हां सेटा लै छ़ाडै आथी। 25हाम्हैं सोभी किअ कठा हई आप्पू मांझ़ै जोग, संघा समझ़अ हाम्हैं सोभी इहअ ठीक कि हाम्हां छ़ाडणैं छ़ांटी करै धख मणछ तम्हां सेटा लै। संघा छ़ाडै हाम्हैं आपणैं पैरै भाई बरनबास और पल़सी तम्हां सेटा लै। 26ईंयां दूई मणछ आसा इहै ज़ुंणी आपणैं प्राण बी म्हारै प्रभू ईशू मसीहे नांओंआं लै खातरै दी पाऐ।
27“यहूदा और सिलास बी छ़ाडै हाम्हैं तिन्नां संघै और तिन्नां हेरनी सारी गल्ला आपणैं मुंहां का बी तम्हां का खोज़ी। 28पबित्र आत्मां, और हाम्हां लागी एही ठीक कि किछ़ खास गल्ला छ़ाडी निं तम्हां लै होर किछ़ै बोझ़ पाणअ। 29तिंयां गल्ला आसा एही कि तम्हैं रहै मुर्ति लै बल़ी किऐ दै मासा और लोहू का और गल़ा का मरोक्कै दै मासा का और कंज़रैई का दूर। इना सोभी गल्ला का ज़ै तम्हैं दूर रहे, तै हणअ थारअ भलअ। खिरी हाम्हां सोभी बाखा तम्हां लै राज़ी-खुशी।” (मूल़ 9:4; लेबी बधान 3:17; 17:10-14)
30तेखअ पुजै तिंयां तिधा का बिदा हई करै अन्ताकिया नगरी। तेखअ पहल़ी सभा कठा करी करै च़िठी। 31तेखअ हुऐ तिंयां च़िठी पहल़ी करै शिक्षे गल्ला शूणीं बडै भारी खुश। 32यहूदा और सिलास ज़ुंण आप्पू बी परमेशरे गूर तै, तिन्नैं बी किऐ कई गल्ला करै विश्वासी भाई-बैहणी शिक्षा दैई करै मज़बूत।
33तेखअ रहै तिंयां थोल़ै धैल़ै तिधी संघा छ़ाडै तिंयां विश्वासी भाई येरुशलेम मंडल़ी बर्गत और शांती दी बापस। 34पर सिलासे मनैं बेठी एही कि तेऊ रहणअ तिधी और यहूदा नाठअ येरुशलेम नगरी लै। 35ता पल़सी और बरनबास रहै अन्ताकिया दी और होर बी कई लोगा रहै प्रभूए बैणा सखाऊंदै और खुशीए समादा खोज़दै लागी।
बरनबास और पल़सीओ ज़ुदअ हणअ
36थोल़ै धैल़ै बाद बोलअ पल़सी बरनबासा लै, “ज़हा-ज़हा नगरी हाम्हैं परमेशरो बैण लोगा का खोज़अ द आसा, च़ाल्ला, हाम्हां एछणी तिन्नां विश्वासी भाईए हेर सभाल़ करी कि तिंयां किहै आसा?”
37तेखअ किअ बरनबासै युहन्ना ज़हा लै मरकुस बोला, संघा निंणैओ बच़ार 38पर पल़सी किअ मरकुस संघा निंणां लै नांईं किल्हैकि सह हुअ त पिछ़ली बारी पंफूलिआ लाक्कै पुजी करै ज़ुदअ और कामां लै निं तिन्नां संघै नाठअ त। 39तिन्नां मांझ़ै हूई एही दूई रंगे गल्ला कि तिंयां हुऐ आप्पू ई मांझ़ै ज़ुदै। तेखअ नाठअ बरनबास मरकुसा संघा निंईं करै ज़हाज़ा दी कुप्रास टापू लै।
खुशीए समादा खोज़णा लै पल़सीए दुजी हांढ
40पर पल़सी छ़ांटअ सिलास और होर विश्वासी भाई का परमेशरे झींण सभाल़ी करै लागअ तिधा का आजू हांढदअ। 41तेखअ नाठअ पल़सी विश्वासीए मंडल़ी पाक्कै करदी, सिरीया लाक्कै और किलकिआ लाक्कै बाती हांढ दैई।
Currently Selected:
शधाणूं 15: OSJNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
