शधाणूं 6
6
सात टैहलू छ़ांटणैं
1तिन्नां धैल़ै ज़ांऊं खास्सै लोग विश्वासी बणैं ता यूनानी बोली बोल़णैं आल़ै विश्वासी लागै इब्रानी बोली बोल़णैं आल़ै लै बोलदै कि हर धैल़ै निं ढबै-धेल्लै और खाणैं-पिणैं दी म्हारी बिधबा बेटल़ीओ ईंयां च़ेल्लै मांझ़ै कोहै धैन-खैल करदअ।
2तेखअ हुऐ तिंयां बारा च़ेल्लै आप्पू मांझ़ै कठा और तेखअ बोलअ तिन्नैं येरुशलेम मंडल़ीए होरी च़ेल्लै लै, “अह गल्ल निं ठीक हणीं कि हाम्हैं परमेशरे बैणा छ़ाडी खैऊंदै-पणैंऊंदै रहे लागी। 3तैहीता भाईओ, आप्पू मांझ़ा का छ़ांटा सात छ़ल़ैघ मणछ ज़ुंण पबित्र आत्मां और बुधि दी भरपूर होए, ताकि तिंयां एऊ काम-काज़ करे। 4पर हाम्हां रहणअ प्राथणां और बैणे शिक्षा दैणें सेऊआ लागी।”
5अह गल्ल लागी सारी मंडल़ी बधिया और तिन्नैं स्तिफनुस नांओं एक मर्ध ज़ुंण विश्वास और पबित्र आत्मां दी भरपूर त, और फिलिप्पुस, प्रखरुस, नीकानोर, तिमोन, परमनास और अन्ताकिया रहणैं आल़अ निकूलाऊस ज़ुंण यहूदी पक्षा का आअ त, तिंयां छ़ांटै। 6तिन्नैं आणै तिंयां सात ज़ण्हैं शधाणूं सेटा लै और प्राथणां करी करै तिन्नां प्रैंदै हाथ डाही करै दैनअ तिन्नां लै सेऊआ करनैओ हक।
7परमेशरो बैण लागअ सारै दी पुजदअ और येरुशलेम हुऐ नगरी बडै भारी खास्सै च़ेल्लै और कई यहूदी परोहित बी मनअ अह समाद और तिन्नैं बी किअ मसीहा ईशू दी विश्वास।
स्तिफनुस कैद करनअ
8स्तिफनुस रहैऊआ त जश और शगती दी भर्हुई करै लोगा मांझ़ै बडै-बडै च़मत्कार और नछ़ैण। 9तेखअ लागै आज़ादी नांओंए आराधना कोठीए कई लोग स्तिफनुसे बरोध करी हठल़दै ज़ुंण कुरेन नगरी, सिकंदरीया नगरी, किलकिआ और एशिया लाक्कै का आसा तै। 10पर तिंयां निं स्तिफनुसे बुधि और पबित्र आत्मां करै भेटै दै ज्ञैना सम्हनै टेकी सकै।
11एता लै शकाऊऐ तिन्नैं होर लोग और तिंयां लागै इहअ बोलदै, “हाम्हैं शूणीं मुसा गूरे बधाने और परमेशरे खलाफ निंदा करने गल्ला।” 12तिन्नैं शकाऊऐ स्तिफनुसे खलाफ होर यहूदी मुखियै और शास्त्री और तिन्नैं किअ सह कैद संघा निंयं सह माहा सभा लै।
13तेऊ लै आणै तिन्नैं झ़ुठी गवाही दैणैं आल़ै लोल़ी, तिन्नैं दैनी एही झ़ुठी गवाही, “अह मणछ निस्सअ एसा पबित्र ज़ैगा और बधाने खलाफ बोल़णअ छ़ाडी। (यिर्मयाह 26:11) 14किल्हैकि हाम्हैं शूणअ अह इहअ बोलदअ कि नासरत नगरीए ईशू पाणअ अह पबित्र मांदर ढोल़ी और तिंयां रबाज़ पाणै तेऊ बदल़ी ज़ुंण मुसा गूरै आसा हाम्हां लै खोज़ै दै।”
15ज़ुंण माहा सभा दी तै बेठै दै तिंयां सोभ लागै स्तिफनुसा बाखा भाल़ै, तेऊओ मुंह त स्वर्ग दूता ज़िहअ च़मकदअ लागअ द।
Currently Selected:
शधाणूं 6: OSJNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
