युहन्ना 10
10
फुआल और भेडे कथ्या
1 “हुंह खोज़ा तम्हां का सत्त कि ज़ुंण बी भेडा सेटा भडैल़ै भितरा लै दुआरा बाती नांईं डेऊंदअ, पर कसा होरी बाता उखल़ा, सह आसा च़ोर डाकू। 2पर ज़ुंण दुआरा बाती भडैल़ै लै डेओआ, सह आसा तिन्नां भेडो असली फुआल। 3तेऊ लै खोल्हा दुआरो पहरी दुआर और भेडा शूणां तेऊए हाक्का। सह शादा तिन्नां नांओंआं लई करै बागा लै। 4भेडा बागा लै काढी करै हांढा सह फुआल तिन्नां आजू-आजू और भेडा हांढा तेऊ पिछ़ू-पिछ़ू। किल्हैकि तिंयां बछ़ैणा तेऊए बोल। 5तिंयां निं कसा पराऐ मणछा पिछ़ू कधि डेऊंदी। पर तेऊ का ठुर्हा तिंयां दूर, किल्हैकि तिंयां निं पराऐ मणछो बोल बछ़ैणदी।”
6ईशू खोज़ी तिन्नां का अह कथ्या पर तिन्नैं निं एतो मतलब समझ़अ कि ईंयां कै गल्ला बोली।
ईशू आसा असली फुआल
7ईशू बोलअ तिन्नां लै भी, “हुंह खोज़ा तम्हां का सत्त कि भेडो सह दुआर आसा हुंह ज़ेता बाती सोभै सका परमेशरा सेटा पुजी। 8ज़ेतरै बी मुखा पैहलै आऐ, तिंयां तै च़ोर और डाकू और भेडा निं तिन्नें बोल शूणीं। (यिर्मयाह 23:1; युहन्ना 10:27) 9दुआर आसा हुंह, ज़ै कुंण मुंह करै भितरा लै डेओए तेऊ भेटणअ उद्धार। सह रहणअ भितरी-बागै एछदअ-डेऊंदअ और घाहा पाणीं खांदअ-पिंदअ लागी। (भज़न 23:1; याशायाह 40:11; यजकेल 34:15)
10 “च़ोर निं किज़ू होरी कामैं एछदअ सह एछा सिधअ च़ोरी करदअ, मारदअ और बनाशा करदअ। हुंह आसा आअ द एते तैणीं कि सोभी लै ज़िन्दगी भेटे और टिरा-बहूंदी भेटे।
11 “हुंह आसा असली फुआल। असली फुआल दैआ आपणीं भेडे तैणीं ज़ान। 12ज़ुंण जुआरअ हआ, सह निं असली फुआल हंदअ। नां सह मालक हंदअ, ज़ेभै भेड़िय भेडा खांदअ एछा, तेभै ठुर्हा सह तेऊ भाल़ी भेडा छ़ाडी दूर और सह भेड़िय पाआ तिन्नां भेडा खाई और तिन्नां दरल़ाऊआ सातै बातै। 13सह जुआरअ ठुर्हा तिधा का आसा तै कि सह आसा जुआरअ, तेऊ निं भेडो फिकर हंदअ।
14 “असली फुआल आसा हुंह। ज़िहअ मुंह मेरअ बाप्पू बछ़ैणा, तिहअ बछ़ैणा हुंह तेऊ। 15ज़िहअ बाप्पू मुंह बछ़ैणा तिहअ बछ़ैणा हुंह आपणैं बाप्पू। ठीक इहअ ई, हुंह बछ़ैणा आपणीं भेडा और मेरी भेडा बछ़ैणा मुंह और हुंह दैआ आपणीं भेडा लै ज़ान। 16मेरी आसा होर बी भेडा ज़ुंण एऊ भडैल़ै दी नांईं आथी। मुंह आसा तिंयां झाल़णीं बी ज़रूरी। तिन्नां शुणनअ मेरअ बोल, और, तेखअ हणअ मेरी भेडो एक्कै छ़ुंड, और हुंह एक्कै फुआल। (याशायाह 56:8; यजकेल 34:23; 37:24)
17 “तैही डाहा बाप्पू मुंह संघै झ़ूरी, किल्हैकि हुंह दैआ आपणअ प्राण कि भी बापस लई सकूं। 18एता निं कोहै मुखा छ़ड़ैऊई सकदअ, पर हुंह दैआ एता आप्पै। मुंह आसा एता दैणैंओ हक बी और बापस लणेंओ हक बी। मुल्है आसा परमेशरै अह हुकम दैनअ द।”
19इना गल्ला पिछ़ू पल़ी यहूदी आप्पू मांझ़ै भी फूट। 20तिन्नां मांझ़ै लागै कई लोग बोलदै, “एऊ दी आसा भूत, एऊ शूणैं किज़ू आसा लागै दै।”
21तिन्नैं होरी बोलअ इहअ, “भूत शाचै दै मणछा ज़ेही निं ईंयां ई गल्ला आथी, भूत कै कांणै मणछा शरैछै करा?”
यहूदी लोगै निं विश्वास किअ
22तधू तै हिंऊंदे धैल़ै और येरुशलेम नगरी हुअ येरुशलेम मांदरो पूज़ो थैर। 23ईशू त येरुशलेम मांदरे खोल़ै सुलैमान नांओंए च़ाऊल़ी दी लागअ द हांढदअ। 24तिधी आऐ यहूदी तेऊ फेर और बोलअ, “ताह केभै तैणीं डाहणैं हाम्हैं दबिधा दी पाई? ज़ै तूह मसीहा आसा, तै बोल हाम्हां का एचल़ी कि हुंह आसा।”
25ईशू दैनअ तिन्नां लै ज़बाब, “मंऐं हेरअ तम्हां का बोली और तम्हैं निं विश्वास करदै। ज़ुंण काम हुंह आपणैं बाप्पूए नांओंए करा तिंयां आसा मेरै गवाह। 26पर तम्हैं निं तै विश्वास करदै, किल्हैकि तम्हैं निं मेरी भेडा जैंदरा का आथी। 27मेरी भेडा शूणां मेरै बोल, और हुंह बछ़ैणा तिन्नां, और तिंयां हांढा मुंह पिछ़ू-पिछ़ू। 28हुंह दैआ तिन्नां लै सदा रहणैं आल़ी ज़िन्दगी। तिन्नां निं मेरै हाथा का कोहै छ़ड़ैऊई सकदअ। 29सह आसा मेरअ बाप्पू ज़ुंणी तिंयां मुल्है आसा दैनी दी सह आसा सोभी का बडअ और तेऊए हाथा का निं कोहै तिन्नां छ़ड़ैऊई सकदअ। 30हुंह और मेरअ बाप्पू आसा एक्कै।”
31यहूदी च़कै ईशू मारना लै पात्थर। 32एता भाल़ी बोलअ ईशू तिन्नां लै, “मंऐं किऐ आपणैं बाप्पू बाखा का बडै भारी काम। इना मांझ़ै कसा कामां पिछ़ू लाई तम्हैं मुल्है पात्थरै बाही?”
33यहूदी लोगे मुखियै दैनअ तेऊ लै ज़बाब, “भलै कामां पिछ़ू निं हाम्हैं ताल्है पात्थरै बाहंदै, तंऐं की परमेशरे निंदा इहअ करै कि तूह बणां आपणैं आप परमेशर।” (लेबी बधान 24:16)
34ईशू दैनअ तिन्नां लै ज़बाब, “थारै बधाना दी कै इहअ निं आथी लिखअ द, ‘हुंह बोला तम्हैं आसा ईश्वर।’ (भज़न 82:6) 35ज़ै तेऊ तिन्नां लै ईश्वर बोलअ ज़हा सेटा परमेशर पुजअ (और पबित्र शास्त्रे गल्ल निं लुक्की सकदी)। 36तै ज़ुंण मेरै बाप्पू परमेशरै पबित्र बणांईं करै संसारै छ़ाडअ, तम्हैं बोला तेऊ लै कि तूह करा परमेशरे निंदा। तैही बोलअ मंऐं, हुंह आसा परमेशरो शोहरू।
37 “ज़ै हुंह बाप्पूओ काम नांईं करदअ, तै निं मुंह प्रैंदै विश्वासा करने ज़रुरत आथी। 38पर ज़ै हुंह तेऊए काम करा, तै तम्हैं च़ाऐ मेरअ विश्वास करा, च़ाऐ नां करा, पर इना कामों विश्वास ता करा, ताकि तम्हां का थोघ लागे और समझ़ एछे कि बाप्पू आसा मुंह दी और हुंह आसा बाप्पू दी।”
39तेखअ की तिन्नैं तेऊ ढाकणें कोशिश पर सह निं तिन्नें हाथै आअ।
40तेखअ नाठअ ईशू जरदण नदी पार एकी ज़ैगा लै, और सह रहअ तिधी, ज़िधी पैहलै युहन्ना डुबकी दैआ त। 41कई लोग आऐ तेऊ सेटा और तिन्नैं बोलअ, “युहन्ना ता निं किछ़ै नछ़ैण रहैऊअ पर ज़ुंण बी तेऊ ईशूए बारै बोलअ सह आसा त शुचअ।” 42तेखअ कई लोगै किअ तिधी ईशू दी विश्वास कि सह ई आसा मसीहा।
Currently Selected:
युहन्ना 10: OSJNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
