लुका 15

लुक्की दी भेडे कथ्या

(मत्ती 18:12-14)

1ईशू सेटा लै एछा तै कई कारै गराहणै आल़ै और पापी मणछ तेऊए शिक्षा शूणैं। 2पर फरीसी और धर्म शास्त्री लागै इहअ बोलदै, “अह बेशा लोगा संघै और तिन्नां संघै खाआ-पिआ बी।”

3तेखअ खोज़ी ईशू तिन्नां का एक होर कथ्या, 4“तम्हां मांझ़ै इहअ कुंण मणछ आसा कि ज़सरी शौ भेडा होए, तिन्नां मांझ़ै एक लुक्की दी होए और सह रहा नडिनुंऐं भेडा बणैं छ़ाडी तेसा लुक्की दी भेडा लोल़अ तेभै तैणीं लागी, ज़ेभै तैणीं सह भेड़ भेटी निं जाए? (यजकेल 34:11-12,16)

5 “तेखअ ज़ांऊं सह भेड़ तेऊ भेटी जाए, तेखअ फिरनअ तेऊ बडअ खुशी-खुशी तैहा भेडा कान्हा च़की। 6आपणैं घरै पुजी खोज़ा तेखअ सह सोभी कठा करी इहअ ‘बडी भारी खुशीए गल्ल हुई, मेरी ती भेड़ लुक्की दी और सह गई मुंह भेटी।’

7 “हुंह बोला तम्हां का इहअ कि ठीक इहअ ई करै पाप करनै का मन फरेऊंणै आल़ै पापी मणछे बारै बी हआ स्वर्गै एही ई खुशी, ज़ेतरअ कि तम्हां ज़िहै नडिनुंऐं धर्मीं मणछे बारै निं हंदी, ज़ुंण ऐबै पाप निं करदै!

शोठुऐ दै सिक्कै

8 “या एही कुंण बेटल़ी होए कि ज़हा का दस सिक्कै होए, और तेता मांझ़ा का एक शोठिए; और सह लाटू ज़ाल़ी करै झाल़ी-ठुल़्हकी करै ज़ेभै तैणीं सह नांईं भेटे, तेभै तैणीं रहा सह लोल़ी लागी। 9तेखअ ज़ांऊं सह भेटी जा; ता सह खोज़ा सोभी साथी संघी का हाक्का लाई कि ‘बडी खुशीए गल्ल हुई मेरअ त सिक्कअ शोठुअ द ऐबै गअ मुंह सह भेटी।’

10 “हुंह खोज़ा तम्हां का कि परमेशरे स्वर्ग दूता सम्हनै हआ स्वर्गै एही ई खुशी नंद ज़ेभै एक मणछ पाप करनअ छ़ाडी करै परमेशरा बाखा लै फिरा।”

बाधू शोहरूए कथ्या

11तेखअ बोलअ ईशू इहअ, “एकी मणछे तै दूई शोहरू। 12तिन्नां मांझ़ै बोलअ कान्हैं शोहरू आपणैं बाप्पू का इहअ कि हे बाप्पू, मुल्है दै एभी मेरी बांड ओर्ही। तेखअ दैनी तेऊ तिन्नां दुही शोहरू लै सारी ज़ैदात बांडी। 13खास्सै धैल़ै बी नांईं तै हुऐ कि होछ़अ शोहरू नाठअ सोभ गल्ला कठा करी करै परदेसा लै और तिधी की तेऊ आपणीं सारी ज़ैदात दिला मनें साबै ज़िन्दगी ज़िऊंणां लै बूरै कामां दी खतम। (सैणीं गल्ला 29:3)

14 “ज़ांऊं सह सोभ किछ़ छेभी मुक्कअ, ता तेऊ देशै पल़अ नकाल़ और सह हुअ गरीब। 15तेखअ रहअ सह तेऊ देशै एकी मणछे घरै टैहलू। तेऊ डाहअ सह आपणैं खेचै सुंगरा च़राऊंदअ लाई। 16सह मालक च़ाहा त इहअ कि ज़ुंण शिम्मीं तिंयां सुंगर खाआ तेता करै भरे अह बी आपणअ पेट और सह निं तेऊ लै किछ़ बी दैंदअ त।

17 “ज़ांऊं तेऊ सोर समझ़ आई ता सह लागअ आप्पू इहअ सोठदअ, ‘मेरै बाप्पूए टैहलू बी भेटा तिन्नें पेटा भरनै का बी खास्सी रोटी। हुंह आसा इधी भुखै लागअ द मरदअ। 18मुंह डेऊणअ ऐबै आपणैं बाप्पू सेटा लै बापस फिरी और मुंह बोल़णअ आपणैं बाप्पू लै इहअ कि हे बाप्पू, मंऐं किअ तेरी आछी दी और तेऊ परमेशरे खलाफ पाप ज़ुंण स्वर्गै आसा। (भज़न 51:4) 19ऐबै निं हुंह एता जोगी आथी कि तूह मुल्है आपणअ शोहरू बोले, मुंह डाह इधी आप्पू सेटा टैहलू ज़िहअ।’

20 “तेखअ नाठअ सह तिधा का आपणैं बाप्पू सेटा लै। ज़ांऊं सह आपणैं घरा नेल़ पुजअ ता तेऊए बाप्पू आई तेऊ भाल़ी करै झींण और ठुर्हअ तेऊ सेटा लै संघा दैनी तेऊ लै पिडी मल़्हैची तेखअ लागअ तेऊ लै च़ुंज़ी माख्खी दैंदअ। 21तेखअ बोलअ तेऊ शोहरू, ‘बाप्पू, मंऐं किअ तेरी आछी और तेऊ परमेशरे खलाफ पाप ज़ुंण स्वर्गै आसा। ऐबै निं हुंह एता जोगी आथी कि तूह मुल्है आपणअ शोहरू बोली सके।’

22 “पर तेऊए बाप्पू शादै आपणैं टैहलू संघा बोलअ तिन्नां लै, ‘ओर्ही आणा छ़ेकै सोभी का बधिया नऊंऐं झिकल़ै बन्हैऊंआं एऊ लै, हाथै बन्हैऊंआं एऊए सुन्नें मुंदल़ी और खूरा लै दैआ नऊंऐं बूट। 23खुढै ढाकअ द बडअ गाभू काटी खैऊआ सोभी लै खुशीए धाम। 24किल्हैकि मेरअ अह शोहरू गअ त मुल्है मेरै बराबर हई, अह त लुक्कअ द और ऐबै गअ अह भेटी। अह हुअ मरी करै ज़िऊंदै हणैं बराबर भी ज़िऊंदअ।’ तिंयां लागै सोभ खुशी मनाऊंदै।

25 “पर तेऊओ ज़ेठअ शोहरू त खेचा लै नाठअ द और ज़ांऊं सह बापस घरा नेल़ पुजअ ता तेऊ का शुहणनअ गाज़ै-बाज़ै और नाच़दै लोगे छ़ेल़। 26तेऊ पुछ़अ एकी टैहलू का कि एथ किज़ै हुअ? 27तेऊ टैहलू बोलअ, ‘तेरअ होछ़अ भाऊ आअ घरा लै फिरी और तेरै बाप्पू काटअ तेऊए राज़ी राम्बल़ै फिरी एछणें खुशी दी खुढै धाचअ द बडअ गाभू। किल्हैकि तेऊ भेटअ सह राज़ी राम्बल़अ बापस।’

28 “इहअ शूणीं करै आई तेऊ बडै शोहरू बडी भारी रोशै और तेऊओ निं भितरा लै डेऊणेओ मन बी किअ पर तेऊओ बाप्पू आअ बागा लै और सह लागअ तेऊ मनैंऊंदअ। 29तेखअ बोलअ तेऊ आपणैं बाप्पू का, ‘भाल़, एतरी साला ओर्ही आसा हुंह तेरी सेऊआ-च़ाकरी करदअ लागअ द। मंऐं मनी तेरी सोभै गल्ला, तंऐं निं कधि मेरी तैणीं बाकरीओ होछ़अ ज़िहअ बच्च़अ बी दैनअ कि आपणैं साथी भाई संघै खुशी मनाऊं! 30पर ज़ांऊं अह तेरअ शोहरू ज़ुंणी तेरी सारी ज़ैदात बूरै कामां पिछ़ू खतम की और एभै आअ अह सोभ किछ़ बरैबाद करी करै घरा लै और तंऐं काटअ एऊ लै खुंढी धाचअ द बडअ गाभू!’

31 “तेऊए बाप्पू बोलअ तेऊ लै, ‘ओ शोहरूआ, तूह हआ धैल़ मुंह संघै और ज़ुंण बी मेरअ आसा सह आसा तेरअ ई। 32पर एभै लोल़ी ती तंऐं बी खुशी मनाऊंईं, भाल़, तेरअ भाऊ गअ त मरी और अह हुअ ऐबै भी ज़िऊंदअ, अह त लुक्कअ द और ऐबै भेटअ अह भी।’”

Currently Selected:

लुका 15: OSJNT

Highlight

Copy