यूहन्ना 18

यीशु रा ढोकणै धियाणा

1यीशु प्रार्थना खत्म केरनै न बाद, आपणै च़ेले सैंघै किद्नोन नालै रै पारै नौठै। तौखै एक बगीच़ा ती, ज़ुणीन यीशु होर तिन्हरै च़ेले नौठै। 2यीशु रा ढौकणै धियाणु आल़ा यहूदा भी तेसा ज़ैगा बै ज़ाणै ती, किबैकि प्रभु यीशु आपणै च़ेले सैंघै तौखै बै जाया केरा ती। 3तैबै यहूदा, सपाई रै एक दला बै होर मुख्यपुरोहिता होर फरीसियै री धिरै न सपाई आंणिआ, दिऊऐ होर मशाल होर हथियारा बै आंणिआ तौखै पुजै।

4तैबै यीशु, तिन्हां सैभी गैला बै ज़ो तेई पैंधै ऐणु आई ती ज़ाणिया निकता, होर तिन्हां बै बोलू, “तुसै कुणी बै तोपदै लागै सी?” 5तिन्हैं यीशु बै बोलू, “यीशु नासरी बै।” यीशुऐ तिन्हां बै बोलू, “हांऊँ सा।” यीशु रा ढौकणै धियाणु आल़ा यहूदा भी तिन्हां सैंघै खड़ा ती। 6तेई रै ऐ बोलणे पैंधै, “हांऊँ सा”, तै पिछ़ै हटिया धौरती पैंधै झौड़े।

7तैबै यीशुऐ भी तिन्हां न पुछ़ू, “तुसै कुणी बै तोपदै लागै सी।” तिन्हैं बोलू, “यीशु नासरी बै।”

8यीशुऐ तिन्हां बै बोलू, “मैं ता तुसाबै बोलू ती, कि हांऊँ सा, अगर मुँभै तोपा सी ता इन्हां दुज़ै लोका बै ज़ाणै देआ।” 9ऐ तैबै हुआ, कि सौ वचन पूरा होला ज़ो यीशुऐ बोलू ती, “ज़ो तुसै मुँभै धिनै ती, तिन्हां न मैं एक भी नी खोऊ।”

10तैबै शमौन पतरसै तलवार ज़ो तेई आगै ती, खींच़ी होर महापुरोहिता रै दासा पैंधै चलाईया तेइरा देहणा कोन काटिया शेटू। तेई दासा रा नाँ मलखुस ती।

11तैबै यीशुऐ पतरसा बै बोलू, “आपणी तलवार म्याना न डाआ। ज़ो दुःखा सौहणै बै बापूऐ मुँभै धिना सा, कि हांऊँ तेइबै नी सौहणु?”

हन्ना रै सामनै यीशु

12तैबै सपाई होर सूबैदार होर यहूदियै रै सैनिकै प्रभु यीशु ढौकिया बौनु, 13होर पैहलै प्रभु यीशु हन्ना हागै बै नेऊ किबैकि तेस बोर्षा रा महापुरोहित कैफा रा शौऊरा ती। 14ऐ सौऐ कैफा ती ज़ुणियै यहूदियै बै सलाह धिनी ती कि आसरी तैंईंयैं एक मांहणु रा मौरणा खरा सा।

पतरसा रा नाँह

15शमौन पतरस होर एक होर च़ेला भी प्रभु यीशु रै पिछ़ै न हुऐ। ऐ च़ेला महापुरोहिता रा ज़ाणू पछ़ियाणु ती, तैबै सौ प्रभु यीशु सैंघै महापुरोहित रै आँध्रै बै नौठा, 16पर पतरस दुआरा पैंधै खड़ा रौहू। तैबै सौ दुज़ा च़ेला ज़ो महापुरोहिता रा पछ़ियाणु होंदा ती बाहरै निकता, होर दरुआज़ै री पौहरैदारनी बै बोलिया पतरस आँध्रै बै आंणु। 17सौ दासी ज़ो पौहरैदारी ती, पतरसा बै बोलू, “कोइँछ़ै तू भी ऐई मांहणु रै च़ेले न ऑथि?” तेइयै बोलू, “हांऊँ नी ऑथि।” 18दास होर सपाई ठण्डै री बजहा न कोयलै भकेईया खड़ै औग छिपदै लागै ती, होर पतरस भी तिन्हां सैंघै खड़ा औगी छिपदा लागा ती।

बड़ै मुखिया द्वारा यीशु री पूछ़ताछ़

19तैबै महापुरोहित प्रभु यीशु न तिन्हरै च़ेले रै बारै न होर उपदेशै रै बारै न पुच्छदै लागै।

20यीशुऐ तिन्हां बै ज़वाब धिना, “मैं सैभी रै सामनै खुलिया गैला केरी, मैं आराधनालय न होर मन्दिरा न, ज़ौखै सैभ यहूदी कठै हुऐ ती सदा उपदेश देआ ती होर गुजुईया किछ़ भी नी बोलू। 21तू मूँ न किबै पुछ़दा लागा सा? शूणनू आल़ै न पुछ़ कि मैं तिन्हां बै कि बोलू, हेर ते ज़ाणा सी कि मैं तिन्हां बै कि-कि बोलू?” 22ज़ैबै यीशुऐ बोलू, ता मन्दिरा रै पौहरैदारा न एकियै ज़ो यीशु हागै खड़ा ती, यीशु बै चंडा मारिया बोलू, “कि तू महापुरोहिता बै ऐण्ढी तैरहै ज़वाब देआ सा?”

23 यीशुऐ ज़वाब धिना, “अगर मैं बुरा बोलू, ता तेस बुराई बै मुँभै दैस, पर अगर खरा बोलू ता मुँभै किबै मारदा लागा सा?” 24हन्ने यीशु ज़ो बौनु हौन्दा कैफा महापुरोहित हागै बै भेज़ू।

पतरसा रा दबारा नाँह केरना

25शमौन पतरस खड़ा होईया औगी छिपदा लागा ती। तैबै तिन्हैं तेइबै बोलू, “कोइँछ़ै तू भी ता तेई रै च़ेले न ता नैंई ऑथि?” तेइयै नाँ केरिया बोलू “हांऊँ नैंई ऑथि।” 26महापुरोहित रै नोकरै न एकियै ज़ो तेई रै टबरा न ती, ज़ुणिरा कोन पतरसै काटू ती, बोलू, “कि मैं तू यीशु सैंघै बगीच़ै न नैंई ती हेरूदा ती?” 27पतरसै फिरी नाँ केरू होर फट मुर्गै बाँग धिनी।

पिलातुसा रै सामनै यीशु

28तैबै तिन्हैं यीशु कैफा रै सामने गड़ा बै नेये, होर दोथी रा बौगत ती, पर तै आपु गढ़ा आँध्रै बै नैंई नौठै, किबैकि ते अशुद्ध नैंई लोड़ी लागी पर फसहै रै त्यौहार खाई सकलै। 29तैबै पिलातुस तिन्हां आगै बै बाहरै निकतू होर बोलू, “तुसै ऐई मांहणु पैंधै कुणी गैला रा दोष लागै सी लांदै?” 30तिन्हैं तेइबै बोलू, “अगर ऐ बूरै कोम केरनु आल़ा नैंई होंदा ता आसा ऐ तेरै हौथा न नैंई ती देणा।” 31पिलातुसै तिन्हां बै बोलू, “तुसै ऐईबै नेइया आपणै बिधाना रै ज़रियै ऐईरा न्याय केरा।” यहूदी नेतै तेई राज़ै बै बोलू, “आसाबै अधिकार नैंई ऑथि कि कोईरी जान लेई सकलै।” 32ऐ तैबै हुआ कि यीशु री सौ गैला ज़ो यीशु इशारा केरदी घेरै बोलू ती कि तेइरी मौऊत कैण्ढी होंणा।

33तैबै पिलातुस भी गढ़ा आँध्रै बै नौठा, होर यीशु शाधिया तेईन पुछ़ु, “कि यहूदियै रा राज़ा सा?”

34यीशुऐ बोलू, “कि तू ऐ गैल आपु धिरै न बोल्दा लागा सा कि होरिये मेरै बारै न तुसाबै ऐ बोलू?” 35पिलातुसै ज़वाब धिना, “तू ज़ाणा सा कि हांऊँ यहूदी नैंई? तेरी ज़ाति होर मुख्यपुरोहिते तू मेरै हौथा न धिना सा। तैं कि केरू सा?”

36यीशुऐ बोलू, “मेरा राज्य ऐसा दुनिया रा नैंई, अगर मेरा राज्य ऐसा दुनिया रा होंदा ता, मेरै च़ेले झौटीदै, कि मूँ यहूदी नेतै रै हौथा न नी ती ज़ाणा, पर मेरा राज्य औखला नैंई ऑथि।”

37पिलातुसै तेइबै बोलू, “तैबै कि तू राज़ा सा?” यीशुऐ तेइबै बोलू, “तुसै बोलू कि हांऊँ राज़ा सा। मैं तैबै जन्म लेऊ सा होर तैबै दुनिया न आऊ सा कि सच़ै री गुआही देनु। ज़ो कोई सच़ाई सैंघै झ़ुरी रैखा सा, सौ मेरी हाक्क शूणा सा।”

38पिलातुसै यीशु बै बोलू, “सच़ कि सा?” ऐ बोलिया सौ भी यहूदी नेता हागै बै नौठा होर तिन्हां बै बोलू, “हांऊँ ता तेईन किछ़ भी बुरी गैल नैंई पांदा।

मौऊती री सज़ा देणै रा हुक्म

39“पर तुसरी ऐ रीति सा कि मूँ फसह री त्यौहारा न तुसरी तैंईंयैं एक कैदी मांहणु छ़ौड़णु तैबै तुसै कि चाहा सी, कि हांऊँ तुसा री तैंईंयैं यहूदी रै राज़ा बै छ़ौड़णु?” 40तैबै तिन्हैं ज़ोरै सैंघै बोलू, “ऐईबै नी पर आसरी तैंईंयैं बरअब्बा बै छ़ौड़ा।” होर बरअब्बा एक डाकू ती।

Currently Selected:

यूहन्ना 18: KFX-NT

Highlight

Copy