लूका 5

यीशु पैहलै आपणै च़ेले बै बणा सी

1एक रोज़ परमेश्वरा रा वचन शुणनै री तैंईंयैं ज़ैबै लोकै री भीड़ कठा हुई ता यीशु गन्नेसरतै री समुन्द्रा रै बौढ़ा न खड़ै हुऐ ती। 2यीशुऐ समुन्द्रा रै बौढ़ा न दुई किश्ती लागीदी हेरी, होर मैच्छ़ी ढौकणु आल़ै आपणी किश्ती छ़ौड़िआ आपणै ज़ाला बै धोंदै लागैदै ती। 3तिन्हां मौंझ़ै एक किश्ती शमौनै री ती, होर यीशु तेसा किश्ती न च़ढ़िया लोका बै उपदेश देंदै लागै। 4उपदेश देणै न बाद यीशुऐ शमौना बै बोलू, “आपणी किश्ती डूघै पाणी बै च़ला होर मैच्छ़ी ढौकणै री तैंईंयैं ज़ाला शेट।” 5तैबै शमौनै यीशु बै बोलू, “ओ गुरू ज़ी, आसै सारी रात मेहनत केरी पर किछ़ भी नी ढौकी पर तुसै बोला सी ता हांऊँ ज़ाला शेटणू।” 6ज़ैबै पतरस होर तेइरै सैंघियै ज़ाला शेटू ता तिन्हैं ऐतरी बोहू मैच्छ़ी ढौकी कि तिन्हरै ज़ाल च़िरिदै लागै। 7तैबै तिन्हैं दुज़ी किश्ती रै सैंघी भी मज़ती केरनै री तैंईंयैं इशारै केरिया शाधै होर तिन्हैं दुऐ किश्ती ऐतरी भौरी कि ते डूबनू आल़ी ती। 8ऐई च़मत्कार हेरिया शमौन पतरस यीशु री ज़ोंघा पैंधै पौऊ होर बोलू, “गुरू जी मूँ हागै न दूर ज़ाआत्, किबैकि हांऊँ पापी मांहणु सा।” 9किबैकि ऐतरी मैच्छ़ी ढौकणै री बजहा न तेइबै होर तेइरै सैंघी बै बड़ी हैरानी हुई। 10जब्दी रै बेटै याकूब होर यूहन्ना भी ज़ो शमौनै रै सैंघी ती,

तिन्हां बै बी बड़ी हैरानी हुई होर तैबै यीशुऐ शमौना बै बोलू, “डौरदा मत, औज़ा न बाद मूँ तुसै मांहणु बै मेरा च़ेला बनाणा सिखाणै।” 11तैबै तिन्हैं किश्ती बौढ़ा बै आंणी होर ते सैभ किछ़ छ़ौड़िआ यीशु पिछ़ै च़लै।

यीशु एकी कोढ़ी मांहणु बै ठीक केरा सी

12ज़ैबै सौ कोई नगरा न ती, ता हेरा, तौखै कोढ़ा न भौरु हुन्दा एक मांहणु आऊ, होर सौ यीशु बै हेरिया टुँबड़ै पौड़ू, होर अर्ज़ा केरी, “हे प्रभु अगर तुसै च़ाहलै ता मुँभै ठीक केरी सका सी।”

13तैबै यीशुऐ कोढ़ी आपणै हौथा सैंघै छ़ुँगू होर बोलू, “हांऊँ च़ाहा सा कि तू ऐबरै ठीक लोड़ी हुआ।” तुरन्त तेइरा कोढ़ खत्म हुआ होर सौ ठीक हुआ।

14तैबै यीशुऐ तेइबै हुक्म धिना, “ऐसा गैल तू कौसी बै हेरेई दसदा। पर ज़ाइआ यहूदी पुरोहिता बै रिहा होर कोढ़ा न ठीक हुऐदै लोका बै मूसै ज़ो बलि च़ढ़ाणै बै बोलू सा तेसा बै च़ढा ताकि लोक ज़ाणलै कि तू ठीक हुआ सा।” 15पर यीशु रै बारै न केरीदी ऐ गैल औगी सांही फैलदी रौही होर लोकै री भीड़ यीशु री शिक्षा शुणनै री तैंईंयैं होर तिन्हरी बीमारी न ठीक होंणै री तैंईंयैं कठी होंदै रौही। 16पर यीशु तिन्हां न दूर सुनसान ज़ैगा न ज़ाइआ प्रार्थना केरा ती।

यीशु ध्रँगै रै मरीजा बै ठीक केरा सी

17एक रोज़ ज़ैबै यीशु उपदेश देंदै लागै ती, तैबै तौखै फरीसी पंथै रै किछ़ लोका होर यहूदी शास्त्री भी तौखै बेठैंदै ती ज़ो कि गलील होर यहूदिया देशा रै हरेक ग्राँ न होर यरूश्लेम शैहरा न आऐ ती। बीमारी न लोका बै ठीक केरनै तैंईंयैं प्रभु री शक्ति यीशु सैंघै ती। 18तेई बौगतै किछ़ लोकै एक ध्रँगा रा मरीज़ माँज़ै पैंधै आंणु। तिन्हैं लोकै मरीज़ा बै घौरा भीतरै नेहणै होर यीशु सामनै रखणै री बड़ी कोशिश केरी। 19पर लोकै री बड़ी भीड़ै री बजहा सैंघै ते मरीज़ा बै भीतरै नी नैंई सकै ता तिन्हैं घौरै रै छ़ापरा पैंधै च़ढ़िया किछ़ पौट पेच़ै होर सौ मरीज़ यीशु सामनै उतारू।

20यीशुऐ तिन्हरा बशाह हेरिया तेई मरीज़ा बै बोलू, “ऐई बेटैआ तेरै पाप माफ हुऐ।”

21तैबै शास्त्री होर फरीसी लोक आपु न बैहस केरदै लागै, “ऐ कुण सा ज़ो परमेश्वरै री निन्दा केरा सा? परमेश्वरै रै सिवाए कोई बी पापा बै माफ नी केरी सकदा।”

22यीशुऐ तिन्हरै मनै रै विचार ज़ाणिया तिन्हां बै बोलू, “तुसै आपणै मना न किबै वहस केरदै लागै सी?” 23सान कि सा, “ऐण्ढा बोलणा कि तेरै पाप माफ हुऐ या ऐण्ढा बोलणा सान सा उठ होर औंढदा लाग।” 24पर तुसै ज़ाणि लेआ कि हांऊँ मांहणु रै बेटै बै ऐसा धौरती पैंधै पापा बै माफ केरनै रा भी हक़ सा। तेथा न बाद यीशुऐ ध्रँगै रै मरीज़ा बै बोलू, “हांऊँ तौभै बोला सा उठ होर आपणै माँज़ै च़किआ घौरा बै ज़ा।” 25तैबै सौ मरीज़ एकदम उठु होर ज़ुणी माँज़ै पैंधै सौ सुता ती तेई माँज़ै च़किआ परमेश्वरै री जय-जयकार केरदै-केरदै आपणै घौरा बै नौठा। 26तौखै बेठैंदै लोका बड़ै हैरान हुऐ होर परमेश्वरै री जय-जयकार केरदै लागै होर बोलदै लागै, “औज़ आसै नौखी गैला हेरी।” 27ऐथा न बाद यीशु शैहरा न बाहरै नौठै होर एक लेवी नाँ रा मांहणु च़ुँगी लेणै री च़ोऊकी हागै बेठादा हेरू होर तेइबै बोलू, “मूँ सैंघै च़ला होर मेरा च़ेला बैण।” 28तैबै सौ सैभ किछ़ छ़ौड़िआ उठु होर यीशु पिछ़ै च़लू।

29बादा न लेवियै आपणै घौरा न यीशु री तैंईंयैं एक बड़ी धाम रखी। सैभै च़ुँगी लेणू आऐ होर होरी लोकै री एक बोहू बड़ी भीड़ यीशु सैंघै रोटी खाँदी बेठी ती। 30फरीसी होर शास्त्री यीशु रै च़ेले न पुछ़दै लागै, “तुसै च़ुँगी लेणू आल़ै सैंघै होर पापी लोका सैंघै किबै खा पीआ सी?”

31यीशुऐ तिन्हां बै ज़वाब धिना, “ठीक मांहणु बै बैदै री ज़रूरत नी होंदी पर बीमार मांहणु बै बैदै री ज़रूरत होआ सा।” 32यीशुऐ बोलू, “तैण्ढाऐ हांऊँ धर्मी री तैंईंयैं नी, बल्कि पापी री तैंईंयैं आऊ सा ताकि ते आपणै पापा बै छ़ौड़लै।”

ब्रता रै बारै न सवाल

33तिन्हैं यहूदी नेतै यीशु बै बोलू, “यूहन्नै रै च़ेले ता बार-बार ब्रत रैखा सी होर प्रार्थना केरा सी, फरीसी लोकै होर रै च़ेले भी कई बार ब्रत रखा सी, पर तेरै च़ेले ता खाँदै-पींदै रौहा सी।”

34तैबै यीशुऐ तिन्हां बै बोलू, “ज़ाँ ढौई लाड़ा सैंघै सा कि तुसै बराती न ब्रत कराई सका सी?” 35पर तिन्हां ध्याड़ै ऐणा ज़ैबै लाड़ा बराती न लग केरिना तैबै तिन्हां ब्रत केरना।

36यीशुऐ तिन्हां बै एक होर उदाहरण बी दसू “कोई भी मांहणु नोंऊँऐं कपड़ै रा टौला पराणै झिकड़ै न कोई नी लाँदा। अगर तैण्ढा केरला ता नोंऊँऐं कपड़ै पैहलै न बी ज़ादा च़िरिना। 37तैण्ढाऐ न कोई मांहणु नोंऊँआं अँगूरा रा रस च़ंबड़ै री पराणी खौलड़ी न भौरदा। अगर ऐण्ढा केरलै ता नोंऊँऐं अँगूरा रा रसा पराणी खौलड़ी भोनणी होर अँगूरा रा रस ता थैली दुऐ नष्ट होंणी। 38पर नोंऊँआं अँगूरा रा रस च़ंबड़ै री नोऊँई थैली न भौर न पौड़ा सा। 39होर ज़ुणियै पराणा अँगूरा रा रस पीऊ सा सौ नोंऊँआं अँगूरा रा रस नी पीणा च़ाँहदा। किबैकि सौ ऐण्ढा बोला सा, पराणा ऐ अँगूरा रा रस शोभला सा।”

Currently Selected:

लूका 5: KFX-NT

Highlight

Copy