मत्ती 24

मन्दिरा रै नाशा री भविष्यवाणी

1ज़ैबै यीशुऐ मन्दिरा रै ब्राम्दै छ़ौड़िआ ज़ाँदै लागै ती ता तेइरै च़ेले मन्दिरै री बनावट रिहाणै री तैंईंयैं तेई हागै आऐ। 2यीशुऐ तिन्हां बै बोलू, “कि तुसै ऐ सैभ नी हेरदै? हांऊँ तुसाबै सच़ बोला सा, औखै एकी पात्थरै पैंधै दुज़ा पात्थर नी टिकी रौहणा। बल्कि सैभ किछ़ नाश होंणा।”

दुःख होर क्लेश

3ज़ैबै सौ जैतून ढौगा पैंधै बेठा ती ता च़ेले तेई हागै एज़िया बोलू, “आसाबै दैस कि ऐ गैला कैबै होंणी? होर तेरै ऐणै री, कि नशाणी होंणी? होर दुनियै रै आखरी होंणै री कि नशाणी होंणी?”

4यीशुऐ तिन्हां बै ज़वाब धिना, “होशियार रौहा! कि कोई तुसाबै भरमाला नी। 5किबैकि बोहू ऐण्ढै हौंणै ज़ुणी मेरै नाँ न एज़िया बोलणा, ‘कि हांऊँ मसीह सा’, होर तिन्हां बोहू सारै लोका भरमाणै। 6तुसा लड़ाई-झ़गड़ै री अफवाहै रै बारै न शुणलै पर तुसै घबराँदै हेरीत् किबैकि इन्हरा होंणा ज़रूरी सा पर तेई बौगतै आखरी नी होंणा। 7किबैकि ज़ाति-ज़ाति आपु न लड़ीना, एकी राज्य होरी राज्य सैंघै लड़ीना, ज़ैगा-ज़ैगा अकाल पौड़ना होर ज़ौज़री होंणी। 8इन्हां सारी गैला सैंघै दु:खै री शुरूआत होंणी।

9 “तैबै ज़ो लोका तुसरै खिलाफ़ सी, दु:ख देणै री तैंईंयैं तुसै ढौकणै द्याणै होर तिन्हां तुसै मारनै होर सैभ ज़ाति रै लोका मेरी बजहा न तुसा सैंघै बैर रखणा, किबैकि तुसै मूँ पैंधै बशाह रखा सी। 10तैबै बोहू सारै लोका मूँ पैंधै बशाह केरना छ़ौड़ना, एकी-दुज़ै ढौकणै द्याणै होर एकी-दुज़ै सैंघै बैर रखणा। 11बोहू सारै झ़ूठै भविष्यवाणी केरनु आल़ै ऐणै होर तिन्हां बोहू सारै लोका बै धोखा देणा। 12होर पाप बढ़नै री बजहा न बोहू सारै लोकै री झ़ुरी कम होंणी। 13पर ज़ुण आखरी तैंईंयैं धीरज रखला तेई मुक्ति पाणी। 14होर परमेश्वरै रै राज्य रा खुशी रा समाद सारी दुनिया रै हर ज़ैगा न प्रचार केरिना कि सैभी देशा रै लोका बै ऐ ग्रहण केरनै रा मौका मिलणा।

महासंकटा री शुरुआत

15 “ज़ैबै तुसै ‘घृणित चीज़ा बै तौखै खड़ी हेरलै’ ज़ौखै ते नी ती लोड़ी, ज़ुणी रै बारै न दानिय्येल भविष्यवाणी केरनु आल़ै बोलू ती, (ज़ो कोई ऐ पौढ़ा सा तिन्हां बै समझणै री कोशिश केरनी चेहिऐ) 16अगर तुसै तेई बौगता यहूदिया न रौहंदै लागै सी, ता ढौगा बै भैगा। 17ज़ो घौरै रै छ़ापरा पैंधै सी ते आपणा समान नेहणै री तैंईंयैं नी ओसलै। 18ज़ो छेता न सी ते आपणै झिकड़ै नेहणै री तैंईंयैं पिछ़ै नी हटलै।

19 “तिन्हां बेटड़ी री तैंईंयैं ज़ुणा सुज़दी होली होर ज़ुणिरै शोहरू दूधा पीणू आल़ै होलै, तिन्हां ध्याड़ै बड़ै भयानक होंणा। 20प्रार्थना केरा कि तुसाबै ठण्डै रै मौसमा न या बशाँ रै ध्याड़ै न भैगणा नी पौड़ला। 21किबैकि तेई बौगतै ऐण्ढा भारी दु:ख होंणा ज़ैण्ढा कि दुनिया री शुरूआता न लेइया औज़ा तैंईंयैं नी हुआ होर नी होंणा। 22होर अगर परमेश्वरै ते ध्याड़ै कम केरनै रा फैसला नी केरुदा होंदा, ज़ैबै लोका ऐतरै दुःख भुगतणै, ता हर कोइयै मौरना ती। पर तिन्हैं एथा बै होछ़ा केरनै रा फैसला केरुदा सा किबैकि तिन्हां बै तिन्हां लोका रै बारै न चिन्ता सा ज़ो परमेश्वरै चुनै सी। 23तिन्हां ध्याड़ै न अगर कोई तुसाबै बोलला, ‘हेर, ऐ सा मसीह!’ होर, ‘सौ सा मसीह!’ ता तेइरा भरोसा हेरी केरदै। 24किबैकि झ़ूठै मसीह होर भविष्यवाणी केरनु आल़ै हेरिदै लागणै होर तिन्हां ऐण्ढै नशाण च़मत्कार रिहाणै होर नोखै कोम केरनै होर तिन्हां ते चुनैदै मांहणु भी भरमाणै। 25तुसै होशियार रौहित्, हेरा मैं बौगता न पैहलै तुसाबै सैभ किछ़ दसू सा।

26 “अगर ते तुसाबै बोललै, ‘हेरा सौ बौणा न सा’, ता तुसै बाहरै हेरीत् निकल़दै; अगर ते बोललै कि ‘हेरा’ सौ कोठरी न सा, ता तुसै बशाह हेरीत् केरदै।

27 “किबैकि ज़ैण्ढै बिजली पूर्वा न पश्चिमा तैंईंयैं च़मकदी लोका हेरा सी, तैण्ढाऐ मांहणु रै बेटै रा मतलब मेरै ऐणै रै बौगता सैभी लोका मुँभै हर ज़ैगा हेरणा। 28ज़ौखै लाश होली, तौखै इलणी-काऊड़ै भी कठा होंणै।

मांहणु रै बेटै रा दबारा ऐणा

29 “तिन्हां ध्याड़ै रै दु:खा न बाद सूरज़ काल़ै होंणा, होर ज़ोथा रा प्याशा नी रौहणा, तारै सर्गा न औल़नै होर सर्गै री सारी शक्ति हिलाइणी। 30तैबै मांहणु रै बेटै रा मतलब मेरा चिन्ह सर्गा न हेरिना, तैबै धौरती रै सैभी खानदाना रै लोका छ़ाती पिटणी होर मांहणु रै बेटै बै बड़ी शक्ति होर महिमा सैंघै सर्गा न बादला पैंधै ऐन्दै हेरना। 31तेई तुरही री बड़ी छ़ेड़ा सैंघै, आपणै स्वर्गदूत भेज़णै, होर तिन्हां सर्गा रै कुणै न लेइया पूरी धौरती मौंझ़ै न च़ोहू दिशा न परमेश्वरा रै चुनैदै लोका कठा केरनै।

फेगड़ै रै बूटै रा उदाहरण

32“फेगड़ा रै बुटै न ऐ उदाहरण सीखा; ज़ैबै तेइरी शांणी नरम होआ सी होर पौचा निकल़दै लागा सी ता तुसै ज़ाणा सी कि गर्मी रै ध्याड़ै नेड़ सी। 33ऐण्ढी तैरहा ज़ैबै तुसै इन्हां सैभी गैला बै हेरलै, ता ज़ाणी लेआ कि परमेश्वरा रा राज्य नेड़ सा। 34हांऊँ तुसाबै सच़ बोला सा, ज़ैबै तैंईंयैं ऐ सारी गैला पूरी नी होली तैबै तैंईंयैं ऐसा पीढ़ी रा आखरी नी होंणा। 35सर्ग होर धौरती नाश होंणै, पर मेरी गैला कैधी भी नाश नी होंणी।

बिऊदै रौहा

36“तेई ध्याड़ै होर तेसा घड़ी रै बारै न कोई नी ज़ाणदा, न स्वर्गदूत, न बेटा, पर परमेश्वर पिता ज़ाणा सा। 37ज़ैण्ढा नूहै रै ध्याड़ै न हुआ, तैण्ढाऐ मांहणु रै बेटै रा ऐणा बी होंणा। 38किबैकि ज़ैण्ढा जल-प्रलय रै पैहलकै ध्याड़ै न ज़ुणी रोज़ा तैंईंयैं नूह जहाज़ा नी च़ढ़ू तेई ध्याड़ै तैंईंयैं लोका खाँदै-पींदै ती होर तिन्हां न ब्याह-शादी होआ ती। 39होर ज़ैबै तैंईंयैं कि ते प्रलय रै पाणियै नी नेऐ तैबै तैंईंयैं तिन्हां बै किछ़ भी पता नी च़लू; तैण्ढाऐ हांऊँ मांहणु रै बेटै रा ऐणा बी होंणा। 40तेई बौगतै दूई लोका छेता न होंणै तिन्हां न एक नेइणा होर दुज़ा छ़ौड़ी देणा। 41अगर दुई बेटड़ी कठै चक्की पीशदी होली, तिन्हां न एक नेईणी, होर दुज़ी छ़ौड़ी देईणी। 42ऐबै बिऊदै रौहा, किबैकि तुसै नी ज़ाणदै कि तुसरै प्रभु कौस ध्याड़ै न ऐणा। 43पर ऐसा गैला ज़ाणी लेआ कि अगर घौरका मालक ज़ाणदा कि च़ोरा कुणी बौगतै ऐणा ता सौ ज़ागदा रौंहदा होर आपणै घौरा न च़ोरी नी ती होंणै देंदा। 44तैबै तुसै मेरै वापस ऐणै री तैंईंयैं त्यार हुऐ लोड़ी; किबैकि हांऊँ मांहणु रा बेटा स्वर्गा न तेई बौगतै ऐणै ज़ैबै तुसै मेरै ऐणै री आश भी नी रखदै।”

विश्वासयोग्य दास होर दुष्ट दास

45“विश्वासयोग्य होर बुद्धिमान नोकर कुण सा ज़ुण तेई मालकै आपणै नोकरा पैंधै प्रधान बणाऊ कि तिन्हां बै ठीक बौगता न रोटी देला? 46धन्य सा सौ नोकर ज़ुणिबै तेइरा मालक ऐण्ढा केरदा हेरा सा। 47हांऊँ तुसाबै सच़ बोला सा; तेई मालका सौ नोकर आपणी सारी सम्पति पैंधै प्रधान बनाणा। 48पर अगर सौ दुष्ट नोकर सोच़ला कि मेरै मालकै रै ऐणै न देर सा, 49होर आपणै सैंघी नोकरा बै मारदा लागला होर पियक्कड़ लोका सैंघै खाला-पीला, 50ता तेई नोकरा रा मालक ऐण्ढै ध्याड़ै न वापस ऐणा ज़ुणिरै बारै न सौ नोकर ज़ाणदा बी नी, 51होर तेई रै मालका तेइबै कठोर सज़ा देणी होर कपटी लोका सैंघै तेइरा हिस्सा ठहराणा। तौखै तेइबै बोहू दु:ख-कष्ट होंणा।”

Currently Selected:

मत्ती 24: KFX-NT

Highlight

Copy