मत्ती 26

यीशु रै बरोधा न धोखा धड़ी

1ज़ैबै यीशुऐ ऐ सारी गैला बोली ता सौ आपणै च़ेले बै बोलदा लागा, 2“तुसै ज़ाणा सी, कि दुई रोज़ा बाद फसह रा त्यौहार होंणा होर मांहणु रै बेटै (यीशु) क्रूसा पैंधै च़ढ़ाणै री तैंईंयैं ढौकणै द्याइणा।”

3तैबै मुख्यपुरोहिता होर लोकै रै स्याणै पतरसा रै महापुरोहिता रै नाँ रै बरामदै न कठा हुऐ। 4होर आपु न विचार केरदै लागै कि आसा यीशु कैण्ढै ढौकणा होर मारना। 5पर ते बोला ती, कि त्यौहार रै बौगतै नी, कोइँछ़ै ऐण्ढा नी लोड़ी हुआ कि लोका न हुलड़ मच़ला।

बैतनिय्याहा न यीशु रा अभिषेक

6ज़ैबै यीशु बैतनिय्याह शैहरा न शमौन ज़ुणिबै कोढ़ ती तेइरै घौरा न रोटी खाँदा बेठा ती, 7ता एक बाँकी बेटड़ी सँगमरमरै री एक शीशी (ऐ नर्म पात्थरै लाईया बणीदी कीमती शीशी सा) न कीमती खुशबूदार तेल लेइया यीशु हागै आई होर ज़ैबै यीशु रोटी खाँदा बेठा ती ता तेइरी मुँडी पैंधै पेरू। 8ज़ैबै तेइरै च़ेले ऐ हेरू, ता ते झ़िकुऐ होर बोलदै लागै, “ऐ खुशबूदार तेल किबै ऐण्ढा बर्बाद केरू?” 9ऐईबै ता शोभली कीमतियै बेच़िया कंगाला बै बोंडी सका ती।

10ऐ ज़ाणिया यीशुऐ तिन्हां बै बोलू, तुसै ऐसा बेटड़ी बै किबै सता सी? एसै मूँ सैंघै भलाई केरी सा। 11कंगाल तुसा सैंघै हमेशा रौहा सी पर मूँ तुसा सैंघै हमेशा नी रौहणा। 12तेसै मेरी देही पैंधै ज़ो खुशबूदार तेल पेरू सा सौ मेरै पौथिणै री तैंईंयैं केरू सा। 13हांऊँ तुसाबै सच़ बोला सा कि सारी दुनिया न ज़ौखै खुशी रै समादा रा प्रचार केरिला तौखै ऐसा बेटड़ी रै कोमा रा ज़िक्र भी एसरी यादी न केरिना।

यहूदा इस्करियोती रा विश्वासघात

14तैबै बारा च़ेले मौंझ़ै न यहूदा इस्करियोती नाँ रै च़ेले मुख्यपुरोहिता हागै ज़ाइआ बोलू, 15“अगर हांऊँ यीशु बै तुसरै हौथै ढौकणै द्यानू, ता तुसा मुँभै कि देणा?” तिन्हैं तेइबै तीह च़ाँदी रै सिक्कै तोलिया धिनै। 16होर सौ तैदी न बाद यीशु बै ढौकणै रा मौका तोपदा लागा।

प्रभु-भोज

17अखमीरी रोटी रै त्यौहारा रै पैहलै रोज़ै च़ेले यीशु हागै एज़िया पुछ़दै लागै, “तू कि चाहा सा कि आसै तेरी तैंईंयैं फसह री रोटी खाँणै री तैंईंयैं त्यारी केरलै?”

18यीशुऐ बोलू, “तुसै ग्राँ बै ज़ात् तौखै तुसाबै एक मांहणु मिलणा। तुसै तेई हागै ज़ाइआ बोलीत् कि, गुरू बोला सा कि मेरा बौगत नेड़ आऊ सा। मूँ आपणै च़ेले सैंघै तेरी हागै साज़ा मनाणा।” 19च़ेले यीशु री गैल मैनी होर फसह रा भोज त्यार केरू। 20सौंझ़की घेरै यीशु आपणै बारा च़ेले सैंघै रोटी खाँणै री तैंईंयैं बेठा। 21ज़ैबै ते फसह री रोटी खाँदै लागैदैं ती ता यीशुऐ बोलू, “हांऊँ तुसाबै सच़ बोला सा कि तुसा मौंझ़ै न एकी हांऊँ ढौकणै द्याणा।” 22एसा गैला शुणिया ते च़ेले ऊदास हुऐ होर हर एक च़ेला पुछ़दा लागा, हे गुरू कि हांऊँ ता नी?

23यीशुऐ ज़वाब धिना, “ज़ुणियै मूँ सैंघै थाल़ी न हौथ पाऊ सा तेई हांऊँ ढौकणै द्याणा। 24मांहणु रै बेटै रा ज़ाणा ता ज़रूरी सा, ज़ैण्ढा कि तेइरै बारै पवित्र शास्त्र न लिखू सा, पर तेई मांहणु री तैंईंयैं दुःख सा ज़ौसरी बजहा न मांहणु रै बेटै ढौकिणा। अगर तेई मांहणु री तैंईंयैं केतरा भला होंदा कि सौ पैदा नी ती होंदा।” 25तैबै तेइबै ढौकणै द्याणू आल़ै यहूदा इस्करियोतीयै बोलू, “हे गुरू कि सौ हांऊँ सा?” तेइयै तेइबै बोलू, “तुसै सौ सी।”

पतरसा रै नाँह केरनै री भविष्यवाणी

26यीशुऐ तेइबै बोलू, तैं बोलू: तैबै यीशुऐ रोटी च़की होर प्रार्थना केरिया चोड़ी, होर च़ेले बै देंदी घेरै बोलू, “एसा बै खात्; ऐ मेरी देह सा।”

27तैबै यीशुऐ कटोरा च़कू होर प्रार्थना केरिया च़ेले बै देंदी घेरै बोलू, “तुसै सैभियै ऐई कटोरै न पीआ, 28किबैकि ऐ वायदै रा सौ लोहू सा ज़ो बोहू लोकै रै पापै री माफी री तैंईंयैं बहाइणा। 29हांऊँ तुसाबै सच़ बोला सा कि मूँ ऐ अँगूरा रा रस तेई ध्याड़ै तैंईंयैं कैधी बी नी पीणा ज़ैबै तैंईंयैं कि हांऊँ परमेश्वर पिता रै राज्य न तुसा सैंघै नोंऊँआं नी पीनू।” 30तैबै ते फसह रा भजन गाईया जैतून ढौगा पैंधै बै नौठै।

गतसमनी न प्रार्थना

31तैबै यीशुऐ तिन्हां बै बोलू, “तुसा सैभी औज़ राती मेरी बजहा न ठोकर खाँणी; किबैकि ऐ लिखू सा, कि ‘मूँ फुआल मारना; होर छ़ुण्डै री भेड़ा तितर-बितर होंणी।’ 32पर मूँ ज़िन्दै होंणै न बाद तुसा न पैहलै गलीला बै ज़ाणा।”

33ऐथा पैंधै पतरसै तेइबै बोलू, “अगर सारै तेरै बारै न ठोकर खालै ता खालै पर मूँ ठोकर नी खाँणी।”

34यीशुऐ तेइबै बोलू, “हांऊँ तौभै सच़ बोला सा, औज़ राती मुर्गै रै बाँग देणै न पैहलै तौ त्रा बार मेरा नाँह केरना कि तू मुँभै नी ज़ाणदा।” 35पतरसै तेइबै बोलू, “अगर मुँभै तौ सैंघै मौरना भी पौड़ला तैबै भी मूँ नी मुकरना” होरी सैभी च़ेले भी ऐण्ढा बोलू।

यीशु रा धोखै सैंघै ढोकिणा

36तैबै यीशु आपणै च़ेले सैंघै गतसमनी ज़ैगा बै आऊ होर आपणै च़ेले बै बोलू, कि तुसै “औखै बैशा, होर मूँ आगै ज़ाइआ प्रार्थना केरनी।” 37यीशुऐ पतरस होर जब्दी रै दूई बेटै आपु सैंघै नेऐ। तैबै यीशु उदास होर व्याकुल होंदा लागा। 38तैबै यीशुऐ च़ेले बै बोलू, “मेरा ज़ीऊ बोहू उदास सा औखै तैंईंयैं कि मेरै प्राण निकल़दै लागै सी। तुसै औखै ठहरा, होर मूँ सैंघै बिऊदै रौहा।”

39तैबै सौ थोड़ा आगै ज़ाइआ टुँबड़ा पौड़ू, होर प्रार्थना केरदा लागा, “हे मेरै बापू, अगर होइ सका सा, ता ऐसा दु:खै री घड़ी मूँ न दूर केरा पर तैबै भी मेरी नी पर तुसरी इच्छा पूरी लोड़ी हुई।” 40तैबै तेइयै एज़िया आपणै च़ेले सोंदै हेरै होर पतरसा बै बोलू, कि तुसै एक घड़ी बी मूँ सैंघै ज़ागी नी सकै? 41“बिऊदै रौहा होर प्रार्थना केरदै रौहा कि तुसै परीक्षा न नी लोड़ी पौड़ै, मना न ता तुसै त्यार सी, पर शरीरा न कमज़ोर सी।”

42तैबै यीशुऐ दुज़ी बार ज़ाइआ प्रार्थना केरी, “हे मेरै परमेश्वर पिता, अगर ऐ दु:ख मेरै भुगतै बगैर नी हटी सकदा ता तेरी इच्छा पूरी लोड़ी हुई।”

43तैबै यीशुऐ एज़िया ते च़ेले भी सुतैदै हेरै किबैकि तिन्हरी औछ़ी नींज़ै लाइया भौरूइदी ती। 44होर तिन्हां छ़ौड़िया भी नौठा होर सौहै गैल बोलिया त्रीजी बार प्रार्थना केरी।

45तैबै तेइयै एज़िया आपणै च़ेले बै बोलू, “तुसै कि हाज़ी बी आरामा सैंघै सोंदै लागै सी, हेरा, सौ बौगत आऊ सा होर मांहणु रा बेटा यीशु पापी रै हौथै ढोकिणा। 46उठा, च़ला; मुँभै ढौकणै द्याणू आल़ा नेड़ पुजू सा।”

बड़ी सभा रै सामनै यीशु

47यीशु बोलदा लागा ती, कि यहूदा ज़ो बारा च़ेले मौंझ़ै एक च़ेला यहूदा इस्करियोती तौखै आऊ, होर तेई सैंघै मुख्यपुरोहिता होर स्याणै री भीड़ तलवारी होर शोठे लेइया आई। 48यहूदा इस्करियोतीयै तिन्हां बै दैसू ती कि, “ज़ुणिबै हांऊँ माँकी देनू तुसै तेइबै ढौकेइत्।” 49होर तुरन्त यीशु हागै एज़िया बोलू, “ओ गुरू, नमस्कार!” होर तेइबै माँकी धिनी।

50यीशुऐ तेइबै बोलू, “ओ सैंघी, ज़ुणी कोमै री तैंईंयैं तू आऊ सा, तेइबै केर।” तैबै तिन्हैं एज़िया यीशु ढौकू होर आपणी हिरासता न लेऊ। 51होर यीशु रै एकी च़ेले आपणी तलवार खींच़ी होर महापुरोहिता रै एकी सपाही रा कोन काटू।

52तैबै यीशुऐ तेइबै बोलू, “आपणी तलवार म्याना न डाआ किबैकि ज़ो तलवार च़ला सी, तिन्हां सैभी तलवारियै लाइया नष्ट केरिना। 53कि तू नी समझदा, कि हांऊँ आपणै परमेश्वर पिता हागै अर्ज़ा केरी सका सा होर तेई तुसा नी बी ज़ादै स्वर्गदूत ऐबै मूँ हागै भेज़णै? 54पर पवित्र शास्त्रै री गैला रा पूरा होंणा ज़रूरी सा।”

55तेसा घड़ियै यीशुऐ भीड़ै रै लोका बै बोलू, “कि तुसै तलवारी होर डँडै लेइया मुँभै डाकू सांही ढौकणै री तैंईंयैं आऐ सी? हांऊँ हर रोज़ मन्दिरा न तुसा सामनै उपदेश देआ ती, पर तुसै हांऊँ नी ढौकू। 56पर ऐ सैभ एथै री तैंईंयैं हुआ कि भविष्यवक्तै रै वचन पूरै होलै।” तैबै सैभ च़ेले तेइबै छ़ौड़िया भैगै।

पतरसा रा न केरना

57तिन्हैं यीशु ढौकिया कैफा नाँ रै, महापुरोहिता हागै नेऊ ज़ौखै शास्त्री होर स्याणै कठा हुऐ ती। 58होर पतरस तेई पिछ़ै-पिछ़ै महापुरोहित रै ब्राम्दै तैंईंयैं नौठा होर भीतरै ज़ाइआ पौहरैदारा सैंघै नतीज़ै हेरदा बेठा। 59मुख्यपुरोहिता होर सारी सभा यीशु बै मारनै री तैंईंयैं तेइरै खिलाफ़ झ़ूठी गुआही देणै री तैंईंयैं त्यार ती। 60पर बोहू सारी झ़ूठी गुआही सैंघै बी यीशु पैंधै दोष साबित नी हुआ। 61आखरी न दूई मांहणु एज़िया बोलू, हांऊँ परमेश्वरै रै मन्दिरा बै ढाई सका सा होर त्रा रोज़ा न बणाई सका सा।

62तैबै महापुरोहित खड़ै होईया बोलू, “कि तू कोई ज़वाब नी देंदा? ऐ लोका तेरै खिलाफ़ कि गुआही देआ सी? पर यीशु च़ुपच़ाप रौहू।” 63महापुरोहितै तेइबै बोलू, “हांऊँ तौभै ज़िन्दै परमेश्वरै री कसम देआ सा कि अगर तू परमेश्वरा रा बेटा मसीह सा ता आसाबै बोल।”

64यीशुऐ तेइबै बोलू, “तैं आपुऐ बोलू बल्कि हांऊँ तुसाबै ऐ भी बोला सा कि ऐबै न तुसा मांहणु रा बेटा सर्वशक्तिमान परमेश्वरै री दैहिणी धिरै बेठैंदै होर सर्गै रै बादलै न ऐन्दै हेरना।” 65तैबै महापुरोहितै आपणा चोल़ा च़िरिया बोलू, “ऐईयै परमेश्वरै री निन्दा केरी सा ऐबै आसाबै गुआही री कि ज़रूरत सा? 66हेरा तुसै ऐबै ऐ निन्दा शुणी। तुसै कि समझा सी?” तिन्हैं ज़वाब धिना, ऐ ज़ानिया मारनै लायक सा। 67तैबै तिन्हैं तेइरै मुँहा बै थुकू, सौ मुक्कै लाइया मारू, होर तेइरै थप्पड़ बाहै, 68होर बोलू, हे मसीह, “भविष्यवाणी केर कि तेरै कुणिऐ बाही?”

पतरसा रा नाँह केरना

69पतरस बाहरै ब्राम्दै न बेठा ती कि एकी बेटड़ियै तेई हागै एज़िया बोलू, “तू बी ता गलीला न यीशु सैंघै ती।” 70तेइयै सैभी सामनै नाँह केरू, कि “हांऊँ नी ज़ाणदा कि तू कि लागी सा बोलदी?” 71तैबै पतरस बाहरै डेही हागै नौठा ता एकी होरी नोकराणियै बी तौखै बेठैंदै लोका बै बोलू, ऐ बी ता यीशु नासरी सैंघै ती। 72तेइयै भी कसम खाईया नाँह केरू, कि “हांऊँ तेई मांहणु बै नी ज़ाणदा।” 73थोड़ी देर बाद ज़ो लोका तौखै ती तिन्हैं पतरसा हागै एज़िया बोलू, “सच़िऐ तू बी ता तिन्हां मांहणु न एक सा किबैकि तेरी बोली तेरा भेद खोला सा।” 74तैबै सौ कसम खाँदा लागा, कि “हांऊँ तेई मांहणु बै नी ज़ाणदा।” होर मुर्गै तुरन्त बाँग धिनी। 75तैबै पतरसा बै यीशुऐ बोली दी गैल याद आई, “मुर्गै रै बाँग देणै न पहिलै तौ मेरा त्रा बार नाँह केरना।” होर सौ बाहरै ज़ाइआ बड़ै दु:खी होईया रोंदा लागा।

Currently Selected:

मत्ती 26: KFX-NT

Highlight

Copy