मरकुस 2
2
ध्रँगा रै मांहणु बै ठीक केरना
1बोहू रोजा बाद यीशु भी कफरनहूम शैहरा बै वापस आऐ होर लोकै शुणु कि यीशु आपणै घौरा सा। 2तैबै ऐतरै लोका कठा हुऐ कि दुआरा हागै भी ज़ैगा नी ती होर यीशु तिन्हां बै परमेश्वरै रै वचन शुणादा लागा ती। 3होर किछ़ लोका आऐ, तिन्हां मौंझ़ै न च़ार मांहणुऐ एक ध्रँगा रै मरीज़ा बै माँज़ै न च़किया तेई हागै आंणु। 4पर ज़ैबै ते भीड़ होंणै री बजहा न यीशु भेटी नी पुजी सकै ता घौरै रै छ़ापरा पैंधै च़ढ़िया किछ़ पौट पेच़ै होर सौ मरीज़ माँज़ै न पाईआ यीशु सामनै उतारू। 5यीशुऐ तिन्हरै बशाह हेरिया तेई ध्रँगै रै मरीज़ा बै बोलू, “ओ बेटैआ तेरै पाप माफ हुऐ।”
6तैबै बोहू सारै शास्त्री ज़ो तौखै बेठै ती, आपणै-आपणै मना न विचार केरदै लागै, 7“ऐ मांहणु ऐण्ढा किबै बोला सा? ऐ ता परमेश्वरै री निन्दा केरा सा! परमेश्वरा बै छ़ौड़िआ होर कुण पापा बै माफ केरी सका सा?”
8तैबै यीशुऐ एकदम ज़ाणू कि ते ऐण्ढा विचार केरदै लागै सी होर तिन्हां बै बोलू, “तुसै आपणै-आपणै मना न ऐण्ढा विचार किबै केरदै लागै सी? 9एक ध्रँगै रै मरीज़ा बै उठ होर आपणै माँज़ै च़किया औंढ फिर एथा न ज़ादा ऐ बोलणा सान कि तेरै पाप माफ हुऐ। 10पर तुसै ज़ाणी लेआ कि हांऊँ मांहणु रै बेटै बै एसा धौरती पैंधै पापा बै माफ केरनै रा भी हक सा।” यीशुऐ तेई ध्रँगै रै मरीज़ा बै बोलू, 11“हांऊँ तौभै बोला सा कि, आपणै माँज़ै च़किया आपणै घौरा बै ज़ा।” 12तैबै सौ उठु होर आपणै माँज़ै च़किया सैभी सामनै नौठा। तौखै बेठैंदै सैभै लोका हैरान हुऐ होर परमेश्वरै री सराउथी केरिया बोलदै लागै, “आसै ऐण्ढा च़मत्कार कैधियै नी हेरू।”
लेवी बै शाधणा
13यीशु कफरनहूम शैहरा न निकल़िया आपणै च़ेले सैंघै समुन्द्रा रै बौढ़ा बै नौठा होर सारी भीड़ यीशु हागै आई, होर यीशु तिन्हां बै उपदेश देंदा लागा। 14ज़ाँन्दी घेरै यीशुऐ हलफई रा बेटा लेवी च़ुँगी लेणै री च़ोऊकी हागै बेठादा हेरू होर तेइबै बोलू, “मूँ पिछ़ै एज़।” होर सौ उठिया यीशु पिछ़ै च़लू
15ज़ैबै यीशु लेवी रै घौरा न रोटी खाँदा बेठा तैबै बोहू सारै च़ुँगी लेणु आल़ै होर पापी, यीशु होर तिन्हरै च़ेले सैंघै रोटी खाँदै बेठै, किबैकि ते बोहू ती, होर यीशु पिछ़ै हर ज़ैगा जाया केरा ती। 16ज़ैबै शास्त्री होर फरीसियै ऐ हेरू कि सौ ता पापी होर च़ुँगी लेणु आल़ै सैंघै रोटी खा सा, यीशु रै च़ेले बै बोलू, “सौ ता च़ुँगी लेणु आल़ै, होर पापी सैंघै खा पीआ सा।”
17यीशुऐ ऐ शुणिया तिन्हां बै बोलू, “भलै-चँगै मांहणु बै बैदै री ज़रूरत नैंई, पर बीमारा बै सा, हांऊँ धर्मी मांहणु री तैंईंयैं नी बल्कि पापी बै शाधणै री तैंईंयैं आऊ सा।”
ब्रता रा सवाल
18यूहन्नै रै च़ेले होर फरीसी ब्रत रखा ती, तिन्हैं एज़िया यीशु न ऐ पुछ़ू, “यूहन्नै रै च़ेले होर, फरीसी लोका किबै ब्रत रखा सी, पर तेरै च़ेले ब्रत नैंई रखदै?”
19यीशुऐ तिन्हां बै बोलू, “ज़ाँ ढौई लाड़ा बराती सैंघै रौहा सा, कि ते ब्रत केरी सका सी? तिन्हां सैंघै सा, तैबै तैंईंयैं ते ब्रत नैंई केरी सकदै। 20पर तिन्हां ध्याड़ै ऐणा ज़ैबै लाड़ा तिन्हां न अलग केरिना, तैबै तेई बौगत तिन्हां ब्रत केरना।
21 “नोंऊँऐं कपड़ै रा टौला पराणै झिकड़ै न कोई नी लाँदा, ऐण्ढा केरनै सैंघै तेई पराणै झिकड़ै न किछ़ खींच़णा होर तेई पैहलै न भी ज़ादा च़िरिना। 22नोंऊँऐं अँगूरा रा रसा बै पराणै च़ंबड़ै री खौलड़ी न कोई नी रैखदा, ऐण्ढा केरनै सैंघै तेई अँगूरा रा रसा होर च़ंबड़ै री खौलड़ी फूटणै होर अँगूरा रा रस ता च़ंबड़ै री खौलड़ी दुहै नाश होंणै पर नोंऊँऐं अँगूरा रा रसा बै नोंऊँऐं च़ंबड़ै री खौलड़ी न रैखा सी।”
बशाँ रै ध्याड़ै रा प्रभु
23एक रोज़ यीशु होर तेइरै च़ेले बशाँ रै ध्याड़ै न छेतै बोलिया ज़ाँदै लागै ती होर तेइरै च़ेले च़लदै-च़लदै सीला चोड़दै लागै होर खाँदै लागै। 24तैबै किछ़ फरीसियै तेइबै बोलू, “हेर, तेरै च़ेले बशाँ रै ध्याड़ै न तेई कोमा बै किबै केरा सी ज़ो मूसा री बिधान रै मुताबक ठीक नी ऑथि?”
25यीशुऐ तिन्हां बै बोलू, “कि तुसै ऐ कैधियै नी पौढ़ू कि ज़ैबै राजा दाऊदा बै ज़रूरत हुई, होर ज़ैबै सौ होर तेइरै सैंघी भूखै ती, तैबै तेइयै कि केरू ती? 26तेइयै कैण्ढै अबियातर महापुरोहित रै बौगता न, परमेश्वरै रै तोम्बू न ज़ाईया च़ढ़ाईदी रोटी खाई, बिधान रै मुताबक ज़ुणी बै सिर्फ़ पुरोहित खाई सका ती होर कौसी री तैंईंयैं ठीक नी ती ऑथि, होर आपणै सैंघी बै भी धिनी।” 27तैबै यीशुऐ तिन्हां बै बोलू, “बशाँ रा ध्याड़ा मांहणु री तैंईंयैं बणाऊ सा, न कि मांहणु बशाँ रै ध्याड़ै री तैंईंयैं। 28तैबै हांऊँ मांहणु रा बेटा बशाँ रै ध्याड़ै रा भी मालक सा।”
Currently Selected:
मरकुस 2: KFX-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
