मरकुस 8

च़ार हज़ार मांहणु बै खियाणा

1तिन्हां ध्याड़ै न, ज़ैबै फिरी दुज़ी घेरै लोकै री एक बड़ी भीड़ कठा हुई, तिन्हां हागै खाँणै बै किछ़ नी ती ऑथि। यीशुऐ आपणै च़ेले शाधै होर तिन्हां बै बोलू, 2“मुँभै इन्हां लोका पैंधै दया ऐन्दी लागी सा किबैकि इन्हां लोका बै मूँ सैंघै त्रा ध्याड़ै हुऐ सी होर इन्हां हागै खाँणै बै किछ़ नी बैचु़ ती, 3अगर हांऊँ इन्हां बै भूखा घौरा बै भेज़ा सा ता इन्हां बौता न कमज़ोर होंणा होर किछ़ ता बोहू दूरा न आऐ सी।” 4तेइरै च़ेले ज़वाब धिना, “ऐई जंगल न इन्हां बै खयाणै री तैंईंयैं ऐतरा भोजन कौखै न मिली सका सा?” 5यीशुऐ तिन्हां न पुछ़ू, “तुसा हागै केतरी रोटी सी?” तिन्हैं ज़वाब धिना, “सौत रोटी।” 6तैबै तेइयै तिन्हां बै ज़मीना न बैशणै रा हुक्म केरू होर आपणै च़ेले ते सौत रोटी मुँगी, परमेश्वरा रा धन्यवाद केरू होर रोटी चोड़िया आपणै च़ेले बै बोंडणै री तैंईंयैं धिनी होर तिन्हैं च़ेले ते भीड़ै रै लोका न बोंडी। 7तिन्हां हागै किछ़ होछ़ी मैच्छ़ी भी ती, यीशुऐ धन्यवाद केरिया तिन्हां बोंडणै बै बी बोलू। 8लोकै रौज़दै तैंईंयैं रोटी खाई होर तिन्हैं बच़ीदी रोटी री सौत टोकरी भौरी। 9तौखै कोई च़ार हज़ार मर्द ती। तैबै यीशुऐ ते विदा केरै 10तैबै यीशु फट आपणै च़ेले सैंघै किश्ती न बैशिया दलमनूता ज़िलै बै नौठा।

फरीसी द्वारा स्वर्गा री नशाणी री माँग

11तैबै फरीसी लोका आऐ होर यीशु न सवाल पुछ़दै लागै, होर तेइबै प्रेखणै री तैंईंयैं यीशु बै स्वर्गीय नशाणी प्रगट केरनै बै बोलू। 12तैबै यीशुऐ लोमा शाह लेऊ होर बोलू, “ऐई ज़ुगै रै लोका नशाणी च़मत्कार किबै चाहा सी? इन्हां बै कोई नशाणी नी देईणा।” 13तैबै सौ तिन्हां बै छ़ौड़िआ वापस किश्ती बै आऊ होर समुन्द्रा पारै बै नौठा।

फरीसी लोका होर हेरोदेसा रा शिक्षा रूपी (खमीर) मलेड़ा

14होर च़ेले रोटी आंणनी बिसरी ती, होर किश्ती न तिन्हां आगै सिर्फ़ ऐकै रोटी ती। 15ज़ैबै ते ज़ाँदै लागै ती तैबै यीशुऐ तिन्हां बै च़िताऊणी देईया बोलू, “हेरा, फरीसी रै मलेड़े होर हेरोदेसै रै मलेड़े न साबधान रौहा।” 16च़ेले गलत बुझ़ु। तैबै ते आपु न विचार केरिया एकी दुज़ै बै बोलदै लागै, “तिन्हैं बोलू होला कि आसा हागै कम रोटी सा” 17ते कि लागै सी बोलदै, ऐ ज़ाणिया यीशुऐ तिन्हां बै बोलू, “रोटी नी होंणै रै बारै न तुसै किबै लागै सी सोच़-विचार केरदै? कि तुसै हाज़ी बी नी समझ़दै? कि तुसरी बुद्धि ऐतरी कठोर हुई सा? 18तुसरी औछ़ी सी, कि तुसै हेरी नी सकदै? तुसरै कोन सी, कि तुसै शुणी नी सकदै? कि तुसाबै याद नी? 19कि ज़ैबै मैं पौंज़ झ़ार मांहणु बै पौंज़ रोटी चोड़ी ती ता तुसै रोटी न भौरिया केतरी टोकरियाँ च़की ती?” तिन्हैं तेइबै बोलू, “बारा टोकरियाँ।”

20 “होर ज़ैबै मैं च़ार हज़ार मांहणु री तैंईंयैं सौत रोटी रै टुकड़ै केरै ती ता, तुसै केतरी टोकरी भौरिया च़की ती?” तिन्हैं बोलू, “सौत टोकरी।” 21यीशुऐ तिन्हां बै भी बोलू, “कि तुसै हाज़ी भी नी समझ़दै?”

बैतसैदा न एक कांणै मांहणु बै ठीक केरना

22तैबै ते बैतसैदा शैहरा बै आऐ; तौखै किछ़ लोकै एक कांणा मांहणु यीशु हागै आंणु होर तेई हागै अर्ज़ केरी कि सौ तेई कांणै मांहणु बै छ़ुँगला। 23यीशुऐ तेई कांणै मांहणु रा हौथ ढौकू होर सौ ग्राँ बाहरै नेऊ। यीशुऐ तेई कांणै मांहणु री औछ़ी पैंधै थुक लाऊ, आपणै हौथ तेई पैंधै रखै होर तेईन पुछ़ू, “तौ न किछ़ हेरिया सा?” 24तेइयै ऊझै हेरिया बोलू, “मूँ न किछ़ लोका हेरिदै लागै सी। ते औरै-पौरै च़लदै बूटै सांही लागदै लागै सी।” 25ज़ैबै यीशुऐ तेइरी औछ़ी पैंधै दुज़ी बार आपणै हौथ रैखै ता तेई मांहणुऐ आपणी औछ़ी पूरी खोली होर तेईन सैभ किछ़ साफ-साफ हेरिदा लागा। 26तैबै यीशुऐ सौ घौरा बै भेज़ू होर बोलू, “बैतसैदा ग्राँ बै हेरी ज़ाँदा।”

पतरसा रा यीशु मसीह बै अपनाणा

27तैबै यीशु होर तेइरै च़ेले फिलिप्पी नगरा रै औरलै-पौरलै ग्राँ बै नौठै। बौता न यीशुऐ आपणै च़ेले न पुछ़ू, “लोका कि बोला सी कि हांऊँ कुण सा?” 28च़ेले ज़वाब धिना, “बपतिस्मै देणु आल़ा यूहन्ना, पर किछ़ लोका तौभै एलिय्याह बोला सी होर किछ़ लोका बोला सी कि ऐ भविष्यवाणी केरनु आल़ै मौंझ़ै न कोई एक सा।” 29तैबै यीशुऐ तिन्हां न पुछ़ू, “होर तुसै कि बोला सी कि हांऊँ कुण सा?” पतरसै ज़वाब धिना, “तू मसीह सा।” 30तैबै यीशुऐ तिन्हां बै च़िताऊणी धिनी कि ते मेरै बारै न कौसी बै नी दैसलै।

आपणी मौऊती रै बारै न यीशु री भविष्यवाणी

31होर यीशुऐ तिन्हां बै समझ़ाणा शुरू केरू, “मांहणु रै बेटै (यीशु) बै बोहू दु:ख सौहणा पौड़ू होर स्याणै, मुख्यपुरोहित होर शास्त्रियै सौ नकारना होर तेइरी बेइज़ती केरनी होर सौ पक्का मारिना होर तेई त्रीज़ै ध्याड़ी मूँऐंदै न ज़िन्दै होंणा।” 32यीशुऐ आपणै च़ेले बै ऐ साफ-साफ दैसू। एथा बजहा न पतरसै यीशु एकी धिरै नेऊ होर तेइबै झ़िड़कदा लागा। 33पर यीशुऐ पिछ़ै मुड़िया आपणै च़ेले धिरै हेरिया पतरसा बै फटकारिया बोलू, “शैतान मूँ न दूर हो, तू परमेश्वरै री गैला रा भरोसा नी रैखदा बल्कि मांहणु री गैला पैंधै भरोसा रखा सा।”

यीशु पिछ़ै च़लणै रा मतलब

34तैबै यीशुऐ च़ेले समेत लोकै री भीड़ बी आपु हागै शाधी होर बोलू, “अगर कोई मूँ पिछ़ै ऐणा चाहा सा ता सौ आपणा सैभ किछ़ छ़ौड़ला होर आपणै दु:ख सौहणै री तैंईंयैं त्यार रौहला। 35किबैकि ज़ुण आपणै प्राणा बै बच़ाणा चाहा सा, तेई सौ गवाणी होर ज़ुण मेरी तैंईंयैं होर मेरै खुशी रै समादै री तैंईंयैं आपणी ज़िन्दगी देला तेइरा प्राण बच़ाला। 36अगर कोई मांहणु दुनिया न सैभ किछ़ हासिल केरा सा, ज़ो सौ चाहा ती होर फिरी आपणै प्राणा बै नाश केरा सा ता तेथा रा कि फायदा? 37किबैकि कोई भी मांहणु आपणै प्राणा रै बदलै हमेशा री ज़िन्दगी नी पाई सकदा। 38अगर कोई एसा व्यभिचारी होर पापी पीढ़ी न मेरै नाँ न होर मेरै वचना न शर्मिया सा ता मांहणु रै बेटै बी, ज़ैबै हांऊँ पवित्र स्वर्गदूता सैंघै आपणै परमेश्वरै री महिमा समेत एला ता तेई बी तिन्हां मांहणु न शर्मिणा।”

Currently Selected:

मरकुस 8: KFX-NT

Highlight

Copy