Jan 19

1Alò Pilat di soda-ya mennen Jézi alé é bay li roun volé.

2Soda-ya fè roun kouròn ké lyann pikan é yé pozé l ansou so tèt, yé abiyé l osi ké roun manto rouj.

3Yé té ka proché di l é yé té ka di: “Bonjou, rwè jwif-ya!” Epi yé té ka bay li kalòt.”

4Pilat viré soti dèrò ankò épi i di jwif-ya: “Men, mo ka mennen l dèrò pou zòt, pou zòt wè ki mo pa ka trouvé anyen sa wonm-an fè pou mo kondannen l.”

5A konran Jézi soti dèrò, i té gen kouròn pikan-an ansou so tèt é manto rouj-a ansou li. Pilat di yé: “Mé wonm-an!”

6Lò dòkò prèt jwif-ya ké gard-ya wè li, yé koumansé rélé fò: “Krisifyé l, krisifyé l.” Pilat di yé: “Pran li é krisifyé li zòt menm, pou mo menm, mo pa ka trouvé anyen pou mo kondannen l.”

7Jwif-ya réponn li: “Nou gen roun lalwa, é sélon sa lalwa-a li divèt mouri, piski li di li sa Pitit Bondjé.”

8Lò Pilat tandé sa palò-a, li té plis pè ankò.

9I viré rantré annan gran kaz gouvèrnèr-a, é li doumandé Jézi: “Koté to soti?” Mé Jézi pa réponn li.

10Pilat di li: “Kouman a pou mo to pa lé palé? Ès to pa savé mo gen pouvwè laché to kou osi mo gen pouvwè krisifyé to?”

11Jézi réponn li: “To pa gen pyès pouvwè ansou mo, si a pa Bondjé ki bay to li. A pousa, moun-an ki mété mo anba to lanmen-an ka fè roun pli gran péché ki to.

12Lò Pilat tandé sa, li chaché laché Jézi. Mé jwif-ya roukoumansé rélé pli fò ankò: “Si to laché sa wonm-an, to pa zanmi Sézar. Nenpòt ki moun ka fè so kò rwè sa zenmi Sézar!”

13Lò Pilat tandé sa, i mennen Jézi dèrò é li asiz ansou chèz jij-a koté yé ka aplé “Lakou pavé roch” (an ébré “Gabata”).

14A té lavèy lafèt Pak-a, bòdi midi. Pilat di jwif-ya: “Men zòt rwè!”

15Mé yé rélé: “Tchwé l! Tchwé l! Krisifyé l!” Pilat di yé: “Zòt lé mo krisifyé zòt rwè?” Dòkò prèt-ya réponn: “A Sézar rounso ki sa nou rwè.”

16Alò Pilat bay yé Jézi pou yé krisifyé l. Yé trapé li é mennen l alé.

Jézi krisifyé ansou lakrwa-a

17Jézi poté limenm so lakrwa, li soti di lavil-a é li rivé roun koté yé ka aplé “zo tèt” an ébré “Golgota.”

18A la yé kloué Jézi ansou roun lakrwa. An menm tan yé krisifyé dé ròt moun, roun chak bò, Jézi té an mitan.

19Pilat fè yé kroché roun pankart laro lakrwa-a. I té ékri ansou l: “Jézi wonm Nazarèt-a, Rwè Jwif-ya.”

20Bokou jwif li pankart-a, piski koté yé té krisifyé Jézi-a té proch lavil-a. Pankart-a té ékri an ébré, an laten ké an grèk.

21Dòkò prèt jwif-ya di Pilat: “Pa ékri ‘Rwa Jwif-ya.’ ” Mé ékri: “Sa wonm-an di: “Mo sa Rwa Jwif-ya.”

22Pilat réponn: “Sa mo ékri, mo byen ékri l.”

23Lò soda-ya fin” krisifyé Jézi, yé pran so lenj é yé fè kat moso, roun moso pou chak. Yé pran osi so tinik fèt ké roun sèl bi moso létof dipi laro jik anba.

24Soda-ya di roun a lòt: “A nou pa déchiré tinik-a, mé annou jité grenndé pou nou wè kilès ki ké gannyen li.” A konsa sa ki té ékri annan Liv Bondjé-a fèt vrè, i ékri: “Yé partajé mo lenj, yé jité grenndé pou mo tinik.”

25Obò lakrwa Jézi, li té ganyen so manman ké sò so manman, Mari, fanm Klopas ké Mari di Magdala.

26Jézi wè so manman é òbò li disip li té kontan-an. Jézi di so manman: “Man, men to pitit.”

27Epi li di disip-a: “Men to manman.” Dépi sa, disip-a pran manman-an koté li.

Lanmò Jézi

28Aprè sa, Kou Jézi té savé tout bagaj té fini é pou sa ki té ékri annan Liv Bondjé-a fèt vrè, li di: “Mo swèf.”

29I té ganyen la roun karaf plen ké vinèg. Soda-ya tranpé roun zéponj annan vinèg-a, yé maré l annan roun bout bwa izop, épi yé proché l bòdi so bouch.

30Lò Jézi pran gou vinèg-a, li di: “Tou bagaj fèt!” Li bésé so tèt, é a konsa li mouri.

31Atò, li té vandrédi lavèy jou saba-a, chèf jwif-ya pa té lé kò-ya rété ansou lakrwa-a, (piski sa saba-a té roun gran jou pou yé), yé alé doumandé Pilat fè soda-ya kasé janm krisifyé-ya pou yé mouri pli vit, é fè yé désann kò-ya.

32Soda-ya vin kasé janm promyè wonm-an krisifyé ké Jézi épi janm dézyèm-an.

33Lò yé rivé bò Jézi, yé wè li té déja mouri, a pousa yé pa kasé so janm.

34Mé roun soda krévé bò kòt Jézi ké roun piké, lanmenm disan ké dilo vidé soti.

35Moun ki ka bay sa témwnyaj-a wè ké so wyé sa fèt, é so témwnyaj a lavérité; li savé li ka di lavérité, Li ka di sa pou zòt krè, zòt osi.

36Tou sa rivé pou sa Liv Bondjé-a té di, fèt vrè, li ékri: “Yé péké kasé pa roun di so zo.”

37Rounnòt koté li ékri: “Yé ké gadé sala yé krévé-a.”

Lantèrman Jézi

38Aprè sa, Jozèf moun Arimaté, ki té sa disip Jézi san dòkò jwif-ya té savé, piski li té pè yé, doumandé Pilat kò Jézi. Pilat bay li pèrmisyon pran kò-a.

39Nikodenm vini li osi. A li ki té alé wè Jézi gro lannwit. Li mennen trant kilo zèrb mirr ké lalwès.

40Yé pran kò Jézi é yé roulé bandé l annan roun létof lenj, ké losyon, kou jwif-ya té ganyen labitud fè pou yé lantèrman.

41Atò, li té ganyen roun jarden proch koté yé té krisifyé Jézi-a, é annan sa jarden-an li té gen roun tonm fouyé annan montann-an ki pa té janmen sèrvi pou roun lantèrman.

42Kou a té lavèy lafèt saba jwif-ya é ki tonm-an té proch, a la yé mété déposé kò Jézi.

Currently Selected:

Jan 19: GCR07

Highlight

Copy