Yeunossak kon Wotokoyi 1
1
1Theophilus, wapiyalok ukaletayi yau imenukappù uya tamù'nawolon Jesus nùkupùppù molopai enupa'nàppà ya tùwotokoyi piyattàppù tùuya motapai pàk. 2Epùn pona tùwenuttok weyu ponalà. Tùwenuku wapiya tùneunoko pe tùnanùmùssan nùssan yelupappù ya tok nùkupù woton pàk Wakù Akkwalù meluntàlù yai. 3Tùwettalumattà molopai tuwelikù tùpo, 40 pe wei kaichalà ichenpoikapàtùppù ta'lon kon nùssan piyak, kasei pe pùla pàli'yau tùwechi yekama pe tukke itekkwa yà'là yekkwa yawàlà là. Tok uya yeneppù molopai ichelupappù tok pokonpe Katù wettok itepulu pe pàk. 4Tewin wei yattai tok wepilichak yau, “Jerusalem kù'nàntàu, tùse lepantok mùmàmuttàik màlà ipàk uselupatai nùk, Ukàipùnù uya itùlù uya màlà teppù lùppù,” teppù ya tok pàk. 5“John uya enpatauka'nàppà màlà tuna ke, tùse eyenpatauka kon màlà Wakù Akkwalù ke, tukke kulu wei tùpo pùla,” teppù Jesus uya tok pàk.
Jesus Wenukuppù Epùn pona
6Jesus nenupassan wesseposak ipokonpe yau tok uya yekamappoppù, “Itepulu, itepulu pe ken na' we'nàtok mùnappo auya sàlà pe Israel yamùk piyak?” tukaik. 7Jesus uya, “Yà'làlà wekkuttok yattai molopai yà'làlà wekkupù màlà ànùttu kon pen tùse ukàipùnù nùkupù màlà tapàikketù yau,” teppù tok pàk. 8“Tùse meluntà yepolo auya'nokon màlà Wakù Akkwalù uyàssak àpona'nokon yau, molopai uyekaman nan pe ewechi kon màlà Jerusalem po, tamù'nawàlà Judea yawàlà molopai Samaria polo, molopai mailàlà sàlà non wenukattok yawàlà,” teppù Jesus uya tok pàk. 9Wa te ya tùpo Jesus yanùmùppù màlà Epùn pona tok uya yene tùse, molopai katuppluk uya yonamùppù tok yenu winàpai.
10Màlàyau tok wechi lùppù kakàik itenu iwenuku yene pàk tùse, asa'lon kon kàyik yamùk aimu'nan ipon ton wechippù satippe tok piyau. 11“Kàyik yamùk Galilee pon kon, yà'là pe ken iwechi pàk kak yenupàkà ewechi kon màlà? Pùsàlà Jesus Epùn pona yanùmù nepàssai'nùk ewinàpai'nokon, mùkkàlà tùuyà tu'ma woton epùn pona iità menpàssatài'nùk kasa,” teppù tok uya.
Judas Mùyakan
12Màlàyau tok wennapoppù Jerusalem pona wùk Olive Tùpù poi. Sàlà wùk wechippù màlà mei kulu pùla Jerusalem poi, wàlàkka'nàtok yattai usanàtok kaichalà. 13Tok welepamùppù Jerusalem pona, tok utàppù tapùi kawon pan tak molo tùwetok kon yak. Molo tùwessan mùkkyamlo Peter, John, James, molopai Andrew, Philip, molopai Thomas, Bartholomew, molopai Matthew, James Alphaeus mumu, Simon Zealot, molopai Judas, James mumu. 14Tok wepilippàtùppù tamùkke echipalà àpùlemase, tamùkke nossan yamùk pokonpe, Mary là Jesus yan molopai Jesus yakon non tukaik.
15Màlà yattai ailon tawonnan wepilipùppù. 120 pe tok wechippù màlà tamù'nawàlà molopai Peter wà'mùssakkappù eselupase. 16“Utonpa yamùk, Katù Maimu wekkussak man ailon pe, Wakù Akkwalù uselupappù David yai Judas pàk lùppù kasa. Mùkkàlà wechippù Jesus yachin nan kàyik yamùk yanài pe,” 17“Judas wechippù kùklottawon'nokon, yanùnsa' lùppù kùwotokoyi kon kupù tonpa pe.”
18(Umà ye'mappù Judas uya pùlayatta tùnepoloppù àli pe tùwettok winà ke. Màlà umà yau iwepukappù ipla, ilotta wettoikwappù molopai tamù'nawàlà iwek wettùlùkkwappù. 19Tamù'nawolon kon kappon yamùk Jerusalem pon kon uya yetappù. Màlàpàk tok uya yesettàppù tùmaimu kon yau ‘Akeldama’ tukaik, ‘Mùn Pata’ te ya pe iwechi.)
20Masapùla “Iwe'menukasak man Psalms kaletayi yau, ‘Tàwà itùwùk yà'làlà pùla nechii, molopai ànù'là kùsemattak itau,’ tukaik. Iwe'menukasak nàlà man, ‘Tàwà tùulon iwotokoyi lùppù yanùmùik,’ tukaik.
21-22“Màlàpàk uchi tùulon iche ina man kùya'là iwessak lùppù Jesus we'wuluukappù yekamanài pe. Kùya'là'nokon iwessak lùppù Itepulu Jesus usalà kùpokon pe' nokon yawàlà, John uya enpatauka'nàppà motapai tùpyattàse Jesus wenukuppù kùwinàpai'nokon epùn pona ponalà,” teppù Peter uya. 23Màlàyau tok uya asa'là kàyik yamùk yanùmùppù Joseph, Barsabbas tukaik tesassen (Justus tukaik nàlà là tesassen) molopai Matthias. 24Molopai tok wàpùlemappù, “Itepulu, tamù'nawolon kon kappon yamùk yewan mùttuyaik. Màlàpàk ina pàk yekamakà i'nai là yanùnsak auya pùsamlo kùlottapai, 25teunossen pe sàlà wotoko yanùmù woton Judas nùnàmàppù lùppù tùutà yau tùpatassek yak,” tukaik. 26Sàlà tùpo tok uya tàk lùkkwà yenu'mapàtùppù i'nai là yanùmù tùuya'nokon pùsamlo kùlottapai ittutoppe tùuya'nokon. Matthias pona iwepukappù, mùkkàlà yanùnsak wechippù màlà, molopai 11 pan kon teunossan tonpa pe iwechippù.
Currently Selected:
Yeunossak kon Wotokoyi 1: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
