Yeunossak kon Wotokoyi 28
28
Malta po
1Ina ukklàssak nulà a'mun pona yau, ina uya Malta pe pata yesek wechi ittuppù. 2Molon kon nà wechippù màlà wakù pe ina pàk. Konok wepyattàppù tùutà pàk molopai iko pe iwechippù, màlàpàk apok pottàppù tok uya molopai tok uya ina yanùmùppù. 3Paul uya aipù apok pilipùppù, molopai apok pona inonkapàtù ya tùse àkài wepakkappù a'nek pe iwechi pàk, molopai ikkappù ya itemyatù yai iwemokka pùla iwekkaiwattàsak. 4Molonkonnà uya àkài wechi Paul yemyatù pàk yeneppù molopai tùyiwalà'nokon, “Pùsàlà kàyik wechi màlà wànài pe, tùse talumattàntok katùyi uya iwemattoppe ikupù pen màlà, iwepesak là tuna kapai tùse,” teppù. 5Tùse Paul uya àkài yenu'mappù temyatù poi apok yak, molopai e'nek pe ikupùppù ya pen. 6Iwawo wapùla iwelikù tewinanpa yeneiche tok wechippù. Tachin pe imàmuku tùpo molopai yà'làlà wekkussak iwinàkàik pùla iwechi pàk, tok uya tùusenumenkatok kon mùyakanmappù. Molopai “Katù pe iwechi màlà!” teppù tok uya.
7Mei pùla Publius, màlà pata yesak patassek wechippù. Ina yanùmùppù ya màlà wakù pe molopai àsolùwau wei ina wechippù ikaklamu pe. 8Publius kàipùnù wechippù màlà tekwek tau e'nek pe. Iwàkkàmi'masak molopai iwe'wasukka. Paul utàppù ipatassek yak iwàpùlemappù, temyatù tùlùppù ya ipona, molopai ipittàppù ya. 9Sàlà wekkussak yau, tamù'nawàlà tùulon kon e'nek ton màlà pata yawon kon uyàpùppù molopai tok uchipittàppù. 10Tok uya ina lepappù tukke lepantok ke, molopai ina utà tuna po yau kanau yak iche ina wettok te'ma kon tau tùlùppù tok uya.
Malta Poi Rome Pona
11Àsolùwau kapùi tùpo ina utàppù kanau Alexandria pon “Echi'munuik Katù yamùk” tetok yau, iko pe iwettok yawàlà iko'mansak molo pata lùkkwà yau. 12Ina welepamùppù màlà Syracuse pona molopai molo ina uko'mamùppù àsolùwau wei. 13Màlà motapai ina utàppù tuna po molopai ina welepamùppù Rhegium pon pata pona. Yakon wei yattai assetun wepyattàppù tasse'nùmù pàk south winàpai; molopai asa'là wei, yau ina welepamùppù pata Puteoli pona. 14Molo ailon tawonnan yepoloppù ina uya, molopai tok wechippù molo ina uko'mamù iche tewin suntayakka. Molopai wa là ina uyàpùppù Rome pona. 15Ailon tawonnan Rome pon kon uya ina yetappù molopai tok uyàpùppù Appius Makitiyi motak molopai “Àsolùwau Tappùi yamùk” motak ina yepose. Tok yensak tùuya yau Paul uya Katù pàk tenki teppù molopai inmeluntàtappù.
Rome po
16Ina welepansak Rome pona yau, Paul wemattoppe tùyiwalà ikupùppù màlà, tennài soicha pokonpe.
17Àsolùwau wei tùpo Paul uya Jew yamùk eke ton pilipùppù. Tok wepilichak yau, tok pàk: “Utonpa yamùk! Yà'làlà kussak uya kùtonpa yamùk wapùla kùyeselu kon yanùnsak lùppù kùtamo kon winàpai winàkàik pùla tùse, uyachisak sàlà Jerusalem po molopai utùsak sàlà Roman yamùk yemyak. 18Uyekamappopàtù tùpo unonkapai tok nettai, masapùla tok uya yà'làlà kussak uya welittok itepeppù pe yepolo pùla iwechi pàk. 19Tùse Jew yamùk wessak iwinàkàik pàk uyeka'nonkappù Caesar yekamappo toppe uya ukottùma toppe ya, yà'làlà uselupatok utonpa yamùk winàkàik pùla tùse. 20Màlàpàk eyentok kon pe uya eyekamapposak kon uya màlà molopai uselupa toppe àpokonpe'nokon. Masapùla enpen Israel yamùk wettok pàkànsau sàlà uyaulonsak chin ke,” teppù ya. 21Tok uya ipàk: “Kaleta yeposak ina uya Judea poi àpàk pùla man; molopai ina tonpa yamùk uyàssak màlà motapai itekale pokonpe pùla man, wapùla yà'làlà yetasak ina uya àli pe àpàk pùla man. 22Tùse euselupatok enetapai ina man, masapùla ina nùttuyan mailàlà kappon yamùk uselupa àli pe, sàlà enupantok yau messaik nùk winàkàik,” teppù.
23Màlàpàk tok uya wei konekappù Paul pokonpe tùwessepotok kon pe, molopai tukke tok uyàpùppù màlà yattai Paul patassek yak. Ko'làma motapai ewalupà tepose Katù wettok itepulu pe yekale yekamappù ya. Jesus pàk ailon tetoppe tok uya ikupù iche iwechippù, Law Moses winàpaino molopai Katù Maimu yenpoikannan nùmenukappù yapai. 24Tùulon kon uya ailon teppù imaimu pàk, tùse tùulon kon uya ailon te pùla iwechippù. 25Màlàpàk tok utàppù tùpatalà'ne tùusenumenkaik Paul uya sàlà te tùpo, “Ikasa kulu Wakù Akkwalù uselupappù tùmaimu yenpoikanài Isaiah yai kùtamo kon yelupa tùuya yau!
26Masapùla: ‘Itàkà molopai wa kata pùsamlo kappon yamùk pàk: Tàwàlàlà yeta auya'nokon màlà tùse ittu auya'nokon pen, tàwàlàlà iwa auya'nokon màlà tùse yene auya'nokon pen. 27Masapùla pùsamlo kappon yamùk yewan wechi màlà sa'man pe. Tok uya tùpana kon yakkosak man, molopai tenu kon yakkosak tok uya. Màlà kasa pùla iwechi yau, tok yenu uya yene eppaino, tok pana uya yeta, tok usenumenkatok uya ittu, molopai tok welattà eppaino upyak, molopai tok ipittà uya eppaino,’ tukaik,” 28“Ittuichi auya'nokon màlà Katù uya pùikattàntok yekale yeunossak Jew yamùk pen piyak. Tok uya yeta màlà!” tukaik. 29[Sàlà tesak Paul uya tùpo Jew yamùk utàppù tùusàulàmai'ma' nokon àsà pe tùklottau'nokon.]
30Asa'là kilichimochi Paul uko'mamùppù màlà pata yau tùne'mappù tùwemattoppe itau tau, molopai tamù'nawolon kon tense iyàssak kon yanùmùppù ya molo. 31Katù wettok itepulu pe yekamappù ya molopai kappon yamùk yenupappù ya Itepulu Jesus Christ pàk, tùuselupa pàk iwechippù tùusenalippaik pùla molopai iwakkà'nài pùla.
Currently Selected:
Yeunossak kon Wotokoyi 28: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
