Matthew 17
17
Jesus Wemyakanmatok
(Mark 9.2-13; Luke 9.28-36)
16 pe wei tùpo Jesus uya Peter molopai echiyakonnon James molopai John tawonnan yalàppù ta'là, molopai tok utàppù kawon wùk pona tewincha. 2Tok uya yene tùse, Jesus wemyakanmappù. Itenpata wenappù màlà akkwa pe wei kasa. Molopai ipon wenappù aimu'ne akkwa pe. 3Molopai nen uchi àsolùwawon kon Jesus ya'lon kon uya Moses molopai Elijah tawonnan uselupa Jesus pokonpe yeneppù. 4Màlàyau Peter uya Jesus pàk, “Uyepulu, wakù pe nen talà we'nà'nokon man. Iche ewechi yau, talà àsolùwau tapùi koneka uya, tewin àwùppe, tewin Moses yùwùppe, molopai tewin Elijah yùwùppe tukaik,” teppù. 5Ichelupa lùppù tùse akkwa katuppluk uyàpùppù màlà tok yepoi molopai mayin uya katuppluk yapai, “Pùsàlà mùkkàlà u'nùn kulu Umu, uyauchinpanài. Yetatàk kon!” teppù. 6Mayin yetasak tùuya'nokon yau, Jesus ya'lon kon wettalipasak kulu wechippù màlà. Màlàyau tok wekkawai'mappù non pona tenpata kon po. 7Jesus uyàpùppù tok piyak molopai tok yappàtùppù ya. “E'wuluukatàk kon. Kettalipatàu!” teppù ya. 8Màlàpàk tok uya tenu kon tùlùppù, molopai ànù'là yeneppù tok uya pen molo tùse Jesus neken.
9Tùwuttà kon pe wùk poi Jesus uya tok pàk, “Ànù'là pàk sàlà menpàssatài'nùk kùsekamatàu Kàyik Mumu wuluuka weli'nàtok yapai ponalà,” tukaik. 10Màlàyau ya'lon kon uya, “Yà'là pe ken uchi iwechi pàk màlà Law pàk enupannan uya Elijah uyàpù màlà wapiya te?” tukaik yekamappoppù. 11“Elijah làichi mùkkàlà tùuyàssen wapiya molopai tamù'nawolon koneka ya màlà. 12Tùse tekamayaik àpàkù'nokon! Elijah uyàkkapùppù man molopai kappon yamùk uya ittu pùla iwechippù, tùse tok uya italumattàppù iche tùwettok kon yawàlà. Màlà kasa làma Kàyik Mumu talumattà tok uya màlà,” teppù ya. 13Màlàyau nen uchi ya'lon kon uya John Enpataukanài pàk ichelupa ittuppù.
Jesus Uya Walawok Muleppù Àli Akkwalù Yen Ipittà
(Mark 9.14-29; Luke 9.37-43a)
14Ilinà kappon yamùk kùlottak tok wennaposak yau, kàyik uyàpùppù Jesus piyak, molopai tese'muyok iwenappù itemlotopo. 15Molopai, “Uyepulu, Umu pàk tàwà esentuppakà! Tùusa'mantapàssen mùkkàlà, molopai àsà pe imattanù'nài, tùwàpàpàssen nà apok yak wapùla tuna kak là. 16Aya'lon kon piyak tùnepùi tùse tok uya ipittà pùn,” teppù ya. 17Jesus uya yeikuppù, “Ailon tawonnan pe pùla messatàik molopai ikasa pùla messatàik kappon yamùk! Yà'là pàkàlà ken apyau'nokon wechi? Yà'là pàkàlà àpàlika kon uya? Walawok inekkà sà motak upyak!” tukaik. 18Jesus uya meluntà pe àli akkwalù pàk, “Epakkakà!” teppù, molopai iwepakkappù. Màlàyau màlà yattai kulu walawok uchipittàppù.
19Màlàyau Jesus ya'lon kon uyàpùppù ipyak amak yai molopai yekamappoppù tok uya, “Yà'là pe ken iwechi pàk ina uya àli akkwalù yenpakka pùla nechiinùk?” tukaik. 20“Ailon tetok auya'nokon ma'le iwechi pàk. Ailon kulu sàlà, ailon tetok yesappe ewechi kon mustard yenappà kasa là yau, sà wùk pàk, ‘Sàlà motapai itàkà motak,’ te auya'nokon, molopai iità. Yà'làlà kupù auya' nokon! 21[Tùse tùuta'lettàik pùla wàpùlemantok neken màlà pùsàlà yekkwa yenpakkanài. Yà'làlà uya ikupù yentai iwechi màlà.]” tukaik Jesus uya tok yeikuppù.
Jesus uselupa tu'ma Tùwelittok pàk
(Mark 9.30-32; Luke 9.43b-45)
22Ta'lon kon uyàssak tamù'nawàlà tamùkke Galilee po yau, Jesus uya tok pàk, “Kàyik Mumu tùlù màlà kappon yamùk yemyak. 23Tok uya iwànà màlà. Tùse icholùwano wei yattai iwuluuka màlà wema'nàtok yak,” teppù. Ya'lon kon usewankono'mappù kulu màlà.
Katù Yùwùk Ponaloppe Pùlayatta Ye'matok
24Jesus molopai ya'lon kon uyàssak Capernaum pona yau, Katù yùwùk ponaloppe tùtùsen pùlayatta pili'nàinan uyàpùppù màlà Peter piyak molopai yekamappoppù tok uya, “Eyenupanài ken na? Katù yùwùk ponaloppe pùlayatta tùnài?” tukaik. 25“Ewaik, itùnài mùkkàlà” tukaik yeikuppù ya. Peter wewonsak tapùi tak yau, Jesus uselupappù màlà wapiya, “Simon, yà'là kasa mesenumenkayan sàlà pàk? Ànùkyan winàpai ken pùlayatta yekkwa'nàinan sàlà non pon kon kappon yamùk kinù? Tùmu kon yamùk ka'lù, wapùla tùulon kon?” tukaik. 26“Tùulon kon,” tukaik Peter uya yeikuppù. “Màlàpàk na' tok mumu yamùk uya ye'ma pen màlà. 27Tùse pùsamlo kappon yamùk we'naikatoppe ikupù iche pùla we'nà'nokon man. Màlàpàk tuna kak itàkà molopai konoik menu'maik tuna kak. Wapiya anmappù mùpàlàkaik, molopai intau pùlayatta pun yepolo auya màlà, Katù yùwùk ponaloppe pùlayatta ye'matok untùlù molopai àntùlù kaichalon. Malàik molopai tok me'maik,” teppù ya.
Currently Selected:
Matthew 17: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
