Matthew 21

Jesus Welepamù Jerusalem Pona

(Mark 11.1-11; Luke 19.28-40; John 12.12-19)

1Jerusalem winàkàik tùuyàpù kon pe, Jesus molopai ya'lon kon uyàpùppù màlà Bethphage Olives Tùpù motawon pata motak. Molo Jesus uya asa'là ta'lon kon yeunokoppù wapiya. 2Sàlà yamùk elupantok pokonpe, “Pata eyemloto kon po nai'nùk yak itàtàk kon. Màlà yattai tonki yewattàsak yepolo auya'nokon màlà imle ipyau. Tok meukatàik molopai tok mùnettàik upyak. 3Molopai ànù'là uya yà'là là te yau, ‘Ina yepulu tok iche kulu man’ mùkatàik. Molopai màlà yattai là tok utàtoppe ikupù ya màlà,” tawon.

4Sàlà wekkupùppù màlà Katù Maimu yenpoikanài uselupappù kasa iwekkupù yekamanài pe.

5“Pata Zion yawon pàk yekamakà. Ekinù nùyàssan apyak, tenpan mùkkàlà molopai tonki po nùyàssan, tonki mule po,” {ZEC 9.9} tawon.

6Màlàpàk ya'lon kon utàppù màlà molopai Jesus nekamappù ikuttoppe tùuya'nokon kupùppù tok uya. 7Tok uya tonki molopai imle tawonnan nepùppù. Tok uya tùpon kon nonkappù tok pona, molopai Jesus wenukuppù ipona. 8Tukkan kon kappon yamùk uya tùpon kon yalenkapàtùppù asantawàlà, tùulon kon uya kumya yale walai yattàpàtù molopai inonkapàtù tùse. 9Tukkan kon kappon yamùk Jesus wapiya, molopai ite'mappù pàk tùutàssan wessa'molùkappù màlà tùwentaime kon pàk, “David Mumu yapulàtàk kon! Mùkkàlà nùyàssai'nùk Itepulu yesek yau yapulà tàk! Katù yapulà tàk!” tukaik.

10Jesus welepansak Jerusalem pona yau, tamù'nawàlà pata yawon kon utaimelunpasak wechippù molopai tok uya. “Ànùk ken mùkkàlà?” teppù. 11“Katù Maimu yenpoikanài pùsàlà Jesus, Nazareth Galilee yawon pon,” tukaik tukkan kon kappon yamùk uya yeikuppù.

Jesus Utà Katù Yùwùk tak

(Mark 11.15-19; Luke 19.45-48; John 2.13-22)

12Jesus utàppù màlà Katù yùwùk tak molopai tamù'nawolon kon yà'làlà ye'mannan molopai yà'làlà chilanmannan Katù yùwùk tau yenpakkappù ya. Pùlayatta yenchimannan pùlayattayi yapon lattàppù ya, molopai weluchi walai non chilanman nan yapon yamùk. 13Molopai tok pàk, “Katù Maimu yau iwe'menukasak man, ‘Uyùwùk yesatù màlà wàpùlemantok yùwùk pe teppù,’ tukaik. {Isa 56.7} Tùse amatton uso'nantok itappe imasak auya'nokon man!” teppù ya.

14Enpùn molopai sesen pan uyàpùppù màlà Jesus piyak Katù yùwùk tak molopai tok ipittàppù ya. 15Eke ton paatele yamùk yepulu molopai Law pàk enupannan we'naikappù màlà, wakù ton kupù ya yensak tùuya'nokon yau, molopai mule yamùk wentaimepàtù Katù yùwùk tau, “David Mumu yapulàtàk!” tukaik pàk. 16Tok uya Jesus pàk, “Yà'là te là na' pùsamo mule yamùk uya metayan?” teppù.

“Ewaik, Katù Maimu yau ken na' imenukasa'lùppù yennàinan pen amyamlo, ‘Mule yamùk molopai echikili ton mule yamùk winàpai wakù kulu apulàntok kussak auya màlà,’ {Psa 8.2} tawon?” teppù.

17Jesus uya tok nàmàppù, molopai iitàppù pata poi Bethany pona, màlà yailà pata tùlùppù ya.

Jesus uya Fig Yek Pa'nùpù

(Mark 11.12-14, 20-24)

18Iwemassappe Jerusalem pona tùwennappo yau, Jesus wapàkkassak wechippù. 19Fig yek yeneppù ya màlà asanta yena po molopai iitàppù itekalespàk, tùse yà'làlà yepoloppù ya pen màlà, tùse yale neken. Màlàpàk yei pàk, “Ewepeta tu'ma pen màlà!” teppù ya. Màlà yattai fig yek waipùtàppù màlà. 20Ya'lon kon uya sàlà yeneppù molopai tok usenumenkappù. “Yà'là kasa ken uchi fig yek naipùtai asse'ne là?” tukaik tok usekamappoppù. 21Jesus uya tok yeikuppù “Ailon kulu sàlà, ailon te auya'nokon, kasei tukaik pùla yau, tùkuppàssai'nùk sàlà fig yek pàk kupù auya'nokon màlà, sàlà neken pen. Sàlà wùk pàk nàlà lànen, ‘E'wuluukakà molopai epukakà palau kak,’ te auya'nokon, molopai iwekkupù màlà. 22Ailon te auya'nokon yau, yà'làlà enennappù kon àwàpùlema kon pe, yepolo auya'nokon màlà,” teppù Jesus uya.

Jesus Yapàikketù Pàk Ekamappontok

(Mark 11.27-33; Luke 20.1-8)

23Jesus wennappoppù màlà Katù yùwùk tak. Molopai kappon yamùk yenupa ya tùse, eke ton paatele yamùk yepulu molopai Jew yamùk yesak ton uyàpùppù Jesus piyak molopai tok uya yekamappoppù, “Yà'là yekkwa ken apàikkek yesak àmàlà sàlà yamùk kupù pa? Ànùk ken elepatai sàlà apàikkek ke?” tukaik. 24Jesus uya tok yeikuppù, “Tewin neken eyekamappo kon uya sàlà. Molopai yeichak auya'nokon yau, yekama uya màlà àpàkù'nokon yà'là yekkwa là apàikkek ke sàlà yamùk kupù uya. 25I'nai yailà pai ken John yapàikketù uyàpùppù kappon yamùk yenpataukatoppe ya. Katù winàpai ka' lù, wapùla kappon winàpai?” tukaik.

Tok wessa'molùkappù tùuselupa kon pàk tùyiwalà'nokon: “Yà'là te'nokon ken uchi? ‘Katù winàpai iyàssak màlà,’ te'nokon yau nen, ‘Yà'là pe ken uchi iwechi pàk ailon te auya'nokon pùn John pàk?’ te ya màlà,” 26“Tùse, ‘Kappon winàpai iyàssak màlà,’ te'nokon yau, usenalippan man yà'là là kupù kappon yamùk uya kùwinàkà'nokon pàk, masapùla tamù'nawàlà tok uya ailon tesak màlà John wechi Katù Maimu yenpoikanài pe pàk,” teppù tok uya.

27Màlàpàk tok uya Jesus yeikuppù, “Ina uya ittu pùla man,” tukaik.

Molopai tok pàk, “Àpàkù'nokon nàlàichi yekama uya pen sàlà, yà'là yekkwa là apàikkek ke sàlà yamùk kupù uya,” teppù Jesus uya.

Asa'lon Kon Walawotichi Yamùk Pantomù

28“Yà'là tukaik ken mesenumenkayatàu? Kàyik wechippù màlà molo asa'lon kon imu yamùk. Wapiyalok piyak iitàppù màlà molopai ipàk, ‘Umu, umà yak e'wotokomata sàlà pe,’ teppù ya. 29‘Utà pen sàlà,’ tukaik yeikuppù ya, tùse màlà tùpo tùusenumenkatok mùyakanmappù ya molopai iitàppù umà yak. 30Màlàyau ikàipùnù utàppù yakon piyak, molopai watetukkappù ya. ‘Ewaik, ukàipùnù utà màlà,’ tukaik yeikuppù ya, tùse iitàppù pen màlà. 31I'nai uya ken tùkàipùnù wettok iche kupùppù nai?” teppù Jesus uya. “Wapiyalok uya,” tukaik tok uya yeikuppù. “Ailon kulu sàlà, pùlayatta pili'nàinan molopai kàyik yamùk yemyak tùwechilanmasan utà màlà Katù patassek yak awapiya'nokon. 32Masapùla John Enpataukanài uyàpùppù màlà apyakù'nokon iwalai asanta yekamase, molopai ailon te auya'nokon pùn. Tùse pùlayatta pili'nàinan molopai kàyik yamùk yemyak tùwechilanmasan uya ailon teppù ipàk. Sàlà yene tùpo'nokon nànen eusenumenkatok kon mùyakanma auya'nokon pùn, molopai ailon te auya'nokon pùn,” teppù Jesus uya.

Grape yekkwa Mainanpan nan Pantomù

(Mark 12.1-12; Luke 20.9-19)

33“Tùulon panton yetatàk kon,” teppù Jesus uya. “Pata yesak wechippù màlà molo, grape yekkwa pànnàippù. Kulala tùlùppù ya iwoi, molopai non yakappù ya kùyali yepelu grape kaklà tok tùuya yau pe. Kawon pata yentok ipoi yamùppù ya. Molopai umà tùlùppù ya imainanpannan pe tùnepolossan yemyak. Molopai iitàppù tùulon pata yak. 34Kùyali pilitok yattai iwechi yau, tapyoto yamùk yeunokoppù ya umà mainanpannan piyak tùponalok yepose. 35Umà mainanpannan uya itapyoto yamùk yachippù, tewin ippoppàtùppù tok uya, tùulon wànàppù tok uya, molopai tùulon wànàppù tok uya tàk ke. 36Kàyik uya tu'ma tùulon kon tapyoto yamùk yeunottu'mappù, tukke wapiyalok kon yentai, molopai umà mainanpanan uya tok talumattàppù màlà kasa làma. 37Àkàmlàk lùppù tùmu yeunokoppù ya tok piyak. ‘Umu nama nen uchi tok uya màlà,’ teppù ya. 38Tùse imu yensak tùuya'nokon yau, umà mainanpannan uya tùyiwalà'nokon, ‘Pùsàlà mùkkàlà umà yesak mumu. Àittàk kon iwàpai'nokon man, molopai nen uchi iponalok wettoppe kùponalok kon pe!’ teppù. 39Màlàpàk tok uya yachippù, tok uya yenu'mappù màlà umà yapai, molopai tok uya iwànàppù.

40“Molopai yà'là pe ken umà yesak uya mùkyamlo umà mainanpannan kupù tùuyàssak yau?” tukaik Jesus uya tok yekamappoppù. 41“Àli ku'nàinan wànà yaichi màlà ipla tok tùtalumattàse, molopai tùulon kon umà mainanpannan yemyak tùlù ya, mùkyamlo tùlepa woton kon tùponalok ke iweyu yattai yemyak,” tukaik tok uya yeikuppù. 42Jesus uya tok pàk, “Katù Maimu yau ken na' sàlà yensak auya'nokon pùla nai? ‘Tàk tapùi yamùnnan nùnulunpappù tapulàsen yek pen wenappù man iche kulu we'nàtok pe. Sàlà wekkupùppù màlà Itepulu winà. Wakù pe kulu man!’ tawon,” teppù. 43“Màlàpàk tekamayaik àpàkù'nokon, sàlà lepantok mokka màlà ewinàpai'nokon molopai itùlù màlà kappon yamùk wakù pe tùwepetasan yemyak. 44Ànù'là tùwekkawai'masen sàlà tàk pona utakitukka màlà tùtamokklsse. Molopai ànù'là pona tàk wekkawai'masak yau, yamokklopù ya màlà ipla sululuppe,” teppù ya.

45Eke ton paatele yamùk yepulu molopai Pharisee yamùk uya Jesus pantomù yetappù màlà molopai tùpàkù'nokon ichelupa pe tok uya ittuppù. 46Màlàpàk tok wechippù Jesus yachiiche. Tùse tok usenalippù tukkan kon kappon yamùk, Jesus wechi Katù Maimu yenpoikanài pe ittunnan pàk.

Currently Selected:

Matthew 21: PNTR

Highlight

Copy