Mark 13
13
Jesus Uselupappù Katù Yùwùk Mattanùttok pàk
(Matthew 24.1-2; Luke 21.5-6)
1Jesus uyàpù Katù yùwùk tapai yau, inenupa ton tonpa uya Jesus pàk, “Masa yenkà, Enupanài, eke ton tàk molopai wakù ton kulu tapùi yamùk!” teppù. 2Jesus uya imaimu yeukuppù, “Sàlà yamùk ku eke ton tapùi yamùk menyaik? Tewin nà tùpatassek yau tàk usene pen màlà. Tamù'nawàlà iwettùlùkkwa woton màlà,” teppù.
Usewankono'mantok molopai Talumattàntok
(Matthew 24.3-14; Luke 21.7-19)
3Jesus wechippù màlà chichiu pe Olive Wùpù itesek po, Katù yùwùk yessumla, màlà yattai Peter, James John, molopai Andrew tawonnan uya yekamappoppù tùkkenan yai.
4“Masa yekamakà ina pàk, yà'là yattai ken sàlà yamùk wechi molopai yà'là wechi yentok ipàkàlà pe sàlà yamùk wekkupù yau?” teppù tok uya.
5Màlàyau Jesus uya tok pàk, “Enpen ettàk kon, ànù'là uya kasei pàk eyenkuttà kon tukaik, tukaik.
6“Tukkan kon kappon yamùk uyàpù màlà uyesek yau, màlàyau tok uya màlà, ‘Mùkkàlà Iulà!’ te, molopai tukkan kon kappon yamùk yenkuttà tok uya.
7Tùwepanta'masan wechi mei pùla molopai mei tùwepanta'masan pàk tùuselupasan yeta auya'nokon yau kesenalippatàu. Màlà yekkwa ton nà wekkupù màlà, tùse masa lùppù iwenukattok wechi màlà.
8Pata uya màlà tùulon pata panta'ma, molopai pata yesak wepanta'ma màlà tùulon kon pata yesak pokonpe. Tùlùppùnù wechi màlà molo pata yamùk yawàlà, molopai iwan pe pata wechi. Tùwentusen wechi'mosak wapiya kulu kasa sàlà yamùk wechi màlà.
9“Tùse amyamlo enpen ettàk kon, ayachi kon màlà. Molopai eyippoppàtù kon màlà kappon yamùk wepilittok motau. Kappon yamùk yesak yamùk yemloto pona asalattà kon màlà upàkànsau, molopai kin yamùk yemloto pona tok pàk Wakù Itekale yekama kon pa.
10Wenuka'nàtok wapiya Wakù Itekale usekamatok wechi màlà tamù'nawàlà pata yawon kon kappon yamùk pàk. 11Molopai ayachichak kon tùpo ayasak kon usekamappopà'nàtok yak yau, kataimelunpatàu, yà'là tetok auya'nokon ittuiche, euselupatok yatai pe iwechi yau eyelupatok ke eselupatàk kon. Màlà yattai màlà ewinàpaino pe pùla màlà euselupa, tùse Wakù Akkwalù winàpaino ke. 12Walawotichi yamùk uya màlà takon kon wapùla tùlui kon tùlù iwàtoppe. Tok kàippùnù uya màlà tùmunkà tùlù tok wà toppe. Molopai imunkà yamùk welattà màlà tùsan kon tùkàipùnù kon winàkàik, tok wàtoppe. 13Kappon yamùk uya màlà tùtalumayi kon pe àkupù kon upàkànsau. Tùse mùkkàlà tùwemattok yawàlà tùwettalumatàtok pàlikanàippù tùwematok wenukappù tepose pùikattà Katù uya màlà,” tukaik.
Àli Kulu Usenalippantok
(Matthew 24.15-28; Luke 21.20-24)
14“Katù yewanma pe nai'nùk Mattantok ku'nài yene auya'nokon yau tùpatassek pen yau, tàwà Katù Maimu yennài nùttui. Molopai mùkyamlo Judea po tùwessan nepeik wùk yamùk pona.
15Molopai mùkkàlà tùwùk nakata po nai'nùk uttà tùwùk tak tùnalà woton yepose pen màlà.
16Molopai kàyik tù'mà yau nai'nùk wennappo tùwùk tak tùpon yepose pen.
17Molopai àsà pe kulu iwechi màlà monok yamùk pona molopai echikili ton kulu imunkà yamùk pona màlà yattai.
18Àpùlematàk kon Katù pàk sàlà wekkupù iko yattai tukaik!
19Wettalumattàntok wechi màlà màlà yattai àsà pe kulu wettalumattà'nàppà wapiya sàlà wolù yau yentai, sàlà wei ponalà.
20Tùse Itepulu uya wettalumattàntok weyu kussak man tukke pùla iwa. Ikussak ya pùla iwechi yau, ànù'là wepùikattàppù pen eppaino sàlà. Tùse mùkyamlo tùnanùmùssan pàkànsau pata weyu yamùk kupùppù ya màlà tukke pùla.
21“Ànù'là uya, ‘Masa yenkà, Christ pùsàlà,’ wapùla tùulon uya, ‘Imasa yenka, mailà man!’ te yau, ailon kùkatàu ipàk.
22Masapùla Christ pe tukaik, molopai Katù Maimu yenpoikannan pe tukaik tùusennakasan ailon ton pen uyàpù màlà molopai yentok ipàkàlà woton, eke ton enumenkanài molopai enalippanài kupù tok uya màlà. Ikupù tùuya'nokon yau Katù nanùmùssan yennakaiche tok wechi màlà.
23Enpen ettàk kon! Tamù'nawolon tekamapàssaik iwekkupù wapiya,” teppù Jesus uya.
Katù Mumu Kappon pe Iwenasak lùppù Uyàttok
(Matthew 24.29-31; Luke 21.25-28)
24“Wettalumattàntok tùpo wei wewalumamù màlà molopai kapùi ulenpamù pen màlà. 25Chilùkà yamùk wessoloka màlà kak poi, molopai kak meluntàlù utalo'ma màlà. 26Kàyik Mumu usenpoika màlà katuppluk yau. Iyàppù eke pe tùmeluntàlù ke molopai tùyakkwayi yau. 27Tùyinchelùyi yamùk yeunoko ya màlà i'nailàlà non yawàlà Katù ponalok kon kappon yamùk piliche tamù'nawolon pata yamùk yapai, wei wepaka motapai wei wewomù motak,” teppù Jesus uya tok pàk.
Usenupantok Fig Yek pàk
(Matthew 24.32-35; Luke 21.29-33)
28“Fig yek pàk esenupatàk kon. Mùttuyatàik ipanta waleta yau wàpànùsak wattatok yattai pe iwena ittu nan amyamlo. 29Màlàpàk sàlà yamùk wekkupù yene auya'nokon yau màlà, ittu auya'nokon màlà pata weyu wechi mei pùla, iwepyattà winàkàik. 30Ailon kulu sàlà, tàmù'nawàlà sàlà yamùk wekkupù màlà, sàlà pe nulà nai'nannùk welikù wapiya. 31Kak molopai non tawon waliwomù màlà, tùse Umaimu wenukappù pen màlà,” teppù Jesus uya tok pàk.
Ànù'là Uya Màlà Yattai Tukaik Iweyu Ittu Pùla Iwettok
(Matthew 24.36-44)
32“Tùse ànù'là uya màlà yamùk wekkupù weyu ittu pùla iwechi màlà. Inchelù yamùk là epùn pon kon uya. Wa pùla Katù Mumu là uya ittu pùla iwechi màlà. Tùse Ukàippùnù neken uya ittu màlà. 33Enpen ettàk kon, masapùla yà'là yattai là màlà weyu uyàpà ittu auya'nokon pùla iwechi màlà. 34Sàlà wechi màlà kàyik utà mei te'ma tawà kasa. Tùpata nàmà tùuya yau tùpoitolù ton nàmà ya màlà tùpata mainanpanài pe. Tùpoitolù ton lepa ya tok wotokoyi ke. Molopai manatta yesak pàk, ‘Enpen mechik,’ teppù ya. 35Enpen uchi ettàk kon, masapùla ittu auya'nokon pùla tapùi yesak uyàpù màlà. Ko'man pe wapùla anomlak, wapùla kalicho tàwù yattai, wapùla ko'làma là. 36Tewinanpa asse'ne iyàssak yau, ewe'nànsak kon yepotak. 37Tekamayai'nàk àpàkù'nokon, yekama uya nàlà màlà tamù'nawolon kon pàk, ‘Enpen ettàk kon!’ te uya,” teppù Jesus uya tok pàk.
Currently Selected:
Mark 13: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
