मत्ती 21
21
यीशु रा आखरी हफ्ता: तिन्हा पर जुल्म होणा ते मौत
यरुशलेम सहर बिच विजय प्रवेश
1जां से यरुशलेम सहर रे नेड़े आई रेह् अते जैतून पहाड़ पर बैतफगे पूज्जे, तां यीशु ने दो चेल्लेयां जो ए बोल्ली करी भेज्जेया, 2सामणे वाले ग्रां बिच जाओ उत्ते जादें कने ही गधी ते तिसेरा बच्चा बन्ने रा मिलणा तिन्हेरे जो खोल्ली करी लेई आओ। 3जे कोई तुसा जो किच्छ बोल्ले, तां बोल्ली देयो कि प्रभु जो इसेरी जरुरत है, तां तिनिये तिस्सी बेल्ले तिसजो भेज्जी दैणा। 4ए इस तांइ होया कि जे गल्ल भविष्यद्वक्ता रे जरिए बोल्ली गेई थी से पूरी हो;
5“सिय्योन री कुड़ी जो बोल्लो,
‘दिख्ख, तेरा राज्जा तेरे का आदां है; से नमर,
ते गधे पर बैठ्ठे रा है;
बल्कि लादू रे बच्चे पर।’”
6चेल्लेयां ने जाई करी जिय्यां यीशु ने बोल्लेया थिया, तिय्यां ही कित्तेया। 7ते गधी ते तिसेरे बच्चे जो लाई करी तिन्हेरे पर अपणे कपड़े पाई दित्ते, ते से तिन्हेरे पर बेई गे। 8तां मते सारे लोक्कां ने अपणे कपड़े रस्ते बिच बिछाए, ते होर लोक्कां ने बूट्टेयां का डाल कटी करी रस्ते बिच बिछाए। 9जे भीड़ अग्गे-अग्गे जाया करदी थी ते जे पीच्छे का आया करदी थी, हक्कां लाई-लाई करी बोलदी थी,
“दाऊद री औलाद री जय हो है,
धन्न है से जे प्रभु रे नां कने आदां,
स्वर्ग बिच जय हो।”
10जां यीशु यरुशलेम सहर बिच आए, तां सारे नगर बिच हलचल मची गई, ते मणू बोलणा लगे, ए कुण हिन? 11लोक्कां ने बोल्लेया, गलील रे नासरत रे भविष्यद्वक्ता यीशु हिन।
मन्दिर का दुकानदारां जो कडणा
12यीशु ने परमेश्वर रे मन्दिर बिच जाई करी तिन्हा सारेयां जो, जे सभास्थल बिच लैण दैण करदे थिये, कड्डी दित्ता, ते सर्राफेयां रे पीढ़े ते कबूतर बेचणे वालेयां री चौकियां पलटी दित्ती। 13ते तिन्हेरे जो बोल्लेया, लिख्खे रा है कि मेरा घर प्रार्थना रा मन्दिर होणा पर तुसा तिसजो डाकुआं रा अड्डा बणादें। 14तां अन्ने ते लगंड़े तिन्हेरे का मन्दिर बिच आए, ते तिन्हा ने तिन्हेरे जो ठीक कित्ता। 15पर जां बड्डे पुरोत्त ते शास्त्रियां ने इन्हा अनौखी गल्लां जो दिख्खेया जे तिन्हा ने कित्ते थिये, ते मुडेंया जो मन्दिर बिच दाऊद री सतांन री जय हो बोलदे सूणेया, तां से गुस्से होए। 16ते तिन्हा जो बोलणा लग्गे, कै तू सूणदा कि ए मणू कै हिन बोल्लेया करदे? यीशु ने तिन्हा जो बोल्लेया, हाँ कै तुसा ए कदी नी पढ़ेया: मुडेंया ते दूद्द पिदें बच्चेयां का तू अपणी महिमा कराई? 17तां से तिन्हा जो छड्डी करी नगर का बाहर बैतनिय्याह जो गे ते तित्ते रात बिताई।
बगैर फल्ल वाले अंजीर रे बूट्टे रा उदारण
18भ्यागा जां से नगर जो हटेया करदे थिये तां तिन्हा जो भूख लग्गी। 19सड़क रे कनारे इक्क अंजीर रा इक्क बूट्टा दिख्खी करी तिसेरे नेड़े गे ते पत्तेयां जो छड्डी करी तिस बिच होर किच्छ ना पाई करी तिसजो बोल्लेया, अब्बे का तेरे बिच फिरी कदी फल्ल ना लगे ते अंजीर रा बूट्टा तिसी बेल्ले सुकी गेया। 20ए दिख्खी करी चेल्लेयां जो हैरानी होई ते तिन्हा ने बोल्लेया, ए अंजीर रा बूट्टा इन्नी तौले किय्यां सुकी गेया? 21यीशु ने तिन्हा जो जवाब दित्तेया, मैं तुसा कने सच बोलदा, जे तुसा विश्वास रखो ते शक ना करो, ते ना सिर्फ ए करगे जे इस अंजीर रे बूट्टे कने कित्ते रा है, पर जे इस पहाड़ कने भी बोलगे, उखड़ी जा, ते समुदंर बिच जाई पे, तां ए होई जाणा। 22ते जे किच्छ तुसा प्रार्थना भी मेरे का मगंगे से सारा किच्छ तुसा जो मिलणा।
यीशु रे हक्क पर सवाल
23से मन्दिर बिच जाई करी भाषण देया करदे थिये, तां बड्डे पुरोत्त ते यहूदी लोक्कां रे बुजुर्ग लोक्कां ने तिसेरे का जाई करी तिन्हेरे का पूच्छेया, तू ए कम्म कुस हक्क कने करदा? ते तेरे जो ए हक्क कुनिये दित्ते रा है? 24यीशु ने तिन्हेरे जो जवाब दित्तेया, मैं भी तुसा का इक्क गल्ल पूच्छदा जे तुसा मेरे जो से दस्सी दिंगे तां मैं भी तुसा जो दसणा कि ए कम्म कुस हक्क कने करदा। 25यूहन्ना रा बपतिस्मा कुते का थिया? स्वर्ग रे पास्से का या मणूआं रे पास्से का? तां से अप्पु बिच बैह्स करणा लग्गी पेय, जे असी बोलण स्वर्ग रे पास्से का, तां तिनिये असा कने बोलणा फिरी तुसा तिसेरा विश्वास किजो नी कित्ता? 26ते जे बोलिये मणूआं रे पास्से का, तां असा जो भीड़ रा डर है, किजोकी से सारे यूहन्ना जो भविष्यद्वक्ता मनदे। 27अते तिन्हा ने यीशु जो जवाब दित्ता, असी नी जाणदे तिन्हा ने भी तिन्हेरे जो बोल्लेया, तां मैं भी तुसा जो नी दसदा की ए कम्म कुस हक्क कने करदा।
दो पुत्तरां रा उदारण
28तुसा इस उदारण रे बारे बिच कै सोचदे? कुसकी मणू रे दो पुत्तर थिये तिसने पैल्ले का जाई करी बोल्लेया, ओ पुत्तर अज्ज अंगूर रे बगीच्चे बिच कम्म कर। 29तिसने जवाब दित्ता, मैं नी जाणा, पर बाद बिच पछताई करी से बगीच्चे बिच कम्म करणा चली गेया। 30फिरी प्यो ने जाई करी दूए मुंडे जो इय्यां ही बोल्लेया, तिसने जवाब दित्तेया, हाँज्जी, जादां, पर से नी बगीच्चे बिच कम्म करणा नी गेया। 31इन्हा दोन्नां बिच का कुसने पिता री मर्जी पूरी कित्ती? तिन्हा ने बोल्लेया, पैल्ले मुंडे ने, यीशु ने बोल्लेया, मैं तुसा कने सच बोलदा की महसुल लैणे वाले ते वेश्या तुसा का पैल्ले स्वर्ग रे राज बिच पुजदे। 32किजोकी यूहन्ना बपतिस्मा दैणे वाला धार्मिकता रा रस्ता दसदे होए तुसा का आया, ते तुसा ने तिसेरा विश्वास नी कित्ता पर महसुल लैणे वालेया ने ते वेश्या ने तिसेरा विश्वास करी के अपणे पाप्पां का तौबा कित्ती ते तिसेरे गलाए चलणा लग्गी पये, ते तुसा ए दिख्खी करी बाद बिच भी नी पछताए की तिसेरा विश्वास करी लिदें।
बुरे किसानां रा उदारण
33इक्क होर उदारण सुणो: इक्क घर रा मालक थिया जिनिये अंगूर रा बगिचा लाया, तिसेरे चारो पास्से बाड़ा लाया, तिस बिच रस्स रा कुआँ खोदेया ते गुम्मट बणाया, ते कसानों जो तिसेरा ठेका देई करी परदेस चली गेया। 34जां फल्ल रा बेल्ला नेड़े आया तां तिसने अपणे नौकरांं जो तिसेरा फल्ल लैणे तांइ कसानां का भेज्जेया। 35पर किसानां ने तिसेरे नौकरांं जो पकड़ी करी, कुसकी जो कुट्टेया, ते कुसकी जो मारी रख्खेया ते कुसकी पर बट्टे मारे। 36फिरी तिसने पैल्ले का जादा नौकरांं जो भेज्जेया, ते तिन्हा ने तिन्हेरे का भी तिय्यां ही कित्तेया। 37आखर बिच तिसने अपणे मुडें जो तिन्हेरे का ए सोच्ची करी भेज्जेया की से मेरे मुडें री बड़ाई करगे। 38पर किसानां ने तिस मुडें जो दिख्खी करी अप्पु बिच बोल्लेया, ए तां वारिस है, आओ, इसजो मारी रखदे ते इसेरी मिरास लेई लिदें। 39अते तिन्हा ने तिसजो पकड़ेया ते अंगूर रे बगीच्चे का बार कड्डी करी मारी रख्खेया। 40इस तांइ जां अंगूर रे बगीच्चे रा मालक आंगा तां तिन्हा किसानां कने कै करगा? 41तिन्हा ने तिस कने बोल्लेया, तिनिये तिन्हा बुरे लोक्कां जो बुरे तरिक्के कने खत्म करी रखणा ते अंगूर रे बगीच्चे रा ठेका दूए किसानां जो दैणा, जिन्हा ने ठीक बेल्ले तिसजो फल्ल दैणा। 42यीशु ने तिन्हा जो बोल्लेया, कै तुसा कदी पवित्रशास्त्र बिच ए नी पढ़ेया: जिस बट्टे जो राजमिस्त्रियां ने ठुकराई दित्तेया थिया, से ही कुणे रे सिरे रा बट्टा होई गेया? ए परमेश्वर रे पास्से का होया ते असा री नजर बिच अनौखा है। 43इसी तांइ मैं तुसा जो बोलदा की परमेश्वर रा राज तुसा का लेई लित्तेया जाणा ते इदेइ गैर यहूदी जाति जो दित्तेया जाणा जे तिसेरा फल्ल लाए। 44जे इस बट्टे पर पैगां, से चकनाचूर होई जाणा ते जिस पर से पैणा, तिसजो पीह् रखणा। 45बड्डे पुरोत्त ते फरीसी तिसेरे उदारणा जो सुणी करी समजी गे की से तिन्हेरे बारे बिच बोल्लेया करदे थिये। 46ते तिन्हा ने तिन्हेरे जो पकड़ना चाएया पर लोक्कां का डरी गे किजोकी से तिन्हेरे जो भविष्यद्वक्ता मनदे थिये।
Currently Selected:
मत्ती 21: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
