मत्ती 9
9
अधरंग रे रोगी जो ठीक करणा
1फिरी यीशु किस्ती पर चढ़ी करी पार अपणे सहरां जो आई गे। 2अते दिख्खो, किच्छ मणू अधरंग रे इक्क मरीज जो बाणी वाले मन्जे पर रख्खी करी यीशु रे नेड़े लेई आये तिन्हा ने तिन्हेरा विश्वास दिख्खी करी, तिस अधरंग रे मरीज जो बोल्लेया, “ओ पुत्तर, हिम्मत रख तेरे पाप माफ होई गे।”
3अते शास्त्रियां बिच किच्छ अप्पु-मित्ते बोलणा लग्गे, “ए तां परमेश्वर री बेजती करेया करदा है।” 4यीशु ने तिन्हेरे मन री गल्लां जो जाणी करी बोल्लेया, “तुसां अपणे-अपणे मन अन्दर बुरा किजो सोच्चेया करदे हिन।” 5असान कै है? ए बोलणा, तेरे पाप माफ होई गे, या ए बोलणा, उठ अते हन्ड़ फिर? 6ताकि तुसा ए जाणी जाओ कि मणू रे पुत्तर, जे मैं ही है जो दुनिया पर पाप माफ करणे रा हक्क है तां तिन्हा ने अधरंग रे मरीज जो बोल्लेया, “उठ, अपणा पन्द चुक्क, अते अपणे घरे चली जा।”
7से उठी करी अपणे घरां जो चली गेया। 8मणू ए दिख्खी करी डरी गे अते परमेश्वर री महिमा करणा लग्गे जिनिये मणू जो इदेयी ताकत दित्ती।
यीशु रा मत्ती जो सद्देया जाणा
9जिय्यां ही यीशु तित्ते का अग्गे बदधे उन्हा ने मत्ती नां रे इक्क मणू जो चुंगी लैणे वाली चौक पर बैठ्ठे रा दिख्खेया, अते तिसजो बोल्लेया, “मेरा चेल्ला बणी जा।”
ते से उठी करी तिन्हेरे पीच्छे चली पेया। 10फिरी इय्यां होया कि जां से मत्ती रे घरे रोट्टी खाणा बैठ्ठे रे थिये तां मते सारे चुंगी लैणे वाले अते पापी मणू आई करी यीशु अते तिन्हेरे चेल्लेयां कने रोट्टी खाणा बेई गे। 11ते जां फरीसियां ने ए दिख्खेया तां तिन्हा ने यीशु रे चेल्लेयां जो बोल्लेया, “तुसां रा गुरु चुंगी लैणे वालेयां कने अते पापियां कने रोट्टी किजो खाया करदा ए?” 12ए सुणी करी यीशु ने तिन्हा जो बोल्लेया, “वैद्द री जरुरत भले-चंगेयाँ जो नी पर मरीजाँ जो हुंदी।” 13“पर तुसा जाओ अते इस गल्ल रा मतलब समझो, मैं कुर्बानी नी पर रहम चाह्ंदा किजोकी मैं भले अते नेक मणूआं जो नी, पर पापियां जो सदणे आये रा ए।”
ब्रत्त पर सवाल
14तां बपतिस्मा दैणे वाले यूहन्ना रे चेल्ले यीशु का आई करी बोलणा लग्गे, “असी अते फरीसी इतणे ब्रत्त रखदे, पर तुसा रे चेल्ले ब्रत्त नी रखदे?” 15यीशु ने तिन्हा जो बोल्लेया, “जां तांइ नौलाड़ा बरात्ती कने ए कै से दुखी होई सकदे?” पर से रोज भी आणा जां नौआ लाड़ा तिन्हा का बखरा कित्तेया जाणा, अते तिस बेल्ले तिन्हा ब्रत्त रखणे। 16“पुराणे कपड़े पर नौये कपड़े री टल्ली कोई नी लगान्दा, किजोकी से टल्ली तिस कपड़े जो छिक्की लिन्दी, अते से पैल्ले का भी जादा फटी जान्दा।” 17“ते ना ही पुराणे खलड़ू बिच नौआ अंगूर रा रस्स भरदे, किजोकी इय्यां करणे कने खलड़ू फटी जान्दे अते अंगूर रा रस्स रुड़ी जांदा ते खलड़ू बेकार होई जांन्दे पर नौये अंगूर रे रस्स जो नौये खलड़ू बिच भरदे अते दोनो ही बची रेह्न्दे।”
मरे री कुड़ी ते इक्क बिमार जनानी
18जां से तिन्हा कने ए गल्लां करेया ही करदे थिये तां दिख्खो, यहूदी सभास्थल रा इक्क अधिकारी आया अते तिन्हा जो प्रणाम करी के बोलणा लग्गेया “मेरी कुड़ी अब्बे-अब्बे ही मरी, पर तुसा चली करी तिस पर अपणा हत्थ रख्खी दिंगे, तां तिसने जिन्दे होई जाणा।” 19यीशु ते तिन्हेरे चेल्ले उठ्ठे अते तिसेरे पीच्छे चली पेह्। 20अते दिख्खो, इक्क जनानी ने जिस जो बारह साल्लां का खून चलणे री बीमारी थी, से पीच्छे का आई अते तिन्ने यीशु रे कपड़े रे कुणे जो छुह्ई लित्तेया। 21किजोकी से अपणे मन अन्दर सोचदी थी, जे इन्हेरे कपड़े जो ही मैं छुह्ई लेयां तां ठीक होई जाणा। 22यीशु ने मुड़ी करी तिसजो दिख्खेया अते बोल्लेया, “कुड़िये हिम्मत रख्ख तेरे विश्वास ने तिज्जो ठीक कित्तेया
ते से जनानी तिस्सी बेल्ले ठीक होई गई।” 23जां यीशु तिस सभास्थल रे प्रधान रे घरे पूज्जे तां तिन्हा ने दिख्खेया कि मात्तम वाली धुन बजान्दे बौंसरी बजाणे वाले अते तित्ते इकट्ठा होये रे मणू कुड़ी री मौत पर रोला पाया करदे हिन, 24यीशु ने उन्हा जो बोल्लेया, “हटी जाओ! कुड़ी मरे री नी ए, पर सुत्ते री है।”
इस गल्ल पर से मणू तिन्हेरा मजाक उड़ाणा लगे। 25पर जां मणूआं जो बाहर भेजी दित्तेया, तां यीशु ने अन्दर जाई करी कुड़ी रा हत्थ पकड़ी करी उठाया, ते कुड़ी जिन्दी होई गई। 26अते इस गल री चर्चा तिस इलाके बिच फैली गई।
दो अन्नेयां रा विश्वास
27जां यीशु तित्ते का अग्गे जाणा लग्गे तां दो अन्ने तिन्हेरे पीच्छे लेरां अते ए बोलदे-बोलदे चली पे, “ओ दाऊद री औलाद, असा पर तरस खा!” 28जां से घरां अन्दर पूज्जे तां से अन्ने तिन्हेरे का आये यीशु ने तिन्हा जो पूच्छेया, “क्या तुसा जो विश्वास ए कि मैं तुसा जो ठीक करी सकदा?”
तिन्हा ने यीशु जो बोल्लेया, “हाँ, प्रभु जी, असा जो विश्वास!” 29तां यीशु ने तिन्हेरी हाख्खियां छुई करी बोल्लेया, “मेरे पर विश्वास करणे री वजह कने मैं तुसा जो ठीक करणा।”
30अते अन्नेया जो दिसणा लग्गी पेया, यीशु ने तिन्हा जो सावधान कित्तेया अते बोल्लेया, दिख्खो, ए कुस जो भी मत बोलदे। 31पर तिन्हा ने तित्ते का जाई करी इस गल्ल जो उस इलाके बिच चारो पास्से फैलाई दित्तेया।
गुंगे मणू जो ठीक करणा
32जां से अन्ने मणू ठीक होणे रे बाद हटेया करदे थिये, तां किच्छ मणू यीशु का इक्क दुष्टात्मा रे सताए रे मणू जो लेई करी आये जिस जो दुष्टात्मा ने जल्ला करी दित्ता थिया। 33अते जां यीशु ने तिस मणू बिच का दुष्टात्मा जो कड्डी दित्ता, तां से जल्ला बोलणा लग्गी पेया, इस गल्ल पर मणू हैरान होई करी बोलणा लग्गे, इस्राएल बिच इदेया कदी भी नी दिख्खेया। 34पर फरीसी मणू बोलणा लग्गे, ए तां दुष्टात्मा रे सरदार री मदत कने दुष्टात्मा जो कड्डदा।
मजदूर घट हिन
35तां यीशु अते तिन्हेरे चेल्ले गलीली जिले रे मते सारे सहर ते कस्बेयां बिच जाई करी मते सारे सभास्थल बिच उपदेस दिन्दे, परमेश्वर रे राज रे सुब बसेख रा प्रचार करदे, मणूआं री बीमारी अते हर तरह री कमजोरियां जो दुर करदे रे। 36अते मणूआं री भीड़ जो दिख्खी करी यीशु जो मणूआं पर तरस आया, किजोकी से उन्हा भेड़ां सांई थक्के रे अते बिखरे रे थिये जिन्हेरा कोई पुहाल नी थिया। 37तां यीशु ने अपणे चेल्लेयां जो बोल्लेया, पक्के री फसल तां बड़ी है पर मजदूर घट्ट हिन। 38इधेरे तांइ फसल रे मालक, परमेश्वर का प्रार्थना करो कि से अपणी फसल जो बढ़णे तांइ मजदूर भेजण।
Currently Selected:
मत्ती 9: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
