E’doza 28

1 # E’do 27:33 Isaka nga ani Yakoboni omve, nga asi ndriza fe eri dri, nga e’yo azi eri tia, nga ’yo eri tia, Mi ma je zamva ezoanzi Kanania ’diyi ma azi okuru aluni ku. 2Mi nga, mi mu Padani-aramua, kpere Betueli mi andri ma ati ma joa; ’daarisi mi je ezoanzi Labani mi andri ma adripini ma azi okuru’i. 3#E’do 17:1, 6Mungu Okpoe’ini ma fe asi ndriza mi dri, ma fe mi ma ’ya efi tu, ma fe mini ezuzu kakau, mi ma ofu suru ongulumuru ani. 4#E’do 17:4-8; E’do 12:2; 22:17; 1 Sur 29:15; Zab 39:12; 2 Kor 5:6, 7; Ebra 11:9, 13; 1 Pet 1:17; 2:11Eri ma fe asi ndriza Iburahimuniri mi dri, ma fe mi dri ori mini be tualu, mi ma nya angu mini ovuzu alenia ani’boru ndra Munguni fele Iburahimu driri awurusoru beni! 5Isaka nga di Yakobo ma ti pe mvizu; eri nga mu Padani-aramua, kpere Labani Betueli ’ba Suriaari me mvi, Rebeka Yakobo pi ma andriru Esau beri ma adripi vu.

6Esau nga di ndre kini Isaka fe asi ndriza Yakobo dri ’bo, pe tini Padani-aramua oku jezu engazu ’daarisi, azini kini erini asi ndriza feria eri dri, azi eri tia azita indi kini, Mi ma je ’ba Kanania ’diyi ma ezoanzi ma azi okuru ku, 7azini kini Yakobo’inzi ati pi ma e’yo andri be ra, mu Padani-aramua ’bo, 8#E’do 24:3Esau nga vini ndre kini ezoanzi ’ba Kanania ’diyini feni ayiko i ati Isaka dri aluni ku, 9#E’do 25:13; 36:3Esau nga di mu Isimaeli vu ani, nga Mahalati Isimaeli Iburahimu mvi ma zi, Nebayoti ma amvipiruri je i ma okuru, oku erini ovuzu yi be ’diyi ma aziru.

Munguni i e’dazu Yakobo dri Beteliari

10 # ’Yeta 7:2 Yakobo nga di efu Beeri-sebaarisi muzu Haranialeru. 11Eri nga ca pari azinia, nga te la ’daa ini rra, etuni ’dele ’borisi. Eri nga oni pari ’daria ’diyi ma azi ’du, ’ba i ma dri atizu, nga la va pari ’da ma alia o’du kozu. 12#Yoh 1:51; E’do 41:1; Yob 33:15; Ebra 1:14Orobi nga eri obi ra, te mi ndre, apife enga nyakua, drini ca ’bua uru; te mi ndre, malaika Munguni ’diyini turia azini esiria eri ma driarisi! 13#E’do 13:14-15; E’do 35:1; 48:3; 26:24Te mi ndre, Yehova so pa eri ma drilia, nga ’yo ra, Ma Yehova Mungu mi a’bi Iburahimuni, ma Mungu Isakani; ma nga angu mini lazu driniari fe mi dri, azini ori mini dri indi; 14#E’do 12:3; 22:18; E’do 13:14-16; Azi 12:20ori mini nga ovu kakau irifura nyakuarile, mi nga mi ere etuni ’derialeru azini etuni efurialeru, andraleru azini uruleru; mi ma alia, azini ori mini ma alia, ori’ba nyakua ’diyi dria nga asi ndriza isu ra. 15#E’do 26:24; 35:6; 48:16; Zab 121:5; Azi 31:6; Kal 23:19Te mi ndre, ma ovu mi be, ma nga mi ma ta mba pari mini muzuria dria, ma nga mi omvi dika angu ’doria; a’disiku ma ngani mi ku ku, de nga ma ’yeni e’yo mani e’yoni ’yole mi tia ’bori ku. 16#Efu 3:5; Yos 5:15Yakobo nga enga o’duarisi, nga ’yo ra, Ada ada Yehovani pari ’doria indi; de ma nini ku. 17Eri nga ovu urisi, nga ’yo ra, Pari ’dori eri uriuriru ’doni ya! Pari ’dori eri afa andini yo, lu jo Munguniri’i, eri kalitile ’buari’i.

18Yakobo nga enga uru o’bitisi drio drio, nga oni te erini ’bale i dri atizuri ’du, i’di uru oni edrele piririru, nga odu osu drinia. 19#Lip 1:23; Hos 4:15Eri nga pari nde ma ru ’da Beteli’i; de isu ndra aku nde ma ru okori Luzi’i. 20#E’do 28:15; 31:13; Lip 11:30; 2 Sam 15:8; 1 Tim 6:8Yakobo nga oyo so ci, kini, Mungu ka nga ovu ma be ra, ka nga ma ta mba geri mani muzu ’diri ma alia, ka ma dri enya fe nyazu, ka bongo fe mani suzaru ci, 21#Lip 11:31; 2 Sam 15:8; 19:24; Azi 26:17; 2 Opi 5:17’dini mani ngazu emvizu dika ma ati vile joa asi anzurusi, ka’dini Yehovani nga di ovu Mungu maniru, 22#E’do 35:7; Lev 27:30azini oni mani i’dile nyakua piriru ’diri nga ovu jo Munguniru; azini ma nga afa dria mini ngale fele ma dri ’diyi ma esele mudri ma azi alu fe mi dri ada.

Currently Selected:

E’doza 28: LB66

Highlight

Copy