E’doza 31

1 # Yob 5:2; 31:31; Zab 57:4; Rum 13:13; Tit 3:3; Yak 3:8; Zab 49:16 Eri nga e’yo Labani ma anzi, pini ’yoleri eri ra, kini, Yakobo opa ama ati ma afa dria ’bo; eri isu lonyi ’diyi afa mira ama atini ’diyisi, 2#E’do 4:5; Azi 28:54Yakobo nga Labani ma mile ndre, te mi ndre, ovuni i vu onyiru ekile,okorile ku. 3#E’do 28:15; 32:9Yehova nga ’yo Yakobo ma tia, Mi mvi mi a’bipi ma,angua, ori’ba mini vu; ma nga ovu mi be ra. 4Yakobo nga ’ba ti pe Rakeli pi omvezu Lea be emuzu lanyapa erini o’biru ’diyi vu asea, 5#E’do 21:22; Isa 41:10; Ebra 13:5eri nga ’yo yi tia, Ma ndre emi ati ma mile ovuni onyiru ma vu ekile okorile ku. Te Mungu ma atiniri ovu ma be. 6#E’do 30:29Emi ni ra ma nga azi emi ati dri ma asi driasi; 7#E’do 15:1; 20:6; Yob 22:25; Zab 5:11; 7:10; O’be 30:5te emi ati ici ma lokirisi ra, eri oja oya mani ’paleko mudri, te Mungu a’ini erini ma ’yezu onzi ’dini ku. 8#E’do 30:32Eri ka ’yo ’dini, Anyapa nyunyuru ’diyi nga ovu oya miniru, ka’dini anyapa ongulumuru nga dria anzi oti wura be nyunyuru ani; te eri ka ’yo ra, Anyapa wura be olizaru ’diyi nga ovu oya miniru, ka’dini anyapa ongulumuru dria nga anzi oti wura be olizaru. 9#E’do 31:16’Dini Mungu opa, anyapa emi atini ’diyi ra, ofe yi ma dri ’bo 10Te eri eca ndra o’du anyapa o’biruni anzi otizurisi, ma enga ndra ma mile uru, ma ndre orobisi, te mi ndre, ndriago otupi lanyapa ma dria ’diyi yi wura be Olizaru ’diyi pi, nyunyuru ’diyi pie, minziminziru ’diyi be. 11#E’do 48:16Malaika Munguni nga ’yo ma tia orobi ndesi kini, Yakobo la; ma nga ’yo ra, Ma ’do! 12#Efu 3:7; Azi 24:15; Zab 12:5; Efe 6:9Eri ’yo ra kini, Mi enga mi mile uru, mi ndre, ndriago dria otupi anyapa ma dria ’diyi yi wura be olizaru ’diyi pi, nyunyuru ’diyi pie, minziminziru ’diyi be; mani afa dria Labanini ’yele mi vuri ndrele rarisi. 13#Efu 28:18-22; 32:9Ma Mungu Beteli pari ndra mini odu osuzu oni i’diza ma dria, mini ndra oyo sozu ma be ciriari’i. Mi nga, mi fu angu ’diriasi, mi mvi angu mini osizuria. 14#E’do 2:24Rakeli pi Lea be nga di e’yo omvi ’yo eri tia, Esele amani azini, kani awita ace ama dri nga indi ama ati ma joa ya? 15#Lip 17:5; 1 Sam 19:13; Eze 21:21; Hos 3:4Eri lani ama ekile ani’bale ku ya? Eri fe ndra ama je ’bo, nya vini ama a’bu teketeke ’bo. 16Lonyi dria Munguni opale ama ati dri ’diyi, yi amani ama anzipi be; ka’dini mi ma ’ye di e’yo dria Munguni ’yole mi tiari’i fo.

Yakoboni apazu Labanisiri

17Yakobo nga di enga uru, nga fe anzipi ma otu ngamia ma dria oku piyi be; 18eri nga anyapa erini oku dria, afa dria erini okule ’diyi pie, anyapa erini isule, erini okule Padani-aramua ’diyi, muzu yi be i ati Isaka vu angu Kanania. 19#E’do 35:2Isu Labani mu kabilo i vile ’diyi ma ’biko liria; Rakeli nga i ati vile wura inzile inzi terafiru ’diyi ogu ra. 20Yakobo nga Labaliarii Suriaoururi ku oguoule, awuni e’yo erini muzuri ece eri dri oko ku. 21#E’do 46:28; 2 Opi 12:17; Luk 9:51’Dini eri apa afa erini be dria; eri enga uru, eri zo Yi Ara ma tia ’aa’daasi, eri nga i mile ’ba drile fezu oni Gileadiari vualeru.

22O’du ka aga na, ’ba olu Labani tia kini Yakobo apa ’bo. 23#E’do 13:8Eri nga di i ma adripi ’du i be, nga eri ma vuti bi o’du aziri, nga yi isu eri be angu oni be Gileadiaria. 24#E’do 20:3; Yob 33:15; Mat 1:20; E’do 24:50Mungu nga eca Labani Suriaoururi vu orobisi inisi, ’yo tinia, Mi mba mi ti ma ta, mi ma ’yo e’yo onyiru kani onzi Yakobo vu ku.

25Labani nga eca Yakobo vu. De Yakobo aso ma hema oni dria, Labani pi adripi erini be nga hema yini aso angu oni be Gileadiaria. 26#1 Sam 30:2Labani nga ’yo Yakobo ma tia, Mi ’ye ngoni ya, mini ma kule oguoule mani e’yoni nikokoru, mini ma ezopi opale ekile ’ba obile ombaa seisi ’diyilerisi? 27Mi apa ndi,ma kuzu oguoule a’disi ya? Mi eceni e’yoni ma dri, mani ani mi ti pezu ayiko pisi, ongo pie, ari pie, o’di pie ’dini ku a’disi ya? 28#Rut 1:9; 1 Opi 19:20; ’Yeta 20:37; 1 Sam 13:13; 2 Sur 16:9Mi a’ini: mani agianzi mani piyi ma o’bolo ndruzu ma ezopi be ku a’disi ya? Mi ’ye e’yo azazani. 29#E’do 28:13; Zab 5:11; 84:11; 115:9Ma okpo indi mi ’yezu onzi; te Mungu mi, atiniri ’yo ma tia aje inisi kini, Mi mba mi ti ma ta, mi ma ’yo e’yo onyiru kani onzi Yakobo vu ku. 30#E’do 31:19; Yos 24:2; Lip 18:24; ’Yeta 19:26Te mi ka tro le mu ra, mi ati: ma aku ma avani mi vale turisi ti, te di mi ogu adrou mani a’disi ya? 31Yakobo nga e’yo omvi, nga ’yo Labani ma tia kini, A’disiku ma ovu urisi, ma ega mi nga mi ezopiyi opa ma dri okposi, 32#E’do 44:9Te ’ba mini adrou mini isuzu vuniari ma drani. Mi nda afa mini ovupi ma beri ama adripi ma milia ’de, mi epe mi afa. Te Yakobo nini Rakeli oguniri ku.

33 # E’do 44:9 Labani nga di fi Yakobo vile hemari ma alia, Leaniri be, ezoanzi iri ati’boru ’diyi vileria indi, te eri isuni yi ku. Eri nga fu hema Leaniriasi, nga di fi Rakeli vileria. 34Isu de Rakeli o’du adrou nde ma wura, o’ba yi enyi rizu ngamia driari ma alia, ri yi ma dria ci, Labani nga afa amvi hema ma alia dria, te eri isuni yi ku. 35#Efu 20:12; Lev 19:32; Efe 6:1Rakeli nga ’yo i ati ma tia, Opi mani ma ovu ma be adrasi, mani engale mini uru kurisi ku, te ma a’bi be. Eri nga ndru ti, isuni adrou nde ma wura ku.

36 # Efe 4:26 Yakobo ovu di adrasi, nga otre Labani ma dria; Yakobo nga e’yo omvi, nga ’yo Labani ma tia, Ma eza a’di e’yoni ya? Ezata mani mini ani ma vuti ebizu asi okasiri ngoni ya? 37#1 Sam 12:3; 1 Kor 6:5Mini afa mani amviria dria dria, afa mani joa ’diyi ma eselia mi isu a’di afani ya? Mi ’ba eri adripi mani ’diyi pi ma drilia adripi mini ’diyi be, yi ma li di e’yo ama eselia mi beri. 38Ma ovu mi be eli kali iri ’dipi ’bo; kabiloaroni mini ’diyi ndriaroni be o’beni anzi yini ku, ma nyani kabiloago anyapa mini o’biru ’diyi ma eselia ku. 39#Efu 22:10, 12Afa nguruni ocile ’diyi ma ejini mi vu ku; candiniri mani; mi adri afa avipiri ma arioti a’i ma dri, lea tro ci etusi inisi ti. 40Eri ndra ’dini; etusi etuni ma ve, inisi egbeni ma fu, o’du apa ma miliasi ra. 41#E’do 29:27; 31:7Eli kali iri ’diyi ’dipi ma ovu mi vile joa; ma nga azi mi dri eli mudri drini su mi ezopi iri ’diyisi, ma nga vini azi eli azia anyapa mini o’biru ’diyisi, mi oja oya,mani paleko mudri. 42#Zab 124:1; Isa 8:13; Efu 3:7; 1 Sur 12:17Mungu ma,atini, Mungu Iburahimuni azini ruta Isakaniri eri ka ndra ovu ma be ku, te’do mi pe ma ti mvizu dri be;pirini ’bo ada. Mungu ndre inzata mani pi azi okporu ma drini ngaleri be ’bo, eri ega mi dria aje inisi.

43Labani nga e’yo omvi ’yo Yakobo ma ria, Ezoanzi ’diyi ma ezopi, anzi ’diyi ma anzipi, anyapa o’biru ’diyi anyapa mani, afa dria: mini ndrele ’diyi yi mani. Ma eco ani andru a’di ’ye ezoanzi mani ’diyi ma ruaa, kani anzi yini otile ’diyi ma ruaa ya? 44#E’do 26:28; Yos 24:27Te di, ama ma azi aziza ama eselia mi be; eri ma ovu ecetaru e’yo etiru ama eselia mi be. 45#E’do 28:18Yakobo nga oni ’du, eri i’di uru oni edrele piririru. 46Yakobo nga ’yo adripi erini ma tia, Emi oku oni; yi nga oni e’du odro tualu; yi nga nyaka nya ’dale oni odrole ’diyi ma tia. 47Labani nga oni nde ma ru ’da Yegari-sahaduta’i, te Yakobo ’da ini Galeedi’i. 48#Yos 24:27Labani nga ’yo ra, Oni odrole ’diyi yi ecetaru e’yo etiru ama eselia mi be andru. E’yo ’disi ’da runi Galeedi’i ani, 49#Lip 11:29; 1 Sam 7:5azini Mizipa’i, a’disiku eri ’yo ra, Yehova ma ndre ama eselia mi be, ewu amani ama nezu kuria. 50Mi ka ma ezopi ’diyi inza, mi ka oku azini je ma ezopi ma aziru, ’ba aluni ama eselia yo, te mi ndre, Munguni e’yo ndre ama eselia mi beni.

51Labani nga ’yo Yakobo ma tia, Mi ndre oni odrole ’diyi, azini mi ndre oni edrele piriru mani i’dile ama eselia mi beri. 52Oni odrole ’diyi ma ovu di ecetaru e’yo etiru, oni edrele piriruri ma ovu vini ecetaru e’yo etiru indi, kini ma ngani aga oni odrole ’diyi ma driarisi muzu mi vu e’yo onzi ’yezu ku, mi ngani vini aga oni odrole ’diyi pi ma driarisi oni edrele piriruri be emuzu ma vu e’yo onzisi ku. 53#E’do 16:5; 21:23Mungu Iburahimuni, Mungu Nahorini, Mungu yi ma atini ma li e’yo ama eseliarini. Yakobo nga oyo so Ruta i ati Isakaniri ma rusi. 54Yakobo nga edeta ede oni ma dria, nga i adripiyi omve nyaka nyazu; yi nga ani nyaka nya, nga ovu oni dria ini be rra.

55 # E’do 28:1; 2 Sam 6:20 O’bitisi Labani nga enga drio, nga anzipi ma o’bolo ndru ezopi be, nga asi ndriza fe yi dri; Labani nga di mu ra, nga mvi i paria.

Currently Selected:

E’doza 31: LB66

Highlight

Copy