Yohana 2

Omu odrua pari nyazu Kanaari

1 # Yoh 1:43 O’du narisi omu odrua pari nyazuri ovu Kana Galiliaria indi; Yesu ma andrini ’dale indi; 2yi omve Yesuni alu indi ’ba erini imbale ’diyi be, omu odrua pari nyazuria. 3Patiefi ma su ka ’ba anu ra, Yesu ma andri nga ’yo eri tia, Yi ovu patiefi su kokoru. 4#Yoh 19:26; Mat 12:48; Mar 1:24Yesu nga ’yo eri tia, Oku, amani mi be a’di e’yoni ya? Etu mani ecani nga ku. 5Andrini nga ’yo ’ba azi ’yepi ’diyi ma tia, E’yo erini ’yole emi tiari ka ngoni ti, emi ’ye. 6#Mar 7:3, 4Isu o’ba yilemvu azia edele onisi ’diyi ’dale ’bo, adriza ’ba Yahudiniri adrizu yi rua ’bazu alaruri ma e’yosi, tijo iri kani na eco yilemvu aluri gazaru ra. 7Yesu nga ’yo yi tia, Emi osu yi yilemvua tre tre. Yi osu yi yilemvu alu alu nde ’diyia tre tre kpere tinia. 8Eri ’yo yi tia, Curu’do emi be ji ’ba nyaka awapi omuari vu. Yiji di ra. 9Te ’ba nyaka awapi omuari ka yi i ojapi curu’do patiefi suru ’bori ma aji ’bi ra, te nini pari erini engazuri ku (te ’ba azi ’yepi yi bepi ’diyi ni ra), ’ba nyaka awapi omuari nga izioni omve, 10nga ’yo tinia indi, ’Ba dria adri patiefi su aluzaruri fe oko; ’ba ka mvu huruhuru ’bo, yi alukokoruri fe ndo; te mi mba patiefi su aluzaruri ma ta kpere curu’do. 11#Yoh 1:14; 11:40Yesu ’ye tali erini ma e’doza ’diri Kana Galiliaria, eri ece diza ini; ’ba erini imbale ’diyi a’i eri ra.

E’yo Yesuni hekalu ’bazu alaruri

12 # Mat 4:13; Yoh 7:3 E’yo ’diri ma vutia, eri si mu Kaperinaumua, eri’i, andri pie, adripi pie, ’ba erini imbale ’diyi pie; te yi ovuni ’daa o’du kakau ku.

13 # Efu 12:1-27 Omu agaza ’ba drilesi ’ba Yahudiniri eca ogogo; Yesu nga tu mu Yerusalemua ani. 14#Mat 21:12, 13; Mar 11:15-17; Luk 19:45, 46Eri isu hekalua ’ba yini ti piyi oziria kabilo pie, a’balau pie, isu vini ’ba silingi ofupi ’diyi yini riria ’daa. 15Eri nga baka ekila ekila, nga yi odro dria hekaluarisi amve, kabilo piyi, ti pie; eri oda silingi ’ba silingi ofupi ’diyini va, ogu vini mesa yini indi. 16#Luk 2:49Eri ’yo ’ba a’balau ozipi ’diyi ma tia, Emi ji afa ’diyi amve; emi ’ba ma Ati ma jo jo afa jezuriru ku. 17#Zab 69:9’Ba erini imbale ’diyi nga a kini e’yo ovu sizaru ’dini, jo mini ma avani ma fu fu. 18#Mat 21:23; Yoh 3:2’Ba Yahudini nga e’yo omvi, ’yo eri tia ani, Mi ece ama dri eceta ngoni ngori mini afa ’diyi ’yezurisi ya? 19#Mat 26:61; 27:40; Mar 14:58; 15:29Yesu nga e’yo omvi ’yo yi tia, Emi anzu hekalu ’diri ra, ma nga di eri enga o’du na ma alia ra. 20’Ba Yahudini nga e’yo omvi ani, Yi si ndra hekalu ’diri, nya eli kali su drini azia; mi di nga eri enga o’du na ma alia ra ya? 21#1 Kor 6:19Te eri ’yo hekalu eri ruaniri ma e’yo’i. 22Eri ka enga ’ba draza eselia ’bo, ’ba erini imbale ’diyi ega ani kini eri ’yo e’yo ’diri’i; yi a’i ani e’yo siza pi e’yo Yesuni ’yoleri be ra.

Yesuni ’ba dria ma e’yo nizu ra

23Erini ovuria Yerusalemua, omu agaza ’ba drilesiri ma alia, ’ba kakau nga eri ma ru a’i ra, yini tali erini ’yele ’diyi ndrelerisi; 24te Yesu a’ini i fezu yi dri ku, erini ’ba dria nilerisi, 25#Mar 2:8azini leni ’ba azini ma nze e’yo ’bani ma eti eri dri ku; a’disiku eri ni eri’i afa ovupi ’ba aliari ra.

Currently Selected:

Yohana 2: LB66

Highlight

Copy