Yohana 21

Yesuni i e’dazu miri Tiberiaari

1E’yo ’diyi ma vutia Yesu nga i ece ’ba erini imbale ’diyi dri dika miri Tiberiani ma tia; eri ece i ’dini. 2#Yoh 1:45Simoni Petero pi, Toma yini omvele Ejoruri pie, Natanieli Kana Galiliariniri pie, anzi Zebedayoni pie, ’ba azini iri erini imbale ’diyi pie yi ovu tualu. 3#Luk 5:5Simoni Petero nga ’yo yi tia, Ma mu mani e’bi oku. Yi nga ’yo eri tia, Ama mu mi be indi. Yi ko dri ra, tu o’bo ma alia ra; te ini ’darisi yi isuni afa aluni ku. 4#Yoh 20:14; Luk 24:16Te angu ka ’ba ati curu’do ’bo, Yesu eri so pa yi kutia; te ti ’ba erini imbale ’diyi nini eri Yesu’iri ku. 5#Luk 24:41Yesu nga di ’yo yi ria, Anzi la, afa nyaza emi dri indi ya? Yi nga e’yo omvi eri ria, Yo. 6#Luk 5:6Eri ’yo yi tia, Emi ’be emba o’bo ma kala dri ndialeruria, emi nga isu ra. Yi ’be ani, te curu’do okpo yini funi dri emba esuzu ku, e’bini ovule karakaraurisi. 7#Yoh 13:23’Ba Yesuni imbale erini leleri nga ’yo Petero ma tia ani, ’Di Opi’i! Simoni Petero ka di eri kini eri Opi’i, eri nga afa suza ini anzu i ruaa erini ovule pililirurisi, nga i ’be miri alia. 8Te ’ba erini imbale ’diyi ma azi yi nga emu o’bo wererisi, de yi kuti aceni re ku, te ekile wuale turu iri ’dipile; o’bo vutia yi se emba ovupi e’bi be alenia treri se se.

9Yi ka fu amve nyaku dria ’bo, yi ndre aci eduzaru aciolusi ’daa, drinia e’bi pi mikate be. 10Yesu nga ’yo yi tia, Emi eji e’bi emini okule curu’do ’diyi ma azi. 11Simoni Petero tu di ani o’bo alia, nga emba ese nyaku dria. Emba nde ga tre e’bi ’wara ’wara turu alu drini kali towi drini na ’diyisi; te ka tro e’bi eri alia kakau ti, emba ceni i ku. 12Yesu nga ’yo yi tia, Emi emu nyaka o’bitiniri nya. ’Ba erini mbale ’diyi ma azi aluni i asi imbapi zizu eri tia, Mi a’di’i ya?-ni yo, yini nile eri Opi’irisi. 13#Yoh 6:11Yesu nga di emu mikate ’du, fe yi dri, e’bi be ’dinile indi. 14#Yoh 20:19, 26’Diri eceta pale na Yesuni i ecezu ’ba erini imbale ’diyi dri, erini engazu ’ba draza ma eselia ’bori ma vutiari’i.

Mi oce kabilo mani

15 # Yoh 1:42 Yi ka di nya ’bo, Yesu nga ’yo Simoni Petero ma tia, Simoni, Yohana mvi la, mi le ma avasi aga ’diyi ra ya? Eri ’yo eri tia, E, opi; mi ni ra ma le mi ra. Eri ’yo eri tia, Mi fe nyaka kabiloanzi mani dri. 16#1 Pet 5:2, 4Eri ’yo eri tia dika pale iririsi, Simoni, Yohana mvi la, mi le ma avasi ra ya? Eri ’yo eri tia, E, Opi; mi ni ra ma le mi ra. Eri ’yo eri tia, Mi oce kabilo mani. 17#Yoh 13:38; 16:30Eri ’yo eri tia pale narisi, Simoni, Yohana mvi la, mi le ma ra ya? Petero eri ovu ani candisi erini ’yole eri tia pale na, Mi le ma ra ya?-risi. Eri ’yo eri tia, Opi, mi ni e’yo dria; mi ni ra ma le mi ra. Yesu ’yo eri tia, Mi fe nyaka kabilo mani dri, 18#Mat 16:22; 26:39Ma ’yo mi tia ndi ndi, mini ovuria karilaururia mi adri ndra mi opile a’di mi ngulupi ma drisi, mi adri aci pari mini leleria; te mi ka nga ca mbazauru mi nga mi dri eju, te ’ba azini nga mi opile a’dini, nga mi ji pari mini lele kuria. 19#Yoh 13:36(Eri ’yo e’yo ’diri, dra erini ngazu drazu diza fezu Mungu driri ecezu.) Eri ka e’yo ’diri ’yo ’bo, eri ’yo eri tia. Mi bima vuti.

’Ba Yesuni imbale erini lele tori

20 # Yoh 13:23 Petero nga i oja, nga ’ba Yesuni imbale erini leleri ndre erini yi vuti biria, eri ’ba i atipi Yesu agatia yini nyaka ondre beri nyaria, ’yopi, Opi, ’ba mi o’di nyapiri eri a’di’i ya? -ri’i. 21Peteroni ’ba ’diri ndreria eri nga di ’yo Yesu tia, Opi, ’ba ’diri driri te ngoni ya? 22Yesu nga ’yo eri tia, Ma ka le eri ma ovu ’dani kpere mani emviria, e’yoni mini ya? Mi bi mini ma vuti’i! 23E’yo ’diri nga ku adripi nde ’diyi ma eselia ani, kini ’ba erini imbale ’diri ngani dra ku; te Yesu ’yoni eri tia kini eri ngani dra ku, ’dini ku, te kini, Ma ka le eri ma ovu ’dani kpere mani emviria, e’yoni mini ya?

24 # Yoh 15:27 ’Diri ’ba erini imbale e’yo ’diyi ma eti nzepi, e’yo ’diyi sipiri’i; te ama ni ra e’yo eti erini nzeleri eri adaru.,

25 # Yoh 20:30 Afa azini karakarau Yesuni ’yele ’diyi yi indi, te yi ka te yi ma e’Yo si alu alu dria, ma ega wudrikuru ma ngulupi ngani te dri fu buku nde yini ngale sile ’diyisi ku.

Currently Selected:

Yohana 21: LB66

Highlight

Copy