Yohana 6

Nyaka fezu ’ba alifu towi driri

1 # Mat 14:13-21; 15:32-39; Mar 6:32-44; 8:1-10; Luk 9:10-17 E’yo ’diyi ma vutia Yesu nga fu mu miri Galiliari ma tia ’aa’dasi, miri nde Tiberiani’i. 2’Ba karakarau bi vutini, yini tali erini ’yele ’ba azoru ma ruaa ’diyi ndrelerisi. 3Yesu nga tu oni dria, nga ri va ’dale ’ba erini imbale ’diyi be. 4#Yoh 2:13; 11:55; Luk 22:1Isu agaza ’ba drilesiri, omu ’ba Yahudiniri, ovu ogogo. 5Yesu nga i mile enga uru ani, erini ndreria ’ba karakarau yini emuria eri vu, eri nga ’yo Filipo tia, Ama nga mikate ie ngoa, yi ma nya ani ya? 6Eri ’yo e’yo ’diri eri o’bizu, de eri ma ngulupi ni e’yo ini ngale ’yeleri ra. 7Filipo nga e’yo omvi eri vu, Yi ka mikate je silingi turu irisi ti, funi dri yi dri ku, yi alu alu ka tro ’du were were ti. 8’Ba erini imbale ’diyi ma azi alu, Andarea, Simoni Petero ma adri, ’yo eri tia, 9#2 Opi 4:42, 43Mva azini ’dia ovupi mikate edele ondufurasi ’diyi be towi, e’bi iri be; te afa ’diyi ’ba kakau ’doyi dri a’di afani ya? 10Yesu nga ’yo ra, Emi fe ’ba ma ri va. Isu irindi de amboru angu ’daa ci. ’Ba agupiru ’diyi ri va, yi ma kalafe ovu ekile alifu towile. 11Yesu nga mikate e’du, eri ka awa’difo fe ’bo, eri awa ’ba riŋ va ’diyi dri; awa vini e’bi, yini lelerile. 12Yi ka tra ra, eri ’yo ’ba erini imbale ’diyi ma tia, Emi oku mikate onyoza acepi jolokoru ’diyi, aluni kazu i ezazu ku. 13Yi nga di yi oku ra, mikate towi edele ondufurasi ’diyi ma joloko yi onyopi, acepi ’ba nyapi ’diyi dri ’diyi, ga abaka tre tre mudri drini iri. 14#Azi 18:15’Ba ka tali erini ’yeleri ndre ra, yi ’yo, Ada ’ba ’diri eri nabi nde emupi nyakuari’i. 15#Yoh 18:36Yesuni niria ’ba yi ’ye emu eri bizu okposi eri ’bazu opiru, eri ku angu nde dika, mu oni dria, eri’i a’dule.

Yesuni acizu miri driari

16 # Mat 14:22-33; Mar 6:45-52 Etu ka ’de ra, ’ba erini imbale ’diyi si andra miria; 17yi fi o’bo alia, e’do mu Kaperinaumua miri tia ’aa’dasi. Angu nga bi ra, te Yesu emuni nga yi vu ku. 18Miri ’ba ombu ombu olini lile okposirisi. 19Yi ka o’bo pe ekile mailo na kani sule, yi ndre Yesu erini aciria miri dria, erini ecaria o’bo vu ogogo. Uri nga yi bi ra, 20te eri ’yo yi tia, ’Do ma’i; emi ’ye urisi ku. 21Yi nga le ani eri a’izu o’bo alia; perepere o’bo nde nga ca kuti yini ’yezu te muzuria.

’Bani Yesuni ndruzuri

22Drusi ’dini ’ba ongulumuru pa sopi miri tia ’aa’dasi ’diyi ndre o’bo were azini ’daa yo, pe alu, yi ndre vini Yesu fini o’bo ma alia ’ba erini imbale ’diyi be tualu ku, te ’ba erini imbale ’diyi fu mu a’dule. 23#Yoh 6:11Te o’bo were were azini ’diyi ibi enga Tiberiaa eca pari ’bani mikate Opini awa’difo fezu driniari nyazuria ogogo. 24Ka’dini ’ba ongulumuru nde ka ndre Yesuni ’ba erini imbale ’diyi be ’daa yo, yi fi o’bo were were ’diyi ma alia yi’i, muzu Kaperinaumua Yesuni ndruzu.

Yesuni enya idriniri

25Yi ka eri isu miri tia ’aa’dasi ’bo, yi ’yo eri tia, Rabi, mi emu ’doa a’dungare ya? 26Yesu nga e’yo omvi yi tia ’yo ra, Ma ’yo emi tia ndi ndi, emi ndruni ma emini tali ndrelerisi ku, te emini mikate nyalerisi, emini tralerisi indi. 27#Yoh 4:14; 5:36; Mat 16:12Emi ma nga azi nyaka dri japi rarisi ku, te emi ma nga azi nyaka ovupi ’dani kpere idri ’dani ’daniri vu, Mvi ’banini ngale fele emi dririsi; te eri ovu ’ba Mungu Atani eceta ’bale ruaniari’i. 28Yi ’yo eri tia ani, Ama di a’di ’ye, ama-ni azi Munguni ngazu ani ya? 29#1 Yoh 3:23Yesu nga e’yo omvi, ’yo yi tia, Azi Munguni ’di’i, emini ’ba erini tini epeleri a’izu. 30#Yoh 2:18; Mar 8:11Yi nga di ’yo eri tia, Mi di a’di ’ye ecetaru, ama ma ndre, ama ma a’i mi beni ya? Mi a’di azi riga ya? 31#Efu 16:4, 15; Zab 78:24A’bi amani drio ’diyi nya mana angu roko dria; ekile yini silerile, Eri fe yi dri mikate engapi ’buari nyazu, 32#Yoh 6:49Yesu nga di ’yo yi tia ani, Ma ’yo emi tia ndi ndi, ’ba ndra mikate engapi ’buari fepi emi driri eri Musa’i yo; te ma Atini emi dri mikate adaru engapi ’buari feni. 33#Yoh 6:51Te mikate Munguni eri ’ba engapi ’buari esipi va, idri fepi nyaku driri’i. 34Yi nga di ’yo eri tia ani, Opi, mi fe ama dri mikate ’diri etuzu ’dani,

35 # Yoh 4:14; 6:48; 7:37 Yesu nga ’yo yi tia, Ma’i, ma mikate idriniri; ’ba emupi ma veri ngani ovu abirisi ku, ’ba ma a’ipiri yi avijo ngani eri fu aluni ’de ku. 36#Yoh 6:26, 29Te ma ’yo emi tia ra emi ndre ma ’bo, te emi a’ini ma ku. 37#Yoh 17:6-8; Mat 11:28’Ba dria ma Atini fele ma driri nga emu ma vu; azini ’ba emupi ma vuri ma ngani eri ’be amve ’de ku. 38#Yoh 4:34; Mat 26:39A’disiku ma esi ’buarisi e’yo ma asini leleri ’yezu ku, te ’ba ma ti epepirini leleri ’yezu’i; 39#Yoh 10:28, 29; 17:12e’yo ’ba ma ti epepirini leleri ’di, afa dria erini fele ma driri ma aluni ma avi ma dri ku, te ma ma fe erini engazu o’du ewuni asizurisi. 40#Yoh 5:29; 11:24Te e’yo ma Atini leleri ’di: ’ba dria ale alu Mvini ndrepi, azini eri a’ipiri, yi ma ovu idri ’dani ’daniri be; azini ma nga fe eri ma enga o’du ewuni asizurisi.

41’Ba Yahudini nga ono eri dria ani, erini ’yole, Ma mikate ibipi engapi ’bua esipi vari’irisi. 42#Luk 4:22Yi ’yo, ’Ba ’diri eri Yesu Yusufu mvi, amani atani nile andri be rari ku ya? Eri di ’yo, Ma esi i ’buarisi ’bo-ri agoni ngoni ya? 43Yesu nga e’yo omvi, ’yo yi tia, i Emi one emi eselia ku. 44#Yoh 6:55’Ba aluni econi emuzaru ma vu ku, de nga ma Ati ma ti epepiri eseni erini ku; ma nga fe eri ma enga o’du ewuni asizurisi. 45#Isa 54:13; Yer 31:33, 34E’yo ovu sizaru buku nabini ma alia, Yi dria nga ovu imbazaru Mungusi. ’Ba dria alu alu e’yo eripi Ata tia, e’yo onipi vuniari, eri emu ma vu, 46#Yoh 1:18Ovuni kini ’ba azini ndre Atani ’bo ’dini ku; lu ’ba engapi Mungu vuri ndre Atani ’bonini. 47#Yoh 3:16Ma ’yo emi tia ndi ndi, ’ba a’ipiri eri ovu idri ’dani dani be. 48#Yoh 6:35Ma mikate idriniri. 49#Yoh 6:31, 32; 1 Kor 10:3, 5Emi a’bipi nya ndra mana roko ’dria, te yi odra ra. 50’Diri mikate esipi ’buarisi vari’i, ’ba ma nya eri, ma dra ku beni. 51#Ebra 10:5, 10Ma mikate idriru esipi ’buarisi vari’i; ’ba alu ka mikate ’diri nya ra, eri nga ovu idriru ’dani ’dani; te mikate mani ngale feleri eri kalanya mani, idri nyakuni ma e’yosi.

52 # Yoh 6:60 E’yo ’disi ’ba Yahudini yi agata ga ’dani yi eselia, ’yozu kini, ’Ba ’diri eco i ma kalanya fezaru ama dri nyazaru ngoni ngoni ya? 53Yesu nga ’yo yi tia ani, Ma ’yo emi tia ndi ndi, emi ka Mvi ’bani ma kalanya nya ku, azini emi ka ari erini mvu ku, emi ovuni idri be emi alia ku; 54’ba kalanya mani nyapi ari mani mvupi indiri ovu idri ’dani ’daniri be, ma nga eri enga o’du ewuni asizurisi. 55Te kalanya mani eri nyaka adani, ari mani eri afa mvuza adani indi. 56#Yoh 15:4; 1 Yoh 3:24; 2:24’Ba ma kalanya nyapi ari mani mvupi indiri eri ovu ma alia, ma’i ma ovu eri alia indi. 57Ekile Ata idrirurini ma ti pelerile, azini mani ovule idriru Atasidrile, ’dinile ’ba ma nyapiri nga ovu idriru masi. 58’Diri eri ovu mikate esipi ’buarisi vari, ekile ama a’bipini ndra nyale ra odrazu ndorile ’dini ku; ’te ’ba mikate ’diri nyapiri eri nga ovu idriru ’dani ’dani. 59Eri ’yo e’yo diri pari ’bani yi okuzuria, erini ’ba imbaria Kaperinaumua.

E’yo ’yoza idri ’dani ’danirini

60E’yo ’disi ’ba erini imbale ’diyi kakau ka eri ra, yi ’yo ra, E’yo ’yoza ’diri eri okporu; a’di eco erizaruni ya? 61Te Yesu erini niria i alia ’ba erini imbale ’diyi yi ono e’yo ’disi, eri ’yo yi tia, E’yoi ’diri fe emini abazu abani ya? 62#Yoh 3:13Te di eri nga ovu ngoni ya emi ka nga Mvi ’bani ndre erini turia pari ini ndra ovuzu okoria ya? 63#2 Kor 3:6Orindini idri feni, kalanya ma orodri yo; e’yo mani ’yole emi tia ’bo ’diyi yi orindini, azini yi idrini. 64#Yoh 13:11Te ’ba azini emi eselia e’yo a’ipi ku ’diyi indi. Te Yesu ni okokele ’ba a’ipi ku ’diyi a’dipi yari ra, azini vini ’ba ngapi eri o’di nyapiri a’di yari indi. 65#Yoh 6:44Eri ’yo ra, E’yo ’disi ma ’yo te emi tia ’bo, ’ba aluni econi emuzaru ma vu ku Ata ka fe eri drini ku.

66E’yo ’disi ’ba erini imbale ’diyi kakau yi asi mvi vile, awuni aci eri be dika ku. 67Yesu nga ’yo ’ba mudri drini iri ’diyi ma tia ani, Emi le mu alu indi ya? 68#Mat 16:16; Mar 8:29; Luk 9:20; Yoh 6:63Simoni Petero nga e’yo omvi eri tia, Opi, ama mu a’di vu ya E’yo ’yoza idri ’dani ’danirini ’diyi yi mi vu; 69#Yoh 1:49; 11:27; Mat 14:33; 16:16ama a’i ’bo, ama ni ra, mi ’Ba Alatararu Munguniri’i. 70Yesu nga e’yo omvi yi tia, Ma openi emi mudri drini iri ku ya, te ’ba alu emi eselia eri orindi onzini? 71Eri ’yo Yudasi Simoni Isikariote mvi ma e’yosi, a’disiku agu nde alu ’ba mudri drini iri ’diyi ma eseliarini ’yele eri ma o’di nyalerisi.

Currently Selected:

Yohana 6: LB66

Highlight

Copy