Luka 11

Imbata Yesuni Mungu ziza ma e’yosiri

1 # Luk 5:33 Eri nga eca ’dini, erini Mungu ziria pari azinia, ka de zizu ’bo, ’ba erini imbale ’diyi ma azi alu nga ’yo eri ria, Opi, mi imba ama Mungu zizasi, ekile Yohanani ndra ’ba erini imbale ’diyi imbalerile. 2#Mat 6:9-13Eri ’yo yi ria, Emi ka Mungu zi, emi ’yo ’dini:

Ata, ru mini ma ovu inzizaru. Suru mini ma emu. 3Etu vusi etu vusi mi fe ama dri nyaka o’du andruniri; 4mi ku e’yo onzi amani, te ama’i indi, ama ku mari ’ba dria alu alu mari nyapi ama vurini; mi ji ama obeta ma alia ku.

5Eri ’yo yi ria, ’Ba emi eselia a’di’i, ovupi agyi beri, agyi nde ka nga eca eri vu iniaayi, ka nga ’yo eri ria, Ma agyi, mi fe ma dri enya olemiru na toboru; 6te ma agyi engapi aciari eca ma vu, te afa mani ngale fele eri driri aluni yo; 7#Mat 26:10eri nga e’yo omvi geri jo aliarisi ’dini ya, kini, Mi ecandi ma ku; ma opi lotile ’bo, azini anzi mani yi ovu ma be pari dria; econi mani ngazaru fezu mi dri ku? 8#Luk 18:5Ma ’yo emi ria, Eri ka enga fezu eri dri erini ovule eri agyirisi ku ti, te erini zile dika dikarisi eri nga enga ra, eri nga afa erini a’ile ’diyi fe eri dri ra. 9#Mat 7:7-11Ma ’yo emi ria indi, Emi zi, eri nga ovu fezaru emi dri; emi ndru, emi nga isu ra; emi kpo, eri nga ovu zizaru emi dri. 10A’disiku ’ba dria alu alu afa zipiri eri a’i ra, ’ba afa ndrupiri eri isu ra, ’ba kpopiri dri yi nga zi ra. 11’Ba emi eselia ovupi ataru, mva erini ka enya olemi a’i eri dri, ngapi eri dri oni fepi’iri a’di’i ya? 12Eri ka nga a’ugbe a’i, eri nga di eri dria otunukua fe’i ya? 13Ka’dini emi ’ba onziru ’diyi ka ni afa onyiru fezu emi anzipi dri ra, Ata emini ’buari ngani Orindi Alatararu fe ’ba eri zipi ’diyi dri aga rakuya?

Suru i esele copi ndu nduri econi pa sozaru okporu ku

14 # Mat 12:22-30, 43-45; Mar 3:22-27 Eri ovu de orindi onzi ndindiruri droria. Eri nga eca ’dini, orindi onzi ka fu amve ’bo, ’ba ndindiru ’ba e’yo ’yo; ’ba ongulumuru yi nga osu ani osu osu. 15#Mat 9:34; 10:25Te ’ba azini yi eselia ’yo ra, Eri orindi onzi odro Beelizebuli opi orindi onzi ma i driliari ma okposi; 16#Mat 12:38; 16:1; Mar 8:11te ’ba azini, yini eri o’biria, nga eceta engapi ’buari ndru eri vu. 17Te eri’i, erini asisile yini nile rarisi, nga ’yo yi tia, Suru nyaza dria yi esele opi ombasi ceni ’diyi nga dri ja ra, aku indi ka i esele co ceni eri nga i eza ra. 18Satani ka i esele co ceni, suru erini nga pa so ngoni ngoni ya? A’disiku emini ’yole ma nze orindi onzi okpo Beelizebulinirisi. 19Te ma ka orindi onzi odro okpo Beelizebulinisi, anzi emini yi di yi odro a’di ma okposi ya? E’yo ’disi yi nga ovu ’ba e’yo emini lipi ’diyiru. 20#Efu 8:19Te ma ka orindi onzi odro drileju Mungunisi, awa’dini suru Munguni eca emi vu ’bo. 21’Ba okpo be i osupi afa ombanisiri ka i ma aku agei te, afa erini dria yi nga ovu ’yeke; 22#Kol 2:15te ’ba okpo be eri agapi rari ka nga emu ’ba nderi ma dria eri agazu, eri nga afa ombani erini asi ’bazu drinia egale kini i nga i pa ani ’diyi o’du dria, nga di afa erini opale ombaa ’diyi awa ra. 23#Mar 9:40; Luk 9:50’Ba ovupi ma be kuri eri ovu ’ba ma dri arupiri, azini ’ba afa okupi ma be tualu kuri eri ere saaru.

Orindi onzini emvizu

24Orindi ondiru ka efu ’ba aliarisi ’bo, eri aga pari yi kokorua, erini ande liza ndaria; te eri ka isu ku eri ’yo, Ma nga dri atri mvizu jo ndra mani efuzuria. 25Eri ka eca ra, eri isu ko jo ale ’bo, ede eri ra. 26#Yoh 5:14Eri nga di mu orindi azini aziri eri agapi onzisi ra ’diyi oku i vu, yi nga fi ovu ’daa; ’dini agu nderi ma e’yo vileri nga eca onzi aga okori ra.

Asi ndriza adari

27 # Luk 1:28, 42, 48 Eri nga eca ’dini, erini e’yo ’diyi ’yoria, oku alu ’ba ongulumuru ma eseliari nga oyu o’duko urusi, nga ’yo eri tia, Opojo mi ojipiri ovu ’drilebaru, ba mini ndruleri be. 28#Luk 8:15, 21Te eri ’yo ra, Kani bani ’ba e’yo Munguni eripi, tani mbapi ’diyi, yi drilebaruni!

A’bianzi onzi ’diyini eceta zizu

29 # Mat 12:38-42 # Mat 16:4; Mar 8:12; 1 Kor 1:22 ’Ba ongulumuru ’diyini yi okuria eri vu, eri ’ba ’yo kini, ’Ba a’bianziru ewu ’dosi ’diyi yi ’ba onzini; yi eceta nda, te eceta ngani ovu fezaru yi dri ku, pe lu eceta Yonani a’dule. 30#Yon 3:4Mvi ’bani eri ovu ecetaru a’bianzi ewu ’dosi ’diyi drini, ekile ndra Yonani ovule ecetaru ’ba Ninevea ’diyi dririle. 31#1 Opi 10:1-10; 2 Sur 9:1-12Oku melekiru engapi angu uruleruari nga enga etu e’yo lizurisi a’bianzi ewu ’dosi ’diyi be, eri nga yi nde e’yo lizasi ra; erini ndra engale angu ma kalatini asizuria ondua Sulemanini erizurisi; te emi ndre, agu Sulemanini agapi rari eri ’doa ci. 32#Yon 3:5Etu e’yo lizurisi ’ba Ninevea: ’diyi nga pa so a’bianzi ewu ’dosi ’diyi be, yi nga yi nde e’yo lizasi ra; yini yi asi ojale e’yo Yonani olulerisirisi; te emi ndre, ’ba Yonani agapi rari ’doa ci.

Tala rua vileri

33 # Mat 5:15; Mar 4:21; Luk 8:16 ’Ba aluni tala ’ipi eri ’bapi pari zizarua, kani acalaka etiani yo, te eri nga eri ’ba pari tala ’bazuri ma dria, ’dini ’ba fipi ’diyi ma ndre ani dizani beni. 34#Mat 6:22, 23Tala mi ruani eri mi mileni; te mi mile ka ovu alaru, rua mini dria nga ga dizasi tre; te mi mile ka ovu onzi, mi ruani nga ga angu bizasi tre indi. 35Ka’dini mi lu onyiru diza ovupi mi aliari kazu ovuzu bizaru ku. 36Mi rua dria ka ga dizasi tre, ’dini esele aluni ka ovu bizaru ku, eri nga ovu diza be tre, ekile talani angu emvele mi dri diza erinisirile.

Yesuni egazu ’ba Farisaini ’diyi ma dria ’ba azita imbapi ’diyi be

37 # Luk 7:36; 14:1 De erini e’yo ’yoria, ’ba Farisaini nga eri omve nyaka nyazu i be; eri nga fi, ri nyaka tia. 38#Mat 15:2Te ’ba Farisaini ka ndre ra, asi erini osu tu a’disiku Yesuni nyaka nyale ’dani rua ojikokorurisi. 39#Mat 23:1-36Opi nga ’yo eri tia, Te di emi ’ba Farisaini, emi adri ejea pi ma nguku amveleruri oji ko’biani be’i, te alialeru emi ga tre afa opaza pisi e’yo onzi be. 40Emi ’ba azazani! ’Ba nguku amveleruri edepiri edeni alialeruri indi ku ya? 41Emi fe afa ovupi alenia ’diyi afa fezaru; te mi ndre, afa dria nga ofu alaru emi dri ani.

42 # Lev 27:30 Te candi emi dri, emi ’ba Farisaini! emi adri tibi ma esele mudriniri fe ra, afa arikariruri pi, mondrokolo pi, tibi be dria, te emi adri e’yo liza onyiruri pi ku ja leta Munguni be; te onyiru emi ka ndra e’yo ’diyi ’ye, e’yo azini ’diyi kuzu ku indi ’yeke. 43#Luk 20:46Candi emi dri ’ba Farisaini! emini oguna drileru pari ’bani yi okuzuriari pi lele zita cuua ’diyi berisi. 44Candi emi dri emini ovule ekile nyadri i e’dapi ku ’diyilerisi, te ’ba acipi yi ma dria ’diyi nini ku.

45’Ba azita imbapi ’diyi ma azi alu nga e’yo omvi, ’yo eri tia kini, ’Ba ’ba Imbapiri, mini e’yo ’diri ’yoria mi di ama onzo indi. 46Eri nga ’yo, Caridi emi dri indi, emi ’ba azita imbapi ’diyi la! emini teri nzizaru ’bani ’dule ewasi ’diyi o’bale ’ba driarisi, de te emi ngulupi eloni afa nzizaru nde ’diyi drianzi emini ma azi alunisi ku. 47Candi emi dri! emini nabi ma nyadri silerisi, de te emi a’bipi ofu ndra yini. 48’Dini emi ovu ’ba e’yo eti nzepi ’diyiru, azi emi a’bipini ’yeleri a’izu; yiruni yi ofu yi ra, te emi’i, emi si yi ma nyadrini. 49E’yo ’disi ondua Munguni ’yo indi, Ma nga nabi piyi ti pe ’ba ti opele ’diyi be yi vu, yi nga azini ’diyi ofu ra, azini ’diyi inza ra, 50’dini yi nga nabi dria ma ari ’bani adale engazu nyaku tini e’dozurisiri-ma arioti a’i a’bianzi ewu ’dosi ’diyi vu, 51#E’do 4:8; 2 Sur 24:20-21engazu ari Habilinisi ecazu kpere ari Zakariani vu, agu nde yini fule pari edeta edezuri pi ma eselia jo Munguni beri’i. Ada, ma ’yo emi tia, eri nga ovu a’izaru a’bianzi ewu ’dosi ’diyi vu. 52Candi emi dri, ’ba azita imbapi ’diyi la emini fungua onduani palerisi; emi ma ngulupi fini ku, te emi oga ’ba ’yepi fipi ’diyi fiko si.

53Eri ka efu ’daarisi ’bo, karani piyi ’ba Farisaini be yi nga ’ba ozo eri dria okposi, yi fe eri dri e’yo ’yozu e’yo o’biru ma dria, 54#Luk 20:20e’yo erini mbazu, yi ma isu e’yo azini efupi eri ma tiliari ani.

Currently Selected:

Luka 11: LB66

Highlight

Copy