KUBULUKA 1

Aisraele avuyiwa mu Iguputo

1Ana achimuna a Yakobo, ale adenda na iye ku Iguputo pabodzi pene na mabanjawo akhali awa:#Kut. 46.8-27. 2Rubeni, Simioni, Levi, Yuda, 3Isakara, Zebuloni, Benjemani, 4Dani, Nafitali, Gadi na Asheri. 5Onsene pabodzi pidzukulu pya Yakobo akhali anthu makumanomwe;#1.5 makumanomwe: Chakuthumbusula chinango chibodzi chakale chalonga makumanomwe na ashanu (Yang'anani Mab. 7.14). mwanache Yosefe akhadenda kale ku Iguputo. 6Tenepo Yosefe na abale ache, pontho na mfendu wache adafa, 7mbwenye pidzukulu pyawo, ale mba Aisraele adabalana pikulu mbakhala anthu akuinjipa pyakwanga mwakuti dziko ya Iguputo mudadzala na anthu enewa.#Mab. 7.17.

8Pidagwanda ndzidzi ukulu ene, mu Iguputo mudapita mfumu unango kutonga, ule hakhadziwa tayu pya Yosefe.#Mab. 7.18. 9Tenepo iye adalonga kuna anthu ache mbati, “Aisraelewa ainjipa pontho ngamphamvu pyakwanga mwakuti tikugoswerwa nawo. 10Mwinango kunabwera nkhondo iwo anaphatizana na anyamalwathu, towera atikunde mbathawa kubuluka#1.10 mbathawa kubuluka: penu mbatonga. m'dziko muno. Tathema kusaka njira yakualekesa kuinjipa pikulu pene.”#Mab. 7.19. 11Natenepo anthu a ku Iguputo adaikhira anyakuyang'anira avinga towera aavuye pakuaphatisa basa mwakuakhakhamiza. Aisraele adamanga mizinda ya Pitomu na Ramese yakukoyeramo pinthu pya Mfumu wa Iguputo. 12Mbwenye na kuavuya kukulu kukhachita anthu a ku Iguputo, Aisraele ndiye adanyanya kuinjipa mbafalikira m'nthemba yonseneyo. Tenepo anthu a mu Iguputo adatoma kuagopa Aisraele, 13-14mbaavuya pakuaphatisa basa mwavinga ninga mabitchu. Iwo adaakhakhamiza kuawumbira njerwa na kumunya mataka na mabasawo anango onsene a m'minda. Anthu a ku Iguputo adaaphatisa basa mwavinga pontho mwakukhonda kuavera nsisi.

15Tenepo mfumu wa ku Iguputo adalonga kuna Shifira na Pua, anyakubalisa akazi a Chiheberi mbati, 16“Mungabalisa mkazi wa Chiheberi, mwanayo angakhala mamuna mpheni, mbwenye angakhala wamkazi mulekeni.” 17Mbwenye anyakubalisa akazi ale akhali akugopa Mulungu, tenepo iwo hadavere pidalonga mfumu pile tayu mbakhonda kupha ana achimuna ale. 18Tenepo mfumu adachemeresa akazi ale mbaavunza mbati, “Mwatani munachita tenepa? Munalekeranji kupha ana achimuna?”

19Iwo adatawira mbati, “Akazi a Chiheberi alekana na akazi a kuno ku Iguputo; iwo nkhabe nenseka na kubala tayu, iwo ambabala mwenemo mbodzi wa ife mbadzati fika kweneko.” 20-21Na thangwi yakuti anyakubalisa akazi akhali akugopa Mulungu, Mulunguyo adaakomera mtima mbaapasa mabanjawo ene. Tenepo Aisraele adathimiza kuinjipa pontho kukhala amphamvu. 22Pakumalisira pache mfumu adapereka utongi ukulu kuna anthu ache onsene wakuti: “Ana onsene akachiya achimuna a Chiheberi akaponywe mumkulo wa Nailo, mbwenye ana achikazi mualeke.”#Mab. 7.19.

Currently Selected:

KUBULUKA 1: SenaMw

Highlight

Copy