KUBULUKA 2

Kubalwa kwa Mose

1Ndzidzi wenewo mamuna unango wa dzinza ya Levi adasemba mkazi wa dzinza mwache monthomo, 2mbabala naye mwana wamamuna. Pidaona mkaziyo kuti mwanayo akhali wakubalika pyakwanga, iye adambisa miyezi mitatu.#Mab. 7.20; Aheb. 11.23. 3Mbwenye pikhali pyakuchimwanika kuthimiza kumbisa, iye adakwata chitundu chakusasanywa na mitete mbachikwalangula na upula kuti chileke pita madzi. Iye adaikha mwanayo mwenemo mbachisiya pakati pa mitete yakulapha pankhomole ya mkulo wa Nailo. 4Nyamaingache mwanayo adaimira patali pang'ono kuona chikhafuna kumchitikira mwanayo.

5Mwana wamkazi wa mfumu adadza kumkuloko kasamba, mwenemo anyabasache akhafamba-famba pyawo pankhomole ya mkulo. Kabodzi kene iye adaona chitundu pakati pa mitete yakulapha, tenepo adatuma bitchu wachikazi kachikwatapo. 6Mwana mfumu ule adachifungula mbaonamo mwana wamamuna. Mwanayo akhalira, tenepo iye adava naye nsisi. Iye adalonga mbati, “Weneyu ndi mbodzi wa ana a Chiheberi.”

7Nyamaingache mwana ule adamvunza mbati, “Munafuna ndikachemere mkazi wa Chiheberi kuti amuyamwise kukulererani?”

8Iye adatawira mbati, “Ndaphata miyendo ndoko.” Natenepo mtsikana ule adenda kachemera mache eneletu mwanayo. 9Mwana mfumu ule adapanga mkazi ule mbati, “Kwata mwanayo ukamuyamwise kundilerera, tenepo ine ndinakupagali.” Natenepo iye adakwata mwana ule mbaenda naye kamuyamwisa. 10Pidakula mwanayo, iye adenda naye kuna mwana mfumu, ule adamkwata mbasanduka mwanache ene. Iye adalonga yekha ene mbati, “Mwanayu ndidachita kumnula madzi, tenepo ndinamthula Mose.”#2.10 Mose: Dzina yeneyi ikuveka ninga ya Chiheberi kulonga kuti, “Kunula.” #Mab. 7.21.

Mose athawira kudziko ya Midiani

11Nsiku inango, pikhadakula Mose, adenda kafambira anthu ache a Chiheberi mbaona mukhakhakhamizirwa iwo kuphata mabasa akupha. Iye adaona pontho munthu wa ku Iguputo akupha Mheberi, mbodzi wa anthu ache.#Aheb. 11.24. #Mab. 7.23-28. 12Mose adayang'ana-yang'ana, tenepo pidaona iye kuti pakhali nkhabe munthu unango chifupi, iye adapha munthu wa ku Iguputo ule mbafikhira mtembo wache m'tchetcha. 13Mangwana mwache iye adenda pontho kweneko mbaona Aheberi okhokha awiri akumenyana. Iye adalonga kuna ule akhaboneresa mwanzache mbati, “Watani unamenya Mheberi mnzako tenepa?”

14Munthu ule adatawira mbati, “Mbani adakuikha kukhala mfumu, pontho nyakutonga mseru pakati pathu? Ayi ukufuna kundipha ninga mudaphera iwe munthu wa ku Iguputo ule?” Tenepo Mose adachita mantha mbalonga yekha ene mbati, “Anthu adziwa pinthu pyachita ine.” 15-16Pidava mfumu pidachitikapyo, adayesa-yesa kuti aphe Mose, mbwenye Mose adathawa mbaenda kakhala kudziko ya Midiani.

Nsiku inango pikhakhala Mose chifupi na mchera, ana anomwe achikazi a nyansembe wa dziko ya Midiani adadza dzatunga madzi mbadzaza pyakumweseramo mbamwesa mabira na mbuzi za babawo.#Mab. 7.29; Aheb. 11.27. 17Mbwenye amakabuswa anango akhathamangisa ana a Yetero. Tenepo Mose adenda kaavunulira mbaatungira madzi akumwesa pifuyo pyawopyo. 18Pidabwerera ana ale kuna babawo adaavunza mbati, “Mwatani mwachimbiza kudza lero?”

19Iwo adatawira mbati, “Munthu unango wa ku Iguputo adativunulira kuna amakabuswa, pontho atitungira madzi mbamwesa pifuyo pyathu.”

20Iye adavunza anache ale mbati, “Munthu weneyu ali kupi? Mwatani kudza naye kuno? Ndokoni mukamchemere towera adye nafe pabodzi.”

21Natenepo Mose adatawira kukhala kweneko. Yetero adampasa Zipora mwanache wamkazi kuti akhale mkazache, 22mbabala naye mwana wamamuna. Mose adalonga yekha ene mbati, “Ndine mlendo m'dziko muno, tenepo ndinamthula mwanayu Gereshomu.”#2.22 Gereshomu: Dzina yeneyi ikuveka ninga ya Chiheberi kulonga kuti, “Mlendo.”

23Pidapita ndzidzi ukulu mfumu wa ku Iguputo adafa, mbwenye Aisraele akhabulira basi na ubitchu mbalira kuti aphedzwe. Kulira kwawo kudafika kuna Mulungu, 24ule adava kubulira kwawo mbakumbuka chiverano chache na Abrahamu, Isake na Yakobo.#Kut. 15.13, 14. 25Iye adaona ubitchu wa Aisraele mbadziwa pikhachitika pile.#2.25 mbadziwa pikhachitika pile: Chakuthumbusula chinango chibodzi chakale chalonga iye adapitchulula yekha ene kuna iwo.

Currently Selected:

KUBULUKA 2: SenaMw

Highlight

Copy