KUBULUKA 20

Matongero khumi

(Deut. 5.1-21)

1Mulungu adalonga, tenepo mafalache onsene mbawa: 2“Ine ndine MBUYA, Mulungu wako, ule adakubulusa m'dziko ya Iguputo, kukhali iwe paubitchu kule.

3“Leka pembedza milungu inango, mbwenye ine ene basi.

4“Leka kupisasanyira wekha ene mifanikizo ya chinthu chonsene cha kudzulu, penu cha pansi pano, penu cha m'madzi a pansi pa mataka.#Kub. 34.17; Lev. 19.4; 26.1; Deut. 4.15-18; 27.15. 5Leka lambira mifanikizo penu kuipembedza, thangwi ine ndine MBUYA Mulungu wako pontho ndine wantchanje. Ndimbatchunyusa ana thangwi ya pyakudawa pya makolo awo ambandizonda ale, kuatchunyusa mpakana mfendu wachitatu na wachinayi.#Kub. 34.6, 7; Kal. 14.18; Deut. 7.9, 10. 6Mbwenye ndimbaonesa kuafuna kwanga kokhonda mala kuna mifendu pikwi-pikwi#20.6 mifendu pikwi-pikwi: penu anthu pikwi-pikwi. pya ale ambandifuna mbavera matongero anga.

7“Leka thula dzinanga papezi, thangwi ine, MBUYA Mulungu wako, ndinatchunyusa munthu onsene anaphatisa basa dzinanga papezi.#Lev. 19.12.

8“Koya Nsiku Yakupuma pakuichitisa kukhala yakupambulika.#Kub. 16.23-30; 31.12-14. 9Pana nsiku zitanthatu zinakwanisa iwe kuphata mabasako,#Kub. 23.12; 31.15; 34.21; 35.2; Lev. 23.3. 10mbwenye nsiku yachinomwe ndi Nsiku Yakupuma yakupambulika kuna ine. Pansiku yeneyo nee munthu na mbodzi ene athema kuphata basa tayu, nee iwe penu anako, nee mabitchu ako penu pifuyo pyako, penu mlendo ali m'dziko mwakomo tayu. 11Pansiku zitanthatu, ine MBUYA, ndidasasanya dziko yapansi, thambo, bara na pyonsene pili mwenemo, mbwenye ndidapuma pansiku yachinomwe. Ndi thangwi yache, ine MBUYA, ndidatsanzayisa Nsiku Yakupuma mbandiichitisa kukhala yakupambulika.#Kut. 2.1-3; Kub. 31.17.

12“Lemedza babako na mako, towera nsiku za moyo wako pansi pano ziinjipe m'dziko inafuna ine, MBUYA Mulungu wanu, kukupasa.#Deut. 27.16; Mt. 15.4; 19.19; Mk. 7.10; 10.19; Lk. 18.20; Aef. 6.2, 3.

13“Leka chita upandu.#Kut. 9.6; Lev. 24.17; Mt. 5.21; 19.18; Mk. 10.19; Lk. 18.20; Arom. 13.9; Yak. 2.11.

14“Leka chita uputa.#Lev. 20.10; Mt. 5.27; 19.18; Mk. 10.19; Lk. 18.20; Arom. 13.9; Yak. 2.11.

15“Leka kuba.#Lev. 19.11; Mt. 19.18; Mk. 10.19; Lk. 18.20; Arom. 13.9.

16“Leka pambizira mwanzako.#Kub. 23.1; Mt. 19.18; Mk. 10.19; Lk. 18.20.

17“Leka sirira nyumba ya mwanzako; leka sirira mkazache, mabitchu ache, ng'ombe zache, mabulu ache, penu chinthu chonsene cha mwanzako.”#Arom. 7.7; 13.9.

Anthu achita mantha

(Deut. 5.22-33)

18Pidava anthu chiphaliwali na kulira kwa ngoma, pontho pidaona iwo njazi na utsi paphiri pale adatetemera na mantha mbaimira kutali na phiri.#Aheb. 12.18, 19. 19Iwo adalonga kuna Mose mbati, “Iwe ungalonga kuna ife, tinati tive, mbwenye tikuchita mantha, thangwi ngakhala Mulungu analonga kuna ife, tinati tife.”

20Mose adatawira mbati, “Lekani chita mantha; Mulungu atchitha kukuyesani, pontho kukuchitisani kuti muthimize kumgopa, towera muleke dawa.” 21Mbwenye anthu adathimiza kukhala kutali basi. Mose ene basi adenda chifupi na makole akuswipa kule kukhali Mulungu.

Mwambo wakulonga pya maguwa ansembe

22MBUYA adapanga Mose kuti alonge kuna Aisraele kuti, “Imwe mwapiona mule ine, MBUYA, ndalonga kuna imwe kubulukira kudzulu. 23Lekani kupisasanyira mwekha ene milungu yasiliva penu yagolidi kuti mupipembedze padzulu pakupembedza ine. 24Ndisasanyireni guwa yansembe ya mataka, tenepo muperekepo nsembe za mabiranu na ng'ombe zanu kukhala nsembe zakupyerera, pontho nsembe zachiphatizano. Pambuto ponsene padapambula ine kuti ndipembedzwepo, ine ndinabwera pana imwepo mbandikutsanzayisani. 25Ngakhala munandisasanyira guwa yamiyala, lekani phatisa basa miyala yakusema, thangwi mungaphatisa basa ntchemu kusema nayo miyalayo, munaichitisa kukhala yokhonda thema na basanga.#Deut. 27.5-7; Yos. 8.31. 26Lekani kundimangira guwa yakukhala na nsikada zakukwirira penepo, thangwi mungachita tenepo, munaoneka pezi pakukwira penepo.

Currently Selected:

KUBULUKA 20: SenaMw

Highlight

Copy