KUBULUKA 6
6
1Tenepo MBUYA adalonga kuna Mose mbati, “Chinchino unati uone pinafuna ine chita kuna mfumu. Ndinamkhakhamiza kutawirisa anthu anga kuti aende. Ndinati ndimkhakhamize maka-maka kuabulusa m'dziko mwachemo.”
Mulungu achemera Mose
2Mulungu adalonga kuna Mose mbati, “Ine ndine MBUYA.#Kut. 17.1; 28.3; 35.11; Kub. 3.13-15. 3Ine ndidaonekera kuna Abrahamu, Isake na Yakobo ninga Mulungu Wamphamvu zonsene, mbwenye sidapichite ndekha ene tayu kudziwika kuna iwo na dzinanga yakuchena, MBUYA.#6.3 MBUYA: (Yang'anani 3.14). 4Ndidachita pontho chiverano nawo mbandiapanga kuti ndinaapasa dziko ya Kanani, dziko ile ikhadakhala iwo ninga alendo. 5Chinchino ndava kubulira kwa Aisraele, ale adaikhwa paubitchu na anthu a ku Iguputo, tenepo ine ndakumbuka chiverano chidachita ine na iwo. 6Tenepo panga Aisraele kuti ine ndikulonga kuna iwo kuti, ‘Ine ndine MBUYA; ine ndinakupulumusani mbandikusudzulani panyatwa ya ubitchu mu Iguputo na mkono wanga wamphamvu. Ndinaatchunyusa pikulu mbandikupulumusani. 7Ndinakusanduzani kukhala anthu anga, inembo ndinakhala Mulungu wanu. Penepo imwe munadziwa kuti ine ndine MBUYA, Mulungu wanu, ndingakusudzulani paubitchu mu Iguputo. 8Ndinakudzesani kudziko, ile idadumbira ine kuna Abrahamu, Isake na Yakobo; mbandiipereka kuna imwe kukhala yanu ene. Ine ndine MBUYA.’ ” 9Mose adalonga penepi kuna Aisraele, mbwenye iwo hadamvesere tayu, thangwi mitimawo idasanyika pikulu na ubitchu wakuphawu.
10Tenepo MBUYA adalonga kuna Mose mbati, 11“Ndoko kapange mfumu kuti iye athema kutawirisa Aisraele kubuluka m'dziko mwachemo.”
12Mbwenye Mose adatawira mbati, “Ngakhala Aisraele hakundivesera tayu, apo ndi tani na mfumuyo? Ine ndine munthu pyache wamathatha.”
13Tenepo MBUYA adatonga Mose na Aroni mbati, “Pangani Aisraele na mfumu ene wa ku Iguputo kuti ndakutongani ndine kutsogolera Aisraele kubuluka mu Iguputo.”
Mbiri ya banja ya Mose na Aroni
14Rubeni, mwana wamamuna wautombo wa Yakobo, akhali na ana anayi achimuna: Hanoki, Palu, Hezironi na Karimi; iwo akhali makolo a mbumba adakwata madzinawo ale. 15Simioni akhali na ana atanthatu achimuna: Yemuele, Yamini, Ohadi, Yakini, Zohari na Shauli, mwana wamamuna wa mkazi wa ku Kanani; iwo akhali makolo a mbumba adakwata madzinawo ale. 16Levi akhali na ana atatu achimuna: Gereshoni, Kohati na Merari; iwo akhali makolo a mbumba adakwata madzinawo ale. Levi adakhala moyo pyaka dzana na makumatatu na pinomwe.#Kal. 3.17-20; 26.57, 58; 1Mbi. 6.16-19. 17Gereshoni akhali na ana awiri achimuna: Libini na Shimei: iwo akhali na pidzukulu pizinji. 18Kohati akhali na ana anayi achimuna: Amuramu, Izihara, Hebroni na Uziele. Kohati adakhala moyo pyaka dzana na makumatatu na pitatu. 19Merari akhali na ana awiri achimuna: Mahili na Mushi. Enewa ndi mbumba ya Levi na pidzukulu pyawo.
20Amuramu adasemba Yokebedi, nyamaingache babache, ule adabala Aroni na Mose. Amuramu adakhala moyo pyaka dzana na makumatatu na pinomwe. 21Izihara akhali na ana atatu achimuna: Kora, Nefegi na Zikiri. 22Uzielembo akhali na ana atatu achimuna: Mishaele, Elizafani na Sitiri.
23Aroni adasemba Elisheba, mwana wamkazi wa Aminadabu, pontho nyamaingache Nashoni; iye adambalira Nadabu, Abihu, Eleazara na Itamara. 24Kora akhali na ana atatu achimuna: Asiri, Elikana na Abiasafu; enewa akhali makolo a mbumba akhadapambuka kuna mbumba ya Kora ale. 25Eleazara, mwana Aroni, adasemba mbodzi wa ana achikazi a Putiele mbabala naye Finiasi. Enewa akhali akadamu a mbumba ya m'dzinza ya Levi malingana mabanjawo.
26Nkhuna amuna enewa, Aroni na Mose, kudalonga MBUYA mbati, “Tsogolerani Aisraele kubuluka mu Iguputo.” 27Iwo akhali amuna ale adapanga mfumu wa ku Iguputo kuti abuluse Aisraele mu Iguputo. Anthu ache ngonthowa Mose na Aroni.
MBUYA atonga Mose na Aroni kwenda kuna mfumu
28Pidalonga MBUYA kuna Mose m'dziko ya Iguputo, 29adalonga mbati, “Ine ndine MBUYA. Panga mfumu wa ku Iguputo pyonsene pinakupanga ine.”
30Mbwenye Mose adatawira mbati, “Imwe mukupidziwa kuti ine ndine munthu pyache wamathatha, apo pinakwanisika tani kuti mfumu akandivesere?”
Currently Selected:
KUBULUKA 6: SenaMw
Highlight
Share
Copy
Want to have your highlights saved across all your devices? Sign up or sign in
© Bible Society of Malawi
