Kutoma 21

Kubalwa kwa Isake

1MBUYA adamtsanzayisa Sara ninga mukhadadumbira iye. 2Tenepo adakwata mimba mbabalira Abrahamu mwana wamamuna uku akalamba kale. Mwanayo adabalwa pandzidzi onthowo ukhadalonga Mulungu kuti anabalwa.#Aheb. 11.11. 3Abrahamu mwanayo adamthula Isake. 4Pikhali Isake nsiku zisere zakubalwa, Abrahamu adamgwanda nsonga yachimuna ninga mukhadampangira Mulungu.#Kut. 17.12; Mab. 7.8. 5Mukhabalwa Isake Abrahamu akhali pyaka dzana pyakubalwa.

6Sara adalonga mbati, “Mulungu andichitisa kukomerwa na kusekera.#21.6 Kusekera: Dzina yakuti Isake m'Chiheberi nkhulonga kuti “Iye ambaseka” (yang'anani pontho 17.17-19). Onsene anavawo anasekera nane pabodzi.” 7Tenepo iye adathimiza kulonga mbati, “Mbani mbadakwanisa kulonga kuna Abrahamu kuti Sara anayamwisa mwana? Kwache ndambalira mwana wamamuna uku akalamba kale.”

8Mwana ule adakula mbamulekesa bele. Tenepo pansiku ikhalekeswa Isake kuyamwa Abrahamu adasasanya phwando ikulu.

Hagara na Ishimaele abuluswa panyumba ya Abrahamu

9Mbwenye Sara adaona mwana wamamuna wa Hagara, munthu wa ku Iguputo adabalira Abrahamu mwana ule, kuti akhasingirira#21.9 akhasingirira: penu akhasenzeka. Isake,#21.9 Isake mwana wamamuna wa Sara: Pyakuthumbusula pinango pyakale pyalonga penepi; m'Chiheberi nkhabemo mafala enewa. 10natenepo iye adalonga kuna Abrahamu mbati, “Mbuluse bitchu wa mkaziyo na mwanache ene, thangwi mwana bitchu hadatheme kukwata khundu pamfumako inafuna iwe kusiyira mwananga Isake tayu.”#Agal. 4.29, 30. 11Penepi pidamsanya mtima Abrahamu pyakwanga thangwi Ishimaele akhalimbo mwanache. 12Mbwenye Mulungu adalonga kuna Abrahamu mbati, “Leka swipa mtima na mwana, pontho na bitchu wamkaziyo. Chita pyonsene pinakupanga Sara, thangwi kudzera muna Isake iwe unakhala na pidzukulu ninga mudadumbira ine kale mule.#Arom. 9.7; Aheb. 11.18. 13Ndinapereka pontho ana azinji kuna mwana wa bitchuyi, towera iwo akhale dzinza ikulu. Iye ndi mwanako pontho.”

14Bzobzo mangwana mwache Abrahamu adapereka phoso na dudu ya madzi kuna Hagara. Iye adathukula mwanayo mbamuikha kunduli kwa Hagara mbaagwinya. Mkazi ule adabuluka mbatsalakatika m'thando yatchetcha ya Beeresheba. 15Pidamala madzi m'dudu mule, iye adamuleka pyache mwana pansi pa thenthere, 16mbakakhala pansi patsogolo mathanyo dzana ibodzi. Iye adalonga yekha ene mbati, “Ine nkhabe kwanisa kuona mwananga akufa.” Uku ali khale penepo mkaziyo#21.16 mkaziyo: Chakuthumbusula chinango chibodzi chakale chalonga mwanayo. adatoma kulira.

17Mulungu adava kulira kwa mwana ule. Tenepo kubulukira kudzulu mngelo wa Mulungu adalonga mbati, “Hagara chinaswipa na iwe mtima ninji? Leka gopa! Mulungu ava kulira kwa mwanayo padamgonesa iwe pale. 18Lamuka ukamthukule kummatamisa. Ine ndinasasanya dzinza ikulu kubulukira muna pidzukulu pyache.” 19Tenepo Mulungu adafungula maso a Hagara mbaona mchera. Iye adenda penepo mbadzaza dudu yache mbakaperekambo anango kuna mwanache. 20Mulungu akhali na mwanayo pikhakula iye. Iye adakhala m'thando yatchetcha ya Parani mbasanduka nyaluso pakupha nyama. 21Mache adamgumanira mkazi wa ku Iguputo.

Chiverano pakati pa Abrahamu na Abimeleki

22Pandzidzi wenewu Abimeleki na Fikolo, mkadamu wa anyankhondo ache, adenda kuna Abrahamu mbalonga mbati, “Pyonsene pinaphata imwe Mulungu ali namwe.#Kut. 26.26. 23Tenepo chinchino dumbirani pamaso pa Mulungu kuti ine, ananga na pidzukulu pyanga nee munatinyengeza tayu. Pontho onesani udidi kuna ine na kuna dziko inakhala imwe ninga mlendoyi ninga udidi udakuonesa ine.”

24Abrahamu adalonga mbati, “Ndinadumbira.”

25Abrahamu adadungunya kuna Abimeleki pya mchera ukhadakwata anyabasa a Abimeleki ule. 26Mbwenye Abimeleki adalonga mbati, “Munthu adachita penepi sinamdziwa tayu. Iwe hudandipange tayu. Ine ndikupiva kwene lero.” 27Tenepo Abrahamu adapereka mabira na ng'ombe kuna Abimeleki natenepo anthu awiriwa adachita chiverano. 28Abrahamu adapambula anabira achikazi anomwe kubulukira pa mkumbi pache. 29Abimeleki adamvunza mbati, “Unachitiranji tenepo?”

30Abrahamu adatawira mbati, “Tambira anabira anomwewa. Ungachita tenepo, ndiye kuti watawira kuti adakumba m'cherawu ndine pano.” 31Natenepo mbutoyo idachemerwa Beeresheba,#21.31 Beeresheba: Dzina yeneyi m'Chiheberi nkhulonga kuti “Mchera wakudumbirisana” penu “Mchera wa anomwe” (yang'anani pontho 26.33). thangwi kudumbirisana kwa anthu awiri ale kudachitikira penepo.

32Pidamala iwo chita chiverano chawo pa Beeresheba, Abimeleki na Fikolo adabwerera ku dziko ya Afilisti. 33Tenepo Abrahamu adabzala muti wabwemba mu Beeresheba mbapembedza MBUYA Mulungu Wakukhala na kukhala. 34Abrahamu adakhala m'dziko ya Afilisti ndzidzi ukulu ene.

Currently Selected:

Kutoma 21: SenaMw

Highlight

Copy