Kutoma 22
22
Mulungu apanga Abrahamu kupereka nsembe Isake
1Kubuluka penepo nsiku inango Mulungu adamuyesa Abrahamu. Iye adamchemera mbati, “Abrahamu!” Abrahamu adatawirambo mbati, “Ndili pano.”#Aheb. 11.17-19.
2Penepo Mulungu adalonga mbati, “Kwata Isake mwanako mbodzi ene wapamtima pakoyo mbuende kudziko ya Moria. Kweneko paphiri inafuna ine kakuonesa ukampereke nsembe mwanayo kuna ine.”#2Mbi. 3.1.
3Bzobzo mangwana mwache Abrahamu adapandula nkhuni zakukwana kuotchera nsembe mbazipakiza pabulu wache mbakwata Isake na anyabasache awiri kwenda nawo. Iwo adautoma ulendo wakwenda kumbuto kukhadampanga Mulungu kule. 4Pansiku yachitatu Abrahamu adaiona mbuto ile na pakansinzo. 5Tenepo iye adalonga kuna anyabasache mbati, “Imwe banga khalani pano na buluyi. Mphaleyu na ine tinaenda uko kapembedza Mulungu. Tenepo tingamala tinati tibwerere kuna imwe kuno.”
6Abrahamu adathukulisa mwanache Isake nkhuni zakuotchera nsembe zile. Iye ene mwenechiro adathukula mpeni na moto. Pikhafamba iwo uwiriawo panjira, 7Isake adalonga mbati, “Baba!”
Abrahamu adatawira mbati, “Ndawo, mwananga?”
Isake adavunza mbati, “Nkhuni na moto takwata, apo mwanabira wakuti tikampereke nsembe ali kupi?”
8Abrahamu adamtawira mbati, “Mulungu mwenechiroache anati apereke mwanabira wakuti timpereke nsembe.” Tenepo uwiriawo adathimiza kufamba pabodzi.
9Pidafika iwo kumbuto ikhadampanga Mulungu ile, Abrahamu adamanga guwa mbasanjikapo nkhuni. Iye adamanga mwanache mbamgonesa pankhuni paguwa ile.#Yak. 2.21. 10Tenepo Abrahamu adafuthula dzanjache mbakwata mpeni kuti aphe mwanache Isake. 11Mbwenye mngelo wa MBUYA adachemera Abrahamu kubulukira kudzulu mbati, “Abrahamu, Abrahamu!”
Iye adatawira mbati, “Ndili pano.”
12Mngelo adalonga mbati, “Leka kumkuwaza mwana, penu kuchita chinthu na chibodzi chene kuna iye. Chinchino ndapidziwa kuti iwe umbagopa Mulungu, thangwi hudandikhondese mwanako, mwanako mbodzi eneyo tayu.”
13Abrahamu adamwaza maso mbaona bira wamamuna akoloweka nyanga m'thundudzi. Iye adenda kweneko mbakamkwata birayo mbampereka nsembe yakupyerera m'mbuto mwa mwanache. 14Abrahamu adaithula mbuto ile kuti, “MBUYA Ambapasa.”#22.14 Ambapasa: penu Ambaona. Podi na lero ene mbuto yeneyi anthu ambailonga kuti, “Paphiri ya MBUYA, iye ambapasa.”#22.14 ambapasa: penu ambaoneka.
15Mngelo wa MBUYA adachemera Abrahamu kubulukira kudzulu kachiwiri kache mbati, 16“MBUYA alonga kuti, ‘Ine ndinadumbira na dzinanga kuti thangwi ya pinthu pyachita iwepi, kuleka kundikhondesa mwanako, mwanako mbodzi ene basi,#Aheb. 6.13, 14. 17ine ndinati ndikutsanzayise, pontho ndinainjipisa pidzukulu pyako ninga nyenyenzi za kuthambo pontho ninga tchetcha ya pagombe ya bara. Pidzukulu pyako pinati pipokosere mizinda ya anyamalwawo.#Aheb. 11.12. 18Pontho kudzera muna chidzukulu chako madzinza onsene padziko yapansi anatsanzayiswa, thangwi iwe wandivera.’ ”#Mab. 3.25. 19Kubuluka penepo Abrahamu adabwerera kuna anyabasache ale mbakwatana nawo pabodzi ulendo wa ku Beeresheba, kukhakhala iye kule.
Pidzukulu pya Nahori
20Mdembu-dembu Abrahamu adadziwa kuti Milika akhadabala ana asere kubalira mbaleache, Nahori: 21Uzi mwana wautombo, Buzi mphwache, Kemuele (Babawo Aramu, 22Kesedi, Hazo, Pilidashi, Jidilafi na Betuele). 23Betuele akhali babache Rebeka. Milika adabalira Nahori, mbaleache Abrahamu, ana aserewa. 24Reuma, mkazi wachibitchu wa Nahori, adabala Teba, Gahamu, Tahashi na Maaka.
Currently Selected:
Kutoma 22: SenaMw
Highlight
Share
Copy
Want to have your highlights saved across all your devices? Sign up or sign in
© Bible Society of Malawi
