Kutoma 24

Mkazi Isake

1Abrahamu ndzidzi wenewu akhadakulupala pyakwanga. Pontho MBUYA akhadamtsanzayisa papinthu pyonsene pikhaphata iye. 2Iye adalonga kuna nyabasache wamkulu, ule akhali mkadamu wa pinthu pyonsene pikhali na Abrahamu mbati, “Ikha dzanjako pantchafu pangapa kudumbira. 3Ndikufuna udumbire na dzina ya MBUYA, Mulungu wa kudzulu pontho na pansi pano, kuti iwe hunasembera mwananga ana akazi a ku Kanani, anthu anakhala ine pakati pawo ale tayu, 4mbwenye kuti unaenda kudziko ya kwathu, kuna abale anga mbukakwata mkazi kweneko kuti akhale mkazache mwananga Isake.”

5Mbwenye nyabasa ule adavunza Abrahamu mbati, “Apo ngakhala mkaziyo hanafuna tayu pyakudza kudziko kuno pabodzi na ine, ayi ndimkwate mwananu kwenda naye kudziko kudabulukira imweko?”

6Abrahamu adatawira mbati, “Onenesa kuti mwananga uleke bwerera naye kweneko. 7MBUYA, Mulungu Wakudzulu, ule adandibulusa pamsuwo wa babanga na m'dziko ya abale anga, pontho ule adandipanga mbadumbira kuna ine kuti anapereka dzikoyi kuna pidzukulu pyanga, iye anatuma mngelo wache patsogolo pako towera iwe ukwanise kagumana mkazi kweneko wakuti mwananga asembe. 8Ngakhala mkaziyo hanafuna tayu kudza nawe pabodzi kuno, penepo iwe unakhala wakusudzuka kuna kudumbira kudachita iwe. Mbwenye podi pitani kwene, iwe leka kwata mwananga kubwerera naye kweneko.” 9Tenepo nyabasa ule adakwata manjache mbaikha pantchafu ya mbuyache Abrahamu mbadumbira kuna Abrahamu pya papinthu penepi.

10Tenepo nyabasa ule adakwata nyama za ngamila khumi za mbuyache mbalamuka kwenda. Iye adakwata pontho mitukwa yadidiletu yamtundu na mtundu kubulukira kuna mbuyache. Iye adenda kumzinda kule kukhakhala Nahori kumpoto kwa dziko ya Mesopotamia. 11Pidafika iye adachitisa ngamila kugodama pamchera kunja kwa mzinda. Dzuwa ikhadapendamiratu, ndzidzi ukhabwera akazi katunga madzi. 12Iye adapemphera mbati, “MBUYA, Mulungu wa mbuyanga Abrahamu, ndichitiseni kupikwanisa lero, pontho onesani kumfuna kwanu kokhonda mala mbuyanga Abrahamu. 13Ine ndili pamchera pano pale pakuti atsikana a mumzindamu anati adze dzatungapo madzi. 14Ine ndinati ndilonge kuna mbodzi wa iwo kuti, ‘Ine ndaphata miyendo, tereza mulinga yako kuti ine ndimwembo.’ Ngakhala iye analonga kuti, ‘Mwani pontho ngamila zanu ndinazitungira madzi,’ weneyo akhale iye ene, ule asankhulira imwe kuti akhale mkazi nyabasanu Isake. Pingachitikadi tenepo, ndinadziwadi kuti imwe mwaonesa kumfuna kwanu kokhonda mala mbuyanga.”

15Iye mbadzati malisa kupemphera, Rebeka adafika na mulinga yache ili paphewa. Iye akhali mwana wamkazi wa Betuele, mwana wamamuna wa Milika, ule akhali mkazi Nahori, mbaleache Abrahamu. 16Mtsikana akhali mwali wakubalika pyakwanga, pontho okhonda dziwa mamuna. Iye adatchithira kumchera kule, mbadzaza mulinga yache mbawambuka. 17Nyabasa ule adathamanga kagumanikana naye mbalonga kuna mtsikanayo mbati, “Ndipasenimbo madzi akumwa pang'ono kubulukira m'mulinga mwanumo.”

18Mtsikana adachimbiza kutereza mulinga yache mbaiphatira m'manja mbalonga mbati, “Mwani, mbuyanga.” 19Pidamala iye kumwa, mtsikana ule adalonga mbati, “Ndinati nditunge pontho madzi anango akumwesa ngamila zanu mpakana zonsene zimale kumwa.” 20Natenepo adachimbiza kukhuthula madzi ale mu chakumwera pifuyo mbathamanga kumchera kule katunga madzi azinji kufikirana ngamila zonsene zidamala kumwa. 21Mwakukhonda longa chinthu na chibodzi chene nyabasa ule adayang'anisisa mtsikana ule kufuna kudziwa ngakhala ndimomwenedi penu tayu kuti MBUYA achitisa ulendo wache kukhala wakukwanisika.

22Pidamala iye mwesa ngamila zile, munthu ule adakwata nthona yakudula pyakwanga ya golidi mbaikha pamphuno ya mtsikana ule mbaikha pontho magoza mawiri agolidi mumkono mwache. 23Tenepo mamuna ule adavunza mbati, “Iwe ndiwe mwana ani? Ndaphata miyendo ngatipange, ayi ilipo mbuto m'nyumba ya babako yakuti ife tinakwanisa kugonamo mosiku uno?”

24Iye adatawira mbati, “Ine ndine mwana Betuele, ule adabalwa na Milika, pontho Nahori.” 25Iye adathimiza kulonga mbati, “Ife tili nawo maudzu mazinji a pifuyo, pontho mbuto tili nayo yakuti imwe munakwanisa kugonamo.”

26Tenepo munthu ule adalamba mbalemedza MBUYA. 27Iye adalonga mbati, “Mbakuzwe MBUYA, Mulungu wa mbuyanga Abrahamu, ule akhulupirika pakumuonesa mbuyanga kumfuna kwache kokhonda mala. MBUYA anditsogolera kufikiratu kuna nyumba ya abale ache mbuyanga.”

28Mtsikana ule adathamanga kunyumba ya mache mbakalonga pyonsene pile. 29Tenepo Rebeka akhali na nkhoswe yache dzinache Labani, tenepo iye adabuluka panja mbathamangira kumchera kukhali nyabasa wa Abrahamu kule. 30Sindzidzi pidaona Labani mphete pamphuno ya nyamaingache na magoza munkono mwache, pontho kuva pidalonga mamuna ule kuna Rebeka, adenda kuna iye mbagumana aimira chifupi na ngamila pamcherapo. 31Iye adalonga kuna munthuyo mbati, “Dzani kuno imwe munthu wakutsanzayiswa na MBUYA. Mwatani munaimira panja pano? Ine ndasasanya kale nyumba na mbuto ya ngamila zanu.”

32Natenepo munthu ule adapita m'nyumba, mbwenye Labani adatchithisa mitolo ikhadathukula ngamila mbazipasa maudzu kuti zidye. Tenepo Labani adakwata pontho madzi mbapereka kuna mamuna ule na anthu ache kuti atsuke manyalo awo. 33Pidadza pyakudya pamaso pawo, mamuna ule adalonga mbati, “Ine nee ndinadyabi mpakana ndilonge chadzera ine kuno.”

Labani adatawira mbati, “Ngatipangenitu.”

34Natenepo mamuna ule adalonga mbati, “Ine ndine nyabasache Abrahamu. 35MBUYA atsanzayisa mbuyanga pikulu pene, pontho adamchitisa kukhala nyakufuma. Iye ampasa mabira, ng'ombe, siliva na golidi, anyabasa achikazi na achimuna ene, mabulu na ngamila zene. 36Sara, mkazi mbuyanga, mbali nkhalamba kale adambalira mwana wamamuna, pontho adapereka kuna mwanayo pyonsene pina iye. 37Pontho mbuyanga adandidumbirisa kumvera mbalonga kuti, ‘Leka kumsembera mwanangayi mkazi wa muno mu Kanani, m'dziko munakhala ine muno. 38Mbwenye ndoko kunyumba ya babanga na kuna abale anga ukakwate mkazi wakuti mwananga asembe.’ 39Tenepo ndidamvunza mbuyanga kuti, ‘Apo ngakhala mkaziyo anakakhonda kudza nane pabodzi kuno?’ 40Iye adatawira kuti, ‘MBUYA ule ambavera ine nsiku na nsiku anati atume mngelo wache kuti aende nawe pabodzi, pontho anachitisa ulendo wako kukhala wakukwanisika, towera iwe ukamkwate mkazi kubulukira kuna abale anga na banjanga mbudza naye kuno kuti mwananga amsembe. 41Tenepo iwe unasudzulwa kuna kudumbira kudachita iwe. Mbwenye iwe ungaenda kuna abale anga, podi akhonde naye kwene pyawo mwanamkaziyo, iwe unasudzulwa basi kuna kudumbira kudachita iwe kule.’

42“Lero pidadza ine kumcheraku, ndidapemphera kuti, ‘MBUYA, Mulungu wa mbuyanga Abrahamu, ndaphata miyendo, ngakhala imwe munapifuna chitisani ulendo wanga wadzera ine kuno kukwanisika. 43Yang'anani, ine ndikuimira pano chifupi na mcherawu, ngakhala mtsikana anadza dzatunga madzi, ine ndinampanga kuti andipasembo madzi akumwa kubulukira m'mulinga mwache. 44Penepo iye angatawira kundipasa madzi, pontho kumwesa ngamila, weneyo ene akhale asankhula MBUYA kuti akhale mkazi wa mwana mbuyanga ule.’ 45Ine mbandidzati malisa kupemphera chamumtima, Rebeka adadza na mulinga yache paphewa. Iye adatchithira kumchera mbatunga madzi. Tenepo ine ndidalonga kuna iye kuti, ‘Ndaphata miyendo, ndipasenimbo madzi ndimwe.’ 46Msanga-msanga iye adatereza mulinga yache mbandipanga kuti, ‘Mwani, pontho ngamila zanu ndinazitungira madzi kuti zimwembo.’ Natenepo ine ndidamwa, tenepo iye adamwesa pontho ngamila zanga. 47Ine ndidamvunza kuti, ‘Ndiwe mwana ani?’ Iye adatawira kuti, ‘Ndine mwana Betuele, ule ndi mwana Nahori na Milika.’ Tenepo ine ndidaikha nthona pamphuno pache na magoza mumkono mwache. 48Penepo ine ndidalamba kupembedza MBUYA. Ine ndidamkuza MBUYA, Mulungu wa mbuyanga Abrahamu, ule adanditsogolera njira yadidi kuti ndikwate mdzukuluache mwana mbaleache mbuyanga Abrahamu kuti Isake mwanache akamsembe. 49Chinchino ngakhala imwe munakomera mtima na kukhulupirika kuna mbuyanga, ndipangeni, ngakhala tayu, ndipangeni basi, towera ndidziwe chakuchita.”

50Labani na Betuele adatawira mbati, “Podi ipi mphyakubulukira kuna MBUYA; ife nkhabe chakuti tikupangeni pontho tayu. 51Rebeka ngweneyu ali pano; mkwateni muende naye pontho mbakakhale mkazi mwana mbuyako ninga mudalongera MBUYA.” 52Pidava nyabasa wa Abrahamu pidalonga anthu pile, adalamba pamaso pa MBUYA. 53Kubuluka penepo nyabasa ule adabulusa pyakuthemesera pyagolidi na pyasiliva, pontho na nguwo mbazipereka kuna Rebeka. Iye adapereka pontho mitukwa yakudula kuna nkhoswe yache na kuna mache.

54Tenepo iye pabodzi na anthu onsene akhali na iye penepo adadya na kumwa kwene mbagona konthoko. Mangwana mwache na machibese pidalamuka iwo iye adalonga mbati, “Nditawiriseni kuti ndibwerere kuna mbuyanga.”

55Mbwenye nkhoswe yache na mache Rebeka adalonga mbati, “Mulekeni mtsikanayi kuti tikhale naye kuno dimingu ibodzi penu nsiku khumi. Angamala penepo anakwanisa kwenda pyache.”

56Mbwenye nyabasa ule adalonga mbati, “Lekani kutikhazika. MBUYA achitisa ulendo wathu kukhala wakukwanisika; ndilekeni ndibwerere kuna mbuyanga.”

57Iwo adatawira mbati, “Tendeni timchemere mtsikanayo kuti tive chinafuna iye kulonga.” 58Natenepo iwo adamchemera Rebeka mbamvunza mbati, “Ayi unafuna pyakwenda pabodzi na munthuyi?”

Iye adatawira mbati, “Ande.”

59Natenepo adamuleka Rebeka pabodzi na bitchu wamkazi ule akhali makayayache kwenda pabodzi na nyabasa wa Abrahamu, pontho na amuna akhali na iye ale. 60Tenepo iwo adalonga mafalawo akutsanzayisa nawo Rebeka mbati,

“Nyamaingathu, Mulungu akuchitise kukhala mama wa anthu pikwi-pikwi!

Pidzukulu pyako mbapikunde mizinda ya anyamalwawo.”

61Tenepo Rebeka na anyabasache achikazi adasasanyika mbapakira ngamila; natenepo onsene adatoma ulendo wawo.

62Isake akhadadza m'thando yatchetcha ya#24.62 m'thando yatchetcha ya: Pyakuthumbusula pinango pyakale pyalonga penepi; m'Chiheberi nkhabemo mafala enewa. “Mchera wa Nyamoyo, Ambandiona ule.” Tenepo iye akhakhala m'thando yatchetcha ya Negebu. 63Mawulo anango iye adenda kumunda kuthamula miyendo, tenepo pidakwiza iye maso ache, adaona ngamila zikudza chifupi na iye. 64Rebekambo pidaona iye Isake adatchitha pa ngamila pache pale 65mbavunza nyabasa wa Abrahamu ule mbati, “Mamuna ali m'munda kudza kuna ifeyi mbani?”

Nyabasa wa Abrahamu adatawira mbati, “Weneyu ndi mbuyanga.” Natenepo mtsikana ule adakwata chakumpsampsikira mbampsampsika nacho nkhope yache.

66Natenepo nyabasa ule adampanga Isake pyonsene pikhadachita iye. 67Kubuluka penepo Isake adamkwata mtsikana ule mbapita naye m'khumbi mukhakhala Sara, mache Isake ule, tenepo mtsikanayo adasanduka mkazache. Isake adamfuna pyakwanga Rebeka, natenepo iye adatsanzayiswa, podi kwene kuti mache akhadafa.

Currently Selected:

Kutoma 24: SenaMw

Highlight

Copy