Kutoma 25

Pidzukulu pinango pya Abrahamu

(1Mbi. 1.32, 33)

1Abrahamu adasemba mkazi unango dzinache Ketura. 2Iye adambalira Zimirani, Yokishani, Medani, Midiani, Ishibaki na Shua. 3Yokishani adabala Sheba na Dedani, pontho pidzukulu pya Dedani pikhali Aashuri, Aletushi na Aleumi. 4Ana achimuna a Midiani akhali Efa, Eferi, Hanoki, Abida na Elida. Onsenewa akhali pidzukulu pya Ketura.

5Abrahamu adasiyira Isake pyonsene pikhali na iye. 6Mbwenye pikhali iye na moyo adapereka mitukwa kuna ana achimuna akhadabala iye na akazi anango ale. Kubuluka penepo adaagwinya ana enewa kuti akakhale kudziko yakumabulukiro dzuwa kutali na Isake mwanache.

Kufa na kuikhwa m'masiye kwa Abrahamu

7-8Abrahamu adakulupala pyakwanga mbafa ana pyaka dzana na makumanomwe na pishanu. 9Anache, Isake na Ishimaele, adamuikha m'nkhwimba ya Makipela m'munda wa Eferoni mwana Zohari, Mhiti, ule akhali kumabulukiro dzuwa kwa Mamure. 10Wenewo ukhali munda ule udagula Abrahamu kubulukira kuna Ahiti; onsene Abrahamu na mkazache ene Sara adaikhwa penepo. #Kut. 23.3-16. 11Pidafa Abrahamu, Mulungu adatsanzayisa Isake, ule akhakhala chifupi na “Mchera wa Nyamoyo, Ambandiona ule.”

Pidzukulu pya Ishimaele

(1Mbi. 1.28-31)

12Ishimaele, mwana Hagara munthu wa ku Iguputo, ule akhali bitchu wachikazi wa Sara, adabalira Abrahamu mwana ule 13akhalimbo na ana. Anawo mbawa kwache aikhwa panyandandanda kutomera wautombo mpakana chimalisira bele: Nebaioti, Kedara, Adibeele, Mibisamu, 14Mishima, Duma, Masa, 15Hadadi, Tema, Yeturi, Nafishi na Kedema. 16Iwo akhali makolo a madzinza khumi na awiri, natenepo midzi na misasa ikhakhala iwo idachemerwa na madzinawo. 17Ishimaele akhali pyaka dzana na makumatatu na pinomwe pikhafa iye. 18Pidzukulu pya Ishimaele pidakhala pambuto ya pakati pa Havila na Shuri kumabulukiro dzuwa a Iguputo kunjira yakwendera kudziko ya Asiria. Iwo adakhala mbuto zakusiyana na pidzukulu pinango pya Abrahamu.

Kubalwa kwa Esau na Yakobo

19Ishi ndi mbiri ya Isake mwana Abrahamu. 20Isake akhali pyaka makumanayi pyakubalwa pidasemba iye Rebeka mwana wamkazi wa Betuele (Muaramu wakubulukira ku Mesopotamia), pontho nyamaingache Labani. 21Na thangwi yakuti Rebeka akhali wakusowa ana. Isake adampempherera kuna MBUYA. MBUYA adava kupempha kwache, natenepo Rebeka adakwata mimba. 22Iye akhadikhira kuti anabala mapasa. Anawo mbadzati balwa adatoma kuthimbana okhokha m'mimba mwache mwakuti Rebekayo adalonga mbati, “Thangwi yache ninji pinthu ninga penepi pikundichitikira?” Natenepo iye adenda kavunza nzeru kuna MBUYA kuti adziwe pikhamchitikirapyo.

23MBUYA adamtawira mbati,

“Madzinza mawiri ali m'mimba mwakomo.

Unabala magulu mawiri a anthu ale anati agawikane.

Unango anakhala wamphamvu pyakwanga kupiringana mwanzacheyo.

Mkulu anatumikira mwana.” #Arom. 9.12.

24Nsiku zache zakubala zidakwana, tenepo adabala ana achimuna amapasa awiri. 25Wautombo akhali wakufirira, pontho khandache ikhali ninga nguwo yakusasanywa na ubweya, natenepo iye adathulwa Esau.#25.25 Esau: Dzina yeneyi imbanyerezerwa kuti ikulonga pya Seiri, dziko ile m'nduli mwache idakwatwa na pidzukulu pya Esau; Seiri ikuveka ninga ya Chiheberi kulonga kuti, “Ujoya.” 26Wachiwiri kubalwayi adabalwa uku dzanjache yaphata chitende cha Esau, natenepo mwanayo adathulwa Yakobo.#25.26 Yakobo: Dzina yeneyi ikuveka ninga ya Chiheberi kulonga kuti, “Chitende,” penu “Nyakunyengeza.” Pikhabalwa ana enewa Isake akhali pyaka makumatanthatu pyakubalwa.

Esau agulisa chidzo cha ukulu wache

27Aphale ale adakula, natenepo Esau adasanduka nyaluso pakukhulisa, munthu wakukhala na moyo wakufuna kukhala m'tsanga. Mbwenye Yakobo akhali munthu wakumatama, pontho wakukhala pamsuwo. 28Isake akhamfuna Esau, thangwi akhakomerwa na kudya nyama zikhakhulisa Esau zile, mbwenye Rebeka akhamfuna Yakobo.

29Nsiku inango pikhaphika Yakobo nyimo zache, Esau adapita m'nyumba kubulukira kakhulisa. Iye akhadaphatiswa na njala 30mbalonga kuna Yakobo mbati, “Ine ndaphatiswa na njala, ngandipasembo pang'ono chakufiracho.” (Yeneyi ndi thangwi yache iye adathulwa Edomu.)#25.30 Edomu: Dzina yeneyi ikuveka ninga ya Chiheberi kulonga kuti, “Kufira.”

31Yakobo adatawira mbati, “Ndinati ndikupase male ungandigulisa chidzo cha ukulu wako.”

32Esau adatawira mbati, “Ande, ndatawira! Podi ine ndikufuna kufa na njala; apo chidzo cha ukulumbo chinandiphedzanji?”

33Yakobo adatawira mbati, “Dumbira kuti unandigulisadi chidzo cha ukulu wako.”

Esau adadumbira mbagulisa chidzo cha ukulu wache kuna Yakobo. #Aheb. 12.16. 34Tenepo Yakobo adapereka kuna Esau mkate na pimsuzi pya nyimo zile. Iye adadya mbaenda pyache. Na njira yeneyi Esau adalulupisa chidzo cha ukulu wache.

Currently Selected:

Kutoma 25: SenaMw

Highlight

Copy