Kutoma 35

Yakobo abwerera ku Betele

1Mulungu adalonga kuna Yakobo mbati, “Ndokoletu ku Betele mbukakhazikike kweneko. Pontho ukandimangireko guwa yansembe, ule ndidakuonekera pikhathawa iwe pamaso pa mbaleako Esau.” #Kut. 28.11-17.

2Natenepo Yakobo adalonga kuna banjache yonsene na kuna akhali na iye ale mbati, “Bulusani milungu yachilendo ina imweyi, pontho mupichenese mwekha ene mbamuvale nguwo zakuchena. 3Kubuluka penepo tendeni ku Betele, kule kunafuna ine kamangira Mulungu guwa yansembe; Mulungu ule adava kupempha kwanga pansiku ya nyatwa zanga, pontho ule ambakhala na ine konsene kunaenda ine.” 4Natenepo iwo adapereka milungu yachilendo ikhali na iwo, pontho mphete zikhavala iwo m'makutu mwawo kuna Yakobo. Tenepo iye adapikwata mbapifikhira pansi pa muti wamthundu chifupi na Shekemu.

5Pikhatoma iye na anache ulendo wawo, anthu akhakhala muluwani ya chifupi na iwo ale adaphatwa na mantha pyakwanga mwakuti iwo hadaathamangiseve tayu. 6Yakobo pabodzi na anthu ache onsene adadza kuluwani ya Luzi, kule chinchino kumbadziwika na dzina yakuti Betele, m'dziko ya Kanani. 7Kweneko adamanga guwa yansembe, tenepo mbutoyo adaithula Eli Betele, thangwi mphenepo padamuonekera Mulungu pikhathawa iye pamaso pa mbaleache Esau. 8Debora, makayayache Rebeka, adafa mbamuikha pansi pa muti wamthundu kumwera kwa Betele. Natenepo mutiwo udathulwa “Mthundu wa chiliro.”

9Pidabwerera Yakobo kubulukira ku Mesopotamia, Mulungu adamuonekera pontho mbamtsanzayisa. 10Mulungu adalonga mbati, “Dzinako ndi Yakobo, mbwenye kutomera lero kwenda m'tsogolo dzinako inakhala Israele.” Natenepo Mulungu adamthula Israele. #Kut. 32.28. 11Tenepo Mulungu adalonga kuna iye mbati, “Ine ndine Mulungu Wamphamvu zonsene. Khala na ana azinji. Madzinza anabulukira muna iwepo, pontho mafumu anabulukira muna iwepo. #Kut. 17.4-8. 12Ine ndinati ndikupase dziko idapasa ine Abrahamu na Isake, pontho ndinaipasa pidzukulu pyako iwe ungafa.” 13Tenepo Mulungu adenda mbasiya Yakobo ponthopo. 14Yakobo adaimisa mwala wa chikumbuso pambuto pakhadalonga iye na Mulungu pale, pontho kuichitisa kukhala yakupambulika pakukhuthulirapo vinyu na mafuta aolivi. #Kut. 28.18, 19. 15Mbutoyo adaithula Betele.

Kufa kwa Rakele

16Yakobo na banjache adabuluka ku Betele. Pikhadasala iwo na kansinzo kuti afike ku Efurata, ndzidzi wache Rakele wakuti abale mwana ukhadamkwanira. Tenepo iye adanenseka pyakwanga pikhabuluka mwanayo. 17Pidandendeya mtswotswowo, nyakumbazika adalonga kuna iye mbati, “Rakele, leka swipa mtima, ndi mwana wamamuna pontho.” 18Pikhathatha iye na imfa, mwanacheyo adamthula Benoni.#35.18 Benoni: Dzina yeneyi m'Chiheberi nkhulonga kuti “mwana wamamuna wa kutsukwala kwanga.” Mbwenye babache mwanayo adamthula Benjemani.#35.18 Benjemani: Dzina yeneyi m'Chiheberi nkhulonga kuti “mwana wamamuna anafuna kukhala na mphamvu ule.”

19Pidafa Rakele adaikhwa m'khundu mwa njira yakwendera ku Efurata, kule chinchino kumbadziwika na dzina yakuti Betelehemu. 20Yakobo adaimisa mwala wa chikumbuso panthumbipo. Na lero mwalawo uli penepo kuonesa nthumbi ya Rakele. 21Yakobo adafedza patsogolo kukhundu inango ya nsanja ya Ederi.

Ana a Yakobo

(1Mbi. 2.1, 2)

22Pikhakhala Israele m'dziko mule, Rubeni adapita m'bonde na Biliha, mkazi wachibitchu wa babache. Yakobo adava penepi mbazhangali napyo.#35.22 mbazhangali napyo: Chakuthumbusula chinango chibodzi chakale chalonga penepi; m'Chiheberi nkhabe mafala enewa.

Yakobo akhali na ana khumi na awiri. #Kut. 49.4. 23Ana a Lea mbawa: Rubeni (mwana wautombo wa Yakobo), Simioni, Levi, Yuda, Isakara na Zebuloni. 24Ana a Rakele mbawa: Yosefe na Benjemani. 25Ana a Biliha, bitchu wamkazi wa Rakele, mbawa: Dani na Nafitali. 26Ana a Zilipa, bitchu wamkazi wa Lea, mbawa: Gadi na Asheri. Ana enewa adabalwa mu Mesopotamia.

Kufa kwa Isake

27Yakobo adenda kuna Isake babache pa Mamure, penu Kiriati-Ariba, ule pontho ndi Hebroni, kule kukhakhala Abrahamu pabodzi pene na Isake. #Kut. 13.18. 28-29Isake adafa uku ana pyaka dzana na makumasere, pontho akhadakulupala mwadidi. Tenepo anache Esau na Yakobo adenda kamuikha m'masiye babawo.

Currently Selected:

Kutoma 35: SenaMw

Highlight

Copy