Kutoma 49

Yakobo atsanzayisa anache

1Yakobo adachemeresa anache onsene achimuna mbalonga mbati, “Gumanyikanani mwakundizungulira, towera ndikupangeni pinafuna kukuchitikirani m'tsogolo muno:

2“Dzani pabodzi monsenene, ana a Yakobo.

Veserani kuna babanu Israele.

3“Rubeni, mwananga wautombo, ndiwe mphamvu zanga.

Mwana wautombo wa uphaleanga.

Mwana wakudungudzisa, pontho wamphamvu pyakwanga

kupiringana ananga onsene.

4Iwe wakhala ninga madzi akupeluka,

mbwenye hunakhala munthu wakufunika pyakwanga tayu,

thangwi udagona na mkazanga wachibitchu

mbululupisa talimba ya babako.

5“Simioni na Levi ngubaleawo.

Iwo ambaphatisa basa pida pyawo kuchita pyakuzunguzika.

6Ine nkhabe phatizana nawo tayu m'mafalawo a chibiso-biso,

penu kukwata khundu pa misonkhano yawo tayu.

Thangwi iwo adapha amuna mwakuzhangali,

iwo adalamaza ng'ombe zimuna towera asenzeke nazo.

7Dzedze kuna kuzhangali kwawo,

thangwi kukhali kwakugoswa pyakwanga,

pontho na ukali wawo,

thangwi ukhali kwakukala mtima.

Ine ndinaabalalisa pakati pa ana a Yakobo,

mbandiamwaza-mwaza m'dziko yonsene ya Israele.

8“Yuda, abale ako anakukuza pikulu.

Dzanjako inakhwipa m'khosi mwa anyamalwako.

Ana a ababako anakulambira.

9Yuda, iwe wakhala ninga mwana nkhalamu.

Iwe wabwerera pyamala iwe kudya nyama idapha iwe,

ambanjunja mbathathamula ninga nkhalamu.

Pontho ninga nkhalamu ikazi,

mbani anakwanisa kumzunguza?#Kal. 24.9; Chid. 5.5.

10Mthondodzo wachifumu nkhabe buluka pana Yuda tayu,

penu utongi pamanyalo ache,

mpakana kubwera kwa mwenechiroache.

Pontho madzinza anati amvere.

11Iye adamangira bulu wache pamfesa,

mwana bulu wache pamfesa wadidiletu.

Iye ambafula mayalache na vinyu;

chakufinika chache na vinyu wakufira ninga chiropa.

12Maso ache anafira na vinyu,

mano ache anachena na mkaka.#49.12 Maso ache…mkaka: penu Maso ache ngakufira mwakuswipirira kupiringana vinyu; mano ache ngakuchena ninga mkaka.

13“Zebuloni anakhala m'gombe-gombe mwa bara;

iye anakhala gombe ya kutchama miyadiya mikulu-mikulu.

Madire a nthembache anafika mpakana ku Sidoni.

14“Isakara ndi bulu wamphamvu

wakugona pakati pa mathanga.

15Pidaona iye kuti mbuto yakupumirapo ikhali yadidi,

pontho kuti dziko ikhali yakukoma m'maso,

iye adakotamisa phewache kuti athukule mtolo,

tenepo iye adakhakhamizwa kuphata basa ninga bitchu.

16“Dani anatonga anthu ache.

Iwo anakhala ninga madzinza anango a Israele.

17Dani anakhala nyoka m'khundu mwa njira;

nyoka yaukali m'khundu-khundu mwa njira,

ile imbaluma pitende pya kavalo,

towera nyakumpakira agwe na madede.

18“Ndikudikhira chipulumuso chanu, MBUYA.

19“Gadi anasoswa na mapanga,

mbwenye iye anazungunukira mbaathamangisa.

20“Asheri, pyakudya pyache pinakhala pya mafuta,

pontho anapereka pyakudya pyakuthemera mfumu.

21“Nafitali ndi nyasa wakuthamanga mwakusudzuka,

nyakubala anache akubalika.#49.21 Nafitali…akubalika: penu Nafitali ndi muti wakuvata, ule umbaphwitha matsamvu adidi.

22“Yosefe akhala ninga mtawi wamfesa,

wakumera chifupi na mphuno ya madzi,

ule nthambi zache zimbatanthawira m'mafufu.#49.22 Yosefe…m'mafufu: penu Yosefe akhala ninga bulu wam'tsanga chifupi na mphuno ya madzi, bulu wam'tsanga m'khundu-khundu mwa phiri.

23Anyamalwache adamsosa mwakugoswa na mauta

mbamponyera matswimo mwavinga.

24Mbwenye utache ukhali wamphamvu,

pontho manjache akhadawangisa pikulu,#49.24 Mbwenye…pikulu: penu Mbwenye mautawo adatchoka mbatchonkheka, nyama za mikono yawo zidanyedzeka.

na mphamvu za Mulungu, Nyamphamvu wa Yakobo ule,

na Makabuswa, Phanzwi ya Israele.

25Ndi Mulungu wa babako anafuna kukuphedza.

Ndi Mulungu Wamphamvu zonsene anafuna kukutsanzayisa

na mtsanzayiso wa mvula kubulukira kudzulu,

mtsanzayiso wa madzi akuzwika akubulukira pansi,

mtsanzayiso wa pifuyo pizinji na ana azinji,

26mtsanzayiso wa mapira na maluwa,#49.26 mapira na maluwa: m'Chiheberi muna ababanu ngamphamvu pyakwanga kupiringana.

mtsanzayiso wa mapiri akale,

pontho pinthu pyakukoma m'maso

kubulukira kumapiri akukhala na kukhala.#49.26 kumapiri akukhala na kukhala: Chakuthumbusula chinango chibodzi chakale chalonga penepi; m'Chiheberi muna makolo anga kuna.

Pyonsenepi mbapigwere pana Yosefe,

ule adapambulwa pakati pa abale ache.

27“Benjemani akhala ninga mbinzi wakugoswa.

Na machibese ambadya nyamache,

na mawulo ambagawa pyaphata iye mwaupandu.”

28Enewa ndiye madzinza khumi na awiri a Israele. Pontho penepi ndiye pidalonga babawo, pikhaatsanzayisa iye kugonekana na anache onsene kada munthu.

Kufa na kuikhwa m'masiye kwa Yakobo

29Tenepo Yakobo adalonga kuna anache mbati, “Chinchino ndinafa, tenepo mukandiikhe kumbuto idaikhwa makolo anga, m'dzimba ile ili m'munda mwa Eferoni wa Chihiti, 30ku Makipela, kumabulukiro dzuwa a Mamure, m'dziko ya Kanani. Abrahamu adagula nkhwimba na munda wenewu kubulukira kuna Eferoni, towera ikhale masiye.#Kut. 23.3-20. 31Kweneko ndiye kudaikhwa Abrahamu na mkazache, Sara; kweneko pontho ndiye kudaikhwa Isake na mkazache Rebeka; pontho kweneko ndiye kudaikha ine Lea.#Kut. 25.9, 10; 35.29. 32Munda na nkhwimba pili mwenemopyo pidagulwa kubulukira m'manja mwa Ahiti.” 33Pidamala Yakobo kupereka mwambo kuna anache, adagona pontho mbaferatu.#Mab. 7.15.

Currently Selected:

Kutoma 49: SenaMw

Highlight

Copy