Chiyambo 23

Nyifwa ndi kuŵikika kwaku Sara

1Sara wanguŵa wa virimika machumi pe chumi pachanya machumi ghaŵi ndi vinkhonde ndi viŵi (127); ivi vyenga virimika vya umoyo waku Sara. 2Ndipo Sara wangufwa pa Kiriatarba (yo ndi Hebroni) mu charu cha Kanani; ndipo Abrahamu wanguseremo kwachitenjere Sara ndi kumuliya. 3Ndipo Abrahamu wangutuwapo paurongo pa wakufwa wake, ndipo wanguti ku ŵaHiti, 4“Ine nde mlendo ndi muyinga mukati mwinu; ndipaskenipo malo mukati mwinu kuŵa malo gha masanu, kuti ndiŵikepo wakufwa wangu kutuzgako ku maso kwangu.” 5ŴaHiti ŵangumwamuka Abrahamu, 6“Titegherezge, mbuya widu, iwe we chilimbi cha nthazi mukati mwidu. Ŵika wakufwa wako mwakusankhika ukongwa mwa miunda yidu; palivi yumoza waku ifwe wakanizgenge iwe muunda wake, pamwenga kukukanizga kuŵika wakufwa wako.” 7Abrahamu wangusoka ndi wangukotama ku ŵaHiti, ŵanthu ŵa charu cho. 8Ndipo wanguti kwaku wo, “Asani mwe ŵakukhumba kuti ine ndiŵike wakufwa wangu kutuwako ku maso ghangu, mundivwe, ndipo ndipemphiyeni kwaku Efroni mwana munthurumi waku Zohara, 9kuti wandipaske mphanji yaku Makipela, yeniyo njake; yepa umari wa munda wake. Wandiguliske pa mtengo wakwenere paurongo pinu, kuŵa chihara changu chakuŵikamo ŵakufwa.” 10Sono Efroni wanguja mukati mu ŵaHiti; ndipo Efroni muHiti wangwamuka Abrahamu, ŵachivwa ŵaHiti, ŵeniwo wose ŵanguruta ndi kusere pa likomo la msumba wo, 11“Awa, mbuya wangu, undivwe; nditukupaska munda wo, ndipo nditukupaska mphanji yo ye mwenimo; pa maso pa ŵana ŵanthurumi ŵa mtundu wangu nditukupaska wo; ŵika wakufwa wako.” 12Sono Abrahamu wangukotama pasi paurongo pa ŵanthu ŵa charu chiya. 13Ndipo wanguti kwaku Efroni ŵachitegherezga ŵanthu ŵa charu chiya, “Kweni asani ukhumba, undivwe; ndikapaskanga mtengo wa munda; uwuronde kwangu, alinga ndiŵikemo wakufwa wangu mwenimuwa.” 14Efroni wangwamuka Abrahamu, 15“Mbuyangu unditegherezge. Kachigaŵa ka charu kakwenere mtengo wa ndrama za siliva machumi pe chumi ghanayi (400), nkhane izi pakati pako ndi ine? Wika wakufwa wako.” 16Abrahamu wanguzomerezgana ndi Efroni; ndipo Abrahamu wangumupimiya Efroni siliva mweniyo wanguzumbuwa mu makutu gha ŵaHiti, ndrama za siliva machumi pe chumi ghanayi (400) kwakulingana ndi myeso ya nyengo yo mu ŵamalonda. 17Viyo munda waku Efroni mu Makipela wo wenga ku vuma kwa Mamre, munda ndi mphanji yo yenga mwenimo ndi miti yose yo yenga mu munda wo, kosekose mu chigaŵa chose, 18unguza kwaku Abrahamu kuŵa chihara pa maso gha ŵaHiti, paurongo paku wose ŵeniwo ŵangusere pa likomo la msumba wake. 19Pavuli paku ivi, Abrahamu wanguŵika Sara muwoli wake mu mphanji ya munda wo wa Makipela, ku vuma kwa Mamre (yo ndi Hebroni) mu charu cha Kanani. 20Munda ndi mphanji yo ye mukati mwake vingupaskika kwaku Abrahamu nge nchihara cha masanu ndi ŵaHiti.

Currently Selected:

Chiyambo 23: TongaMw

Highlight

Copy