Malaki 1
1
Chanju chaku Chiuta pa ŵaYisraele
1Mazu gha Ambuya ghakuziŵiska ŵaYisraele ndi Malaki.
2Ambuya atiti, “Ndamwanjani.” Kweni imwe mutiti, “Mwatanja uli?” Ambuya atiti, “Kuti Esau ndi mbali waku Yakobe cha? Ndipuuli ndanja Yakobe, 3kweni ndatinkha Esau; ndapasuwa charu chake cha mapiri, ndikusiya chihara chake kuŵa cha ŵakambwe ŵamu mapopa.” 4Asani Edomu watiti, “Tapasuka, kweni tizengenge so vyakupasuka,” Ambuya ŵa maŵanja atiti, “Wazengenge kweni ine ndipasuliyenge pasi, mpaka wadanike mtundu uheni, ŵanthu wo Ambuya akwiya nawo muyaya.” 5Maso ghinu ghakawonanga ichi, ndipo mukakambanga kuti, “Ambuya mbakuru kujumpha mphaka za ŵaYisraele!”
Ŵazukuru ŵasuskika
6“Mwana watumbika wiske, ndipo wanchitu watumbika mbuyake, viyo asani ine nde wiske, chepani chitumbiku chanu? Ndipo asani ndine mbuya wa nchitu, kopeka kwangu kwepani? atiti Ambuya ŵa maŵanja kwaku imwe, mwa ŵazukuru, imwe muyuyuwa zina langu. Mutiti, ‘Tiliyuyuwa uli zina linu?’ 7Pakupereka chiŵande chakukazuzgika pa jochero langu. Mutiti, ‘Tilikazuzga uli?’ Pakughanaghana kuti gome la Ambuya liyuyulike. 8Po mupaska sembe za vyakuŵeta vyachiburumutiya, kuti wo mbuheni cha? Ndipo po mupaska vyakupunduka pamwenga vyakutama, kuti wo mbuheni cha? Perekani chaviyo ku mweruzgi winu mura, kumbi wakakondwanga namwe pamwenga kumuchitiyani ulemu? atiti Ambuya ŵa maŵanja.
9“Ndipo sono ŵeyeriyani ulemu waku Chiuta mwakuti waŵe nafwe ndi lisungu. Kumbi walongonge lisungu kwaku we yose waku imwe yo wapereka cha wanangwa chaviyo? Atiti Ambuya ŵa maŵanja. 10Ndikhumba kuti wangaŵapo yumoza waku imwe wakuti wajale makhomo kuti ŵareke kupemba moto waŵaka pa jochero langu! Ndilivi likondwa mwaku imwe, atiti Ambuya ŵa maŵanja; ndipo kuti nkharondiyanga cha mpasku wakutuwa mu janja linu. 11Chifukwa kutuwa ku maturi ghadazi mpaka ku maselero ghake, zina langu ndikuru mukati mu mitundu, ndipo mu malo ghose vipaskika kwaku ine vyakununkhira ndi mipasku yakutowa, chifukwa zina langu ndikuru mukati mu mitundu, atiti Ambuya ŵa maŵanja. 12Kweni imwe mulipepuwa pakukamba kuti gome la Ambuya ndakufipa ndipo kurgha kwa paku lo kutenere kuyeyeka. 13Mutiti, ‘Uku nkhuvukiska kwa mtundu uli?’ Ndipo mutindinyoza, atiti Ambuya ŵa maŵanja. Mutuza ndicho nchakunangika, pamwenga chakupunduka, pamwenga chakutama, ndipo ichi mutuza nacho nge ndi mpasku winu! Kumbi ndingaronde ichi kutuwa mu janja linu? atiti Ambuya.
14“Watembeke wakupusika yo we ndi yinthurumi mu mskambu wake ndipo wapangana kuyipereka, kweni wabayiya sembe Ambuya yo ye ndi kalema; chifukwa nde karonga mukuru, ndipo nditopeka mukati mu mitundu, atiti Ambuya ŵa maŵanja.
Currently Selected:
Malaki 1: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi